Makundi Mawili

“Watu wawili walipanda hekaluni kuomba.”—Luka 17:10.

Sasa nataka kunena juu ya makundi mawili ya watu: Kwanza, wale wasiohisi uhitaji wao wa Mwokozi, yaani, wale ambao hawajasadikishwa juu ya dhambi na Roho; na Pili, wale waliokwisha sadikishwa juu ya dhambi nao hulia, “Yanipasa nifanye nini nipate kuokoka?”

Watafutaji wote waweza kupangwa chini ya vichwa viwili tu: ama wana roho ya Farisayo, au roho ya mtoza ushuru. Mtu mwenye roho ya Farisayo akija ndani ya mkutano wa baadaye, sijui fungu lingine la Maandiko lililo bora zaidi la kuikabili hali yake kuliko Warumi 3:10: “Kama ilivyoandikwa, Hakuna mwenye haki hata mmoja; hakuna afahamuye; hakuna amtafutaye Mungu.” Paulo hapa anena juu ya mtu wa asili. “Wote wamepotoka, wamekuwa hawana faida wote pamoja; hakuna atendaye mema, la, hata mmoja.” Na katika mstari wa kumi na saba na ile inayofuata, twapata “Na njia ya amani hawakuijua; hakuna hofu ya Mungu mbele ya macho yao. Basi twajua ya kuwa mambo yote inenayo torati, huwaambia wale walio chini ya torati; kila kinywa kifumbwe, na ulimwengu wote uwe chini ya hukumu ya Mungu.”

Kisha uangalie kifungu cha mwisho cha mstari wa 22: “Kwa sababu hakuna tofauti; kwa maana wote wamefanya dhambi, na kupungukiwa na utukufu wa Mungu.” Si sehemu tu ya jamaa ya wanadamu—bali wote—“wamefanya dhambi, na kupungukiwa na utukufu wa Mungu.” Mstari mwingine uliotumiwa sana sana kuwasadikisha watu juu ya dhambi yao ni 1 Yohana 1:8: “Tukisema kwamba hatuna dhambi, twajidanganya wenyewe, wala kweli haimo mwetu.”

Nakumbuka kwamba pindi moja tulipokuwa tukifanya mikutano katika mji mmoja wa Mashariki wenye wakazi elfu arobaini; na mwanamke mmoja akaja na kutuomba tumwombee mumewe, ambaye alikusudia kumleta katika mkutano wa baadaye. Nimesafiri sana na kukutana na watu wengi wenye roho ya Kifarisayo; lakini mtu huyu alikuwa amevikwa haki yake mwenyewe kiasi kwamba usingeweza kuiingiza ncha ya sindano ya kusadikishwa mahali popote. Nikamwambia mkewe: “Nafurahi kuiona imani yako; lakini hatuwezi kumkaribia; ndiye mtu mwenye kujidai haki kuliko wote niliowahi kuwaona.” Akasema: “Ni lazima mfanye hivyo! Moyo wangu utapasuka kama mikutano hii itakwisha bila yeye kuongoka.” Aliendelea kumleta bila kukoma; nami nikakaribia kuchoshwa na kumwona.

Lakini kuelekea mwisho wa mikutano yetu iliyodumu siku thelathini, alinijia na kuuweka mkono wake uliokuwa ukitetemeka juu ya bega langu. Mahali mikutano ilipofanyika palikuwa na baridi kiasi, na palikuwa na chumba kilichopakana ambamo taa ya gesi peke yake ndiyo iliyokuwa imewashwa; naye akaniambia, “Huwezi kuingia humu kwa dakika chache?” Nilidhani kwamba alikuwa akitetemeka kwa baridi, wala sikutamani hasa kwenda mahali penye baridi zaidi. Lakini akasema: “Mimi ni mtu mbaya kuliko wote katika Jimbo la Vermont. Nataka uniombee.” Nilidhani kwamba alikuwa amefanya mauaji, au kutenda uhalifu mwingine wa kutisha; nikamwuliza: “Je, kuna dhambi yoyote moja inayokusumbua hasa?” Naye akasema: “Maisha yangu yote yamekuwa dhambi. Nimekuwa Farisayo mwenye majivuno, ajidaiye haki. Nataka uniombee.” Alikuwa chini ya kusadikishwa kwa kina moyoni mwake. Mwanadamu hangeweza kamwe kulileta tokeo hili; bali Roho ndiye aliyekuwa amelileta. Yapata saa nane za usiku nuru ikapenya na kuingia katika nafsi yake: naye akatembea juu na chini katika barabara ya biashara ya mji ule akiwaambia yale Mungu aliyomtendea; naye amekuwa Mkristo mwenye bidii kupita wote tangu wakati ule.

