Kaeni

Kaeni ndani yangu, nami ndani yenu—Yohana 15:4

Kipandikizi kipya kiwekwapo katika mzabibu na kukaa humo, hutokea mchakato wa namna mbili. Wa kwanza ni katika mti. Kipandikizi hushusha mizizi na nyuzi zake ndogo ndani ya shina, na shina hukua na kuingia ndani ya kipandikizi, hata ile inayoitwa muungano wa umbo hutimia. Kipandikizi hukaa na kuwa kitu kimoja na mzabibu, na hata kama mzabibu ungekufa, bado kingekuwa mti mmoja nao. Kisha huja mchakato wa pili, ambapo utomvu wa mzabibu huingia katika umbo lile jipya, na kulitumia kama njia ambayo kwayo utomvu waweza kupanda juu ili kujidhihirisha katika machipukizi machanga na majani na matunda. Huu ndio muungano wa uhai. Ndani ya kipandikizi kikaacho ndani ya shina, shina huingia kwa utomvu ili kukaa ndani yake.

Bwana wetu asemapo: “Kaeni ndani yangu, nami ndani yenu,” anaonyesha jambo linalofanana na hili. “Kaeni ndani yangu”: maneno haya yahusu zaidi lile tunalopaswa kulitenda sisi. Twapaswa kuamini na kutii, kujitenga na kila kitu kinginecho, kumtafuta yeye na kushikamana naye, kujizamisha ndani yake. Tufanyapo hivyo, kwa neema anayoitoa, tabia hujengeka, na moyo hutayarishwa kwa uzoefu ulio mkamilifu zaidi: “Mimi ndani yenu,” Mungu hututia nguvu kwa uweza kwa Roho katika utu wa ndani, na Kristo hukaa moyoni kwa imani.

Waamini wengi huomba na kutamani kwa bidii nyingi kujazwa kwa Roho na kukaa kwa Kristo ndani yao, nao hushangaa kwa nini hawaendelei zaidi. Sababu mara nyingi ni hii, lile “Mimi ndani yenu” haliwezi kuja kwa sababu lile “kaeni ndani yangu” halidumishwi. “Mwili ni mmoja na Roho ni mmoja”; kabla Roho hajaweza kujaza, ni lazima kuwe na mwili uliotayarishwa. Kipandikizi lazima kiwe kimeota ndani ya shina, na kukaa ndani yake kabla utomvu haujaweza kupita ili kuzaa matunda. Ni katika kumfuata Kristo kwa utii wa unyenyekevu, hata katika mambo ya nje, tukijikana wenyewe, tukiuacha ulimwengu, na hata katika mwili tukitafuta kufanana naye, tunapotafuta hivyo kukaa ndani yake, ndipo tutakapoweza kupokea na kufurahia lile “Mimi ndani yenu.” Kazi tuliyoamriwa: “Kaeni ndani yangu,” itatutayarisha kwa kazi aifanyayo yeye: “Mimi ndani yenu.”

Ndani—Sehemu hizo mbili za agizo zina umoja wao katika lile neno lenye maana kuu lililo kiini: “ndani.” Hakuna neno lililo na kina zaidi katika Maandiko. Mungu yumo ndani ya vyote. Mungu hukaa ndani ya Kristo. Kristo huishi ndani ya Mungu. Sisi tumo ndani ya Kristo. Kristo yumo ndani yetu: uhai wetu umepokewa ndani ya wake; uhai wake umepokewa ndani ya wetu; katika uhalisi wa Kimungu ambao maneno hayawezi kuueleza, sisi tumo ndani yake, naye yumo ndani yetu. Na maneno haya, “Kaeni ndani yangu, nami ndani yenu,” yatuambia tu tuamini jambo hili, siri hii ya Kimungu, na kumtegemea Mungu wetu Mkulima, na Kristo Mzabibu, waifanye kuwa kweli kwa jinsi ya Kimungu. Hakuna kufikiri wala kufundisha wala kuomba kuwezako kulishika; ni siri ya Kimungu ya upendo. Kama tusivyoweza kuufanya muungano huo, ndivyo tusivyoweza kuufahamu. Na tumtazame tu Mzabibu huyu asiye na mwisho, wa Kimungu, mwenye uweza wote akitupenda, akitushika, akitenda kazi ndani yetu. Na katika imani ya kutenda kwake tukae na kupumzika ndani yake, tukielekeza moyo na tumaini kwake yeye peke yake daima. Na tumtegemee yeye aitimize ndani yetu ile siri: “Ninyi ndani yangu, nami ndani yenu.”

Bwana mbarikiwa, waniamuru nikae ndani yako. Nitawezaje, Bwana, usiponijalia kujidhihirisha kwangu, ukingoja kunipokea na kunikaribisha na kunilinda? Nakuomba unionyeshe jinsi wewe ukiwa Mzabibu unavyojitwika kufanya yote. Kushughulika nawe ndiko kukaa ndani yako. Mimi hapa, Bwana, tawi, lililosafishwa na kukaa—likipumzika ndani yako, na kungoja kutiririka kwa uhai wako na neema yako.