Hamwezi Kufanya Neno Lo Lote

Pasipo mimi ninyi hamwezi kufanya neno lo lote—Yohana 15:5

Katika kila jambo, maisha ya tawi yapasa kuwa kielelezo kamili cha maisha ya Mzabibu. Juu ya nafsi yake Yesu alikuwa amesema: “Mwana hawezi kutenda neno mwenyewe.” Kama tokeo la kutegemea huko kwa kamili, aliweza kuongeza: “Yote ayatendayo Baba, ndiyo ayatendayo Mwana vivyo hivyo.” Kama Mwana hakuupokea uzima wake kutoka kwa Baba mara moja kwa ajili ya siku zote, bali kila dakika. Maisha yake yalikuwa ni kumngoja Baba daima kwa ajili ya yote aliyokuwa afanye. Na hivyo Kristo asema juu ya wanafunzi wake: “Pasipo mimi ninyi hamwezi kufanya neno lo lote.” Amaanisha hivyo kwa halisi. Kwa kila mtu atakaye kuishi maisha ya kweli ya mwanafunzi, kuzaa tunda na kumtukuza Mungu, ujumbe huja: Hamwezi kufanya neno lo lote. Yale yaliyokuwa yamekwisha nenwa: “Akaaye ndani yangu, nami ndani yake, huyo huzaa sana,” hapa yathibitishwa kwa hoja iliyo rahisi na yenye nguvu kuliko zote: “Kukaa ndani yangu ni lazima kabisa, kwa maana, mwajua, wenyewe hamwezi kufanya neno lo lote la kudumisha wala kutenda maisha ya mbinguni.”

Kusadiki kwa kina juu ya ukweli wa neno hili kwako katika shina lenyewe la maisha ya kiroho yenye nguvu. Kama vile nisivyoweza kujiumba mwenyewe, na kama nisivyoweza kumfufua mtu katika wafu, ndivyo nisivyoweza kujipa mwenyewe uzima wa kimungu. Na kama nisivyoweza kujipa mwenyewe, ndivyo nisivyoweza kuudumisha wala kuuongeza: kila mwendo ni kazi ya Mungu kupitia Kristo na Roho wake. Ni kadiri mtu asadikivyo haya, ndivyo atakavyoshika ile hali ya kutegemea kwa kamili na daima, ambako ndiko asili yenyewe ya maisha ya imani. Kwa jicho la kiroho amwona Kristo kila dakika akiruzuku neema kwa kila pumzi na kila kuongezeka kwa maisha ya kiroho. Moyo wake wote hunena Amina kwa neno hili: Hamwezi kufanya neno lo lote. Na kwa sababu hii hasa, aweza pia kusema: “Nayaweza mambo yote katika yeye anitiaye nguvu.” Hisia ya kutokuweza, na kukaa kule kuletwako nayo, huongoza kwenye kuzaa tunda kwa kweli na bidii katika matendo mema.

Pasipo mimi ninyi hamwezi kufanya neno lo lote.—Ombi lililoje na wito ulioje wa kukaa ndani ya Kristo kila dakika! Yatupasa kurudi tu kwa mzabibu tuone jinsi ni kweli. Litazame tena lile tawi dogo, lisiloweza kabisa na lisilo na tunda ila kwa kadiri lipokeavyo utomvu kutoka kwa mzabibu, ukajifunze ya kwamba kusadiki kwa kamili kutokuweza kufanya lo lote pasipo Kristo ndicho hasa uhitajicho ili kukufundisha kukaa ndani ya Mzabibu wako wa mbinguni. Ni jambo hili ndilo lenye maana kuu ya kupogoa kule Kristo alikonena—yote yaliyo ya nafsi lazima yashushwe chini, ili tumaini letu liwe katika Kristo peke yake. “Kaeni ndani yangu”—matunda mengi! “Pasipo mimi”—hamna kitu! Je, kuwe na shaka lo lote juu ya tutakachochagua?

Fundisho moja la mfano huu ni hili—kwa hakika, na kwa asili, kama vile tawi likaavyo ndani ya mzabibu, Waweza kukaa ndani ya Kristo. Kwa ajili ya hili Yeye ndiye Mzabibu wa kweli; kwa ajili ya hili Mungu ndiye Mkulima; kwa ajili ya hili wewe u tawi. Je, hatutamlilia Mungu atuokoe milele na lile “pasipo mimi,” na kulifanya lile “kaeni ndani yangu” kuwa jambo halisi lisilokoma? Moyo wako na uelekee kwa kile Kristo alicho, na awezacho kufanya, kwa uweza wake wa kimungu na upendo wake mwororo kwa kila tawi lake, nawe utasema daima kwa uthabiti zaidi: “Bwana! nakaa; nitazaa matunda mengi. Kutokuweza kwangu ndiyo nguvu yangu. Na iwe hivyo. Pasipo Wewe, hamna kitu. Ndani Yako, matunda mengi.”

Pasipo Mimi—wewe si kitu. Bwana, napokea mpango huu kwa furaha: mimi si kitu—Wewe u yote. Kutokuwa kitu kwangu ndiyo baraka yangu kuu kabisa, kwa sababu Wewe ndiwe Mzabibu, utoaye na kutenda yote. Na iwe hivyo, Bwana! Mimi, si kitu, nikingoja daima ujazo wako. Bwana, nifunulie utukufu wa maisha haya yaliyobarikiwa.