Kuna mafungu mengine manne yanayofaa katika kushughulika na watafutaji, ambayo Kristo mwenyewe aliyatumia. “Amin, amin, nakuambia, Mtu asipozaliwa mara ya pili, hawezi kuuona ufalme wa Mungu.” (Yohana 3:3.)

Katika Luka 13:3, twasoma: “Msipotubu, ninyi nyote mtaangamia vivyo hivyo.”

Katika Mathayo 18, wanafunzi walipomjia Yesu wakitaka kujua ni nani atakayekuwa mkuu kuliko wote katika ufalme wa mbinguni, twaambiwa kwamba alimtwaa mtoto mdogo na kumweka katikati yao, akasema, “Amin, nawaambia, Msipoongoka na kuwa kama vitoto, hamtaingia kamwe katika ufalme wa mbinguni” (18:1-3).

Kuna “Msipo” nyingine iliyo ya maana sana katika Mathayo 5:20: “Haki yenu isipozidi hiyo haki ya waandishi na Mafarisayo, hamtaingia kamwe katika ufalme wa mbinguni.”

Ni lazima mtu afanywe kufaa kabla hajataka kuingia katika ufalme wa Mungu. Ningependa zaidi kuingia katika ufalme pamoja na ndugu mdogo kuliko kubaki nje pamoja na yule mkubwa. Mbingu ingekuwa jehanamu kwa mtu wa namna hiyo. Ndugu mkubwa asiyeweza kufurahi kwa kurudi kwa ndugu yake mdogo hangekuwa “anafaa” kwa ufalme wa Mungu. Ni jambo zito kulitafakari; lakini pazia hushuka na kumwacha yeye nje, na ndugu mdogo ndani. Kwake yeye maneno ya Mwokozi aliyoyanena katika hali nyingine yaonekana kufaa: “Amin, nawaambia, Watoza ushuru na makahaba wanatangulia mbele yenu kuingia katika ufalme wa Mungu” (Mathayo 21:31).

Mwanamke mmoja aliwahi kunijia akitaka nimfanyie fadhili kwa ajili ya binti yake. Akasema: “Yakupasa ukumbuke kwamba mimi sikubaliani nawe katika mafundisho yako.” Nikauliza: “Tatizo lako ni nini?” Akasema: “Nadhani jinsi unavyomshambulia yule ndugu mkubwa ni jambo la kutisha. Nadhani yeye ni mtu mwenye tabia tukufu.” Nikasema kwamba nilikuwa tayari kumsikiliza akimtetea; lakini kwamba ni jambo zito sana kushika msimamo wa namna hiyo; na kwamba yule ndugu mkubwa alihitaji kuongoka kama alivyohitaji yule mdogo. Watu wanenapo juu ya kuwa na maadili mema ni vema kuwafanya wamtazame vizuri yule baba mzee akiwa amesimama nje akimsihi mwanawe aliyekataa kuingia ndani.

Lakini sasa tutaendelea mbele kwa lile kundi lingine tunalopaswa kushughulika nalo. Limeundwa na wale waliosadikishwa dhambi, ambao kilio chao huja kama kile cha mlinzi wa gereza wa Filipi, “Yanipasa nifanye nini nipate kuokoka?” Kwa wale watoao kilio hiki cha toba hakuna haja yoyote ya kuwahubiria torati. Ni vema kuwaleta moja kwa moja kwenye Andiko: “Mwamini Bwana Yesu, nawe utaokoka.” (Matendo 16:31). Wengi watakukabili kwa uso uliokunjamana na kusema, “Sijui kuamini ni nini;” na ijapokuwa ni sheria ya mbinguni kwamba ni lazima waamini, ili waokoke—bado wanadai kitu kingine zaidi ya hicho. Yatupasa sisi kuwaambia ni nini cha kuamini, na wapi pa kuamini, na jinsi gani ya kuamini.

Katika Yohana 3:35 na 36 twasoma: “Baba ampenda Mwana, naye amempa vyote mkononi mwake. Amwaminiye Mwana yuna uzima wa milele; asiyemtii Mwana hataona uzima, bali ghadhabu ya Mungu inamkalia.”

