Roho Mtakatifu Akimshuhudia Yesu Kristo

Kazi kuu ya Roho Mtakatifu ni kumfunua Yesu Kristo katika mioyo ya watu. Hakuna mtu awezaye kikweli kumwona, kumwamini, au kuokolewa na Yesu kwa maneno ya kibinadamu au kwa kusoma Maandiko peke yake; ni lazima Roho Mtakatifu aifanye kweli iwe wazi. Mtu ajisalimishapo mapenzi yake kwa Mungu, Roho huyafungua macho yake kumwona Yesu alivyo, jambo linaloongoza kwenye imani ya kweli na wokovu.

Bwana wetu alipokuwa akizungumza na wanafunzi wake usiku ule kabla ya kusulibiwa kwake juu ya Mfariji ambaye baada ya kuondoka kwake angekuja kuchukua nafasi yake, alisema, ‘Lakini ajapo huyo Msaidizi, nitakayewapelekea kutoka kwa Baba, huyo Roho wa kweli atokaye kwa Baba, yeye atanishuhudia. Nanyi pia mnashuhudia, kwa kuwa tangu mwanzo mmekuwa pamoja nami.’

(Yohana 15:26, 27), na Mtume Petro na wanafunzi wengine walipoamriwa kwa nguvu na Baraza la Wayahudi wasifundishe kwa jina la Yesu walisema, ‘Na sisi tu mashahidi wa mambo haya, pamoja na Roho Mtakatifu, ambaye Mungu amewapa wote wamtiio’ (Matendo 5:32).

Ni dhahiri kutokana na maneno haya ya Yesu Kristo na Mitume kwamba ni kazi ya Roho Mtakatifu kumshuhudia Yesu Kristo. Twaupata ushuhuda wa Roho Mtakatifu juu ya Yesu Kristo katika Maandiko; zaidi ya hayo, Roho Mtakatifu humshuhudia moja kwa moja kwa moyo wa kila mtu juu ya Yesu Kristo. Huyatwaa Maandiko yake na kutufasiria na kutufanyia yawe wazi. Kweli yote yatoka kwa Roho, kwa maana yeye ni ‘Roho wa kweli,’ lakini ni hasa kazi yake kumshuhudia yeye aliye kweli, yaani Yesu Kristo (Yohana 14:6).

Ni kwa njia ya ushuhuda wa Roho Mtakatifu moja kwa moja kwa mioyo yetu peke yake kwamba twapata kufikia ujuzi wa kweli na wa uzima juu ya Yesu Kristo (1 Wakorintho 12:3). Kiasi chochote cha kusoma tu Neno lililoandikwa (katika Biblia) na kiasi chochote cha kusikiliza ushuhuda wa mwanadamu havitatuleta kamwe kwenye ujuzi wa uzima juu ya Kristo. Ni Roho Mtakatifu mwenyewe atwaapo Neno lililoandikwa, au atwaapo ushuhuda wa mwenzetu, na kulitafsiri moja kwa moja kwa mioyo yetu peke yake ndipo tupatapo kumwona na kumjua Yesu alivyo.

Katika siku ya Pentekoste, Petro aliwapa wasikiaji wake wote ushuhuda wa Maandiko juu ya Kristo na pia akawapa ushuhuda wake. Aliwaambia yale yeye na Mitume wengine waliyoyajua kwa kuona kwao wenyewe juu ya kufufuka kwake, lakini kama Roho Mtakatifu mwenyewe asingaliyatwaa Maandiko ambayo Petro alikuwa ameyakusanya na kutwaa ushuhuda wa Petro na wanafunzi wengine, wale elfu tatu wasingalimwona Yesu alivyo siku ile na kumpokea na kubatizwa kwa jina lake.

Roho Mtakatifu aliongeza ushuhuda wake kwa ule wa Petro na ule wa Neno lililoandikwa. Bwana Moody alikuwa akisema kwa namna yake fupi na yenye picha kwamba Petro aliposema, ‘Basi nyumba yote ya Israeli na wajue yakini ya kwamba Mungu amemfanya Yesu huyo mliyemsulibisha ninyi kuwa Bwana na Kristo’ (Matendo 2:36), Roho Mtakatifu akasema, ‘Amina,’ na watu wakaona na kuamini. Na ni hakika kwamba kama Roho Mtakatifu asingalikuja siku ile na kwa njia ya Petro na Mitume wengine kutoa ushuhuda wake moja kwa moja kwa mioyo ya wasikiaji wao, kusingalikuwa na maono ya wokovu ya Yesu kwa upande wa watu.

