Mzabibu (Yohana 15:5)

Mimi ni mzabibu, ninyi ni matawi—Yohana 15:5

Katika mstari uliotangulia Kristo alikuwa amesema tu: “Kaeni ndani yangu.” Kisha alikuwa ametangaza sheria kuu isiyoweza kubadilika ya uhai wote wa tawi, duniani au mbinguni: “si kwa nafsi yake”; “lisipokaa.” Katika maneno ya mwanzo ya mfano huo alikuwa amekwisha sema: “Mimi ni mzabibu.” Sasa ayarudia maneno hayo. Angetaka tuelewe—liangalie somo hili vema, ijapoonekana rahisi, ndilo ufunguo wa maisha ya kukaa—kwamba njia pekee ya kutii ile amri, “Kaeni ndani yangu,” ni kuwa na jicho na moyo vilivyokazwa juu yake yeye mwenyewe. “Kaeni ndani yangu... Mimi ndimi mzabibu wa kweli.” Naam, ichunguze siri hii takatifu hata umwone Kristo kuwa Mzabibu wa kweli, akichukua, akitia nguvu, akiruzuku, akihimiza matawi yake yote, akiwa na kutenda ndani ya kila tawi yote lihitajiyo, na kukaa kutakuja kwenyewe. Naam, mtazame yeye kama Mzabibu wa kweli, hata uhisi ni Siri ya mbinguni jinsi gani, na kulazimika kumwomba Baba akufunulie kwa Roho wake Mtakatifu. Yeye ambaye Mungu humfunulia utukufu wa Mzabibu wa kweli, yeye aonaye jinsi Yesu alivyo na anavyongoja kutenda kila dakika, hawezi ila kukaa. Kumwona Kristo ni mvuto usiozuilika; hutuvuta na kutushika kama sumaku. Msikilize daima Kristo aliye hai akikuambia bado, na akingoja kukuonyesha maana na uweza wa Neno lake: “Mimi ni mzabibu.”

Kazi ngapi ya uchovu imekuwako katika kujitahidi kuelewa kukaa ni nini, juhudi ngapi zisizozaa katika kujaribu kukifikia! Kwa nini ilikuwa hivi? Kwa sababu fikira ilielekezwa kwa kukaa kuwa ni kazi tunayopaswa kuifanya, badala ya Kristo aliye hai, ambaye ndani yake tulipaswa kudumishwa katika kukaa, ambaye yeye mwenyewe alipaswa kutushika na kutulinda. Tulidhani kukaa kuwa ni jitihada na taabu isiyokoma—tunasahau kwamba kwa yule aliyeipata mahali pa makao yake maana yake ni kupumzika kutoka jitihada. Tazama jinsi Kristo alivyosema, “Kaeni ndani yangu; mimi ni Mzabibu uzaao, na kushika, na kutia nguvu, na kufanya matawi kuzaa matunda. Kaeni ndani yangu, pumzikeni ndani yangu, na kuniacha nifanye kazi yangu. Mimi ndimi Mzabibu wa kweli, yote niliyo, na ninenayo, na nitendayo ni kweli ya Kimungu, itoayo uhalisi kamili wa yale yaliyonenwa. Mimi ni Mzabibu, kubali tu na kunitolea vyako vyote, nami nitafanya yote ndani yako.”

Na hivyo wakati mwingine hutokea kwamba nafsi ambazo hazikupata kamwe kushughulishwa hasa na wazo la kukaa, zinakaa wakati wote, kwa sababu zimeshughulishwa na Kristo. Si kwamba neno hili kukaa si la lazima; Kristo alilitumia mara nyingi mno, kwa sababu ndilo ufunguo hasa wa maisha ya Kikristo. Lakini angetaka tulielewe katika maana yake ya kweli—“Toka katika kila mahali pengine, na kila tumaini na shughuli nyingine, toka nje ya nafsi pamoja na hoja na juhudi zake, njoo upumzike katika lile nitakalofanya. Ishi nje ya nafsi yako; kaa ndani yangu. Jua ya kuwa u ndani yangu; huhitaji zaidi; dumu humo ndani yangu.”

“Mimi ni mzabibu.” Kristo hakuificha siri hii kwa wanafunzi wake. Aliifunua, kwanza kwa maneno hapa, kisha kwa uweza wakati Roho Mtakatifu aliposhuka. Atatufunulia sisi pia, kwanza katika fikira na maungamo na tamaa ambazo maneno haya huyaamsha, kisha kwa uweza kwa njia ya Roho. Na tumngoje yeye atuonyeshe maana yote ya mbinguni ya siri hii. Kila siku, katika muda wetu wa utulivu, katika chumba cha ndani pamoja naye na Neno lake, fikira na shabaha yetu kuu na iwe kuukaza moyo juu yake, kwa uhakika huu: yote ambayo mzabibu waweza kuyatenda kwa matawi yake, Bwana wangu Yesu atayatenda, anayatenda, kwa ajili yangu. Mpe muda, mpe sikio lako, ili aseme kwa upole na kueleza siri ile ya Kimungu: “Mimi ni mzabibu.”

Zaidi ya yote, kumbuka, Kristo ni Mzabibu wa kupandwa na Mungu, nawe u tawi la kupandikizwa na Mungu. Simama daima mbele za Mungu, ukiwa katika Kristo; ngoja daima neema yote kutoka kwa Mungu, ukiwa katika Kristo; jitoe daima ili kuzaa matunda zaidi ayaombayo Mkulima, ukiwa katika Kristo. Na uombe sana kwa ajili ya kufunuliwa kwa siri hii kwamba upendo wote na uweza wote wa Mungu uliokaa juu ya Kristo unatenda kazi ndani yako pia. “Mimi ni Mzabibu wa Mungu,” asema Yesu; “yote niliyo nimeyapata kutoka kwake; yote niliyo ni kwa ajili yenu; Mungu atayatenda ndani yenu.”

Mimi ni mzabibu. Bwana mbarikiwa, linene wewe neno hilo ndani ya nafsi yangu. Ndipo nitakapojua kwamba utimilifu wako wote ni kwa ajili yangu. Na kwamba naweza kukutegemea unitiririshie ndani yangu, na kwamba kukaa kwangu ni rahisi na kwa hakika sana ninapojisahau na kujipoteza katika imani ya kuabudu kwamba Mzabibu hulishika tawi na kuliruzuku kila lihitajilo.