Basi jambo hili laonekana la busara. Mwanadamu alipoteza uzima kwa kutokuamini—kwa kutoliamini neno la Mungu; nasi twaupata uzima tena kwa kuamini—kwa kumwamini Mungu katika neno lake. Kwa maneno mengine twainuka mahali pale Adamu alipoanguka. Yeye alijikwaa na kuanguka juu ya jiwe la kutokuamini; nasi twainuliwa na kusimama wima kwa kuamini. Watu wasemapo kwamba hawawezi kuamini, waonyeshe sura na mstari, na uwashikilie hasa katika jambo hili moja: “Je, Mungu amewahi kuivunja ahadi yake katika miaka hii elfu sita?” Shetani na wanadamu wamekuwa wakijaribu wakati wote nao hawajafanikiwa kuonyesha kwamba ameivunja hata ahadi moja; na kungekuwa na sherehe kuu jehanamu leo kama neno moja alilolinena lingeweza kuvunjwa. Mtu akisema kwamba hawezi kuamini ni vema kumkaza katika jambo hilo moja.

Naweza kumwamini Mungu leo kuliko niwezavyo kuuamini moyo wangu mwenyewe. “Moyo una hila kuliko vitu vyote, una ugonjwa usiotibika; nani awezaye kuujua?” (Yeremia 22:9). Naweza kumwamini Mungu kuliko niwezavyo kujiamini mimi mwenyewe. Kama wataka kuijua njia ya Uzima, amini kwamba Yesu Kristo ni Mwokozi wa nafsi yako mwenyewe; jitenge na mafundisho yote na kanuni zote za imani, na uje moja kwa moja kwenye moyo wa Mwana wa Mungu. Kama umekuwa ukijilisha mafundisho makavu hakuna ukuaji mwingi katika chakula cha namna hiyo. Mafundisho ni kwa nafsi kama zilivyo kwa mwili zile barabara ziendazo nyumbani kwa rafiki aliyenialika chakulani. Zitaniongoza huko kama nitaifuata ile sahihi; lakini nikibaki barabarani njaa yangu haitatoshelezwa kamwe. Kujilisha mafundisho ni kama kujaribu kuishi kwa maganda makavu; na nafsi isiyoshiriki ule Mkate ulioshuka kutoka mbinguni ni lazima ibaki nyembamba kweli kweli.

Wengine huuliza: “Nitafanyaje moyo wangu upate joto?” Ni kwa kuamini. Hupati nguvu za kumpenda Mungu na kumtumikia yeye hata uwe umeamini.

Mtume Yohana asema “Tukiupokea ushuhuda wa wanadamu, ushuhuda wa Mungu ni mkuu zaidi: kwa maana huu ndio ushuhuda wa Mungu, ya kwamba amemshuhudia Mwanawe. Yeye amwaminiye Mwana wa Mungu anao huo ushuhuda ndani yake; yeye asiyemwamini Mungu amemfanya kuwa mwongo, kwa sababu hakuuamini ushuhuda alioutoa Mungu juu ya Mwanawe. Na huu ndio ushuhuda, ya kwamba Mungu alitupa uzima wa milele; na uzima huu umo katika Mwanawe. Yeye aliye naye Mwana, anao huo uzima; asiye naye Mwana wa Mungu hana huo uzima” (1 Yohana 5:9).

Mambo ya wanadamu yangesimama kabisa kama tusingeupokea ushuhuda wa wanadamu. Tungeendeleaje katika mawasiliano ya kawaida ya maisha, na biashara ingeendeleaje, kama tungeudharau ushuhuda wa watu? Mambo ya kijamii na ya kibiashara yangekwama kabisa ndani ya saa arobaini na nane! Huu ndio mkondo wa hoja ya mtume hapa. “Tukiupokea ushuhuda wa wanadamu, ushuhuda wa Mungu ni mkuu zaidi.” Mungu amemshuhudia Yesu Kristo. Na kama mwanadamu aweza kuwaamini wenzake ambao mara nyingi husema uongo na ambao twawakuta daima si waaminifu, kwa nini tusimwamini Mungu katika neno lake na kuuamini ushuhuda wake?

