Kuvuna kwa Furaha

1852-1854.

KUTARAJIA MAMBO MAKUU KUTOKA KWA MUNGU—MCHANGO WA UKARIMU MKUBWA—MANUFAA YAKIONGEZEKA YA SCRIPTURAL KNOWLEDGE INSTITUTION—KUMFIKIA MUNGU KWA IMANI KATIKA KRISTO—SAUTI KUTOKA MLIMA LEBANONI—FAIDA YA KUUNGOJEA WAKATI WA MUNGU—UWAKILI WA MAKINI—IMANI, TEGEMEO PEKEE—“MJANE HUYU MASKINI AMETIA ZAIDI YA WOTE”—MATENDO MAKUU ZAIDI YA IMANI YANATARAJIWA—USHAURI KWA WAGAWAJI WA VIJIKARATASI—JARIBU JIPYA NA KALI LA IMANI.

Tarehe 26 Mei, 1852, kulikuwa mkononi kwa ajili ya ujenzi wa Nyumba ya pili mpya ya Yatima pauni elfu tatu, mia tano thelathini, shilingi tisa, pensi sita na farath moja. Michango ya viwango mbalimbali, kuanzia pauni mia tatu hata pensi nne, iliendelea kupokelewa kwa kuitikia maombi. Tarehe 4 Januari, 1853, Bw. M. aandika:—

Kutoka London shilingi mbili na pensi sita. Siku baada ya siku sasa nimekuwa nikimngoja Mungu kwa ajili ya mahitaji ya mfuko wa ujenzi kwa zaidi ya miezi kumi na tisa, na karibu kila siku nimepokea kitu kwa kuitikia maombi. Michango hii, kwa sehemu kubwa, imekuwa midogo, ikilinganishwa na kiasi kitakachohitajika kwa kukamilisha kusudi hili; walakini, imeonyesha kwamba Bwana, kwa ajili ya Mwanawe mpendwa, husikiliza dua zangu, na dua za watenda-kazi wenzangu na wasaidizi katika kazi hii; nazo zimekuwa vitia-moyo vya thamani kwangu kuendelea kumngoja Mungu. Kwa miezi mingi nimekuwa na hakika kwamba Bwana, kwa wakati wake mwenyewe, angetoa fedha kubwa zaidi kwa ajili ya kazi hii; na kwa ajili ya jambo hili nimekuwa nikimsihi kwa bidii zaidi na zaidi katika miezi ya karibuni. Sasa hatimaye ameiburudisha roho yangu kwa wingi, na kulijibu ombi langu. Leo nimepokea ahadi kwamba, kama mchango wa pamoja wa Wakristo kadhaa, ningelipwa mchango wa pauni elfu nane na mia moja, kwa ajili ya kazi ya Bwana iliyo mkononi mwangu.

Haiwezekani kueleza uburudisho wa kiroho ambao moyo wangu ulipokea kupitia mchango huu. Siku baada ya siku, kwa miezi kumi na tisa, nilikuwa nikitazamia msaada wa wingi zaidi kuliko niliokuwa nao. Nilikuwa na hakika kamili kwamba Mungu angenisaidia kwa fedha kubwa zaidi; walakini kucheleweshwa kulikuwa kwa muda mrefu. Tazama jinsi ilivyo ya thamani kumngoja Mungu! Tazama jinsi wale wafanyao hivyo wasivyoaibishwa! Imani yao na saburi yao yaweza kujaribiwa kwa muda mrefu na kwa ukali; lakini mwishoni itaonekana bila shaka kwamba wale wanaomheshimu Mungu yeye atawaheshimu, wala hatawaacha waaibishwe. Ukubwa wa mchango huu, ingawa uliiburudisha roho yangu mno, haukunishangaza hata kidogo; kwa maana ninatarajia mambo makuu kutoka kwa Mungu. Je, nimekuwa nikijisifia katika Mungu bure? Je, haidhihiriki kwamba ni jambo la thamani kuu kwa kila njia kumtegemea Mungu? Je, namtumikia Mungu bure? Je, si dhahiri kwamba kanuni ninazozifuata katika kazi yangu hazitumiki tu katika kazi ya Mungu kwa kipimo kidogo, bali pia, kama nilivyothibitisha mara nyingi sana katika miaka kumi na tisa iliyopita, kwa shughuli kubwa mno kwa ajili ya Mungu?

