Toba na Kurudisha

“Mungu sasa anawaagiza watu wote wa kila mahali watubu.”—Matendo 17:30.

Toba ni mojawapo ya mafundisho ya msingi ya Biblia. Lakini naamini ni mojawapo ya kweli zile ambazo watu wengi wanazielewa kidogo sana siku hizi. Wapo watu wengi zaidi leo walio katika ukungu na giza juu ya Toba, na Kuzaliwa Upya, na Upatanisho, na kweli nyingine za msingi kama hizo, kuliko labda juu ya mafundisho mengine yoyote. Lakini tangu miaka yetu ya kwanza kabisa tumekuwa tukisikia habari zake. Kama ningeomba maelezo ya Toba ni nini, wengi sana wangetoa wazo la ajabu sana na la uongo juu yake.

Mtu hawi tayari kuiamini wala kuipokea Injili, asipokuwa tayari kuzitubu dhambi zake na kuziacha. Hata wakati ule Yohana Mbatizaji alipokutana na Kristo, alikuwa na andiko moja tu alilolihubiri, “Tubuni; kwa maana ufalme wa mbinguni umekaribia” (Mathayo 3:2). Lakini kama angeendelea kusema haya tu, na kuishia hapo bila kuwaelekeza watu kwa Kristo, yule Mwana-Kondoo wa Mungu, asingetimiza mengi hata kidogo.

Kristo alipokuja, aliuchukua ule ule mwito wa jangwani, “Tubuni; kwa maana ufalme wa mbinguni umekaribia” (Mathayo 4:17). Na Bwana wetu alipowatuma wanafunzi wake, ilikuwa kwa ujumbe ule ule, “kwamba watu watubu” (Marko 6:12). Baada ya kutukuzwa kwake, na Roho Mtakatifu aliposhuka, twamkuta Petro katika siku ya Pentekoste akipaza kilio kile kile, “Tubuni!” Ni mahubiri haya—Tubuni, na kuiamini Injili—ndiyo yaliyozaa matokeo ya ajabu namna hiyo wakati ule. (Matendo 2:38-47). Nasi twaona kwamba, Paulo alipokwenda Athene, alitoa kilio kile kile, “Sasa Mungu anawaagiza watu wote wa kila mahali, watubu” (Matendo 17:30).

Kabla sijanena juu ya Toba ilivyo, na niseme kwa kifupi jinsi isivyo. Toba si hofu. Watu wengi wamevichanganya viwili hivi. Wadhani kwamba yawapasa kutiwa hofu na kutishwa; nao wanangoja hofu ya namna fulani iwashukie. Lakini makutano ya watu hutiwa hofu ambao hawatubu kwa kweli. Umesikia habari za watu waliokuwa baharini wakati wa dhoruba ya kutisha. Yamkini walikuwa watu wenye lugha chafu sana; lakini hatari ilipokuja walinyamaza ghafula, wakaanza kumlilia Mungu awarehemu. Lakini usingesema kwamba walitubu. Dhoruba ilipopita, waliendelea kuapa kama hapo kwanza. Waweza kudhani kwamba mfalme wa Misri alitubu Mungu alipomletea mapigo ya kutisha yeye na nchi yake. Lakini hiyo haikuwa toba hata kidogo. Mara mkono wa Mungu ulipoondolewa moyo wa Farao ukawa mgumu kuliko wakati wowote. Hakuiacha hata dhambi moja; alikuwa mtu yule yule. Hivyo kwamba hapakuwa na toba ya kweli pale.

Mara nyingi, mauti inapoingia katika jamaa fulani, laonekana kana kwamba tukio lile lingetakaswa hata kuleta kuongoka kwa wote waliomo nyumbani ile. Lakini baada ya muda wa miezi sita yote yaweza kuwa yamekwisha sahauliwa. Wengine wanaosoma maneno haya yamkini wamekwisha pitia uzoefu ule. Mkono wa Mungu ulipokuwa mzito juu yao ilionekana kana kwamba walikuwa karibu kutubu; lakini jaribu limeondolewa—na tazama, ile athari yote imetoweka kabisa.

