Roho Mtakatifu Akiwatuma Watu Katika Njia Dhahiri Za Kazi

Roho Mtakatifu huwaita na kuwatuma waaminio katika njia hususa za kazi ya Kikristo, akiwaongoza waziwazi kwa njia ya maombi na kujisalimisha badala ya ishara za kustaajabisha. Waaminio ni lazima wawe tayari kuutafuta, kuungoja, na kuufuata uongozi wa Roho hatua kwa hatua, wakimwamini Mungu kuyafunua mapenzi yake.

Twasoma katika Matendo 13:2-4, 'Basi hawa walipokuwa wakimwabudu Bwana na kufunga, Roho Mtakatifu akasema, Nitengeeni Barnaba na Sauli kwa kazi ile niliyowaitia. Ndipo, wakiisha kufunga na kuomba, wakaweka mikono yao juu yao, wakawaacha waende zao. Basi hao wakiisha kupelekwa na Roho Mtakatifu wakatelemkia Seleukia; na kutoka huko wakasafiri baharini mpaka Kipro.' Ni dhahiri kutokana na fungu hili kwamba Roho Mtakatifu huwaita watu katika njia dhahiri za kazi na kuwatuma katika kazi hiyo. Yeye hawaiti watu tu kwa jinsi ya jumla katika kazi ya Kikristo, bali huchagua kazi hususa na kuionyesha.

Wengi wanauliza leo, na wengine wengi wanapaswa kuuliza, 'Je, niende Uchina, Afrika, au India?'

Yuko Mtu mmoja tu awezaye kulitatua swali hilo kwa usahihi kwa ajili yako, naye Mtu huyo ni Roho Mtakatifu.

Huwezi kulitatua swali hilo mwenyewe, sembuse mtu mwingine kulitatua kwa usahihi kwa ajili yako. Si kila mtu Mkristo aliyeitwa kwenda Uchina, Afrika, au uwanja wa ng'ambo hata kidogo. Mungu peke yake ndiye ajuaye kama akutaka uwe katika mahali po pote hapo, lakini yu tayari kukuonyesha. Katika siku kama hizi tuishizo, ambapo pana uhitaji mkubwa hivyo wa wanaume wanaofaa na wanawake wanaofaa katika uwanja wa ng'ambo, kila kijana na kila mtu mzima Mkristo mwenye afya na uwezo wa kiakili anapaswa kujitoa kwa Mungu kwa ajili ya uwanja wa ng'ambo na kumwuliza kama anataka waende. Lakini hawapaswi kwenda mpaka yeye, kwa Roho wake Mtakatifu, atakapolifanya wazi.

Uhitaji mkuu katika njia zote za kazi ya Kikristo leo ni wanaume na wanawake ambao Roho Mtakatifu huwaita na kuwatuma. Tunao wanaume na wanawake wengi ambao wanadamu wamewaita na kuwatuma. Tunao wanaume na wanawake wengi waliojiita wenyewe, kwa maana wako wengi leo wanaopinga kwa nguvu kutumwa na wanadamu, au shirika la aina yo yote, lakini ambao ni kile kilicho kibaya zaidi isivyopimika, wametumwa na nafsi zao wenyewe na si na Mungu.

Roho Mtakatifu huitaje? Fungu lililo mbele yetu halituambii jinsi Roho Mtakatifu alivyosema na kundi lile la manabii na walimu huko Antiokia, akiwaambia wamtenge Barnaba na Sauli kwa kazi ile aliyokuwa amewaitia. Limenyamaza kwa makusudi kuhusu jambo hili. Yamkini limenyamaza kuhusu jambo hili tusije tukafikiri kwamba ni lazima Roho Mtakatifu aite siku zote kwa njia ile ile hasa. Hakuna cho chote hata kidogo kuonyesha kwamba alisema kwa sauti isikikayo, sembuse kuna cho chote kuonyesha kwamba aliyafanya mapenzi yake yajulikane kwa njia yo yote za ajabuajabu ambazo baadhi ya watu katika siku hizi hudai kuyaona maongozi yake kwazo kama, kwa kutetemeka kwa mwili, kutikisika, kwa kuifungua Biblia ovyo na kuweka kidole juu ya fungu ambalo laweza kupindishwa kuwa na maana tofauti kabisa na ile ambayo mwandishi aliyevuviwa aliikusudia. Jambo la muhimu ni kwamba, aliyafanya mapenzi yake yajulikane, naye yu tayari kuyafanya mapenzi yake yajulikane kwetu leo. Wakati mwingine huyafanya yajulikane kwa njia moja na wakati mwingine kwa njia nyingine, lakini atayafanya yajulikane.