Ikiwa wataka watu wapate maono ya kweli ya Yesu Kristo, maono ya namna hiyo juu yake hata waweze kuamini na kuokolewa, haitoshi kuwapa Maandiko juu yake; haitoshi kuwapa ushuhuda wako, ni lazima uwatafutie ushuhuda wa Roho Mtakatifu na kujiweka katika uhusiano wa namna hiyo na Mungu hata Roho Mtakatifu aweze kutoa ushuhuda wake kwa njia yako. Wala ushuhuda wako, wala hata ule wa Neno lililoandikwa peke yake, hautatimiza jambo hili, ingawa ni ushuhuda wako, au ule wa Neno, ambao Roho Mtakatifu huutumia. Lakini kama ushuhuda wako na ule wa Neno hautwaliwi na Roho Mtakatifu naye akashuhudia, hawataamini. Jambo hili hueleza kitu ambacho kila mtendakazi mwenye uzoefu ni lazima awe ameona. Twaketi kando ya mtafutaji na kufungua Biblia zetu na kumpa Maandiko yale yanayomfunua Yesu kama Mwokozi wake wa upatanisho msalabani, Mwokozi kutoka hatia ya dhambi, na kama Mwokozi wake aliyefufuka, Mwokozi kutoka nguvu ya dhambi.

Ni kweli ile ile mtu anayohitaji kuiona na kuiamini ili aokolewe, lakini haioni. Twapitia Maandiko haya, ambayo kwetu ni wazi kama mchana, tena na tena, na mtafutaji huketi hapo katika giza tupu; haoni kitu, hashiki kitu. Wakati mwingine twakaribia kushangaa kama mtafutaji ni mjinga, hata hawezi kuliona. La, si mjinga, isipokuwa kwa upofu ule wa kiroho unaomiliki kila akili isiyotiwa nuru na Roho Mtakatifu (1 Wakorintho 2:14). Twalipitia tena, na bado haioni. Twalipitia tena, na uso wake wang’aa naye apaza sauti, ‘Naiona. Naiona,’ naye amwona Yesu na kuamini na kuokolewa na kujua kwamba ameokolewa papo hapo. Nini kimetokea? Ni hivi tu, Roho Mtakatifu ametoa ushuhuda wake, na kilichokuwa giza kama usiku wa manane hapo awali sasa ni wazi kama mchana.

Jambo hili pia hueleza sababu iliyofanya yule aliyekaa muda mrefu katika giza juu ya Yesu Kristo kuja kuiona kweli upesi hivyo ajisalimishapo mapenzi yake kwa Mungu na kutafuta nuru kutoka kwake. Ajisalimishapo mapenzi yake kwa Mungu, amejiweka katika mwelekeo ule kwa Mungu ambapo Roho Mtakatifu aweza kuifanya kazi yake (Matendo 5:32). Yesu asema katika Yohana 7:17, ‘Mtu akipenda kuyatenda mapenzi ya Mungu, ataokolewa papo hapo.

Nini kimetokea? Ni hivi tu, Roho Mtakatifu ametoa ushuhuda wake, na kilichokuwa giza kama usiku wa manane hapo awali sasa ni wazi kama mchana. Jambo hili pia hueleza sababu iliyofanya yule aliyekaa muda mrefu katika giza juu ya Yesu Kristo kuja kuiona kweli upesi hivyo ajisalimishapo mapenzi yake kwa Mungu na kutafuta nuru kutoka kwake.

Ajisalimishapo mapenzi yake kwa Mungu, amejiweka katika mwelekeo ule kwa Mungu ambapo Roho Mtakatifu aweza kuifanya kazi yake (Matendo 5:32). Yesu asema katika Yohana 7:17, ‘Mtu akipenda kuyatenda mapenzi yake, atajua habari ya yale mafunzo, kwamba yatoka kwa Mungu, au kwamba mimi nanena kwa nafsi yangu tu.’ Mtu apendapo kuyatenda mapenzi ya Mungu, ndipo masharti yanapowekwa ambayo kwayo Roho Mtakatifu hutenda kazi, naye huitia akili nuru ione kweli juu ya Yesu na kuona kwamba mafundisho yake ni Neno la Mungu hasa.

Yohana aandika katika Yohana 20:31, ‘lakini hizi zimeandikwa ili mpate kuamini ya kwamba Yesu ndiye Kristo, Mwana wa Mungu; na kwa kuamini mwe na uzima kwa jina lake.’ Yohana aliiandika Injili yake kwa kusudi hili, kwamba watu wapate kumwona Yesu kama Kristo, Mwana wa Mungu, kwa njia ya yale anayoyaandika, na kwamba wapate kuamini ya kwamba yeye ni Kristo, Mwana wa Mungu, na kwamba kwa kuamini hivyo wapate uzima kwa jina lake.

Kitabu kilicho bora zaidi ulimwenguni cha kuweka mikononi mwa yule anayetaka kumjua Yesu na kuokolewa ni Injili ya Yohana. Na bado mtu mwingi ameisoma Injili ya Yohana mara kwa mara bila kuona na kuamini ya kwamba Yesu ndiye Kristo, Mwana wa Mungu. Lakini mtu yuleyule na ajisalimishe mapenzi yake kabisa kwa Mungu na kumwomba Mungu nuru asomapo Injili na kumwahidi Mungu kwamba atasimama imara juu ya kila jambo katika Injili ambalo Mungu atamwonyesha kuwa ni kweli, na kabla mtu huyo hajaimaliza Injili ataona waziwazi ya kwamba Yesu ndiye Kristo, Mwana wa Mungu, naye ataamini na kuwa na uzima wa milele. Kwa sababu amejiweka mahali ambapo Roho Mtakatifu aweza kuyatwaa mambo yaliyoandikwa katika Injili na kuyatafsiri na kutoa ushuhuda wake.