Kisha tena, Toba si hisia. Nakuta watu wengi sana wakingoja hisia ya namna fulani iwajie. Wangependa kumgeukia Mungu; lakini wadhani hawawezi kufanya hivyo hata hisia hii ije. Nilipokuwa Baltimore nilikuwa nikihubiri kila Jumapili katika Gereza Kuu kwa wafungwa mia tisa. Hapakuwa na mtu hata mmoja pale ambaye hakujihisi mnyonge vya kutosha: walikuwa na hisia nyingi tele. Kwa juma la kwanza au siku kumi za kufungwa kwao wengi wao walilia nusu ya wakati. Lakini, walipoachwa huru, wengi wao walirudi moja kwa moja katika njia zao za zamani. Ukweli wenyewe ulikuwa, kwamba walijihisi vibaya sana kwa sababu walikuwa wamekamatwa; ndiyo yote yaliyokuwa. Vivyo hivyo umemwona mtu wakati wa jaribu akionyesha hisia nyingi: lakini mara nyingi ni kwa sababu tu ameingia matatani; si kwa sababu ametenda dhambi, wala kwa sababu dhamiri yake yamwambia ametenda uovu machoni pa Mungu. Yaonekana kana kwamba jaribu lile lingezaa toba ya kweli; lakini hisia hiyo mara nyingi mno hupita na kutoweka.

Tena, Toba si kufunga na kuutesa mwili. Mtu aweza kufunga majuma na miezi na miaka, na bado asiitubu dhambi hata moja. Wala si majuto. Yuda alikuwa na majuto ya kutisha—ya kutosha kumfanya aende na kujinyonga; lakini hiyo haikuwa toba. Naamini kama angekwenda kwa Bwana wake, akaanguka kifudifudi, akaiungama dhambi yake, angesamehewa. Badala ya hilo alikwenda kwa makuhani, kisha akayakomesha maisha yake. Mtu aweza kufanya adhabu za kila namna juu ya mwili wake—lakini hakuna toba ya kweli katika hilo. Liweke jambo hilo akilini mwako. Huwezi kuyatimiza madai ya Mungu kwa kutoa matunda ya mwili wako kwa ajili ya dhambi ya nafsi yako. Uondoke nao udanganyifu wa namna hiyo!

Toba si kusadikishwa juu ya dhambi. Hilo laweza kuonekana geni kwa wengine. Nimewaona watu wakiwa chini ya kusadikishwa dhambi kwa kina kiasi kwamba hawakuweza kulala usiku; hawakuweza kufurahia hata mlo mmoja. Waliendelea hivyo kwa miezi mingi; na bado hawakuongoka; hawakutubu kwa kweli. Usikichanganye kusadikishwa juu ya dhambi na Toba.

Wala kuomba si Toba. Hilo nalo laweza kuonekana geni. Watu wengi, wanapoanza kuwa na wasiwasi juu ya wokovu wa nafsi zao, husema, “Nitaomba, na kuisoma Biblia;” nao wadhani kwamba jambo hilo litaleta tokeo linalotamaniwa. Lakini halitalifanya. Waweza kuisoma Biblia na kumlilia Mungu sana, na bado usitubu kamwe. Watu wengi humlilia Mungu kwa sauti kuu, na bado hawatubu.

Jambo lingine: si kuiacha dhambi fulani moja. Watu wengi sana hufanya kosa hilo hilo. Mtu aliyekuwa mlevi hutia sahihi ile ahadi ya kuacha kunywa, naye huacha kunywa kabisa. Kuiacha dhambi moja si Toba. Kuuacha uovu mmoja ni kama kukata tawi moja la mti, hali mti mzima unapaswa kuangushwa. Mtu mwenye lugha chafu huacha kuapa; ni vema sana: lakini kama hataiacha kila dhambi hiyo si Toba—si kazi ya Mungu ndani ya nafsi. Mungu atendapo kazi yake huuangusha mti mzima. Ataka mtu ageuke na kuiacha kila dhambi. Tuseme niko ndani ya chombo huko baharini, nami nakuta chombo kinavuja mahali patatu au panne. Naweza kwenda na kuziba tundu moja tu; lakini chombo kile huzama. Au tuseme nimejeruhiwa mahali patatu au panne, nami napata dawa kwa jeraha moja: kama majeraha mengine mawili au matatu yatapuuzwa, uzima wangu utatoweka upesi. Toba ya kweli si kuiacha tu dhambi hii au ile ya pekee.

