Maneno ya Shauri

“Hatavunja mwanzi uliopondeka.”—Isaya 42:3; Mathayo 12:20.

Ni jambo la hatari kwa wale wanaoutafuta wokovu kuegemea uzoefu wa watu wengine. Wengi wanangoja urudiwe kwao ule uzoefu wa babu yao au wa bibi yao. Nilikuwa na rafiki aliyeongoka shambani; naye adhani kwamba mji mzima wapaswa kushuka kwenda katika malisho yale na kuongoka humo. Mwingine aliongoka chini ya daraja; naye adhani kwamba kama mtafutaji yeyote angekwenda pale angemwona Bwana. Jambo lililo bora zaidi kwa mtu mwenye wasiwasi ni kwenda moja kwa moja kwenye Neno la Mungu. Kama wako watu wowote ulimwenguni ambao Neno lapaswa kuwa la thamani kuu kwao ni wale waulizao jinsi ya kuokoka.

Kwa mfano mtu aweza kusema, “Mimi sina nguvu.” Basi na ageukie Warumi 5:6. “Kwa maana hapo tulipokuwa hatuna nguvu, wakati ulipotimia, Kristo alikufa kwa ajili ya waovu.” Ni kwa sababu hatuna nguvu ndiyo maana twamhitaji Kristo. Amekuja kuwapa nguvu walio dhaifu.

Mwingine tena aweza kusema, “Mimi siwezi kuona.” Kristo asema, “Mimi ndimi nuru ya ulimwengu” (Yohana 8:12). Alikuja, si kutoa nuru tu, bali “kuyafumbua macho ya vipofu” (Isaya 42:7).

Mwingine aweza kusema, “Sidhani kwamba mtu aweza kuokoka mara moja.” Mtu aliyeshikilia maoni hayo alikuwa katika chumba cha kuulizia usiku mmoja; nami nikayavuta macho yake kwenye Warumi 6:23. “Mshahara wa dhambi ni mauti; bali karama ya Mungu ni uzima wa milele katika Kristo Yesu Bwana wetu.” Je, yachukua muda gani kuipokea karama? Ni lazima uwepo wakati ambapo huna, na mwingine ambapo unayo—wakati ambapo ni mali ya mtu mwingine, na uliofuata ambapo ni yako. Haichukui miezi sita ili kuupata uzima wa milele. Lakini katika hali nyingine yaweza kuwa kama punje ya haradali, ndogo sana mwanzoni. Watu wengine huongoka taratibu hivi kwamba, kama ilivyo nuru ya asubuhi, haiwezekani kutambua mapambazuko yalipoanza; hali kwa wengine, ni kama kumetameta kwa kimondo, na ile kweli huwajia ghafula.

Mimi nisingevuka hata barabara ili kuthibitisha ni wakati gani nilipoongoka; bali jambo lililo la maana ni mimi kujua kwamba kwa hakika nimekwisha ongoka kweli.

Yaweza kuwa mtoto amelelewa kwa uangalifu mkubwa kiasi kwamba haiwezekani kutambua ni lini kuzaliwa kwake upya kulipoanza; lakini ni lazima ulikuwapo wakati fulani ambapo badiliko lile lilitokea, naye alipofanywa mshirika wa tabia ya Uungu.

Watu wengine hawaamini kwamba kuna kuongoka kwa ghafula. Lakini nitamtaka mtu yeyote anionyeshe kuongoka kokote katika Agano Jipya kusikokuwa kwa papo hapo. “Yesu alipokuwa akipita akamwona Lawi, mwana wa Alfayo, ameketi forodhani, akamwambia, ‘Nifuate’: naye akaondoka, akamfuata” (Mathayo 9:9). Hakuna jambo lingeweza kuwa la ghafula zaidi ya hilo.