Nimeliona jambo hili likijaribiwa na kuthibitishwa tena na tena ulimwenguni kote. Watu wamekuja kwangu na kuniambia kwamba hawaamini ya kwamba Yesu ndiye Kristo, Mwana wa Mungu, na wengi wamekwenda mbali zaidi na kusema kwamba hawakuwa waaminio na hawakujua hata kama kulikuwa na Mungu wa nafsi. Kisha niliwaambia waisome Injili ya Yohana, ambayo huonyesha ushahidi kwamba Yesu alikuwa Kristo na Mwana wa Mungu.

Mara nyingi wameniambia kwamba wameisoma mara kwa mara, na bado hawakusadikishwa kwamba Yesu alikuwa Kristo, na Mwana wa Mungu. Kisha niliwaambia, ‘Hamkuisoma kwa njia iliyo sahihi,’ nami niliwafanya wajisalimishe mapenzi yao kwa Mungu (au katika hali ambapo hawakuwa na hakika kama kulikuwa na Mungu, niliwafanya wasimame juu ya haki ya kuifuata kweli popote ingeweza kuwapeleka).

Kisha niliwafanya wakubali kuisoma Injili ya Yohana polepole na kwa fikira, na kila mara kabla hawajasoma wamtazame Mungu juu, kama kulikuwa na Mungu yeyote, awasaidie kuelewa yale watakayosoma, na kumwahidi kwamba watasimama imara juu ya lolote atakalowaonyesha kuwa ni kweli, na kuifuata popote ingewapeleka. Na katika kila hali kabla hawajaimaliza Injili, walikuwa wamekuja kuona kwamba Yesu alikuwa Kristo na Mwana wa Mungu, na walikuwa wameamini na kuokolewa. Walikuwa wamejiweka katika hali ile ambapo Roho Mtakatifu aweza kutoa ushuhuda wake juu ya Yesu Kristo, naye alikuwa ameufanya, na kwa njia ya ushuhuda wake, waliona na kuamini.

Ikiwa wataka watu waione kweli juu ya Kristo, usitegemee nguvu zako za kueleza na kushawishi, bali jitupe juu ya Roho Mtakatifu na uwatafutie ushuhuda wake, na uhakikishe kwamba wanajiweka mahali ambapo Roho Mtakatifu aweza kushuhudia. Hii ndiyo dawa ya kutokuamini na ujinga juu ya Kristo pia. Ikiwa huna uhakika juu ya kweli ya Yesu Kristo, jitafutie mwenyewe ushuhuda wa Roho Mtakatifu juu ya Kristo. Soma Maandiko, soma hasa Injili ya Yohana, lakini usitegemee kusoma tu Neno, bali kabla hujalisoma, jiweke katika mwelekeo wa namna hiyo kwa Mungu kwa kujisalimisha kabisa kwa mapenzi yako kwake hata Roho Mtakatifu aweze kutoa ushuhuda wake moyoni mwako juu ya Yesu Kristo. Kinachohitajika zaidi ni maono yaliyo wazi na kamili ya Yesu Kristo, na haya huja kwa njia ya ushuhuda wa Roho Mtakatifu.

Usiku mmoja, wanafunzi wetu kadhaa walirudi kutoka Pacific Garden Mission huko Chicago na kuniambia, ‘Tulikuwa na mkutano wa ajabu missioni usiku huu. Kulikuwa na walevi wengi na watu waliotupwa mbele waliompokea Kristo.’ Siku iliyofuata nilikutana na Bwana Harry Monroe, mkuu wa missioni, barabarani, nami nikasema, ‘Harry, vijana wanasema mlikuwa na mkutano wa ajabu missioni usiku uliopita.’

‘Je, ungependa kujua jinsi ulivyotokea?’ akajibu. ‘Ndiyo.’ ‘Basi,’ akasema, ‘nilimwinua tu Yesu Kristo na ikampendeza Roho Mtakatifu kuung’arisha uso wa Yesu Kristo, na watu wakaona na kuamini.’ Ilikuwa njia ya pekee ya kulisema, lakini ilikuwa njia yenye kueleza na ya kweli kwa mambo ya msingi katika habari hiyo. Ni fungu letu kumwinua Yesu Kristo, kisha kumtazamia Roho Mtakatifu aung’arishe uso wake au kuitwaa kweli juu yake na kuifanya iwe wazi kwa mioyo ya wasikiaji wetu, naye atalifanya, na watu wataona na kuamini. Bila shaka, twahitaji kuwa tukienenda kuelekea Mungu hata Roho Mtakatifu aweze kututwaa kama vyombo ambavyo kwa njia yao atatoa ushuhuda wake.