Imani ni kuuamini ushuhuda uliotolewa. Si kuruka gizani, kama wengine watuambiavyo. Hiyo isingekuwa imani hata kidogo. Mungu hamwombi mtu yeyote aamini bila kumpa kitu cha kukiamini. Ingekuwa sawa kabisa kumwomba mtu aone bila kuwa na macho; asikie bila kuwa na masikio; na atembee bila kuwa na miguu—kama ilivyo kumwagiza aamini bila kumpa kitu cha kukiamini.

Nilipoanza safari kwenda California nilijipatia kitabu cha mwongozo. Kikaniambia kwamba baada ya kuondoka Jimbo la Illinois, ningevuka Mto Mississippi, kisha Missouri; ningeingia Nebraska; kisha kupitia Milima ya Rocky hadi makao ya Wamormoni katika Salt Lake City, na kwa njia ya Sierra Nevada hadi San Francisco. Nilikikuta kile kitabu cha mwongozo kikiwa sahihi nilipokuwa nikiendelea; nami ningekuwa mwenye shaka wa kusikitisha kama, baada ya kuwa nimekithibitisha kuwa sahihi kwa robo tatu za njia, ningesema kwamba nisingekiamini kwa sehemu iliyobaki ya safari.

Tuseme mtu fulani, katika kunielekeza njia ya kwenda Posta, ananipa alama kumi za kuniongoza; na kwamba, katika kuendelea kwangu kuelekea huko, nazikuta tisa kati yazo zikiwa sawasawa kabisa na alivyoniambia; hapo ningekuwa na sababu nzuri ya kuamini kwamba nilikuwa nakaribia Posta.

Na kama, kwa kuamini, napata uzima mpya, na tumaini, na amani, na furaha, na raha kwa nafsi yangu, ambavyo sikuwahi kuwa navyo hapo awali; kama napata kujizuia, na kukuta kwamba nina nguvu ya kuupinga uovu na kutenda mema, nina uthibitisho mzuri kabisa kwamba niko katika njia sahihi kuelekea ule “mji wenye misingi, ambao mwenye kuubuni na kuujenga ni Mungu.” Na kama mambo yametukia, na sasa yanatukia, kama yalivyoandikwa katika Neno la Mungu, nina sababu nzuri ya kuhitimisha kwamba yale yaliyosalia nayo yatatimizwa. Na bado watu wanena juu ya kutia shaka. Haiwezi kuwapo imani ya kweli mahali palipo na hofu. Imani ni kumwamini Mungu katika neno lake, bila masharti. Haiwezi kuwapo amani ya kweli mahali palipo na hofu. “Upendo mkamilifu huitupa nje hofu.” Ni jinsi gani mke angekuwa mnyonge kama angemtilia shaka mumewe! na ni jinsi gani mama angejihisi mwenye masikitiko kama, baada ya mwanawe kuondoka nyumbani, angekuwa na sababu, kwa kuachwa kwake, ya kuutilia shaka moyo wa mwana yule! Upendo wa kweli hauna shaka kamwe.

Kuna mambo matatu yasiyoepukika kwa imani—maarifa, kukubali, na kutwaa.

Ni lazima tumjue Mungu. “Na uzima wa milele ndio huu, wakujue wewe, Mungu wa pekee wa kweli, na Yesu Kristo uliyemtuma” (Yohana 17:3). Kisha haitupasi tu kuyakubali yale tuyajuayo; bali ni lazima tuishike ile kweli kwa mikono yetu. Mtu akikubali tu kwa akili mpango wa wokovu, jambo hilo halitamwokoa: ni lazima amkubali Kristo kuwa Mwokozi wake mwenyewe. Ni lazima ampokee na kumtwaa awe wake.

Wengine husema hawawezi kueleza jinsi maisha ya mtu yawezavyo kuathiriwa na kuamini kwake. Lakini mtu na apige kelele kwamba jengo fulani tunalobahatika kuketi ndani yake linawaka moto; nawe uone jinsi tungetenda upesi kadiri gani kwa kuamini kwetu na kutoka nje. Twaathiriwa wakati wote na yale tuyaaminiyo. Hatuwezi kujizuia. Na mtu na auamini ushuhuda ambao Mungu ameutoa juu ya Kristo, nao utayaathiri maisha yake yote kwa upesi mkubwa.