Lakini tutaupokeaje wito wa Roho Mtakatifu? Kwanza kabisa, kwa kuutamani; pili, kwa kuutafuta kwa bidii; tatu, kwa kumngoja Bwana kwa ajili yake; nne, kwa kuutazamia. Taarifa yasema, 'Walipokuwa wakimfanyia Bwana ibada na kufunga.' Walikuwa wakimngoja Bwana kwa ajili ya mwelekezo wake. Kwa wakati ule, walikuwa wamevipa kisogo kabisa vishughulisho na anasa za kidunia, hata vile vitu vilivyokuwa vinafaa kabisa mahali pake. Wengi husema leo, wakijitetea kwa kubaki nyumbani mbali na uwanja wa ng'ambo, 'Sijawahi kupata wito.' Lakini wajuaje hilo? Je, umekuwa ukisikiliza wito?

Mungu kwa kawaida husema kwa sauti ndogo, tulivu, na ni sikio lisikilizalo tu liwezalo kuunasa.

Je, umewahi kujitoa kwa dhahiri kwa Mungu ili akutume ako lote atakalo? Ingawa hakuna mwanamume wala mwanamke anayepaswa kwenda Uchina au Afrika au uwanja mwingine wa ng'ambo isipokuwa ameitwa, kila mmoja anapaswa kujitoa kwa Mungu kwa ajili ya kazi hii na kuwa tayari kwa wito na kusikiliza kwa makini apate kuusikia wito ukija. Na lieleweke kwa dhahiri akilini kwamba mtu hahitaji wito ulio dhahiri zaidi wa kwenda Afrika kuliko wa kwenda Boston, au New York, au London, au uwanja mwingine wo wote wa kupendeza wa nyumbani.

Roho Mtakatifu hawaiti watu tu na kuwatuma katika njia fulani za kazi, bali pia huongoza katika mambo madogo ya maisha ya kila siku na utumishi kuhusu pa kwenda na pasipo pa kwenda, la kufanya na lisilofanywa.

Twasoma katika Matendo 8:27-29, 'Akaondoka, akaenda; na tazama, mtu wa Kushi, towashi mwenye mamlaka chini ya Kandake malkia wa Kushi, aliyekuwa msimamizi wa hazina yake yote, naye alikuwa amekwenda Yerusalemu kuabudu, akawa akirejea, ameketi garini mwake, akisoma chuo cha nabii Isaya. Roho akamwambia Filipo, Sogea karibu na gari hili, ukashikamane nalo.' Hapa twamwona Roho akimwongoza Filipo katika mambo madogo ya utumishi aliokuwa amemwitia. Vivyo hivyo, twasoma katika Matendo 16:6-7, 'Wakapita katika nchi ya Frigia na Galatia, wakizuiliwa na Roho Mtakatifu wasihubiri lile neno katika Asia; na walipofika kukabili Misia, wakajaribu kuingia Bithinia, lakini Roho wa Yesu hakuwaacha.' Hapa twamwona Roho Mtakatifu akimwongoza Paulo pasipo pa kwenda.

Twaweza kuwa na uongozi kamili wa Roho Mtakatifu katika kila kigeuko cha maisha. Chukua, kwa mfano, kazi yetu. Ni dhahiri kwamba si kusudi la Mungu tuseme na kila mtu tunayekutana naye. Kujaribu kufanya hivyo kungekuwa ni kujaribu jambo lisilowezekana, nasi tungepoteza muda mwingi katika kujaribu kusema na watu ambapo tusingeweza kufanya lo lote jema, muda ambao ungeweza kutumika katika kusema na watu ambapo tungeweza kutimiza jambo fulani. Wako baadhi ambao ingekuwa hekima kwetu kusema nao. Wako wengine ambao isingekuwa hekima kwetu kusema nao. Muda uliotumika juu yao ungechukuliwa kutoka kazi ambayo ingekuwa ya utukufu zaidi wa Mungu. Bila shaka, Filipo alipokuwa akisafiri kuelekea Gaza, alikutana na wengi kabla ya kukutana na yule ambaye Roho alisema kumhusu, 'Sogea karibu na gari hili, ukashikamane nalo.'