Zakayo, yule mtoza ushuru, alitafuta kumwona Yesu; na kwa sababu alikuwa mfupi wa kimo alipanda juu ya mti. Yesu alipofika mahali pale alitazama juu akamwona, akasema, “Zakayo, shuka upesi” (Luka 19:5). Kuongoka kwake ni lazima kulitokea mahali fulani kati ya ule utanzu na ardhi. Twaambiwa kwamba alimpokea Yesu kwa furaha, akasema, “Tazama, Bwana, nusu ya mali yangu nawapa maskini; na ikiwa nimenyang’anya mtu kitu kwa hila, namrudishia mara nne” (Luka 19:8). Ni wachache sana siku hizi wangeweza kusema hivyo kuwa uthibitisho wa kuongoka kwao.

Nyumba nzima ya Kornelio iliongoka kwa ghafula; kwa maana Petro alipokuwa akimhubiria Kristo yeye pamoja na wenzake wote, Roho Mtakatifu akawashukia juu yao, nao wakabatizwa. (Matendo 10.)

Katika siku ya Pentekoste watu elfu tatu walilipokea Neno kwa furaha. Hawakuongoka tu, bali walibatizwa siku ile ile. (Matendo 2.)

Na Filipo alipozungumza na yule towashi, walipokuwa wakiendelea na safari yao, yule towashi akamwambia Filipo, “Tazama, maji haya; ni nini kinachonizuia nisibatizwe?” Hakuna kitu chochote kilichomzuia. Filipo akasema, “Ukiamini kwa moyo wako wote, yawezekana.” Nao wote wawili wakashuka majini; na yule mtu mwenye mamlaka kuu chini ya Kandake, malkia wa Kushi, akabatizwa, akaenda zake akifurahi. (Matendo 8:26-38.) Utakuta katika Maandiko yote kwamba kuongoka kulikuwa kwa ghafula na kwa papo hapo.

Mtu mmoja amekuwa na tabia ya kuiba fedha kwa mwajiri wake. Tuseme amechukua dola 1,000 katika miezi kumi na miwili; je, tumwambie achukue dola 500 mwaka ufuatao, na pungufu mwaka unaofuata, na unaofuata, hata katika miaka mitano kiasi kilichochukuliwa kiwe dola 50 tu? Hiyo ingekuwa kwa kanuni ile ile ya kuongoka kwa taratibu.

Kama mtu wa namna hiyo angeletwa mbele ya mahakama na kusamehewa, kwa sababu hakuweza kuyabadili maisha yake mara moja, jambo hilo lingehesabiwa kuwa mwenendo wa ajabu sana.

Lakini Biblia yasema, “Mwibaji asiibe tena” (Waefeso 4:28). Ni kama ile amri ya jeshi isemayo, “geuka kabisa upande wa nyuma!” Tuseme mtu ana tabia ya kulaani mara mia moja kwa siku: je, tumshauri kwamba asitamke zaidi ya viapo tisini siku ifuatayo, na themanini siku inayofuata; ili hatimaye baada ya muda aweze kuiacha tabia hiyo? Mwokozi asema, “Msiape kabisa.” (Mathayo 5:34.)

Tuseme mtu mwingine ana tabia ya kulewa na kumpiga mkewe mara mbili kila mwezi; kama angefanya hivyo mara moja tu kwa mwezi, na kisha mara moja tu katika kila miezi sita, jambo hilo lingekuwa, kwa msingi ule ule, la busara kama vile kulivyo kuongoka kwa taratibu. Tuseme Anania angetumwa kwa Paulo, alipokuwa njiani kwenda Dameski akipumua vitisho na uchinjaji juu ya wanafunzi, na kuwatupa gerezani, ili amwambie asiwaue wengi kama alivyokuwa amekusudia; na kuiacha chuki ife moyoni mwake taratibu, lakini si mara moja. Tuseme angeambiwa kwamba haitafaa hata kidogo kuacha kupumua vitisho na uchinjaji, na kuanza kumhubiri Kristo mara moja, kwa sababu wanafalsafa wangesema kwamba badiliko lilikuwa la ghafula mno hata lisingedumu; hii ingekuwa namna ile ile ya hoja itumiwayo na wale wasioamini kuongoka kwa papo hapo.