Basi, wewe utauliza, Toba ni nini? Nitakupa maelezo mazuri ya jambo hili: ni “geuka kabisa upande wa nyuma!” Katika lugha ya Kiairishi neno “Toba” lamaanisha zaidi hata ya “geuka kabisa upande wa nyuma!” Ladokeza kwamba mtu aliyekuwa akitembea upande mmoja hakuugeuza uso wake tu, bali kwa kweli anatembea upande ulio kinyume kabisa. “Geukeni, geukeni; kwani kufa kwa nini?” Mtu aweza kuwa na hisia kidogo au kuwa na hisia nyingi; lakini kama hataigeuka na kuiacha dhambi, Mungu hatamrehemu. Toba imeelezwa pia kuwa ni “kubadili nia.” Kwa mfano, kuna mfano ule aliousema Kristo: “Mtu mmoja alikuwa na wana wawili; akamwendea yule wa kwanza, akasema, Mwanangu, nenda kafanye kazi leo katika shamba langu la mizabibu. Akajibu akasema, Sitaki” (Mathayo 21:28, 29). Baada ya kusema “Sitaki” aliwaza juu ya jambo lile, akaibadili nia yake. Yamkini alijiambia mwenyewe, “Sikusema na baba yangu kwa heshima sana. Aliniomba niende kufanya kazi, nami nikamwambia sitakwenda. Nadhani nilikosea.” Lakini tuseme alisema maneno haya tu, na bado hakwenda kufanya kazi, asingekuwa ametubu. Hakusadikishwa tu kwamba alikuwa amekosea; bali alikwenda zake huko mashambani, akipalilia, au akivuna au lolote lile lililokuwa. Hayo ndiyo maelezo aliyoyatoa Kristo juu ya toba. Mtu akisema, “Kwa neema ya Mungu nitaiacha dhambi yangu, na kuyatenda mapenzi yake,” hiyo ndiyo Toba—kugeuka kabisa upande wa nyuma.

Mtu fulani amesema, mwanadamu huzaliwa akiwa na uso wake umegeuzwa mbali na Mungu. Anapotubu kwa kweli hugeuzwa kabisa kumwelekea Mungu; huyaacha maisha yake ya zamani.

Je, mtu aweza kutubu mara moja? Hakika yeye aweza. Haichukui muda mrefu kugeuka na kurudi nyuma. Haimchukui mtu miezi sita ili kuibadili nia yake. Palikuwa na chombo kilichozama muda fulani uliopita katika pwani ya Newfoundland. Kilipokuwa kikielekea kwenye ufuo, ulikuwapo wakati fulani ambapo nahodha angeweza kutoa amri ya kuzigeuza injini na kukirudisha nyuma. Kama injini zingegeuzwa wakati ule, chombo kingeokoka. Lakini ulifika wakati ambapo ilikuwa imekwisha chelewa mno. Vivyo hivyo upo wakati, naamini, katika maisha ya kila mtu ambapo aweza kusimama na kusema, “Kwa neema ya Mungu sitakwenda mbele zaidi kuelekea mautini na maangamizi. Nazitubu dhambi zangu na kuziacha.” Waweza kusema kwamba huna hisia za kutosha; lakini kama umesadikishwa kwamba uko katika njia isiyo sahihi, geuka kabisa upande wa nyuma, na useme, “Sitaendelea tena katika njia ya uasi na ya dhambi kama nilivyofanya.”

Wakati ule ule, unapokuwa tayari kumgeukia Mungu, wokovu waweza kuwa wako.