Roho yu tayari kutuongoza kama alivyokuwa tayari kumwongoza Filipo. Miaka kadhaa iliyopita, mfanyakazi mmoja Mkristo huko Toronto alikuwa na hisia kwamba anapaswa kwenda hospitalini na kusema na mtu fulani. Alifikiri moyoni mwake, 'Ni nani nimjuaye hospitalini wakati huu?' Akaja akilini mwake mmoja ambaye alijua alikuwa hospitalini, naye akaharakisha kwenda hospitalini, lakini alipoketi kando yake ili kuzungumza naye, alitambua kwamba si kwa ajili ya mtu huyu aliyetumwa. Akainuka ili kuinua dirisha. Yote hayo yalimaanisha nini? Mtu mwingine alikuwa amelala ng'ambo ya njia kutoka kwa yule aliyemjua, na wazo likamjia kwamba huyu huenda ndiye mtu ambaye anapaswa kusema naye. Naye akageuka na kusema na mtu huyu na akapata pendeleo la kumwongoza kwa Kristo. Hapakuwa na jambo zito katika hali ya mtu yule. Alikuwa amepata jeraha fulani katika goti lake, wala hapakuwa na wazo la tatizo zito, lakini mtu yule alipita kwenda milele usiku ule.

Matukio mengi ya namna kama hiyo yangeweza kuandikwa na kudhihirisha kwa uzoefu kwamba Roho Mtakatifu yu tayari kuwaongoza wale wautafutao uongozi wake leo kama alivyokuwa tayari kuwaongoza wanafunzi wa kwanza. Lakini yu tayari kutuongoza, si katika namna zetu zilizo kamili zaidi za kazi ya Kikristo tu bali katika mambo yote ya maisha, biashara, na masomo, kila kitu tunachopaswa kufanya. Hakuna ahadi katika Biblia iliyo dhahiri waziwazi zaidi kuliko Yakobo 1:5-7, 'Lakini mtu wa kwenu akipungukiwa na hekima, na aombe dua kwa Mungu, awapaye wote, kwa ukarimu, wala hakemei; naye atapewa. Ila na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kupeperushwa huku na huku. Maana mtu kama yule asidhani ya kuwa atapokea kitu kwa Bwana.' Fungu hili haliahidi tu hekima ya Mungu bali hutuambia hasa la kufanya ili kuipata. Kuna hatua tano zilizotamkwa au kuashiriwa katika fungu hili: 1. Kwamba 'twapungukiwa na hekima.' Ni lazima tuwe na utambuzi na kukiri kabisa kutokuwa kwetu na uwezo wa kuamua kwa hekima.

Hapa ndipo tunaposhindwa kuipokea hekima ya Mungu. Twafikiri twaweza kujiamulia wenyewe, au angalau hatuko tayari kukiri kutokuwa kwetu na uwezo kabisa wa kuamua. Ni lazima kuwe na kukataa kabisa hekima ya mwili.

2. Ni lazima tutamani kuijua njia ya Mungu na kuwa tayari kwa gharama yo yote kuyafanya mapenzi ya Mungu. Hili laashiriwa katika neno 'omba.' Kuomba ni lazima kuwe kwa unyofu, na kama hatuko tayari kuyafanya mapenzi ya Mungu, yawe nini, kwa gharama yo yote, kuomba huko si kwa unyofu. Hili ni jambo la umuhimu wa msingi. Hakuna kitu kifanyacho mengi kuzifanya nia zetu ziwe wazi katika utambuzi wa mapenzi ya Mungu kama yalivyofunuliwa na Roho wake kama nia iliyojisalimisha. Hapa twapata sababu ya watu mara nyingi kutoyajua mapenzi ya Mungu na kutokuwa na uongozi wa Roho. Hawako tayari kufanya lo lote Roho aongozalo kwa gharama yo yote.

Ni yeye 'apendaye kuyafanya mapenzi yake' atakayejua, si kuhusu fundisho tu, bali atajua pia wajibu wake wa kila siku.