Katika mwaka ulioishia tarehe 26 Mei, 1853, pauni elfu tisa na moja na shilingi tatu zilipokelewa kwa ajili ya mfuko wa ujenzi, na kuufanya mfuko huo kufikia kiasi cha sasa cha pauni elfu kumi na mbili, mia tano thelathini na moja, shilingi kumi na mbili na farath moja.

Kwa ajili ya makusudi mbalimbali ya Scriptural Knowledge Institution, yaani kwa ajili ya shule, umishonari, Biblia, na vijikaratasi, ilinibidi kutumia katika mwaka kutoka Mei, 1852, hata Mei, 1853, kama pauni mia sita kwa mwezi, au zaidi ya pauni elfu saba kwa jumla; lakini nilikuwa na ya kutosha kukidhi kila hitaji; na zaidi ya hayo nilisaidiwa na Bwana kuuongeza mfuko wa ujenzi kwa pauni elfu tisa. Matumizi ya kawaida ya Taasisi hayakuwahi kuwa makubwa hivyo katika miaka kumi na tisa iliyopita; lakini upana wa shughuli zake, na mahitaji ambayo Bwana alipenda kuyaleta, navyo havikuwahi kuwa vikubwa hivyo.

Waona, msomaji mpendwa, kwamba tunalipwa kwa wingi kwa kumngoja kwetu Mungu. Wafahamu utayari wa moyo wake kusikiliza dua za watoto wake wanaoweka tumaini lao kwake. Kama hujawahi kujaribu jambo hili, fanya hivyo sasa. Lakini ili maombi yako yajibiwe, wahitaji kufikisha maombi yako kwa Mungu kwa msingi wa sifa na ustahili wa Bwana Yesu. Haupaswi kutegemea ustahili na sifa zako mwenyewe, bali kumtegemea Bwana Yesu peke yake, kama msingi wa kukubaliwa mbele za Mungu, kwa nafsi yako, kwa maombi yako, kwa kazi zako, na kwa kila kitu kingine. Je, wamwamini Yesu kweli? Je, wamtegemea yeye peke yake kwa ajili ya wokovu wa nafsi yako? Angalia vyema, ili kwamba hata kiwango kidogo cha haki yako mwenyewe kisiletwe mbele za Mungu kama msingi wa kukubaliwa. Lakini basi, kama wamwamini Bwana Yesu, ni lazima tena, ili maombi yako yajibiwe, kwamba mambo unayomwomba Mungu yawe ya namna ambayo Mungu aweza kukupa, kwa sababu ni kwa heshima yake na kwa faida yako halisi. Kama kupata kwa maombi yako kusingekuwa kwa faida yako halisi, au kusingeelekea heshima ya Mungu, ungeweza kuomba kwa muda mrefu bila kupata unachokitamani. Utukufu wa Mungu unapaswa kuwa siku zote mbele ya watoto wa Mungu, katika yale wanayoyataka mikononi mwake; na faida yao ya kiroho, ikiwa imeunganishwa kwa ukaribu mno na heshima ya Mungu, kamwe isipuuzwe katika dua zao. Lakini sasa, tuseme sisi ni waaminio katika Bwana Yesu, na tuseme twafikisha maombi yetu kwa Mungu, tukimtegemea Bwana Yesu peke yake kama msingi wa kuyapata; tuseme pia kwamba, kwa kadiri tuwezavyo kuhukumu kwa uaminifu na kwa unyofu, kupata kwa maombi yetu kungekuwa kwa faida yetu halisi ya kiroho, na kwa heshima ya Mungu; bado twahitaji, mwisho wa yote, kuendelea katika maombi hata baraka itakapotolewa kwetu. Haitoshi kuanza kuomba, wala kuomba vyema; wala haitoshi kuendelea kwa muda kuomba; bali ni lazima tuendelee kwa saburi, kwa kuamini, katika maombi hata tupate jibu; na tena, hatuna budi si tu kuendelea katika maombi hata mwisho, bali tunapaswa pia kuamini kwamba Mungu hutusikia, naye atayajibu maombi yetu. Mara nyingi zaidi twashindwa kwa kutoendelea katika maombi hata baraka ipatikane, na kwa kutotarajia baraka. Kwa hakika kama vile katika mtu ye yote mambo haya mbalimbali yanavyopatikana yameunganika pamoja, ndivyo kwa hakika majibu yatakavyotolewa kwa maombi yake.