Nakuta kwamba kila kisa cha kuongoka kilichoandikwa katika Biblia kilikuwa cha papo hapo. Toba na imani vilikuja kwa ghafula sana. Mara mtu alipoiweka nia yake, Mungu akampa nguvu. Mungu hamwombi mtu yeyote atende yale ambayo hana nguvu za kuyatenda. Asingeamuru “watu wote wa kila mahali watubu” (Matendo 17:30) kama wasingeweza kufanya hivyo. Mwanadamu hana wa kumlaumu ila nafsi yake mwenyewe kama hatubu na kuiamini Injili. Mmoja wa wahudumu wakuu wa Injili katika Ohio aliniandikia barua muda fulani uliopita akieleza kuongoka kwake; nayo yaonyesha kwa nguvu sana jambo hili la uamuzi wa papo hapo. Alisema:

“Nilikuwa na umri wa miaka kumi na tisa, nami nilikuwa nikijifunza sheria kwa wakili mmoja Mkristo huko Vermont. Mchana mmoja alipokuwa hayupo nyumbani, mkewe mwema aliniambia nilipoingia ndani ya nyumba, ‘Nataka uende nami leo usiku kwenye mkutano wa darasa nawe uwe Mkristo, ili uweze kuiongoza ibada ya jamaa wakati mume wangu hayupo.’ ‘Haya, nitafanya hivyo,’ nikasema, bila kufikiri jambo lolote kabisa. Nilipoingia ndani ya nyumba tena aliniuliza kama nilikuwa mnyoofu katika yale niliyoyasema. Nikajibu, ‘Ndiyo, kwa kadiri ya kwenda kwenye mkutano pamoja nawe; hiyo ni adabu tu.’

“Nilikwenda naye kwenye ule mkutano wa darasa, kama nilivyofanya mara nyingi hapo awali. Watu yapata kumi na wawili walikuwapo katika chumba kidogo cha shule. Kiongozi alikuwa amenena na wote waliokuwamo chumbani ila mimi na wengine wawili. Alikuwa akinena na yule aliyekuwa karibu nami, ndipo wazo likaniingia: ataniuliza kama nina neno lolote la kusema. Nikajiambia mwenyewe: nimekusudia kuwa Mkristo wakati fulani; kwa nini nisianze sasa? Katika muda usiofika dakika moja baada ya mawazo haya kupita akilini mwangu akasema, akinena nami kwa ukaribu—kwa maana alinijua vema sana—‘Ndugu Charles, je, una neno lolote la kusema?’ Nikajibu, kwa utulivu kamili, ‘Ndiyo, bwana. Nimeamua sasa hivi, ndani ya sekunde thelathini zilizopita, kwamba nitaanza maisha ya Kikristo, nami ningependa uniombee.’

“Utulivu wangu ulimshangaza; nadhani karibu auitilie shaka unyoofu wangu. Alisema maneno machache sana, bali akaendelea mbele na kunena na wale wengine wawili. Baada ya maneno machache ya jumla, aligeuka kunielekea akasema, ‘Ndugu Charles, je, utaufunga mkutano kwa maombi?’ Yeye alijua kwamba mimi sikuwa nimeomba hadharani kamwe. Hata kufikia wakati huu sikuwa na hisia yoyote. Lilikuwa jambo la kibiashara tu. Wazo langu la kwanza lilikuwa: siwezi kuomba, nami nitamwomba anisamehe. La pili lilikuwa: nimesema nitaanza maisha ya Kikristo; na hii ni sehemu yake. Basi nikasema, ‘Na tuombe.’ Na mahali fulani kati ya wakati nilipoanza kupiga magoti na wakati magoti yangu yalipoigusa sakafu Bwana aliigeuza nafsi yangu.

“Maneno ya kwanza niliyoyasema yalikuwa, ‘Utukufu kwa Mungu!’ Yale niliyoyasema baada ya hayo sijui, wala si kitu, kwa maana nafsi yangu ilikuwa imejaa mno hata isiweze kusema mengi ila Utukufu! Tangu saa ile shetani hajathubutu kamwe kupinga kuongoka kwangu kwa neno lolote. Kwa Kristo na iwe sifa yote.”

