Mwokozi wa Kimungu

“Wewe ndiwe Kristo, Mwana wa Mungu aliye hai.”
(Mathayo 16:1; Yohana 6:69.)

Twakutana na kundi fulani la watafutaji ambao hawauamini Uungu wa Kristo. Kuna mafungu mengi ya Maandiko yatakayotoa nuru juu ya jambo hili.

Katika 1 Wakorintho 15:47, twaambiwa: “Mtu wa kwanza atoka katika nchi, ni wa udongo. Mtu wa pili atoka mbinguni.”

Katika 1 Yohana 5:20: “Nasi twajua kwamba Mwana wa Mungu amekwisha kuja, naye ametupa akili kwamba tumjue yeye aliye wa kweli; nasi tumo ndani yake yeye aliye wa kweli, yaani, ndani ya Mwana wake Yesu Kristo. Huyu ndiye Mungu wa kweli, na uzima wa milele.”

Tena katika Yohana 17:3: “Na uzima wa milele ndio huu, wakujue wewe, Mungu wa pekee wa kweli; na Yesu Kristo uliyemtuma.”

Na kisha, katika Marko 14:60: “Kuhani mkuu akasimama katikati, akamwuliza Yesu, akisema, Je, hujibu neno lolote? Ni nini hiki hawa wanachokishuhudia juu yako? Lakini yeye akanyamaza, wala hakujibu neno. Kuhani mkuu akamwuliza tena, akamwambia, Wewe ndiwe Kristo, Mwana wake Mtukufu? Yesu akasema, Mimi ndiye: nanyi mtamwona Mwana wa Adamu ameketi mkono wa kuume wa nguvu, akija na mawingu ya mbinguni. Ndipo kuhani mkuu akararua nguo zake, akasema, Tuna haja gani tena ya mashahidi? Mmesikia hicho kufuru: ninyi mwaonaje? Nao wote wakamhukumu kwamba amestahili kuuawa.”

Basi kilichonifanya niuamini Uungu wa Kristo ni hiki: sikujua mahali pa kumweka Kristo, wala nifanye nini naye, kama hakuwa wa Kimungu. Nilipokuwa mvulana mdogo nilidhani kwamba alikuwa mtu mwema tu kama Musa, au Yusufu, au Ibrahimu. Hata nilidhani kwamba alikuwa mtu aliye bora kuliko wote waliopata kuishi hapa duniani. Lakini baadaye nikaona kwamba Kristo alikuwa na dai lililo kuu zaidi ya hilo. Alidai kuwa Mungu-Mtu, kuwa wa Kimungu; na kwamba alitoka mbinguni. Alisema: “Kabla Ibrahimu hajakuwako, mimi niko” (Yohana 8:58). Sikuweza kulielewa jambo hili; nami nikasukumwa kufikia hitimisho hili—nami namtaka mtu yeyote mnyoofu alikatae hitimisho hili, au aikabili hoja hii—kwamba Yesu Kristo ni mdanganyifu na mlaghai, au yeye ni Mungu-Mtu—Mungu aliyedhihirishwa katika mwili. Nayo ni kwa sababu hizi. Amri ya kwanza ni, “Usiwe na miungu mingine ila mimi” (Kutoka 20:2). Tazama mamilioni ya watu katika Jumuiya yote ya Kikristo wanaomwabudu Yesu Kristo kuwa Mungu. Kama Kristo si Mungu basi haya yote ni kuabudu sanamu. Sisi sote tuna hatia ya kuivunja amri ya kwanza kama Yesu Kristo alikuwa mwanadamu tu—kama alikuwa kiumbe kilichoumbwa, wala si kile anachodai kuwa.

Watu wengine, wasiokubali Uungu wake, husema kwamba alikuwa mtu aliye bora kuliko wote waliopata kuishi; lakini kama hakuwa wa Kimungu, kwa sababu hiyo hiyo hapaswi kuhesabiwa kuwa mtu mwema, kwa maana alidai heshima na utukufu ambao watu hawa wenyewe wanatangaza kwamba hakuwa na haki wala madai yoyote juu yake. Jambo hilo lenyewe lingemhesabu yeye kuwa mlaghai.