Katika mwaka wa 1852-53, gharama ya kuwatunza yatima ilikidhiwa kikamilifu na michango isiyoombwa. Mambo mawili au matatu tu yatatajwa.

Tarehe 29 Juni, 1852. Leo nimepokea mmojawapo wa michango ya ajabu zaidi niliyowahi kuipata. Natoa habari nzima, bila jina la mtoaji.

Lyons, tarehe 24 Juni, 1852,

Ndugu Mpendwa katika Kristo:

Ni miaka kadhaa sasa tangu nisome kwa hamu kubwa, na natumaini kwa faida fulani kwa nafsi yangu, habari ya kazi zako na mambo uliyoyapitia. Tangu wakati huo kazi yako imekuwa shabaha ya fikira nyingi na maombi mengi, nami nimewapa nakala nyingi za kitabu chako marafiki Wakristo. Mmoja wao amekisoma huko Shamu, juu ya Mlima Lebanoni, alikoenda kwa shughuli za biashara; na, alipokuwa akikuombea wewe na yatima wako wapenzi, Bwana alitia moyoni mwake kukutumia pauni mbili, ambazo mume wangu aliongeza nyingine mbili; nasi twakusihi ukubali sadaka hiyo ndogo kwa jina la Bwana. Ikiwa umechapisha jambo lo lote kuhusu matendo ya Bwana kwako tangu mwaka 1844, tutafurahi sana kulipokea. Ungeweza kulipeleka kwa Mabwana * * * *, London, kwa ajili ya * * * * wa Lyons. Na sasa, ndugu mpendwa, neema na amani ya Bwana zikae juu yako na juu ya wakazi wa nyumbani kwako mpendwa.

Wako kwa mapendo katika Bwana,
* * * *

Nimepata michango kutoka Australia, Indies za Mashariki, Indies za Magharibi, Marekani, Kanada, kutoka Rasi ya Tumaini Jema, kutoka Ufaransa, Uswisi, Ujerumani, Italia, n.k.; na sasa waja pia mchango huu kutoka Mlima Lebanoni, pamoja na maombi ya ndugu Mkristo ambaye jina lake sikuwahi kulisikia wala silijui hata sasa. Tazama, msomaji mpendwa, hii ndiyo njia ambayo kwayo Bwana amenisaidia katika utumishi huu wa thamani kwa miaka ishirini na miwili. Pamoja na watenda-kazi wenzangu, au bila wao, nao bila mimi, maombi yetu hupelekwa kwa Bwana kwa ajili ya msaada, naye hupenda, kwa ajili ya Yesu, kusikiliza dua zetu, na kuisukuma mioyo ya baadhi ya watoto wake, tunaowajua au tusiowajua, kutupelekea msaada. Watoaji waweza kuwa matajiri au maskini; waweza kuishi karibu, au kwa umbali wa zaidi ya maili elfu kumi; waweza kutoa vingi au vidogo; waweza kuwa wametoa mara nyingi kabla, au kamwe; waweza kuwa wanajulikana kwetu vyema, au wasijulikane kabisa: katika mambo haya na mengine mengi kunaweza kuwa na mabadiliko ya daima; lakini Mungu hutusaidia daima; kamwe hatuaibishwi. Na kwa nini isiwe hivyo? Ni kwa sababu tu tumewezeshwa kwa neema ya Mungu kuweka tumaini letu kwake kwa ajili ya kile tunachohitaji.

Tarehe 9 Oktoba. Asubuhi hii Luka sura ya saba ilikuja katika mpangilio wa usomaji wangu kabla ya kifungua-kinywa. Nilipokuwa nikisoma habari ya yule akida na kufufuliwa kutoka mautini kwa mwana wa mjane huko Naini, niliinua moyo wangu kwa Bwana Yesu hivi: “Bwana Yesu, wewe una uwezo ule ule sasa. Waweza kunipatia mahitaji kwa ajili ya kazi yako iliyo mkononi mwangu. Uridhike kufanya hivyo.” Baada ya kama nusu saa nilipokea pauni mia mbili thelathini na shilingi kumi na tano; tena shilingi moja. Pauni hizi mia mbili thelathini na shilingi kumi na tano ziliachwa mkononi mwangu, kama zilivyohitajika zaidi. Nilichukua nusu yake kwa ajili ya matumizi ya kawaida ya yatima, na nusu nyingine kwa ajili ya makusudi mengine. Sasa nimeandaliwa kwa wingi kukidhi mahitaji ya siku hii.

