Kama Mkikaa

Ninyi mkikaa ndani yangu, na maneno yangu yakikaa ndani yenu, ombeni mtakalo lote, nanyi mtatendewa—Yohana 15:7

Sababu inayofanya Mzabibu na matawi yake kuwa mfano wa kweli hivyo wa maisha ya Kikristo ni kwamba maumbile yote yana chanzo kimoja na hupumua roho moja. Ulimwengu wa mimea uliumbwa uwe kwa mwanadamu somo la mfano linalomfundisha kumtegemea Mungu kabisa, na usalama wake katika kutegemea huko. Yeye avikaye maua ya nyika atatuvika sisi zaidi sana. Yeye awapaye miti na mizabibu uzuri wao na matunda yao, akifanya kila kimoja kuwa alichokusudia kiwe, kwa hakika zaidi atatufanya sisi kuwa vile angependa tuwe. Tofauti pekee ni kwamba lile Mungu alitendalo ndani ya miti hulitenda kwa nguvu ambayo miti haitambui. Yeye ataka kufanya kazi ndani yetu kwa idhini yetu. Huu ndio utukufu wa mwanadamu, kwamba ana nia iwezayo kushirikiana na Mungu katika kuelewa na kukubali na kupokea lile aliokusudia kufanya.

Kama mkikaa—Hapa ndipo tofauti kati ya tawi la Mzabibu wa asili na tawi la Mzabibu wa kiroho. La kwanza hukaa kwa nguvu za asili; la pili hukaa, si kwa nguvu za nia, bali kwa nguvu ya kimungu itolewayo kwa idhini ya nia. Ndivyo yalivyo maandalizi ya ajabu Mungu aliyoyafanya, kwamba lile ambalo nguvu za asili hufanya upande mmoja, nguvu ya neema itafanya upande mwingine. Tawi laweza kukaa ndani ya Mzabibu.

Kama mkikaa ndani yangu... ombeni mtakalo lote—Kama tutaishi maisha ya kweli ya maombi, yenye alama ya upendo na nguvu na uzoefu wa maombi, hapana budi kutokuwe na shaka juu ya kukaa huko. Nasi tukikaa, hapana haja ya shaka juu ya uhuru wa kuomba tutakalo, na hakika ya kutendewa. Kuna sharti moja: “Kama mkikaa ndani yangu.” Hapana budi kutokuwe na kusitasita juu ya uwezekano wake wala hakika yake. Hapana budi tuutazame ule utawi mdogo na uwezo wake wa ajabu wa kuzaa tunda zuri hivyo, hata kweli tujifunze kukaa.

Na siri yake ni nini? Uwe umeshughulishwa kabisa na Yesu. Zamisha mizizi ya nafsi yako katika imani na upendo na utii ndani zaidi yake. Ondoka katika kila mahali pengine ili ukae hapa. Toa kila kitu kwa ajili ya pendeleo lisiloweza kufikirika la kuwa tawi duniani la Mwana wa Mungu aliyetukuzwa mbinguni. Kristo na awe wa kwanza. Kristo na awe yote. Usishughulike na kukaa—shughulika na Kristo! Yeye atakushika, atakuweka ukikaa ndani yake. Yeye atakaa ndani yako.

Kama mkikaa ndani yangu, na maneno yangu yakikaa ndani yenu—Hili alitoa kuwa sawa na usemi ule mwingine: “Mimi ndani yenu.” “Maneno yangu yakikaa ndani yenu”—yaani, si katika kutafakari tu, katika kumbukumbu, katika upendo, katika imani—maneno haya yote yaingie katika nia yako, katika nafsi yako, na yaunde maisha yako—kama yakigeuza tabia yako kuwa sura yao wenyewe, nawe ukawa na ndivyo yasemavyo na kumaanisha—ombeni mtakalo; nanyi mtatendewa. Maneno yako kwa Mungu katika maombi yatakuwa tunda la Kristo na maneno yake yakiishi ndani yako.

Ombeni mtakalo, nanyi mtatendewa—Amini kweli ya ahadi hii. Jiweke kuwa mwombezi kwa ajili ya watu; mwombezi azaaye tunda, ukiiomba baraka zaidi ishuke daima. Imani na maombi kama hayo yatakusaidia kwa ajabu kukaa kikamilifu na bila kukoma.

Kama mkikaa. Naam, Bwana, uwezo wa kuomba na uwezo wa kushinda hauna budi kutegemea kukaa huku ndani yako. Kama ulivyo Mzabibu, ndivyo ulivyo Mwombezi wa kimungu, upumuaye roho yako ndani yetu. Ee, tupe neema ya kukaa kwa unyofu na kikamilifu ndani yako, na kuomba mambo makubwa!