Matunda Mengi

Akaaye ndani yangu, nami ndani yake, huyo huzaa sana—Yohana 15:5

Bwana wetu alikuwa amenena juu ya tunda, tunda zaidi. Sasa aongeza wazo hili: matunda mengi. Ndani ya Mzabibu kuna ujazo mkuu namna hiyo, na uangalizi wa Mkulima wa kimungu una hakika ya kufanikiwa namna hiyo, hata matunda mengi si takwa, bali ni ahadi tu ya kile ambacho lazima kije kwa tawi likaalo katika kukaa maradufu—yeye ndani ya Kristo, na Kristo ndani yake. “Huyo huzaa sana.” Ni jambo la hakika.

Je, umepata kuona tofauti iliyoko katika maisha ya Kikristo kati ya kazi na tunda? Mashine yaweza kufanya kazi: lakini uzima peke yake ndio uzaao tunda. Sheria yaweza kulazimisha kazi: lakini upendo peke yake ndio uzaao tunda kwa hiari. Kazi humaanisha juhudi na taabu: bali wazo la msingi la tunda ni kwamba ni zao la kimya, la asili, la utulivu la maisha yetu ya ndani. Mtunza bustani aweza kujitaabisha kuupa mti wake wa tofaa kulima na kuweka mbolea, kutia maji na kupogoa auhitajiavyo; lakini hawezi kufanya lo lote kuzaa tofaa lenyewe: “Tunda la Roho ni upendo, furaha, amani.” Maisha yenye afya huzaa matunda mengi. Uhusiano kati ya kazi na tunda pengine waonekana vizuri zaidi katika usemi huu, “mkizaa matunda kwa kila kazi njema.” (Wakolosai 1:10). Ni wakati tu matendo mema yajapo kama tunda la Roho akaaye ndani yetu ndipo yakubalikapo kwa Mungu. Chini ya lazima ya sheria na dhamiri, au chini ya mvuto wa mielekeo na bidii, watu waweza kuwa na juhudi nyingi katika matendo mema, na hata hivyo wakaona kwamba wana zao dogo tu la kiroho. Hakuwezi kuwa na sababu ila hii—matendo yao ni juhudi ya mwanadamu, badala ya kuwa tunda la Roho, zao la utulivu, la asili la kazi ya Roho ndani yetu.

Na waje wafanyakazi wote wamsikilize Mzabibu wetu mtakatifu afunuavyo sheria ya kuzaa matunda kwa uhakika na kwa wingi: “Akaaye ndani yangu, nami ndani yake, huyo huzaa sana.” Mtunza bustani hujali jambo moja—nguvu na uzima wenye afya wa mti wake: tunda hufuata lenyewe. Kama ungependa kuzaa tunda, angalia ya kwamba maisha ya ndani yako sawa kabisa, na kwamba uhusiano wako na Kristo Yesu u wazi na wa karibu. Anza kila siku pamoja Naye asubuhi, upate kujua kwa kweli ya kuwa unakaa ndani Yake, naye ndani yako. Kristo asema ya kwamba pungufu ya hilo halitatosha. Si kwa kutaka kwako wala kupiga mbio kwako, si kwa uwezo wako wala nguvu zako, bali—“kwa Roho yangu, asema Bwana.” Ukutane na kila wajibu mpya, ushike kila kazi mpya, ukiwa na sikio na moyo ulio wazi kwa sauti ya Bwana: “Akaaye ndani yangu, huzaa sana.” Wewe uangalie kukaa; Yeye ataangalia tunda, kwa maana atalitoa ndani yako na kupitia kwako.

Ee ndugu yangu, ni Kristo lazima afanye yote! Mzabibu hutoa utomvu, na uzima, na nguvu: tawi hungoja, na kupumzika, na kupokea, na kuzaa tunda. Lo, heri iliyoje ya kuwa matawi tu, ambao kwao Roho hupita akileta uzima wa Mungu kwa wanadamu!

Nakusihi, tumia wakati, ukamwombe Roho Mtakatifu akupe kutambua mahali pa utukufu pasipoelezeka ulichokishika katika nia ya Mungu. Amekupanda ndani ya Mwanawe, ukiwa na wito na nguvu za kuzaa matunda mengi. Kubali mahali hapo. Umtazame sana Mungu, na Kristo, na utazamie kwa furaha kuwa kile Mungu alichokusudia kukufanya, tawi lizaalo tunda.

Matunda mengi! Na iwe hivyo, Bwana Yesu mbarikiwa. Yaweza kuwa, kwa kuwa Wewe ndiwe Mzabibu. Yatakuwa, kwa kuwa mimi nakaa ndani Yako. Ni lazima yawe, kwa kuwa Baba yako ndiye Mkulima aisafishaye matawi. Naam, matunda mengi, kutokana na wingi wa neema yako.