Furaha ambayo majibu kama hayo ya maombi huleta haiwezi kuelezwa. Nilikuwa nimeazimia kumngoja Mungu peke yake, wala nisijitengenezee ukombozi usiopatana na Maandiko. Nina maelfu ya pauni kwa ajili ya mfuko wa ujenzi; lakini singechukua kutoka humo, kwa sababu ulikuwa umetengwa kwa ajili ya kusudi hilo. Kuna pia urithi wa pauni mia moja kwa ajili ya yatima uliopitwa na wakati kwa miezi miwili, ambao katika kutazamia kulipwa kwake moyo waweza kwa asili kuelekea kutumia fedha fulani kutoka mfuko wa ujenzi, ili irudishwe na fedha ya urithi, itakapoingia; lakini singetoka hivyo katika njia ya Mungu ya kupata msaada. Wakati ule ule mchango huu ulipowasili, nilikuwa nimefunga pauni mia moja ambazo kwa bahati nilikuwa nazo mkononi, zilizopokelewa kwa ajili ya mfuko wa ujenzi, ili nizipeleke benki, kwa kuwa nilikuwa nimeazimia nisizizguse, bali kumngoja Mungu. Nafsi yangu yamtukuza Bwana kwa wema wake!

Fungu hili la mwisho limenakiliwa kutoka shajara yangu, lililoandikwa wakati ule. Naongeza maneno machache zaidi kwenye sentensi za mwisho.

Akili ya asili huwa daima na mwelekeo wa kufikiri kwa hoja, hapo tunapopaswa kuamini; kuwa kazini, hapo tunapopaswa kuwa kimya; kwenda njia yetu wenyewe, hapo tunapopaswa kuendelea kwa uthabiti katika njia za Mungu, hata ziwe ngumu kiasi gani kwa asili. Nilipoongoka kwanza, ningesema, Kuna ubaya gani kuchukua fedha fulani iliyotengwa kwa ajili ya mfuko wa ujenzi? Mungu atanisaidia tena baada ya muda kwa mahitaji ya yatima, ndipo naweza kuirudisha. Au, kuna fedha hii inayodaiwa ya urithi wa pauni mia moja. Fedha hii ni ya hakika kabisa; kwa hiyo, je, siwezi, kwa kuitegemea, kuchukua fedha fulani kutoka mfuko wa ujenzi, na, urithi utakapolipwa, kuirudisha fedha niliyoichukua? Kutokana na yale niliyoyaona kwa waaminio, najua kwamba wengi wangetenda hivyo. Lakini hutokeaje, tunapomtangulia Mungu hivi, kwa kwenda njia yetu wenyewe? Twaleta, katika mambo mengi, hatia juu ya dhamiri zetu; na kama sivyo, hakika twadhoofisha imani badala ya kuiongeza; na kila mara tunapojitengenezea ukombozi wetu wenyewe hivi twaona ni vigumu zaidi na zaidi kumtumaini Mungu, hata mwishoni twajitoa kabisa kwa akili yetu ya asili iliyoanguka, na kutoamini kunashinda. Ni tofauti kama nini, mtu akiwezeshwa kuungoja wakati wa Mungu mwenyewe, na kumtazamia yeye peke yake kwa ajili ya msaada na ukombozi! Msaada unapokuja hatimaye, baada ya nyakati nyingi za maombi labda, na baada ya kujaribiwa sana kwa imani na saburi labda, ni tamu kama nini, na thawabu iliyopo ni kubwa kama nini ambayo nafsi hupokea mara moja kwa kumtumaini Mungu, na kwa kungoja kwa saburi ukombozi wake! Msomaji Mkristo mpendwa, kama hujawahi kutembea katika njia hii ya utii kabla, fanya hivyo sasa, nawe ndipo utakapojua kwa uzoefu utamu wa furaha itokanayo nayo.

