Lo Lote Mtakalo

Ninyi mkikaa ndani yangu, na maneno yangu yakikaa ndani yenu, ombeni mtakalo lote, nanyi mtatendewa—Yohana 15:7

Mahali pote pa tawi ndani ya mzabibu ni pa maombi yasiyokoma. Pasipo kukatika kamwe hulia daima: “Ee mzabibu wangu, tuma utomvu niuhitajio ili nizae tunda lako.” Na maombi yake hayakosi kujibiwa kamwe: huomba kile kihitajicho, kile kitakacho, nako hutendeka.

Maisha yenye afya ya muumini ndani ya Kristo vivyo hivyo ni maisha ya maombi yasiyokoma. Akijua au asijue, huishi katika kutegemea daima. Neno la Bwana wake, “Hamwezi kufanya neno lo lote,” limemfundisha ya kwamba kuomba kwake na kupokea kwake hakuna budi kuwe bila kukatika, kama vile kudumu kwa tawi ndani ya mzabibu kusivyokatika. Ahadi ya andiko letu yatupa ujasiri usio na mpaka: “Ombeni mtakalo lote, nanyi mtatendewa.”

Ahadi hii yatolewa katika uhusiano wa moja kwa moja na kuzaa tunda. Ikifunge kwako mwenyewe na mahitaji yako mwenyewe, nawe utaiondolea nguvu zake; utajiondolea mwenyewe uwezo wa kuipokea. Kristo alikuwa akiwatuma wanafunzi hawa, nao walikuwa tayari kuutoa uhai wao kwa ajili ya ulimwengu; kwao aliwakabidhi hazina za Mbinguni. Maombi yao yangeleta Roho na nguvu waliyoihitaji kwa kazi yao.

Ahadi hii yatolewa katika uhusiano wa moja kwa moja na kuja kwa Roho. Roho hatajwi katika mfano huu, kama vile utomvu wa mzabibu usivyotajwa. Lakini wote wawili wamekusudiwa katika yote. Katika sura itanguliayo mfano huu, Bwana wetu alikuwa amenena juu ya Roho Mtakatifu, kwa habari ya maisha yao ya ndani, akiwa ndani yao, na kujidhihirisha ndani yao (14:15-23). Katika sura ifuatayo anena juu ya Roho Mtakatifu kwa habari ya kazi yao, akiwajia, akiuhukumu ulimwengu, na kumtukuza Yeye (16:7-14). Ili tujipatie ahadi hizi za maombi zisizo na mpaka, ni lazima tuwe watu waliojazwa Roho, na kujitoa kabisa kwa kazi na utukufu wa Yesu. Roho atatuongoza kuingia katika kweli ya maana yake na uhakika wa kutimizwa kwake.

Na tutambue ya kwamba twaweza kuutimiza wito wetu wa kuzaa matunda mengi kwa kuomba sana peke yake. Ndani ya Kristo zimefichwa hazina zote ambazo watu walio karibu nasi wazihitaji; ndani Yake watoto wote wa Mungu wamebarikiwa kwa baraka zote za kiroho; amejaa neema na kweli. Lakini yahitaji maombi, maombi mengi, maombi ya nguvu ya kuamini, ili kuzishusha baraka hizi chini. Na tukumbuke vile vile ya kwamba hatuwezi kujipatia ahadi hii pasipo maisha yaliyotolewa kwa ajili ya watu. Wengi hujaribu kuipokea ahadi, kisha wakatazama huku na huku waone waombe nini. Hii siyo njia; bali ni kinyume chake kabisa. Ufanye moyo ulemewe na uhitaji wa roho za watu, na amri ya kuziokoa, ndipo nguvu itakapokuja ya kudai ahadi.

Na tuidai kama mojawapo ya mafunuo ya maisha yetu ya ajabu ndani ya Mzabibu: Yeye atwambia ya kwamba tukiomba kwa jina lake, kwa uweza wa muungano wetu Naye, lo lote liwalo, tutatendewa. Roho zaangamia kwa sababu maombi ni machache mno. Watoto wa Mungu ni dhaifu kwa sababu maombi ni machache mno. Twazaa tunda kidogo mno kwa sababu maombi ni machache mno. Imani ya ahadi hii ingetufanya kuwa hodari wa kuomba; tusipumzike hata iingie moyoni mwetu hasa, na kutuvuta kwa nguvu za Kristo kuendelea na kujitaabisha na kushindana katika maombi hata baraka ije kwa nguvu. Kuwa tawi kwamaanisha si kuzaa tunda duniani tu, bali pia nguvu katika maombi ya kushusha baraka kutoka Mbinguni. Kukaa kwa kamili kwamaanisha kuomba sana.

Ombeni mtakalo lote. Ee Bwana wangu, kwa nini mioyo yetu ina uwezo mdogo hivyo wa kuyapokea maneno haya katika unyenyekevu wake wa kimungu? Lo, nijalie kuona ya kwamba hatuhitaji kilicho pungufu ya ahadi hii ili kuzishinda nguvu za ulimwengu na Shetani! Utufundishe kuomba katika imani ya ahadi hii yako.