Twaa Yohana 5:24. Kuna kweli ya kutosha katika mstari huo mmoja kwa kila nafsi kuiegemea kwa ajili ya wokovu. Hauruhusu hata kivuli cha shaka. “Amin, amin”—maana yake kweli, kweli—“nawaambia, Yeye alisikiaye neno langu, na kumwamini yeye aliyenipeleka, yuna—yuna—uzima wa milele; wala haingii hukumuni, bali amepita kutoka mautini kuingia uzimani.”

Basi kama mtu asikia kweli neno la Yesu na kumwamini kwa moyo Mungu aliyemtuma Mwana awe Mwokozi wa ulimwengu, na kuushika na kuutwaa wokovu huu mkuu, hakuna hofu ya hukumu. Hatakuwa akiitazamia mbele kwa woga ile Enzi Kuu Nyeupe; kwa maana twasoma katika 1 Yohana 4:17: “Katika hili pendo letu limekamilishwa, ili tuwe na ujasiri katika siku ya hukumu; kwa kuwa kama yeye alivyo, ndivyo tulivyo na sisi katika ulimwengu huu.”

Tukiamini, hakuna hukumu ya adhabu kwetu, wala hukumu yoyote. Hilo liko nyuma yetu, limekwisha pita; nasi tutakuwa na ujasiri katika siku ya hukumu.

Nakumbuka kusoma habari za mtu mmoja aliyekuwa akihukumiwa kwa maisha yake. Alikuwa na rafiki wenye ushawishi; nao wakampatia msamaha kutoka kwa mfalme kwa sharti kwamba angepitia kesi nzima, na kuhukumiwa. Aliingia mahakamani akiwa na ule msamaha mfukoni mwake. Hisia dhidi yake zilikuwa kali mno, na hakimu akasema kwamba mahakama ilishangazwa kwamba hakujali kabisa. Lakini, hukumu ilipotamkwa, aliutoa ule msamaha, akauwasilisha, na kutoka nje akiwa mtu huru. Yeye amesamehewa; na sisi pia tumesamehewa. Basi mauti na yaje, hatuna cha kuogopa. Wachimba makaburi wote ulimwenguni hawawezi kuchimba kaburi kubwa la kutosha na lenye kina cha kutosha kuuweka ndani uzima wa milele; watengeneza majeneza wote ulimwenguni hawawezi kutengeneza jeneza kubwa la kutosha na lililobana vya kutosha kuuweka ndani uzima wa milele. Mauti imekwisha weka mkono wake juu ya Kristo mara moja, lakini haitaweka tena kamwe.

Yesu alisema: “Mimi ndimi huo ufufuo, na uzima. Yeye aniaminiye mimi, ajapokufa, atakuwa anaishi; naye kila aishiye na kuniamini hatakufa kabisa hata milele” (Yohana 11:25, 26). Na katika Ufunuo twasoma kwamba Mwokozi aliyefufuka alimwambia Yohana, “Mimi ni yeye aliye hai; nami nalikuwa nimekufa, na tazama, ni hai hata milele na milele” (Ufunuo 1:18). Mauti haiwezi kumgusa tena.

Twapata uzima kwa kuamini. Kwa kweli twapata zaidi ya yale Adamu aliyoyapoteza; kwa maana mtoto wa Mungu aliyekombolewa ni mrithi wa urithi ulio tajiri zaidi na wenye utukufu zaidi kuliko Adamu katika Paradiso angeweza kuuwaza kamwe; naam, na urithi huo hudumu milele—hauwezi kuondolewa.

Ningependa zaidi sana kuwa na uzima wangu umefichwa pamoja na Kristo katika Mungu kuliko kuwa nimeishi katika Paradiso; kwa maana Adamu angeweza kufanya dhambi na kuanguka baada ya kuwa huko miaka elfu kumi. Lakini yeye aaminiye yu salama zaidi, kama mambo haya yatakuwa halisi kwake. Na tuyafanye kuwa jambo la kweli, wala si hadithi ya kubuni. Mungu amenena; na hilo latosha. Na tumtumaini hata pale tusipoweza kuifuata njia yake. Na tuchochewe na uhakika ule ule uliokuwa ndani ya Maggie mdogo, kama ulivyosimuliwa katika tukio hili rahisi lakini la kugusa moyo nililolisoma katika Bible Treasury:—

