Sura 3 · dakika 2 za kusoma · dakika 2 za kusikiliza
Maelezo ya Utangulizi
Jitunzeni nafsi zenu, na lile kundi lote ambalo Roho Mtakatifu amewaweka ninyi kuwa waangalizi ndani yake, mpate kulilisha kanisa lake Mungu, alilolinunua kwa damu yake mwenyewe. Matendo 20:28
Ingawa wengine hudhani kwamba onyo hili la Paulo kwa wazee hawa linathibitisha kwamba yeye alikuwa mtawala wao, sisi ambao leo tunasema nanyi kwa niaba ya Bwana tunatumaini kwamba tunaweza kufanya vivyo hivyo kwa uhuru, bila mtu yeyote kushuku hitimisho la namna hiyo. Ingawa tunawafundisha watu wetu kama watumishi tuliowekwa juu yao katika Bwana, bado tunaweza kufundishana sisi kwa sisi, kama ndugu katika huduma, na pia katika imani. Ikiwa watu tuliokabidhiwa wanapaswa ‘kufundishana na kuonyana na kuhimizana kila siku,’ bila shaka walimu nao wanaweza kufanyiana hivyo, bila mmoja kuwa na mamlaka au cheo kilicho juu ya mwenzake. Tuna dhambi zilezile za kuziua, na neema zilezile za kuhuishwa na kuimarishwa, kama walivyo nazo watu wetu; tuna kazi kubwa zaidi kuliko wao, na magumu makubwa zaidi ya kuyashinda, na kwa hiyo tunahitaji kuonywa na kuamshwa, kama si kufundishwa, kama wao. Kwa hiyo nakiri kwamba nadhani mikutano ya namna hii ingepaswa kufanyika mara nyingi zaidi, hata kama tusingekuwa na jambo jingine la kufanya ila hili. Nasi tungepaswa kushughulikiana kwa uwazi na kwa ukaribu, kama wale walio makini zaidi miongoni mwetu wanavyoshughulika na makundi yao, isije ikawa kwamba, kwa kuwa wao peke yao ndio wanaopokea maonyo makali na makaripio, wao peke yao ndio wawe wazima na wenye uhai katika imani. Kwamba huu ndio uliokuwa msimamo wa Paulo, sihitaji uthibitisho mwingine zaidi ya onyo hili linaloamsha na kuyeyusha moyo kwa wazee wa Efeso. Ni hotuba fupi, lakini si rahisi kujifunza upesi! Kama maaskofu na walimu wa Kanisa wangelijifunza kikamilifu onyo hili fupi, hata kama wangeacha vitabu vingi vilivyochukua muda wao na kuwaletea sifa kubwa zaidi ulimwenguni, ingekuwa heri kubwa namna gani kwa Kanisa, na kwao wenyewe! Katika kuendelea kulieleza andiko hili, nakusudia kufuata utaratibu ufuatao:
- Kwanza, Kufikiri maana ya kujitunza nafsi zetu.
- Pili, Kuonyesha kwa nini ni lazima tujitunze nafsi zetu.
- Tatu, Kuchunguza maana ya kulitunza kundi lote.
- Nne, Kueleza namna ambavyo inatupasa kulitunza kundi lote.
- Tano, Kutaja baadhi ya vichocheo vya kwa nini tulitunze kundi lote.
- Mwisho, Kuyatumia mambo haya yote kwetu.