Tarehe 12 Oktoba. Kwa kuuza matambara na mifupa shilingi kumi na mbili na pensi sita. Nanakili kama ilivyo kutoka kwenye daftari la stakabadhi. Twatafuta kutumia kila kitu kwa faida kuu. Kama wakili wa fedha za umma, naona ni haki kwamba hata vitu hivi vibadilishwe kuwa fedha; wala hatungeweza kutarajia majibu ya maombi yetu kama kwa kujua upotevu wo wote ungeruhusiwa katika kazi hii. Kwa maana ni kwa sababu tu fedha hii hupokelewa kutoka kwa Mungu, kwa kuitikia maombi peke yake, kwa hiyo yatupasa zaidi kuwa waangalifu katika kuitumia.

Kutoka tarehe 20 Desemba, 1852, hata tarehe 4 Januari, 1853, hatukuwa na kitu cho chote zaidi ya mahitaji yetu. Mahitaji yaliingia tu kadiri yalivyohitajika kwa shida za haraka. Lakini tarehe 4 Januari, tulipokea, kama ilivyoelezwa chini ya kichwa kingine, mchango mkubwa zaidi niliyowahi kuupata, ambao kutoka humo nilichukua pauni mia sita kwa ajili ya kuwatunza yatima. Mambo haya nayaeleza, ili kutoa mfano wa vitendo kwamba wamekosea kabisa wale wadhaniao kwamba kazi hii sasa si tena kazi ya imani, kama ilivyokuwa katika miaka ya kale. Ni kweli, sasa tuna kipato kikubwa zaidi kuliko tulivyokuwa nacho katika miaka ya 1838, 1839, na 1840; lakini pia ni kweli kwamba matumizi yetu ni mara tatu zaidi. Hatuna kipato cha kawaida sasa, kama vile tusivyokuwa nacho wakati ule. Hatumwombi mwanadamu ye yote msaada sasa; kama vile tusivyofanya wakati ule. Twamtegemea Mungu peke yake, kwa neema yake; kama vile tulivyofanya wakati ule. Ni nani ulimwenguni kote atakayesema kwamba nilimwomba msaada katika kazi hii ya yatima, tangu mwanzo wake, tarehe 9 Desemba, 1835, hata sasa? Basi, kwa kuwa hatuna fedha za kuishi juu yake; kwa kuwa hatuna wachangiaji au watoaji wa kawaida ambao tungeweza kuwategemea; kwa kuwa kamwe hatumwombi mwanadamu msaada, bali Mungu peke yake; na kwa kuwa, mwisho wa yote, kamwe hatukuingia deni kwa ajili ya kazi hii, wala hatuingii sasa: kwa nini sasa isiwe kazi ya imani, kama zamani? Je, wale wasemao sivyo watajiweka katika hali niliyokuwamo, wakati, mwishoni mwa mwaka 1852, sikubaki na pauni mbili, na watu wapatao mia tatu thelathini walipaswa kutunzwa siku baada ya siku, kwa yote wayahitajiyo, ndipo wathibitishe kama sasa ni jambo jingine lo lote isipokuwa kazi ya imani? Lakini labda nimesema mengi mno juu ya jambo hili. Kwa maana kila mtu, isipokuwa wale walioazimia wasione, hatapata ugumu wo wote kutambua kwamba sasa, kama zamani, mtu angeweza tu kulindwa asizidiwe katika hali kama hiyo kwa kumtazamia Bwana siku baada ya siku, na hilo si kwa ajili ya riziki za fedha tu, bali kwa ajili ya msaada chini ya shida zisizo na hesabu ambazo hukutana nazo daima katika kazi kama hiyo.

Ni jinsi gani niwezavyo kumsifu, na kumwabudu, na kumtukuza Bwana ipasavyo kwa upendo wake na uaminifu wake katika kunichukua hivi mwaka hata mwaka katika utumishi huu wake, akinipatia yote niyahitajiyo katika njia ya mahitaji, watenda-kazi wenzangu, nguvu za akili, na, zaidi ya yote, msaada wa kiroho! Kama si msaada wake na tegemezo lake ningezidiwa kabisa katika muda mfupi sana; walakini, kwa msaada wake naendelea, nami nina furaha kuu, kiroho, katika utumishi wangu; wala kwa kawaida siko katika afya mbaya zaidi sasa kuliko nilivyokuwa miaka ishirini iliyopita, bali ni afya njema zaidi.

