Msipokaa

Kama vile tawi lisivyoweza kuzaa peke yake, lisipokaa ndani ya mzabibu; kadhalika nanyi, msipokaa ndani yangu—Yohana 15:4

Twaijua maana ya neno hili msipokaa. Laonyesha sharti fulani lisiloepukika, sheria fulani isiyoepukika. “Tawi haliwezi kuzaa peke yake, lisipokaa ndani ya mzabibu. Kadhalika nanyi, msipokaa ndani yangu.” Kuna njia moja tu ya tawi kuzaa matunda, hakuna uwezekano mwingine, ni lazima likae katika ushirika usiokatika na mzabibu. Si kwa nafsi yake, bali kwa mzabibu tu, ndipo tunda huja. Kristo alikuwa amekwisha sema: “Kaeni ndani yangu”; katika asili tawi latufundisha somo hili waziwazi kabisa; ni pendeleo la ajabu jinsi gani kuitwa na kuruhusiwa kukaa ndani ya Mzabibu wa mbinguni; mtu angedhani si lazima kuongeza maneno haya ya onyo. Lakini sivyo—Kristo ajua vema jinsi kule kujikana nafsi kunakomaanishwa katika haya: “Kaeni ndani yangu”; jinsi mwelekeo ulivyo na nguvu na ulioenea kila mahali wa kutaka kuzaa matunda kwa juhudi zetu wenyewe; jinsi ingekavyo vigumu kutufanya tuamini kwamba kukaa ndani yake kwa kweli na bila kukoma ni ulazima kamili! Yeye asisitiza kweli hii: Si kwa nafsi yake tawi laweza kuzaa; lisipokaa, haliwezi kuzaa. “Kadhalika nanyi, msipokaa ndani yangu.”

Lakini je, jambo hili lapaswa kuchukuliwa kihalisi? Je, ni lazima mimi, kwa namna ya pekee, na dhahiri, na isiyokoma, na kamili, kama vile tawi likaavyo ndani ya mzabibu, nijitoe vivyo hivyo kupata maisha yangu yote katika Kristo peke yake? Naam ni lazima kabisa. Lile msipokaa laenea kwa wote kama vile lile lisipokaa. Lile kadhalika nanyi haliruhusu ubaguzi wala mabadiliko. Kama nitakuwa tawi la kweli, kama nitazaa matunda, kama nitakuwa kile Kristo akiwa Mzabibu anachotaka niwe, kuwako kwangu kote lazima kujitolee kukaa ndani yake kwa namna ya pekee, kama vile tawi la asili lijitoavyo kukaa ndani ya mzabibu wake.

Na nijifunze somo hili. Kukaa ni lazima kuwe tendo la nia na moyo wote. Kama vile zilivyoko daraja katika kumtafuta na kumtumikia Mungu, “si kwa moyo mkamilifu,” au “kwa moyo wote,” vivyo hivyo zaweza kuwako daraja katika kukaa. Katika kuzaliwa upya uhai wa Kimungu huingia ndani yetu, lakini hautawali wala kujaza nafsi yetu yote mara moja. Haya huja kama jambo la amri na utii. Kuna hatari isiyoelezeka ya sisi kutojitoa kwa moyo wetu wote ili kukaa. Kuna hatari isiyoelezeka ya sisi kujitoa kufanya kazi kwa ajili ya Mungu, na kuzaa matunda, huku tukiwa na kidogo tu cha kukaa kwa kweli, kule kujipoteza kwa moyo wote ndani ya Kristo na uhai wake. Kuna hatari isiyoelezeka ya kazi nyingi huku kukiwa na tunda kidogo tu, kwa kukosa kile kitu kimoja kilicho cha lazima. Ni lazima tuyaache maneno haya, “si kwa nafsi yake,” “lisipokaa,” yafanye kazi yake ya kupekua na kufichua, ya kupogoa na kusafisha, yote yaliyomo ya kujitakia nafsi na kujiamini katika maisha yetu; haya yatatuokoa na uovu huu mkuu, na hivyo kututayarisha kwa mafundisho yake, yakitupa maana kamili ya neno hilo ndani yetu: “Kaeni ndani yangu, nami ndani yenu.”

Bwana wetu mbarikiwa atamani kutuita tuondoke kwetu wenyewe na nguvu zetu wenyewe, twende kwake yeye na nguvu zake. Na tulikubali onyo hili, na kumgeukia yeye kwa hofu kuu na kutojiamini ili afanye kazi yake. “Uhai wetu umefichwa pamoja na Kristo katika Mungu!” Uhai huo ni siri ya mbinguni, iliyofichwa kwa wenye hekima hata miongoni mwa Wakristo, na kufunuliwa kwa watoto wachanga. Roho ya kitoto hujifunza kwamba uhai hutolewa kutoka mbinguni kila siku na kila dakika kwa nafsi ikubaliyo mafundisho haya: “si kwa nafsi yake,” “lisipokaa,” na kuutafuta utimilifu wake wote katika Mzabibu. Ndipo kukaa ndani ya Mzabibu huwa si kitu zaidi wala pungufu ila kujisalimisha kwa utulivu kwa nafsi ili kumwacha Kristo awe na yote na kutenda yote, kwa ukamilifu kama vile katika asili tawi lisivyojua wala kutafuta kitu ila mzabibu.

Kaa ndani yangu. Nimesikia, Bwana wangu, kwamba pamoja na kila amri, wewe pia hutoa uweza wa kutii. Kwa neno lako, “Simama, uende,” yule kiwete akaruka, mimi nalipokea neno lako, “Kaeni ndani yangu,” kuwa neno la uweza, litoalo uweza, na hata sasa nasema, Naam, Bwana, nitakaa, nakaa ndani yako.