Watu wengi wanangoja, wala hawawezi kueleza hasa wangoja nini, bali wangoja hisia ya namna ya miujiza iwajie kwa siri—imani ya namna fulani ya fumbo. Nilikuwa nikinena na mtu mmoja miaka kadhaa iliyopita, naye alikuwa na jibu moja tu la kunipa daima. Kwa miaka mitano nilijitahidi kumshinda ili amjie Kristo, na kila mwaka alisema maneno yale yale, “Bado ‘halijanigusa’ moyo.” “Wewe mtu, wamaanisha nini? Ni nini ambacho hakijakugusa?” “Basi,” akasema, “sitakuwa Mkristo hata linigusa; nalo bado halijanigusa. Mimi silioni jinsi wewe ulionavyo.” “Lakini je, hujui kwamba wewe ni mwenye dhambi?” “Ndiyo, najua mimi ni mwenye dhambi.” “Basi, je, hujui kwamba Mungu ataka kukurehemu—kwamba kuna msamaha kwa Mungu? Ataka utubu na kumjia yeye.” “Ndiyo, najua hilo; lakini—bado halijanigusa.” Daima alirudia kujitegemeza juu ya jambo hilo. Mtu maskini! alishuka kaburini mwake akiwa bado katika hali ile ya kutokuamua. Mungu alimpa miaka sitini mirefu ili atubu; na yote aliyokuwa nayo ya kusema mwishoni mwa miaka ile ni kwamba “bado halikuwa limemgusa.”

Je, yuko msomaji yeyote anayengoja hisia fulani ya ajabu—wewe usiyoijua? Hakuna mahali popote katika Biblia ambapo mtu ameambiwa angoje; Mungu anakuagiza sasa utubu.

Je, wewe wadhani Mungu aweza kumsamehe mtu wakati yeye asipotaka kusamehewa? Je, angekuwa na furaha kama Mungu angemsamehe akiwa katika hali hii ya nia? Lo, kama mtu angeingia katika ufalme wa Mungu bila toba, mbingu ingekuwa jehanamu kwake. Mbingu ni mahali palipoandaliwa kwa ajili ya watu walioandaliwa nao. Kama mwanao ametenda vibaya, wala hataki kutubu, huwezi kumsamehe. Ungekuwa unamtendea udhalimu. Tuseme aenda kwenye meza yako ya kuandikia, na kuiba dola 10, na kuzitapanya zote. Urudipo nyumbani mtumishi wako akuambia yale mwanao aliyoyafanya. Wamwuliza kama ni kweli, naye akana. Lakini mwishowe wapata uthibitisho wa hakika juu yake. Hata anapoona kwamba hawezi kukana tena, hataiungama ile dhambi, bali husema atafanya hivyo tena atakapopata nafasi ya kwanza. Je, ungemwambia, “Haya, nakusamehe,” na kuliacha jambo hilo hapo? La! Lakini watu husema kwamba Mungu atawaokoa watu wote, wakitubu au wasipotubu—walevi, na wevi, na makahaba, na wazinzi, haidhuru hata kidogo. “Mungu ni mwenye rehema sana,” wasema. Rafiki mpendwa, usidanganywe na mungu wa ulimwengu huu. Palipo na toba ya kweli na kuiacha dhambi na kumgeukia Mungu, yeye atakutana nawe na kukubariki; lakini habariki kamwe hata kuwe na toba ya kweli ya moyo.

Daudi alifanya kosa la kusikitisha katika jambo hili kwa mwanawe mwasi, Absalomu. Asingeweza kumtendea mwanawe udhalimu mkubwa zaidi kuliko kumsamehe hali moyo wake haukuwa umebadilika. Hapangeweza kuwapo upatanisho wa kweli kati yao hali hapakuwa na toba. Lakini Mungu hafanyi makosa haya. Daudi aliingia matatani kwa sababu ya kosa lake la busara. Mwanawe punde si punde akamfukuza baba yake kutoka kwenye kiti cha enzi.

Akinena juu ya toba, Dk. Brooks, wa St. Louis, aeleza vema: “Toba, kwa usemi kamili, yamaanisha ‘kubadili nia au kusudi;’ kwa hiyo ni hukumu ambayo mwenye dhambi anaitamka juu ya nafsi yake mwenyewe, akiutazama upendo wa Mungu ulioonyeshwa katika kifo cha Kristo, ikiunganishwa na kuachana na kujiamini kwake kote na kumtumaini Mwokozi wa pekee wa wenye dhambi. Toba iokoayo na imani iokoayo huenda pamoja daima; wala huna haja ya kuhangaika juu ya toba kama utaamini.”