Katika mwaka wa 1852-53, kulikuwa na shule nne za mchana, zenye watoto 235 ndani yake, zilizohudumiwa kikamilifu na fedha za Taasisi. Zaidi ya hayo, shule moja ya Jumapili huko Bristol, yenye watoto 150, ilihudumiwa kikamilifu, na nyingine tatu huko Devonshire, Somersetshire, na Gloucestershire, zenye watoto 280, zilisaidiwa. Mwisho, shule moja ya watu wazima, yenye wanafunzi watu wazima 103, ilihudumiwa kikamilifu na fedha za Taasisi. Walikuwa chini ya uangalizi wetu, kutoka tarehe 5 Machi, 1834, hata tarehe 26 Mei, 1853, katika shule mbalimbali za mchana watoto 5,686, katika shule za Jumapili watoto 2,673, na katika shule ya watu wazima watu 2,132. Zilitumiwa kutoka fedha za Taasisi katika mwaka huu, kwa ajili ya shule mbalimbali, £349, 12s. 11d.

Katika mwaka huu zilitolewa kutoka fedha za Taasisi, kwa kusambaza Maandiko Matakatifu, £431, 5s, 1½d., na zilisambazwa Biblia 1,666 na Agano Jipya 1,210. Zilisambazwa kutoka tarehe 5 Machi, 1834, hata tarehe 26 Mei, 1853, Biblia 10,476, na Agano Jipya 6,061.

Kwa miaka kadhaa iliyopita sehemu hii ya kazi imezidi kuonekana kwangu ya muhimu zaidi na zaidi kwa sababu ya jaribio la kutisha lililofanywa na nguvu za giza kulinyang’anya kanisa la Kristo Maandiko Matakatifu. Kwa sababu hii nimetafuta kuchukua kila nafasi kusambaza Maandiko Matakatifu katika Uingereza, Ireland, Kanada, British Guiana, Indies za Mashariki, Uchina, Australia, n.k. Kila mlango uliofunguliwa ambao Bwana alipenda kuuweka mbele yangu katika sehemu hizi au sehemu nyingine za ulimwengu, nimeingia kwa furaha; naam, nimekihesabu kuwa pendeleo, kweli kweli, kuruhusiwa na Mungu kulipeleka Neno lake Takatifu. Watumishi wengi wa Kristo, katika sehemu mbalimbali za ulimwengu, wamenisaidia katika utumishi huu, ambao kwa kupitia kwao nakala za Maandiko Matakatifu zimesambazwa.

Katika mwaka huu zilitumiwa kutoka fedha za Taasisi kwa ajili ya makusudi ya umishonari £2,234, 2s. 6d. Kwa fedha hii watenda-kazi hamsini na wanne katika neno na mafundisho, katika sehemu mbalimbali za ulimwengu, walisaidiwa kwa kiwango kikubwa au kidogo.

Zilitolewa kwa kusambaza vijikaratasi, kutoka tarehe 26 Mei, 1852, hata tarehe 26 Mei, 1853, jumla ya £555, 16s. 7½d.; na vilisambazwa katika mwaka huu vijikaratasi 733,674.

Jumla ya vijikaratasi vilivyosambazwa hata tarehe 26 Mei, 1853, ilikuwa 1,820,040. Kutoka tarehe 19 Novemba, 1840, hata tarehe 10 Mei, 1842, kipindi cha kwanza ambacho usambazaji wa vijikaratasi ulikuwa ukiendelea kwa uhusiano na Scriptural Knowledge Institution for Home and Abroad, vilisambazwa 19,609; kutoka tarehe 26 Mei, 1851, hata tarehe 26 Mei, 1852, 489,136; na katika kipindi hiki 733,674.

Mwanzoni mwa kipindi hiki kulikuwa na yatima 300 katika Nyumba mpya ya Yatima juu ya Ashley Down, Bristol. Katika mwaka huu waliingizwa ndani yake yatima 13, wakawa 313 kwa jumla. Jumla ya yatima waliokuwa chini ya uangalizi wetu kutoka Aprili, 1836, hata tarehe 26 Mei, 1853, ilikuwa 528.