Watu mara nyingi hunijia na kusema, 'Siwezi kuyagundua mapenzi ya Mungu,' lakini niwapapo swali, 'Je, uko tayari kuyafanya mapenzi ya Mungu kwa gharama yo yote?' hukiri kwamba hawako tayari. Njia iliyo isiyo wazi kabisa tunapojizuia mbali na kujisalimisha kabisa kwa Mungu huwa dhahiri kama mchana tunapofanya kujisalimisha huko.

3. Ni lazima 'tuombe' uongozi kwa dhahiri. Haitoshi kutamani au kuwa tayari kutii; ni lazima tumwombe Mungu atuonyeshe njia.

4. Ni lazima tutazamie uongozi kwa ujasiri. 'Na aombe kwa imani, pasipo shaka yo yote.' Wengi hawawezi kuipata njia, ingawa wanamwomba Mungu awaonyeshe, kwa sababu tu hawana matarajio yasiyo na shaka kwamba Mungu atawaonyesha njia. Mungu huahidi kuionyesha kama tukiitazamia kwa ujasiri. Umjiapo Mungu katika maombi akuonyeshe la kufanya, ujue kwa hakika kwamba atakuonyesha. Kwa njia gani atakuonyesha, haambii, lakini huahidi kwamba atakuonyesha, na hilo latosha.

5. Ni lazima tufuate hatua kwa hatua uongozi ujapo. Kama ilivyosemwa awali, ni jinsi gani hasa utakavyokuja, hakuna awezaye kusema, lakini utakuja. Mara nyingi, hatua moja tu ndiyo itakayofanywa wazi kwa wakati; hicho ndicho tu tunachohitaji kujua, hatua inayofuata. Wengi wamo gizani kwa sababu hawajui na hawawezi kugundua lile ambalo Mungu angetaka wafanye juma lijalo, au mwezi ujao au mwaka ujao. Mtu mmoja wa chuo aliwahi kunijia na kuniambia kwamba alikuwa katika giza kubwa kuhusu uongozi wa Mungu, kwamba alikuwa akitafuta kuyagundua mapenzi ya Mungu na kujifunza yaliyopaswa kuwa kazi ya maisha yake, lakini hakuweza kuyapata. Nikamwuliza alikuwa amefika wapi katika masomo yake ya chuoni. Akasema mwaka wake wa pili. Nikamwuliza, 'Ni nini unachotamani kujua?' 'Nifanye nini nitakapomaliza chuo?' 'Je, wajua kwamba unapaswa kupitia chuo?' 'Ndiyo.' Mtu huyu hakujua tu la kufanya mwaka ujao, bali hata mwaka uliofuata, na bado alikuwa katika fadhaa kubwa kwa sababu hakujua alichopaswa kufanya miaka hii miwili itakapokwisha.

Mungu hufurahia kuwaongoza watoto wake hatua moja kwa wakati. Yeye hutuongoza kama alivyowaongoza wana wa Israeli.

'Na kila lile wingu lilipoinuliwa kutoka juu ya hema, ndipo wana wa Israeli waliposafiri; na mahali pale wingu liliposimama, ndipo wana wa Israeli walipopiga kambi zao. Kwa amri ya Bwana wana wa Israeli walisafiri, na kwa amri ya Bwana walipiga kambi; siku zote wingu liliposimama juu ya maskani, walikaa kambini. Na wingu lilipokawia siku nyingi juu ya maskani, wana wa Israeli waliishika amri ya Bwana, wala hawakusafiri. Na palipokuwa na wingu siku chache juu ya maskani; kwa amri ya Bwana walikaa kambini, na kwa amri ya Bwana walisafiri. Na palipokuwa na wingu tangu jioni hata asubuhi, na wingu lile lilipoinuliwa asubuhi, ndipo walisafiri; au likikaa mchana na usiku, wingu lilipoinuliwa, walisafiri. Au wingu likikaa siku mbili, au mwezi, au mwaka, juu ya maskani, likikaa juu yake, wana wa Israeli walikaa kambini, wala hawakusafiri; lakini lilipoinuliwa, walisafiri. Kwa amri ya Bwana walikaa kambini, na kwa amri ya Bwana walisafiri; waliishika amri ya Bwana, kwa amri ya Bwana kwa mkono wa Musa' (Hesabu 9:17-23).