“Nilikuwa nimekaa mbali na nyumbani kwa siku kadhaa, nami nilikuwa nikijiuliza, nilipokaribia tena nyumbani, kama Maggie wangu mdogo, aliyekuwa ameanza tu kuweza kuketi peke yake, angenikumbuka. Ili kuupima ukumbusho wake, nilijiweka mahali ambapo ningeweza kumwona, lakini yeye asiweze kuniona, nikaliita jina lake kwa sauti ile aliyoizoea, ‘Maggie!’ Akaviacha vitu vyake vya kuchezea, akatazama huku na huku chumbani, kisha akaviangalia chini vinyago vyake. Nikalirudia tena jina lake, ‘Maggie!’ ndipo akakitazama tena kile chumba; lakini, asipouona uso wa baba yake, alionekana mwenye huzuni sana, na taratibu akairudia shughuli yake. Mara moja tena nikaita, ‘Maggie!’ ndipo, akiviacha vitu vyake vya kuchezea, na kububujikwa na machozi, akainyoosha mikono yake upande ule ambako sauti ilitoka, akijua kwamba, ijapokuwa hakuweza kumwona, baba yake lazima alikuwapo, kwa maana aliijua sauti yake.”

Basi, tuna nguvu ya kuona na ya kusikia, nasi tuna nguvu ya kuamini. Ni upumbavu mtupu kwa watafutaji kushikilia msimamo kwamba hawawezi kuamini. Wanaweza, kama watataka. Lakini shida ya watu wengi ni kwamba wameiunganisha hisia na kuamini. Basi Hisia haina uhusiano wowote kabisa na Kuamini. Biblia haisemi—Yeye ahisiye, au yeye ahisiye na kuamini, yuna uzima wa milele. Hakuna kitu cha namna hiyo. Siwezi kuzitawala hisia zangu. Kama ningeweza, nisingehisi kuumwa kamwe, wala kuwa na maumivu ya kichwa au ya jino. Ningekuwa mzima wakati wote. Lakini naweza kumwamini Mungu; na tukiiweka miguu yetu juu ya mwamba huo, mashaka na hofu na vije na mawimbi yavurumike pande zote zetu, nanga itashika.

Watu wengine huwa wakiitazama imani yao wenyewe wakati wote. Imani ni ule mkono utwaao baraka. Nilisikia mfano huu wa mwombaji mmoja. Tuseme ungekutana na mtu barabarani ambaye kwa miaka mingi ulikuwa umemjua kuwa amezoea kuombaomba; nawe ukampa fedha kiasi, naye akakuambia: “Nakushukuru; sitaki fedha zako: mimi si mwombaji tena.” “Imekuwaje hivyo?” “Jana usiku mtu mmoja aliweka dola elfu moja mikononi mwangu.” “Kweli aliweka! Ulijuaje kwamba zilikuwa fedha halali?” “Nilizipeleka benki nikaziweka humo, nami nimepata kitabu cha benki.” “Uliipataje zawadi hii?” “Niliomba sadaka; na baada ya yule bwana kuzungumza nami kwa muda alitoa dola elfu moja za fedha taslimu na kuziweka mkononi mwangu.” “Wajuaje kwamba aliziweka katika mkono ulio sahihi?” “Nina shauri gani na mkono upi aliouweka; ilimradi nimezipata zile fedha.” Watu wengi hufikiri daima kama ile imani ambayo kwayo wanamshika Kristo ni ya aina iliyo sahihi—lakini lililo la muhimu zaidi sana kuliko hilo ni kuona kwamba tunaye Kristo aliye wa aina iliyo sahihi.

Imani ni jicho la nafsi; na ni nani angewaza kulitoa jicho ili aone kama ni la aina sahihi ilimradi kuona kwake ni kukamilifu? Si onjo langu, bali ni kile nikionjacho, ndicho kishibishacho hamu yangu ya chakula. Basi, rafiki wapendwa, ni kumwamini Mungu katika Neno lake ndiyo njia ya wokovu wetu. Kweli haiwezi kufanywa kuwa rahisi kupita kiasi.