Kisha kuna kundi lingine ambalo husema kwamba wanaogopa kwamba hawatavumilia hata mwisho. Hili ni kundi kubwa, nalo ni kundi lenye matumaini mema sana. Napenda kumwona mtu asiyejiamini nafsi yake mwenyewe. Ni jambo jema kuwafanya watu wa namna hiyo wamtazame Mungu, na kukumbuka kwamba si yeye amshikaye Mungu, bali ni Mungu ndiye amshikaye yeye. Wengine wanataka wamshike Kristo; lakini jambo lenyewe ni kumfanya Kristo akushike wewe kwa jibu la maombi. Hao na waisome Zaburi 121; “Nitayainua macho yangu niitazame milima; msaada wangu utatoka wapi? Msaada wangu u katika Bwana, aliyezifanya mbingu na nchi. Hataacha mguu wako usogezwe; yeye akulindaye hatasinzia. Tazama, yeye asinziae wala hatalala usingizi, ndiye mlinzi wa Israeli. Bwana ndiye mlinzi wako; Bwana ndiye uvuli wako mkono wako wa kuume. Jua halitakupiga mchana, wala mwezi wakati wa usiku. Bwana atakulinda na maovu yote; atakulinda nafsi yako. Bwana atakulinda utokapo na uingiapo, tangu sasa na hata milele.”

Mtu fulani ameiita hiyo zaburi ya msafiri. Ni zaburi nzuri kwa ajili yetu sisi tulio wasafiri katika ulimwengu huu; nayo ni zaburi tuipasayo kuijua vema.

Mungu aweza kufanya yale aliyoyafanya hapo awali. Alimlinda Yusufu katika Misri; na Musa mbele ya Farao; na Danieli katika Babeli; naye alimwezesha Eliya kusimama mbele ya Ahabu katika siku ile ya giza. Nami nashukuru sana kwamba hawa niliowataja walikuwa watu wenye tabia moja na sisi. Ni Mungu ndiye aliyewafanya kuwa wakuu hivyo. Anachohitaji mwanadamu ni kumtazama Mungu. Imani ya kweli halisi ni udhaifu wa mwanadamu ukiegemea nguvu za Mungu. Mwanadamu asipokuwa na nguvu, akimwegemea Mungu huwa mwenye nguvu. Shida ni kwamba tuna nguvu nyingi mno na kujiamini wenyewe kupita kiasi.

Tena katika Waebrania 6:17, 18: “Katika neno hilo Mungu, akitaka kuwaonyesha zaidi sana warithi wa ahadi jinsi mashauri yake yasivyoweza kubadilika, alitia kiapo kati yake; ili kwa vitu viwili visivyoweza kubadilika, ambavyo katika hivyo Mungu hawezi kusema uongo, tupate faraja iliyo imara, sisi tuliokimbia kuyashika matumaini yaliyowekwa mbele yetu; tuliyo nayo kama nanga ya roho, iliyo salama na imara, tena inayoingia hata mle mlipo ndani ya pazia; ambako Yesu ameingia kwa ajili yetu, mtangulizi wetu, amekuwa kuhani mkuu hata milele kwa mfano wa Melkizedeki.”

Basi hii ni mistari ya thamani kuu kwa wale waogopao kuanguka, wale waogopao kwamba hawatavumilia hata mwisho. Ni kazi ya Mungu yeye mwenyewe kushika. Ni shughuli ya Mchungaji kuwalinda kondoo. Ni nani aliyewahi kusikia habari za kondoo akienda kumrudisha mchungaji? Watu wana wazo kwamba yawapasa kujilinda wao wenyewe na kumlinda Kristo pia. Lakini hilo ni wazo la uongo. Ni kazi ya Mchungaji kuwaangalia, na kuwatunza wale wamtumainio. Naye ameahidi kufanya hivyo. Niliwahi kusikia kwamba nahodha mmoja wa meli alipokuwa akifa alisema, “Utukufu kwa Mungu; nanga inashika.” Alimtumaini Kristo. Nanga yake ilikuwa imeushika mwamba imara. Mwairishi mmoja alisema, pindi moja, kwamba “yeye alitetemeka; lakini ule Mwamba haukutetemeka kamwe.” Sisi twataka kupata mahali imara pa kuweka miguu yetu.

