Ninyi ni Matawi

Mimi ni mzabibu, ninyi ni matawi—Yohana 15:5

Kristo alikuwa amekwisha sema mengi juu ya tawi; hapa aja kwenye matumizi ya binafsi: “Ninyi ni matawi niliyokuwa nikiyanena. Kama vile mimi nilivyo Mzabibu, niliyejitwika kuwa na kutenda yote matawi yahitajiyo, vivyo hivyo sasa nawaomba, katika mpango mpya wa Roho Mtakatifu niliyekuwa nikiwaahidi, mkubali mahali niwapalo, na kuwa matawi yangu duniani.” Uhusiano autafutao kuuweka ni wa binafsi kwa kina kikubwa: wote hutegemea maneno mawili madogo, Mimi na Ninyi. Nao ni wa binafsi kwa kina kwetu sisi kama ulivyokuwa kwa wanafunzi wa kwanza. Na tujitokeze wenyewe mbele za Bwana wetu, hata anene kwa kila mmoja wetu kwa uweza, na nafsi yetu yote iuhisi: “Mimi ni Mzabibu; wewe ni tawi.”

Mwanafunzi mpendwa wa Yesu, hata uwe mchanga au dhaifu kiasi gani, isikie sauti. “Wewe ni tawi.” Huna budi kuwa si pungufu ya hilo. Usiache unyenyekevu wa uongo, wala hofu ya kimwili ya kutoa dhabihu, wala mashaka ya kutokuamini juu ya kile uhisicho unaweza, vikuzuie usiseme: “Nitakuwa tawi, pamoja na yote yaliyomo katika hilo—tawi, dhaifu sana, lakini lililo kama Mzabibu kadiri iwezekanavyo, kwa maana mimi ni wa asili ile ile, na kupokea roho ile ile. Tawi, lisiloweza kabisa kujisaidia, na hata hivyo lililotengwa dhahiri mbele za Mungu na watu, lililojitoa kabisa kwa kazi ya kuzaa matunda, kama Mzabibu wenyewe. Tawi, si kitu ndani ya nafsi yangu, na hata hivyo likipumzika na kufurahi katika imani ijuayo kwamba yeye atatunza yote. Naam, kwa neema yake, nitakuwa si pungufu ya tawi, na yote ayakusudiayo liwe, ili kupitia kwangu, apate kuzaa tunda lake.”

Wewe ni tawi.—Huna haja ya kuwa zaidi ya hilo. Huna haja, hata kwa dakika moja tu ya siku, kujitwika wajibu wa Mzabibu. Huna haja ya kuacha mahali pa kutegemea kabisa na kuwa na uhakika usio na mipaka. Huna haja, kuliko yote, kufadhaika juu ya jinsi utakavyoielewa siri hiyo, au kutimiza masharti yake, au kutekeleza shabaha yake iliyobarikiwa. Mzabibu utatoa yote na kutenda yote. Baba, Mkulima, hulinda muungano wako na Mzabibu na kukua kwako ndani yake. Huna haja ya kuwa zaidi ya tawi. Tawi tu! Hilo na liwe kauli-mbiu yako; litakuongoza katika njia ya kujisalimisha bila kukoma kwa kutenda kwa Kristo, ya utii wa kweli kwa kila amri yake, ya kutarajia kwa furaha neema yake yote.

Je, yuko ye yote sasa aulizaye: “Nitajifunzaje kusema haya sawasawa, ‘Uwe tawi tu!’ na kuyaishi?” Nafsi mpendwa, tabia ya tawi, nguvu zake, na tunda lizaalo, hutegemea Mzabibu kabisa. Na maisha yako ukiwa tawi hutegemea kabisa kufahamu kwako jinsi Bwana wetu Yesu alivyo. Kwa hiyo usiyatenganishe kamwe maneno haya mawili: “Mimi Mzabibu—wewe tawi.” Maisha yako na nguvu na tunda hutegemea jinsi Bwana wako Yesu alivyo! Kwa hiyo mwabudu na kumtumaini; yeye na awe tamaa yako moja na shughuli moja ya moyo wako. Nawe uhisipo kwamba humjui wala huwezi kumjua sawasawa, ndipo kumbuka tu kwamba ni sehemu ya wajibu wake akiwa Mzabibu kujifanya ajulikane kwako. Hufanya hivi si katika fikira na madhanio—la—bali katika kukua kuliko fichika ndani ya uhai uliojitoa kwa unyenyekevu na kwa utulivu na kabisa ili kumngoja yeye. Mzabibu hujifunua ndani ya tawi; kutoka hapo huja kukua na tunda, Kristo hukaa na kutenda kazi ndani ya tawi lake; uwe tawi tu, ukimngoja yeye afanye yote; yeye atakuwa kwako Mzabibu wa kweli. Baba mwenyewe, Mkulima wa Kimungu, aweza kukufanya tawi listahililo Mzabibu wa mbinguni. Hutaaibika.

Ninyi ni matawi. Neno hili, nalo pia Bwana! Ee lisemee kwa uweza katika nafsi yangu. Tawi la mzabibu wa dunia lisiniaibishe, bali kama vile liishivyo tu ili kuzaa tunda la mzabibu, maisha yangu duniani yasiwe na haja wala shabaha, ila kukuacha wewe uzae tunda kupitia kwangu.