Kuna mtu mmoja anayeishi katika mji wa New York ambaye ana nyumba kando ya Mto Hudson. Binti yake pamoja na jamaa yake wakaenda kukaa naye majira ya baridi: na katika majira hayo homa ya vipele ikazuka. Msichana mmoja mdogo akatengwa, ili awekwe mbali na wengine. Kila asubuhi yule babu mzee alikuwa akienda kumwaga mjukuu wake, “Kwaheri,” kabla ya kwenda kazini kwake. Katika mojawapo ya pindi hizo yule mtoto mdogo akamshika yule mzee mkono, na, akimwongoza hadi pembeni ya chumba, bila kusema neno akauelekeza mkono sakafuni ambako alikuwa amevipanga vibiskuti vidogo hata vikatamka maneno haya, “Babu, nataka kisanduku cha rangi.” Hakusema neno. Aliporudi nyumbani alitundika koti lake kubwa na kwenda chumbani kama kawaida: ndipo mjukuu wake mdogo, bila kutazama kwanza kama haja yake ilikuwa imetimizwa, akamchukua mpaka pembe ile ile, ambapo aliona yametamkwa kwa njia ile ile, “Babu, nakushukuru kwa kisanduku cha rangi.” Yule mzee asingekubali kwa jambo lolote lile kukosa kumfurahisha mtoto yule. Hiyo ndiyo ilikuwa imani.

Imani ni kumwamini Mungu katika Neno lake; na watu wale watakao kupewa ishara fulani daima huingia matatani. Twataka kufikia mahali hapa: Mungu amesema jambo hili—basi na tuliamini.

Lakini wengine husema, Imani ni kipawa cha Mungu. Vivyo hivyo na hewa; lakini yakupasa kuivuta. Vivyo hivyo na mkate; lakini yakupasa kuula. Vivyo hivyo na maji; lakini yakupasa kuyanywa. Wengine wanataka hisia ya namna ya miujiza. Hiyo si imani. “Imani ni kwa kusikia; na kusikia huja kwa neno la Mungu” (Warumi 10:17). Hapo ndipo imani itokapo. Si juu yangu kuketi chini na kungoja imani ije ikinijia kwa siri pamoja na hisia ya ajabu; bali ni juu yangu kumwamini Mungu katika Neno lake. Nawe huwezi kuamini, usipokuwa na kitu cha kuamini. Basi litwae Neno kama lilivyoandikwa, na ulitwae kuwa lako, na ulishike.

Katika Yohana 6:47, 48 twasoma: “Amin, amin, nawaambia, Yeye aniaminiye yuna uzima wa milele. Mimi ndimi chakula cha uzima.” Mkate huo upo karibu kabisa. Ushiriki. Ningeweza kuwa na mikate elfu nyingi ndani ya nyumba yangu, na watu wenye njaa wengi vivyo hivyo wakingoja. Wangeweza kukubali ukweli kwamba mkate ulikuwapo; lakini kila mmoja wao asipotwaa mkate na kuanza kula, njaa yao isingetoshelezwa. Vivyo hivyo Kristo ni Mkate wa mbinguni; na kama vile mwili ulishwavyo kwa chakula cha asili, ndivyo nafsi impasavyo kulishwa kwa Kristo.

Mtu anayezama majini akiona kamba imetupwa nje ili kumwokoa ni lazima aishike kwa mikono yake; na ili afanye hivyo ni lazima aachilie kila kitu kingine alichokishika. Mtu akiwa mgonjwa ni lazima ainywe ile dawa—kwa maana kuitazama tu hakutamponya kamwe. Kumjua Kristo hakutamsaidia mtafutaji hata kidogo, asipomwamini yeye, na kumshika yeye kwa nguvu, kuwa tumaini lake pekee. Wale Waisraeli walioumwa na nyoka wangeweza kuamini kwamba yule nyoka wa shaba aliinuliwa juu; lakini kama wasingemtazama wasingeishi (Hesabu 21:6-9).

Naamini kwamba safu fulani ya meli za mvuke itanivusha bahari kwa salama, kwa sababu nimekwisha ijaribu mimi mwenyewe: lakini jambo hili halitamsaidia mtu mwingine ambaye huenda akataka kwenda, kama yeye hatatenda kwa kadiri ya maarifa niliyo nayo. Vivyo hivyo kumjua Kristo hakutusaidii chochote tusipotenda kwa kadiri ya kumjua huko. Ndivyo ilivyo kumwamini Bwana Yesu Kristo. Ni kutenda kwa kadiri ya yale tuyaaminiyo. Kama mtu apandavyo melini ili avuke bahari ya Atlantiki, ndivyo itupasavyo kumtwaa Kristo na kuziweka nafsi zetu amana mikononi mwake; naye ameahidi kuwalinda wote wamwekeao tumaini lao. Kumwamini Bwana Yesu Kristo, ni kumwamini yeye tu katika neno lake.