Wengine tena husema kwamba yeye alidhani kuwa alikuwa wa Kimungu, lakini kwamba alikuwa amedanganyika. Ni kana kwamba Yesu Kristo alichukuliwa na upotovu na udanganyifu, hata akadhani kwamba alikuwa mtu mkuu zaidi ya alivyokuwa! Mimi sikuweza kuwaza wazo lililo dhalili zaidi juu ya Yesu Kristo kuliko wazo hilo. Hili halingemfanya kuwa mdanganyifu tu; bali lingemfanya kuwa mtu aliyerukwa na akili, asiyejua yeye mwenyewe alikuwa nani, wala mahali alipotoka. Basi kama Yesu Kristo hakuwa kile alichodai kuwa, yaani, Mwokozi wa ulimwengu; na kama hakutoka mbinguni kweli, basi alikuwa mlaghai mkubwa.

Lakini mtu yeyote awezaje kuyasoma maisha ya Yesu Kristo na kumfanya kuwa mlaghai? Mtu kwa kawaida huwa na kusudi fulani linalomfanya kuwa mdanganyifu. Basi kusudi la Kristo lilikuwa nini? Alijua vema kwamba njia aliyokuwa akiifuata ingempeleka mpaka msalabani; kwamba jina lake lingetupwa nje kama jina ovu; na kwamba wengi wa wafuasi wake wangeitwa kuyatoa maisha yao kwa ajili yake. Karibu kila mmoja wa mitume alikuwa shahidi aliyeuawa; nao walihesabiwa kuwa takataka na uchafu katikati ya watu wote. Kama mtu ni mdanganyifu, huwa na kusudi fulani nyuma ya unafiki wake. Lakini shabaha ya Kristo ilikuwa nini? Kumbukumbu lasema kwamba “alikwenda huko na huko akitenda mema.” Hii si kazi ya mdanganyifu hata kidogo. Usimwache adui wa nafsi yako akudanganye.

Tena katika Yohana 5:21 na mistari ifuatayo twasoma: “Maana kama Baba awafufuavyo wafu na kuwahuisha, vivyo hivyo na Mwana awahuisha wale awapendao. Kwa maana Baba hamhukumu mtu yeyote, bali amempa Mwana hukumu yote; ili wote wamheshimu Mwana kama vile wanavyomheshimu Baba. Asiyemheshimu Mwana, hamheshimu Baba aliyempeleka.”

Basi angalia jambo hili: kwa sheria ya Kiyahudi kama mtu alikuwa mkufuru ilimpasa auawe; na tukidhani kwamba Kristo alikuwa mwanadamu tu, kama maneno haya si kufuru sijui ni wapi utakapoyakuta. “Asiyemheshimu Mwana, hamheshimu Baba.” Hayo ni maneno ya kufuru kabisa kama Kristo si wa Kimungu. Kama Musa, au Eliya, au Elisha, au mtu mwingine yeyote afaye angesema, “Ni lazima mniheshimu mimi kama vile mnavyomheshimu Mungu;” na hivyo kujiweka mwenyewe sawa na Mungu, jambo hilo lingekuwa kufuru kabisa.

Wayahudi walimwua Kristo kwa sababu walisema kwamba hakuwa kile alichodai kuwa. Ni juu ya ushuhuda huo ndipo alipowekwa chini ya kiapo. Kuhani mkuu alisema: “Nakuapisha kwa Mungu aliye hai, utuambie kama wewe ndiwe Kristo, Mwana wa Mungu” (Mathayo 26:63). Na Wayahudi walipomzunguka pande zote wakasema, “Utatuweka katika shaka hata lini? Kama wewe ndiwe Kristo, tuambie waziwazi.” Yesu akasema, “Mimi na Baba tu umoja.” Ndipo Wayahudi wakaokota mawe tena ili wampige kwa mawe. (Yohana 10:24-33.) Walisema kwamba hawakutaka kusikia neno lingine zaidi, kwa maana hiyo ilikuwa kufuru. Ni kwa sababu ya kujitangaza mwenyewe kuwa Mwana wa Mungu ndipo alipohukumiwa na kuuawa. (Mathayo 26:63-66).

Basi kama Yesu Kristo alikuwa mwanadamu tu, Wayahudi walitenda haki, kwa kadiri ya sheria yao wenyewe, katika kumwua yeye. Katika Mambo ya Walawi 24:16, twasoma: “Naye alikufuruye jina la Bwana, hakika atauawa; mkutano wote watampiga kwa mawe; mgeni kadhalika na mzalia, akikufuru jina la Bwana, atauawa.”

Sheria hii iliwalazimu wao kumwua kila mtu aliyekufuru. Ni kutamka kwake kwamba alikuwa wa Kimungu ndiko kulikomgharimu maisha yake; na kwa sheria ya Musa alipaswa kuipata adhabu ya kifo. Katika Yohana 16:15, Kristo asema, “Na yote aliyo nayo Baba ni yangu: kwa hiyo nalisema ya kwamba atatwaa katika yaliyo yangu, na kuwapasha habari.” Basi angewezaje kuwa mtu mwema tu na kunena maneno kama hayo?