Wengi waliojitoa kwa uongozi wa Roho Mtakatifu huingia katika hali ya utumwa mkubwa na kuteseka kwa sababu wana maongozi ambayo wanahofu huenda yatoka kwa Mungu lakini ambayo hawana hakika nayo. Kama hawayatii maongozi haya, wanahofu kwamba wamemwasi Mungu na wakati mwingine hufikiri kwamba wamemhuzunisha Roho Mtakatifu na kumfukuza, kwa sababu hawakuyafuata maongozi yake. Haya yote hayana lazima. Na tuliweke akilini mwetu kwamba uongozi wa Mungu ni dhahiri. 'Mungu ni nuru, wala giza lo lote hamna ndani yake' (1 Yohana 1:5). Na uongozi wo wote usio dhahiri hautoki kwake. Yaani, ikiwa nia zetu zimejisalimisha kwake. Bila shaka, upungufu waweza kutokana na nia isiyojisalimisha. Lakini ikiwa nia zetu zimejisalimisha kwa Mungu, tuna haki kama watoto wa Mungu kuwa na hakika kwamba uongozi wo wote watoka kwake kabla ya kuutii.

Tuna haki ya kumwendea Baba yetu na kusema, 'Baba wa mbinguni, mimi nipo hapa. Natamani zaidi ya vitu vyote kuyafanya mapenzi yako. Sasa nifanyie wazi mimi, mwanao. Ikiwa jambo hili nililo na mwelekeo wa kulifanya ni mapenzi yako, nitalifanya, lakini lifanye wazi kama mchana ikiwa kweli ni mapenzi yako.' Ikiwa ni mapenzi yake, Baba wa mbinguni atalifanya wazi kama mchana. Wala huhitaji, wala hupaswi kulifanya jambo lile mpaka atakapolifanya wazi, wala huhitaji na hupaswi kujilaumu kwa sababu hukulifanya. Mungu hataki watoto wake wawe katika hali ya hukumu mbele zake. Yeye ataka tuwe huru kutoka kila masumbufu ya moyo, wasiwasi, mahangaiko, na kujilaumu.

Mzazi ye yote wa duniani angeifanya njia wazi kwa mtoto wake aombaye kuijua, na zaidi sana Baba yetu wa mbinguni atatufanyia wazi, na hata atakapoifanya wazi, hatuna sababu ya kuwa na hofu kwamba kwa kutolifanya, twamwasi Mungu. Hatuna haki ya kumwelekeza Mungu jinsi atakavyotoa uongozi wake, kama, kwa mfano, kwa kumwomba afunge kila njia, au kwa kumwomba atoe ishara, au kwa kutuongoza katika kuweka kidole chetu juu ya andiko, au kwa njia nyingine yo yote. Ni juu yetu kutafuta na kutazamia hekima, lakini si juu yetu kuelekeza jinsi itakavyotolewa. Roho Mtakatifu hugawanya "kila mtu peke yake kama apendavyo yeye" (1 Wakorintho 12:11).

Mambo mawili ni dhahiri kutokana na yaliyosemwa kuhusu kazi ya Roho Mtakatifu. Kwanza, jinsi tulivyomtegemea kabisa Roho Mtakatifu katika kila kigeuko cha maisha na utumishi wa Kikristo. Pili, jinsi maandalizi ya maisha na utumishi ambayo Mungu ameyafanya yalivyo kamili. Jinsi utimilifu wa pendeleo lililo wazi kwa mwaminio aliye mnyenyekevu kuliko wote kwa njia ya kazi ya Roho Mtakatifu ulivyo wa ajabu. Si sana kile tulicho kwa asili, iwe kiakili, kimaadili, kimwili, au hata kiroho, ndicho cha maana. Jambo la maana ni kile ambacho Roho Mtakatifu aweza kutufanyia na kile tutakachomruhusu afanye. Si mara chache Roho Mtakatifu humchukua yule aonekanaye kuahidi kidogo zaidi kwa asili na kumtumia kupita mbali wale waahidio zaidi kwa asili. Maisha ya Kikristo hayapaswi kuishiwa katika uwanja wa tabia ya asili, na kazi ya Kikristo haipaswi kufanywa katika nguvu ya kipawa cha asili, bali maisha ya Kikristo yapaswa kuishiwa katika uwanja wa Roho, na kazi ya Kikristo yapaswa kufanywa katika nguvu ya Roho. Roho Mtakatifu yu tayari na atamani sana kumfanyia kila mmoja wetu kazi yake yote, naye atafanya ndani ya kila mmoja wetu yote tutakayomruhusu afanye.