Bila mtu ye yote kuombwa kitu cho chote na mimi binafsi, jumla ya £55,408, 17s. 5¾d. nilipewa kwa ajili ya yatima, kama tunda la maombi kwa Mungu, tangu mwanzo wa kazi hata tarehe 26 Mei, 1853. Yaweza pia kuwa jambo la kupendeza kwa msomaji kujua kwamba jumla iliyotolewa kwa ajili ya makusudi mengine, tangu mwanzo wa kazi hata tarehe 26 Mei, 1853, ilifikia £19,163, 14s. 1½d.; na ile iliyoingia kwa kuuza Biblia na vijikaratasi, na kwa malipo ya watoto katika shule za mchana, ilifikia £3,490, 7s. 1¼d. Zaidi ya hayo, pia, aina nyingi na wingi wa vitu vya mavazi, samani, vyakula, n.k., vilitolewa kwa matumizi ya yatima.

Gharama zinazohusiana na kuwatunza yatima 300 na wanafunzi wa ufundi katika mwaka huu zilikuwa £3,453, 15s. 1½d.

Tarehe 31 Desemba, 1852. Katika mwaka huu wamepokelewa katika ushirika waaminio 35. Bwana amependa kunipa £445, 8s. 8½d.

Shemeji yangu, Bw. A. N. Groves, ambaye ametajwa katika sehemu ya kwanza ya Simulizi hii, kuwa alinisaidia kwa mfano wake nilipoanza kazi zangu katika Uingereza mwaka 1829, kwa kuwa yeye, bila msaada wo wote uonekanao, na bila kuunganishwa na chama cho chote cha umishonari, alikwenda pamoja na mkewe na watoto wake mpaka Bagdad, kama mmishonari, baada ya kuacha kazi yenye faida ya kama pauni elfu moja na mia tano kwa mwaka, alirudi katika majira ya kupukutika kwa majani mwaka 1852, kutoka Indies za Mashariki, kwa mara ya tatu, akiwa mgonjwa mno. Hata hivyo aliishi hata tarehe 20 Mei, 1853, ambapo, baada ya ushuhuda uliobarikiwa mno kwa ajili ya Bwana, alilala usingizi katika Yesu nyumbani mwangu.

Nimekwisha sema kwamba tarehe 26 Mei, 1853, nilikuwa nazo mkononi kwa ajili ya kujenga jengo kubwa la kutosha kuwakaribisha watoto 700, jumla ya £12,531, 12s. 0¼d.

Tukio moja tu litaonyesha vyanzo mbalimbali sana ambavyo kutoka humo michango hupokelewa, pamoja na tofauti kubwa katika kiasi.

Tarehe 17 Januari, 1854. Kutoka S. R. na E. R., wasichana wawili maskini wa kiwandani, karibu na Stroud, 1s. 7d. Siku hii pia nilipokea ahadi kwamba ningelipwa, kwa ajili ya kazi ya Bwana iliyo mkononi mwangu, £5,207, ili nizitumie kama ningeona vyema zaidi.

Jumla yote iliyopokelewa kwa ajili ya Nyumba mpya ya Yatima, katika mwaka ulioishia tarehe 26 Mei, 1854, ilikuwa £5,285, 17s. 5d., ambayo ilifanya jumla ya £17,816, 19s. 5¼d. mkononi tarehe 26 Mei, 1854.

Katika mwaka huu matumizi ya kawaida kwa ajili ya makusudi mbalimbali ya Scriptural Knowledge Institution for Home and Abroad yalifikia £7,507, 0s. 11½d., yakiwa £471, 8s. 11d. zaidi ya mwaka wo wote uliopita; walakini Bwana hakuniwezesha tu kuyakidhi yote, bali kuongeza jumla ya £5,285, 7s. 5d. kwenye mfuko wa ujenzi.

Bado kuna jumla kubwa inayohitajika kabla sitawezeshwa kujenga nyumba nyingine kwa ajili ya yatima 700; wala sina sasa, zaidi ya mwanzoni, matumaini yo yote ya asili ya kupata kile ambacho bado kinahitajika; lakini tumaini langu ni katika Mungu aliye hai. Nilipofikia uamuzi kwamba yalikuwa mapenzi ya Mungu nijenge Nyumba nyingine ya Yatima, sikuwa tu na matumaini yo yote ya asili ya kupata zile £35,000 zitakazohitajika kwa kusudi hili, bali pia sikuwa na matumaini yo yote ya asili ya kuweza kuandaa mahitaji ya wale yatima mia tatu waliokuwa tayari chini ya uangalizi wangu. Miaka mitatu imepita tangu wakati huo, nami nimekuwa na yote niliyoyahitaji kwa ajili yao, yakifikia kama £10,500; na £17,816, 19s. 5¼d. nimezipokea kwa ajili ya mfuko wa ujenzi. Je, siwezi kumtumaini vyema Bwana kwa kile ambacho bado kinahitajika kwa mfuko wa ujenzi? Kwa neema yake nitafanya hivyo, na kufurahia kufanya hivyo; kwa maana najua kwamba hatimaye maombi yangu yote yatageuzwa kuwa sifa kuhusu sehemu hii ya utumishi.