Hakuna shaka iliyowahi kuingia akilini mwangu juu ya jambo hili tangu nilipoongoka.

Mwenye dhambi mmoja aliyejulikana sana kwa uovu wake aliwahi kuulizwa angewezaje kuuthibitisha Uungu wa Kristo. Jibu lake lilikuwa, “Lo, ameniokoa mimi; na huo ni uthibitisho mzuri kabisa, sivyo?”

Mtu mmoja asiyeamini aliniambia pindi moja, “Nimekuwa nikiyachunguza maisha ya Yohana Mbatizaji, Bwana Moody. Kwa nini humhubiri yeye? Alikuwa mtu mkuu zaidi kuliko Kristo. Ungefanya kazi kubwa zaidi.” Nikamwambia, “Rafiki yangu, wewe endelea kumhubiri Yohana Mbatizaji; nami nitakufuata na kumhubiri Kristo: nasi tutaona ni nani kati yetu atakayefanya wema mwingi zaidi.” “Wewe ndiwe utakayefanya wema mwingi zaidi,” akasema, “kwa sababu watu wamejaa ushirikina mwingi.” Lo! Yohana alikatwa kichwa; na wanafunzi wake wakaomba mwili wake wakauzika: lakini Kristo amefufuka kutoka kwa wafu; “amepaa juu; amechukua mateka; amepokea vipawa kwa ajili ya wanadamu.” (Zaburi 68:18.)

Kristo wetu yu hai. Watu wengi hawajagundua bado kwamba Kristo amekwisha fufuka kutoka kaburini. Wanamwabudu Mwokozi aliyekufa, kama alivyofanya Mariamu, aliyesema, “Wamemwondoa Bwana wangu; wala mimi sijui walikomweka.” (Yohana 20:13.) Hiyo ndiyo shida iliyo kwa wale wanaoutilia shaka Uungu wa Bwana wetu.

Kisha tazama Mathayo 18:20. “Kwa kuwa walipo wawili watatu wamekusanyika kwa jina langu, nami nipo papo hapo katikati yao.” “Nami nipo papo hapo.” Basi sasa, kama yeye ni mwanadamu tu, awezaje kuwapo pale? Haya yote ni mafungu yenye nguvu.

Tena tazama katika Mathayo 28:18. “Yesu akaja kwao, akasema nao, akawaambia, Nimepewa mamlaka yote mbinguni na duniani.” Je, angeweza kuwa mwanadamu tu na kunena maneno ya namna hiyo? “Nimepewa mamlaka yote mbinguni na duniani!”

Kisha tena katika Mathayo 28:20. “Na kuwafundisha kuyashika yote niliyowaamuru ninyi; na tazama, mimi nipo pamoja nanyi siku zote, hata ukamilifu wa dahari.” Kama alikuwa mwanadamu tu, angewezaje kuwa pamoja nasi sisi sote? Lakini yeye asema, “Mimi nipo pamoja nanyi siku zote, hata ukamilifu wa dahari!”

Kisha tena tazama katika Marko 2:7. “Mbona mtu huyu anasema hivi? Anakufuru. Ni nani awezaye kusamehe dhambi isipokuwa mmoja, ndiye Mungu? Mara Yesu akafahamu rohoni mwake kwamba wanafikiri hivyo nafsini mwao, akawaambia, Mbona mnafikiri hivi mioyoni mwenu? Lililo jepesi ni lipi, kumwambia mwenye kupooza, Umesamehewa dhambi zako, au kumwambia, Ondoka, ujitwike godoro lako, uende?”

Watu wengine watakukabili na kusema, “Je, Elisha naye hakuwafufua wafu?” Lakini angalia kwamba katika visa vile vichache sana ambavyo wanadamu wamewafufua wafu, walifanya hivyo kwa nguvu za Mungu. Walimlilia Mungu ili yeye mwenyewe alitende jambo hilo. Lakini Kristo alipokuwa hapa duniani hakumwomba Baba awarudishe wafu waishi tena. Alipokwenda nyumbani kwa Yairo yeye mwenyewe alisema, “Msichana, nakuambia, Inuka.” (Marko 5:41.)

Yeye alikuwa na nguvu za kutoa uzima. Walipokuwa wakimchukua nje yule kijana wa Naini alimhurumia yule mama mjane, akaja akaligusa jeneza lake akasema, “Kijana, nakuambia, Inuka.” (Luka 7:14.)