Katika 2 Timotheo 1:12 Paulo asema: “Najua ni nani niliyemwamini, tena nina hakika ya kwamba yeye aweza kukilinda kile nilichokiweka amana kwake hata siku ile.” Huo ndio uliokuwa usadikisho wa Paulo.

Wakati wa ile vita ya uasi iliyopita, mmoja wa makasisi wa jeshi, akipita katika hospitali, alimfikia mtu aliyekuwa akifa. Alipoona kwamba alikuwa Mkristo, akamwuliza ni usadikisho gani aliokuwa akiushika, akaambiwa “Usadikisho wa Paulo.” “Je, yeye ni Mmethodisti?” akauliza; kwa maana Wamethodisti wote humdai Paulo. “La.” “Je, yeye ni Mpresbiteri?” kwa maana Wapresbiteri humdai Paulo hasa. “La,” likawa jibu. “Je, yeye ni wa Kanisa la Episkopali?” kwa maana ndugu wote wa Kiepiskopali hushindania kwamba wana haki juu ya yule Mtume Mkuu. “La,” hakuwa Mwepiskopali. “Basi, ni usadikisho gani anaoushika?” “Nina hakika ya kwamba yeye aweza kukilinda kile nilichokiweka amana kwake hata siku ile.” Ni usadikisho mkuu; nao ulimpa yule askari aliyekuwa akifa raha katika saa ya mauti.

Wale waogopao kwamba hawatavumilia hata mwisho na wageukie mstari wa ishirini na nne wa Waraka wa Yuda: “Yeye awezaye kuwalinda ninyi msijikwae, na kuwasimamisha mbele ya utukufu wake bila mawaa katika furaha kuu.”

Kisha tazama tena Isaya 41:10: “Usiogope, kwa maana mimi ni pamoja nawe; usifadhaike, kwa maana mimi ni Mungu wako; nitakutia nguvu, naam, nitakusaidia, naam, nitakushika kwa mkono wa kuume wa haki yangu.”

Kisha ona mstari wa 13: “Kwa maana mimi, Bwana, Mungu wako, nitakushika mkono wako wa kuume, nikikuambia, Usiogope; mimi nitakusaidia.”

Basi kama Mungu ameushika mkono wangu wa kuume katika mkono wake mwenyewe, je, hawezi kunishika mimi na kunilinda? Je, Mungu hana nguvu za kunilinda? Mungu mkuu aliyezifanya mbingu na nchi aweza kumlinda mwenye dhambi maskini kama wewe na kama mimi tukimtumaini. Kujizuia kuwa na uhakika katika Mungu kwa sababu ya hofu ya kuanguka—kungekuwa kama mtu aliyeukataa msamaha aliopewa, kwa hofu kwamba angeingia gerezani tena; au kama mtu anayezama aliyekataa kuokolewa, kwa hofu ya kuanguka majini tena.

Watu wengi huyatazama maisha ya Kikristo, na kuogopa kwamba hawatakuwa na nguvu za kutosha kuvumilia hata mwisho. Wanaisahau ile ahadi isemayo, “kama zilivyo siku zako, ndivyo zitakavyokuwa nguvu zako” (Kumbukumbu la Torati 33:25). Jambo hili lanikumbusha ile pendulamu ya saa iliyokata tamaa iliponafikiri kwamba ingelazimika kusafiri maili elfu nyingi hivyo; lakini iliponafikiri kwamba umbali ule ungetimizwa kwa “tik, tik, tik,” ikapata moyo mpya wa kwenda safari yake ya kila siku. Vivyo hivyo ni pendeleo la pekee la Mkristo kujiweka mwenyewe chini ya ulinzi wa Baba yake wa mbinguni na kumtumaini siku kwa siku. Ni jambo la kufariji kujua kwamba Bwana hataianza kazi njema bila pia kuimaliza.