“Watu wengine hawana hakika kwamba wamekwisha ‘tubu vya kutosha.’ Kama wamaanisha kwa hili kwamba yakupasa kutubu ili kumwelekeza Mungu akurehemu, kadiri utakavyoiacha upesi toba ya namna hiyo ndivyo itakavyokuwa vema zaidi. Mungu ni mwenye rehema tayari, kama alivyoonyesha kikamilifu katika Msalaba wa Kalvari; nayo ni fedheha kubwa kwa moyo wake wa upendo kama wadhani kwamba machozi yako na uchungu wako vitamsukuma, hali hujui kwamba ‘wema wa Mungu unakuvuta upate kutubu.’ Basi si ubaya wako, bali ni wema wake ndio uongozao kwenye toba; kwa hiyo njia ya kweli ya kutubu ni kumwamini Bwana Yesu Kristo, ‘aliyetolewa kwa ajili ya makosa yetu, na kufufuka ili tuhesabiwe haki.’”

Jambo lingine. Kama iko toba ya kweli itazaa matunda. Kama tumemtenda mtu fulani vibaya hatupaswi kamwe kumwomba Mungu atusamehe, hata tuwe tayari kurudisha. Kama nimemtenda mtu yeyote udhalimu mkubwa na naweza kuurekebisha, sina haja ya kumwomba Mungu anisamehe hata niwe tayari kufanya hivyo. Tuseme nimechukua kitu kisichokuwa changu. Sina haki ya kutazamia msamaha hata nirudishe.

Nakumbuka nikihubiri katika mmojawapo wa miji yetu mikubwa, na mtu mmoja mwenye sura nzuri alinijia mwishoni. Alikuwa katika dhiki kuu ya akili. “Ukweli ni,” alisema, “mimi ni mtu niliyefuja fedha za amana. Nimechukua fedha zilizokuwa za waajiri wangu. Nawezaje kuwa Mkristo bila kuzirudisha?” “Je, unazo zile fedha?” Aliniambia kwamba hakuwa nazo zote. Alikuwa amechukua kama dola 1,500, na bado alikuwa na kama dola 900. Alisema, “Je, sikuwezi kuzichukua fedha hizo na kuingia biasharani, na kupata za kutosha kuwalipa?” Nilimwambia kwamba huo ulikuwa udanganyifu wa Shetani; kwamba hangeweza kutazamia kufanikiwa kwa fedha zilizoibwa; kwamba yampasa kurudisha zote alizokuwa nazo, na kwenda kuwaomba waajiri wake wamhurumie, na kumsamehe. “Lakini watanitia gerezani,” alisema: “Je, huwezi kunipa msaada wowote?” “La; ni lazima urudishe zile fedha kabla ya kutazamia kupata msaada wowote kutoka kwa Mungu.” “Ni jambo gumu kidogo,” alisema. “Ndiyo, ni gumu; lakini kosa kuu lilikuwa katika kutenda ubaya hapo kwanza.”

Mzigo wake ukawa mzito hivyo hata ukawa usiovumilika. Alinikabidhi zile fedha—dola 950 na senti kadhaa—na kuniomba nizipeleke kwa waajiri wake. Jioni iliyofuata wale waajiri wawili pamoja nami mwenyewe tulikutana katika chumba cha pembeni cha kanisa lile. Nikaziweka zile fedha chini, na kuwaarifu kwamba zilitoka kwa mmoja wa wafanyakazi wao. Niliwaeleza habari, na kusema kwamba alitaka rehema kwao, si haki. Machozi yaliteremka mashavuni mwa wanaume hao wawili, wakasema, “Msameheni! Ndiyo, tutafurahi kumsamehe.” Nilishuka chini na kumleta juu. Baada ya kuungama hatia yake na kusamehewa, sote tulipiga magoti na kuwa na mkutano mbarikiwa wa maombi. Mungu alikutana nasi na kutubariki hapo.