Yeye alinena neno tu; na wafu wakainuka.

Na alipomfufua Lazaro aliita kwa sauti kuu, “Lazaro, njoo huku nje!” (Yohana 11:43.) Naye Lazaro akasikia, akatoka nje.

Mtu fulani amesema, Ilikuwa jambo jema kwamba Lazaro alitajwa kwa jina lake, ama sivyo wafu wote waliokuwa ndani ya mlio wa sauti ya Kristo wangeinuka mara moja.

Katika Yohana 5:25, Yesu asema: “Amin, amin, nawaambia, Saa inakuja, na sasa ipo, wafu watakapoisikia sauti ya Mwana wa Mungu, na wale waisikiao watakuwa hai.” Ingekuwa kufuru kama nini kunena maneno hayo, kama hakuwa wa Kimungu! Uthibitisho ni mwingi kupita kiasi, kama wewe utalichunguza tu Neno la Mungu.

Na kisha kuna jambo lingine tena—hakuna mtu mwema yeyote ila Yesu Kristo aliyewahi kumruhusu mtu yeyote amwabudu. Jambo hilo lilipofanywa yeye hakumkemea kamwe yule aliyemwabudu. Katika Yohana 9:38, twasoma kwamba yule kipofu alipoonwa na Kristo alisema, “Naamini, Bwana. Naye akamsujudia.” Naye Bwana hakumkemea hata kidogo.

Kisha tena, Ufunuo 22:6 na mistari ifuatayo, wasomeka hivi: “Kisha akaniambia, Maneno haya ni amini na kweli. Naye Bwana, Mungu wa roho za manabii, alimtuma malaika wake kuwaonyesha watumwa wake mambo ambayo hayana budi kutukia upesi. Na tazama, naja upesi. Heri yeye ayashikaye maneno ya unabii wa kitabu hiki. Nami Yohana ndimi niliyeyasikia na kuyaona mambo hayo. Nami nilipoyasikia na kuyaona, nalianguka nimwabudu mbele ya miguu ya malaika yule mwenye kunionyesha hayo. Naye akaniambia, Angalia, usifanye hivi; mimi ni mjoli wako, na wa ndugu zako manabii, na wa wale wayashikao maneno ya kitabu hiki. Msujudie Mungu.”

Twaona hapa kwamba hata malaika yule hakumruhusu Yohana amwabudu. Hata malaika kutoka mbinguni! Na kama Gabrieli angeshuka hapa kutoka mbele za uso wa Mungu ingekuwa dhambi kumwabudu yeye, au serafi yeyote, au kerubi yeyote, au Mikaeli, au malaika mkuu yeyote.

“Msujudie Mungu!” Na kama Yesu Kristo hakuwa Mungu aliyedhihirishwa katika mwili tuna hatia ya kuabudu sanamu katika kumwabudu yeye. Katika Mathayo 14:33, twasoma: “Nao waliokuwa ndani ya chombo wakaja na kumsujudia, wakisema, Hakika wewe u Mwana wa Mungu.” Naye hakuwakemea hata kidogo.

Na katika Mathayo 8:2, nasi twasoma pia: “Na tazama, akaja mtu mwenye ukoma akamwendea na kumsujudia, akisema, Bwana, ukitaka, waweza kunitakasa.”

Katika Mathayo 15:25: “Ndipo yule mwanamke akaja na kumsujudia, akisema, Bwana, unisaidie!”

Kuna mafungu mengine mengi; lakini nayatoa haya nikiona kwa maoni yangu kwamba yatosha kuuthibitisha bila shaka yoyote Uungu wa Bwana wetu.

Katika sura ya kumi na nne ya Matendo twaambiwa kwamba wapagani wa Listra walikuja na mataji ya maua wakataka kuwatolea dhabihu Paulo na Barnaba kwa sababu walikuwa wamemponya mtu aliyekuwa kiwete; lakini wainjilisti wale wakararua nguo zao na kuwaambia Walistra hao kwamba wao walikuwa wanadamu tu, wala hawakupaswa kuabudiwa; kana kwamba jambo hilo lilikuwa dhambi kubwa. Na kama Yesu Kristo ni mwanadamu tu, sisi sote tuna hatia ya dhambi kubwa katika kumwabudu yeye.

Lakini kama yeye ni, kama sisi tuaminivyo, Mwana pekee wa Mungu aliye mpendwa wake, basi na tuyakubali madai yake juu yetu; na tuipumzikie kazi yake ipatanishayo yote, na tutoke kwenda kumtumikia siku zote za maisha yetu.