Kuna aina mbili za wenye shaka—kundi moja lenye magumu ya kweli; na kundi lingine lifurahialo mabishano tu. Zamani nilidhani kwamba kundi hili la pili lingekuwa mwiba katika mwili wangu daima; lakini sasa hawanichomi tena. Natazamia kuwakuta katika safari yote. Watu wa aina hii walikuwa wakimzunguka Kristo ili wamtege katika maneno yake. Huja katika mikutano yetu ili wafanye mabishano. Kwa wote hao ningependekeza shauri la Paulo kwa Timotheo: “Lakini uyakatae maswali ya upumbavu yasiyo na elimu, ukijua ya kuwa huzaa magomvi.” (2 Timotheo 2:23.) Maswali yasiyo na elimu! Waongofu wengi wachanga hufanya kosa la kusikitisha. Wadhani kwamba yawapasa kuitetea Biblia yote. Nilijua kidogo sana juu ya Biblia nilipoongoka mara ya kwanza; nami nilidhani kwamba ilinipasa kuitetea tangu mwanzo hata mwisho dhidi ya kila mtu ajaye; lakini asiyeamini mmoja wa Boston alinishika, akaziangusha hoja zangu zote mara moja, akanivunja moyo. Lakini sasa nimeliweza jambo hilo. Kuna mambo mengi katika Neno la Mungu ambayo sidai kuyaelewa.

Ninapoulizwa kwamba mimi nayafanyaje mambo hayo, nasema, “Mimi sifanyi lolote kwayo.”

“Basi unayafafanuaje?” “Mimi siyafafanui hata kidogo.”

“Basi wewe unafanya nini kwayo?” “Lo, mimi ninayaamini tu.”

Nami niambiwapo, “Mimi nisingeamini kitu chochote ambacho sikielewi,” najibu tu kwamba mimi huamini vitu kama hivyo.

Kuna mambo mengi yaliyokuwa ya giza na ya fumbo miaka mitano iliyopita, ambayo tangu wakati ule nimepata mafuriko ya nuru juu yake; nami natazamia kuwa nikigundua jambo jipya juu ya Mungu katika umilele wote. Nimekusudia kutobishana juu ya mafungu ya Maandiko yenye mabishano. Mwanatheolojia mmoja wa zamani amesema kwamba watu wengine, wakitaka kula samaki, huanza kwa kuokota mifupa. Naacha mambo kama hayo hata nipate nuru juu yake. Sifungwi kufafanua nisichokielewa. “Mambo ya siri ni ya Bwana, Mungu wetu; lakini mambo yaliyofunuliwa ni yetu sisi na watoto wetu milele” (Kumbukumbu la Torati 29:29); na haya nayatwaa, na kuyala, na kujilisha kwayo, ili nipate nguvu za kiroho.

Kisha kuna shauri dogo jema katika Tito 3:9. “Lakini epukana na maswali ya upuzi, na nasaba, na magomvi, na mashindano ya sheria; kwa maana hayana faida, tena ni ya bure.”

Lakini sasa hapa aja mwenye shaka mnyoofu. Naye ningeshughulika naye kwa upole kama mama na mtoto wake mgonjwa. Sina huruma na watu wale ambao, kwa sababu mtu ana shaka, humtupa na kukataa kuwa na jambo lolote naye.

Nilikuwa katika mkutano wa kuulizia, muda fulani uliopita, nikamkabidhi mwanamke mmoja Mkristo, niliyekuwa nimemjua kwa muda, mtu mmoja aliyekuwa na shaka. Nilipotazama huku na huku punde baadaye nikamwona yule mtafutaji akitoka nje ya ukumbi. Nikauliza, “Kwa nini umemwacha aende zake?” “Lo, huyu ana shaka!” likawa jibu. Nikakimbilia mlangoni nikamfanya asimame, nikamtambulisha kwa mfanyakazi mwingine Mkristo aliyetumia zaidi ya saa moja katika mazungumzo na maombi pamoja naye. Akawatembelea yeye na mumewe; na, ndani ya juma moja, mwanamke yule mwenye akili akaitupilia mbali shaka yake akatokea kuwa Mkristo mwenye bidii. Ilihitaji muda, na busara, na maombi; lakini kama mtu wa kundi hili ni mnyoofu yatupasa kushughulika naye kama vile Bwana angetaka tufanye.