Palikuwa na rafiki yangu mmoja ambaye muda fulani uliopita alikuwa amemjia Kristo naye alitaka kujiweka wakfu yeye mwenyewe na mali yake yote kwa Mungu. Zamani alikuwa na mapatano na Serikali, na alikuwa amewapunja. Jambo hili lilikuja kumbukumbuni alipoongoka, na dhamiri yake ikamsumbua. Alisema, “Nataka kuiweka wakfu mali yangu, lakini yaonekana kana kwamba Mungu hataipokea.” Alikuwa na pambano la kutisha; dhamiri yake iliendelea kuinuka na kumpiga. Mwishowe aliandika hundi ya dola 1,500 na kuituma kwa Hazina ya Serikali ya Marekani. Aliniambia kwamba alipata baraka kubwa namna hiyo alipokwisha fanya hivyo. Hiyo ndiyo ilikuwa kuzaa “matunda yapatanayo na toba.” Naamini watu wengi sana wanamlilia Mungu wapate nuru; nao hawaipati kwa sababu si waaminifu.

Niliwahi kuhubiri mahali fulani, na mtu mmoja akanijia aliyekuwa na umri wa miaka thelathini na miwili tu, lakini nywele zake zilikuwa na mvi nyingi. Alisema, “Nataka uangalie kwamba nywele zangu zina mvi, nami nina miaka thelathini na miwili tu. Kwa miaka kumi na miwili nimekuwa nikibeba mzigo mkubwa.” “Haya,” nikasema, “ni nini?” Alitazama huku na huku pande zote kana kwamba anaogopa mtu fulani asije akamsikia. “Basi,” akajibu, “baba yangu alikufa akamwachia mama yangu gazeti la wilaya, wala hakumwachia kingine ila hilo: hicho ndicho alichokuwa nacho chote. Baada ya kufa kwake lile gazeti likaanza kufifia; nami nikaona mama yangu anazama upesi katika hali ya uhitaji mkubwa. Jengo na gazeti vilikuwa vimewekewa bima ya dola elfu moja, nami nilipokuwa na miaka ishirini niliwasha moto katika jengo lile, nikapata zile dola elfu moja, nikampa mama yangu. Kwa miaka kumi na miwili dhambi hiyo imekuwa ikinisumbua. Nimejaribu kuizamisha kwa kujifurahisha katika anasa na dhambi; nimemlaani Mungu; nimeingia katika kutokuamini; nimejaribu kuthibitisha kwamba Biblia si kweli; nimefanya kila jambo nililoweza: lakini miaka hii yote nimekuwa nikiteswa.” Nikasema, “Kuna njia ya kutoka katika jambo hilo.” Akauliza, “Ni jinsi gani?” Nikasema, “Rudisha ulichokichukua. Na tuketi chini tuihesabu riba, kisha uilipe Kampuni zile fedha.” Ingekufaa wewe kuuona uso wa mtu yule ukiangaza alipoona kwamba kulikuwa na rehema kwa ajili yake. Alisema angefurahi kuzirudisha zile fedha pamoja na riba yake kama tu angeweza kusamehewa.

Wapo watu wengi leo walio gizani na katika utumwa kwa sababu hawako tayari kugeuka na kuziacha dhambi zao na kuziungama; nami sijui jinsi mtu awezavyo kutumaini kwamba atasamehewa kama hayuko tayari kuziungama dhambi zake.

Kumbuka kwamba sasa ndiyo siku pekee ya rehema utakayokuwa nayo kamwe. Waweza kutubu sasa hivi, na kumbukumbu ile ya kutisha ikafutwa kabisa. Mungu angoja ili akusamehe; naye anatafuta kukuleta wewe kwake mwenyewe. Lakini nadhani Biblia yafundisha waziwazi kwamba hakuna toba baada ya maisha haya. Wako wengine wanaokuambia juu ya uwezekano wa kuwako toba humo kaburini; lakini mimi silioni jambo hilo katika Maandiko. Nimeitazama Biblia yangu kwa uangalifu mkubwa, wala siwezi kuona kwamba mtu atapata nafasi nyingine ya kuokoka.

