Matawi Yaliyonyauka

Mtu asipokaa ndani yangu, hutupwa nje kama tawi na kunyauka; watu huyakusanya na kuyatupa motoni yakateketea—Yohana 15:6

Mafunzo yanenwayo na maneno haya ni rahisi sana na mazito sana. Mtu aweza kufika katika uhusiano na Kristo namna hiyo, hata ajihesabu kuwa ndani Yake, na hata hivyo aweza kutupwa nje. Kuna jambo kama hilo la kutokukaa ndani ya Kristo, liongozalo kwenye kunyauka na kuteketea. Kuna jambo kama hilo la tawi lililonyauka, tawi ambalo ndani yake muungano wa kwanza na Kristo waonekana kama umetokea, na hata hivyo waonekana ya kwamba imani yake ilikuwa ya kitambo tu. Ni wito mzito ulioje wa kutazama pande zote tuone kama hamna matawi yaliyonyauka makanisani mwetu, na kutazama ndani tuone kama kweli tunakaa na kuzaa tunda!

Na sababu ya huku “kutokukaa” yaweza kuwa nini? Kwa wengine ni kwamba hawakupata kufahamu jinsi wito wa Kikristo uongozavyo kwenye utii mtakatifu na kwenye utumishi wa upendo. Waliridhika na wazo la kwamba wameamini, na kwamba wako salama na jehanamu; hapakuwa na kusudi wala nguvu ya kukaa ndani ya Kristo—hawakujua uhitaji wake. Kwa wengine ni kwamba masumbufu ya dunia, au ufanisi wake, yalilisonga Neno: hawakuwa wameacha vyote ili wamfuate Kristo. Kwa wengine tena ni kwamba dini yao na imani yao ilikuwa katika hekima ya wanadamu, wala si katika nguvu za Mungu. Walitumainia njia za neema, au unyofu wao wenyewe, au uthabiti wa imani yao katika neema ihesabiayo haki; hawakupata hata kutafuta kukaa kwa kamili ndani ya Kristo kuwa ndiyo usalama wao pekee. Si ajabu ya kwamba, upepo wa moto wa majaribu au wa udhia ulipovuma, walinyauka: hawakuwa wamewekwa mizizi kwa kweli ndani ya Kristo.

Na tuyafumbue macho yetu tuone kama hamna matawi yaliyonyauka pande zote zetu makanisani. Vijana, ambao ukiri wao ulikuwa mng’aavu wakati mmoja, lakini sasa wapoapoa. Au wazee, walioushika ukiri wao, lakini kadiri ya uzima uliokuwa waonekana ndani yao wakati mmoja imekwisha fifia. Wachungaji na waaminio na wayatie maneno ya Kristo mioyoni mwao, waone, na kumwuliza Bwana kama hakuna la kufanywa kwa ajili ya matawi yanayoanza kunyauka. Na neno hili Kaeni lilie katika Kanisa lote hata kila muumini alishike—hakuna usalama ila katika kukaa kwa kweli ndani ya Kristo.

Kila mmoja wetu na aelekee ndani. Je, maisha yetu ni mabichi, na ya kijani, na yenye nguvu, yakizaa tunda lake kwa majira yake? (Tazama Zaburi 1:3; 92:13, 14; Yeremia 17:7, 8.) Na tuupokee kila onyo kwa nia iliyo tayari, na lile la Kristo “mtu asipokaa” lilipe uharaka mpya lile Lake “kaeni ndani yangu.” Kwa nafsi iliyonyoka siri ya kukaa itazidi kuwa rahisi, ni kule kutambua tu mahali aliponiweka; ni kule kupumzika kama mtoto katika muungano wangu Naye, na uhakika wa kutumaini ya kwamba Yeye atanihifadhi. Lo, na tuamini ya kwamba yako maisha yasiyojua kunyauka, yaliyo mabichi daima; na yazaayo tunda kwa wingi!

Kunyauka! Ee Baba yangu, uniangalie, na kunihifadhi, wala usiache kitu cho chote kwa dakika moja kizuie ubichi utokao katika kukaa kwa kamili ndani ya Mzabibu. Wazo lenyewe la tawi lililonyauka na linijaze hofu takatifu na kukesha.