Hii hapa mifungu michache kwa ajili ya watafutaji wenye shaka:

“Mtu akipenda kuyatenda mapenzi yake, atajua habari ya yale mafunzo, kwamba yatoka kwa Mungu, au kwamba mimi nanena kwa nafsi yangu tu” (Yohana 7:17). Mtu asipokuwa tayari kuyatenda mapenzi ya Mungu hatayajua hayo mafundisho. Hakuna kundi lolote la wenye shaka ambalo halijui kwamba Mungu ataka wao waiache dhambi; na kama mtu yu tayari kuiacha dhambi na kuipokea nuru na kumshukuru kwa yale anayoyatoa, wala asitazamie kupata nuru juu ya Biblia yote mara moja, huyo atapata nuru zaidi siku kwa siku; naye atasonga mbele hatua kwa hatua; naye ataongozwa moja kwa moja kutoka gizani mpaka katika nuru safi ya mbinguni.

Katika Danieli 12:10 twaambiwa: “Wengi watajitakasa na kujifanya weupe, na kusafishwa; bali wabaya watafanya ubaya; wala hataelewa mtu mbaya awaye yote; bali wao walio na hekima ndio watakaoelewa.”

Basi Mungu hatawafunulia adui zake siri zake kamwe. Hatafanya hivyo kamwe! Na kama mtu akishikilia kuendelea kuishi katika dhambi hatayajua mafundisho ya Mungu.

“Siri ya Bwana iko kwao wamchao; naye atawajulisha agano lake” (Zaburi 25:14).

Na katika Yohana 15:15 twasoma: “Tangu sasa siwaiti watumwa; kwa maana mtumwa hajui atendalo bwana wake; lakini ninyi nimewaita rafiki; kwa kuwa yote niliyoyasikia kwa Baba yangu nimewaarifu.” Mtakapokuwa ninyi rafiki za Kristo ndipo mtakapozijua siri zake. Bwana alisema, “Je, nimfiche Ibrahimu neno nilitendalo?” (Mwanzo 18:17).

Basi wale wanaofanana na Mungu ndio walio karibu zaidi ya wote kumwelewa Mungu. Mtu asipokuwa tayari kuiacha dhambi yake hatayajua mapenzi ya Mungu, wala Mungu hatamfunulia siri zake. Lakini mtu akiwa tayari kuiacha dhambi yake atashangaa kuona jinsi nuru itakavyoingia ndani kwa wingi!

Nakumbuka usiku mmoja ambapo Biblia ilikuwa kwangu kitabu kikavu na chenye giza kuliko vitabu vyote katika ulimwengu. Lakini siku iliyofuata ikawa tofauti kabisa. Nilidhani nilikuwa nimepata ufunguo wake. Nilikuwa nimezaliwa na Roho. Lakini kabla sijajua lolote juu ya nia ya Mungu ilinipasa kuiacha dhambi yangu. Naamini kwamba Mungu hukutana na kila nafsi pale pale mahali pa kujisalimisha; na wanapokuwa tayari kumwacha yeye aongoze na kuwatangulia njiani. Shida ya wenye shaka wengi ni majivuno yao wenyewe. Wanajua zaidi ya Mwenyezi! nao hawaji kwa roho ya kufundishika. Lakini mara mtu ajapo kwa roho ya kupokea hubarikiwa; kwa maana “Mtu wa kwenu akipungukiwa na hekima, na aombe dua kwa Mungu, awapaye wote kwa ukarimu, wala hakemei; naye atapewa” (Yakobo 1:5).