Kwa nini aombe muda zaidi? Wewe una wakati wa kutosha wa kutubu sasa hivi. Waweza kugeuka na kuziacha dhambi zako dakika hii hasa kama utataka. Mungu asema: “Sipendezwi na kufa kwake afaye; basi geukeni, mkaishi” (Ezekieli 18:32).

Kristo alisema, kwamba yeye “sikuja kuwaita wenye haki, bali wenye dhambi wapate kutubu.” Je, wewe ni mwenye dhambi? Basi wito wa kutubu umeelekezwa kwako. Chukua nafasi yako mavumbini miguuni pa Mwokozi, na uikiri hatia yako. Sema, kama yule mtoza ushuru wa zamani, “Ee Mungu, uniwie radhi mimi mwenye dhambi!” nawe uone jinsi atakavyokusamehe na kukubariki upesi. Hata atakuhesabia haki na kukuhesabu kuwa mwenye haki, kwa sababu ya haki yake yeye aliyezichukua dhambi zako katika mwili wake mwenyewe juu ya Msalaba.

Wapo wengine labda wanaojidhania kuwa wenye haki; na kwamba, kwa hiyo, hawana haja ya kutubu na kuiamini Injili. Wao ni kama yule Farisayo katika mfano ule, aliyemshukuru Mungu kwa kuwa hakuwa kama watu wengine walivyo—“wanyang’anyi, wadhalimu, wazinzi, wala kama huyu mtoza ushuru;” na aliyeendelea kusema, “Mimi nafunga mara mbili kwa juma; hutoa zaka katika mapato yangu yote.” Basi hukumu juu ya watu wa namna hiyo wanaojidai haki ni nini? “Nawaambia, huyu [yule mtoza ushuru maskini, mnyenyekevu, aliyetubu] alishuka kwenda nyumbani kwake amehesabiwa haki kuliko yule” (Luka 18:11-14). “Hakuna mwenye haki hata mmoja.” “Wote wamefanya dhambi, na kupungukiwa na utukufu wa Mungu” (Warumi 3:10, 23). Mtu yeyote asiseme kwamba yeye hana haja ya kutubu. Kila mmoja na achukue nafasi yake ya kweli—ile ya mwenye dhambi; ndipo Mungu atakapomwinua hata mahali pa msamaha na kuhesabiwa haki. “Kwa maana kila ajikwezaye atadhiliwa, naye ajinyenyekeshaye atakwezwa” (Luka 14:11).

Kila mahali Mungu aionapo toba ya kweli moyoni hukutana na nafsi ile.

Nilikuwa huko Colorado, nikihubiri injili muda fulani uliopita, nami nikasikia jambo fulani lililonigusa moyo sana. Gavana wa Jimbo alikuwa akipita katika gereza, na katika chumba kimoja alimkuta kijana ambaye dirisha lake lilikuwa limejaa maua, ambayo yalionekana kuwa yametunzwa kwa uangalifu wa upole sana. Gavana akamtazama yule mfungwa, kisha akayatazama yale maua, akauliza kwamba yalikuwa ya nani. “Haya ni maua yangu,” akasema yule mfungwa maskini. “Je, wapenda maua?” “Ndiyo, bwana.” “Umekaa hapa muda gani?” Akamwambia kwamba alikuwa amekaa miaka fulani mingi: alikuwa amefungwa kwa hukumu ndefu. Gavana alishangaa kumkuta akipenda maua namna hiyo, naye akasema, “Je, waweza kuniambia kwa nini wayapenda maua haya sana namna hii?” Kwa msisimko mwingi akajibu, “Mama yangu alipokuwa hai aliyathamini sana maua; nami nilipokuja hapa nilidhani kama ningekuwa na haya yangenikumbusha mama yangu.” Gavana alipendezwa mno hata akasema, “Haya, kijana, kama wamthamini mama yako namna hiyo nadhani utauthamini uhuru wako,” naye akamsamehe papo hapo.

Mungu aliponapo ua lile zuri la toba ya kweli likichipuka moyoni mwa mtu, ndipo wokovu unapomjia mtu yule.