Kuna jambo moja ambalo hasa ni kitia-moyo kwangu kuendelea kumngoja Bwana kwa ajili ya mahitaji yaliyosalia yanayotakiwa, yaani: maombi ya kupokelewa kwa yatima yanaendelea kufanywa. Tarehe 26 Mei, 1853, kulikuwa na yatima 480 waliokuwa wakingoja kupokelewa. Tangu wakati huo wengine 181 wameombewa, wakawa 661 kwa jumla. Watoto hawa ni kuanzia umri wa miezi mitatu na kuendelea, na wote wamefiwa na wazazi wote wawili kwa mauti.

Katika mwaka ambao sasa unafanyiwa mapitio nilipokea mchango ufuatao kwa ajili ya watenda-kazi wa umishonari, chini ya mazingira ya kupendeza kwa namna ya pekee.

Tarehe 9 Agosti, 1853, nilipokea barua kutoka kwa ndugu Mkristo, ikifuatana na hawala ya pauni themanini na nane, shilingi mbili na pensi sita kwa mabenki yake, ambazo kati yake pauni tatu, shilingi mbili na pensi sita zilikuwa mapato ya sanduku la yatima katika mahali pa mkutano pa waaminio, na pauni themanini na tano kutoka kwa mjane maskini aliyeuza nyumba yake ndogo, iliyokuwa mali yake yote, ambaye alikuwa ameweka pauni tisini, jumla yote ya kile alichokipokea, katika sanduku hilo la yatima miezi miwili kabla, tarehe 9 Juni, 1853. Katika sanduku hili fedha ilikuwa kwa muda fulani, bila kujulikana, hata sanduku la yatima lilipofunguliwa, na pauni tisini pamoja na mistari michache bila jina zilipatikana ndani yake. Lakini, kwa kuwa jambo la nia yake ya kuiuza nyumba ndogo, na nia yake ya kunitumia fedha kwa ajili ya kazi ya Bwana, lilikuwa limejulikana kwa yule ndugu aliyenitumia fedha, hakuona uhuru wa kunitumia bila kumshauri kwa kupitia ndugu wawili, aliowatuma na fedha, wakimrudishia tena; kwa maana alimjua kuwa maskini sana, na aliogopa kwamba jambo hili laweza kuwa tendo la hisia za ghafla, na kwa hiyo lijutiwe baadaye. Ndugu hawa hawakuweza kumshawishi aipokee fedha, lakini walifanikiwa kumshawishi apokee tena pauni tano kati ya kiasi hicho, ndipo yule ndugu aliyetajwa hakuona tena uhuru wa kuizuia fedha isinifikie, na hivyo akanitumia zile pauni themanini na tano.

Nilipoipokea hii, mara moja nilimwandikia yule mjane maskini mcha-Mungu, nikimpa gharama za safari za kuja Bristol, ili nipate mazungumzo ya ana kwa ana naye; kwa maana niliogopa jambo hili lisiwe tendo la hisia za ghafla, na zaidi sana, kwa kuwa alikuwa amepokea tena pauni tano za kiasi hicho. Dada huyu katika Bwana, mjane wa umri wa kama miaka sitini, alikuja Bristol, na akaniambia kwa unyofu wote jinsi miaka kumi kabla, katika mwaka 1843, alivyokuwa amekusudia kwamba kama angepata kumiliki ile nyumba ndogo aliyoishi ndani yake pamoja na mumewe, angeiuza, na kutoa mapato yake kwa Bwana. Baada ya kama miaka mitano mumewe alikufa, naye, akiwa hana watoto, wala mtu ye yote mwenye madai maalum juu yake, ndipo akatafuta kuiondoa ile mali yake ndogo, kama ilivyokuwa nia yake miaka hiyo yote kabla. Lakini, shida moja baada ya nyingine ilimzuia asiweze kufanya mauzo. Hatimaye alijihisi katika shida ya pekee kwa sababu ya kutoweza kwake kulipa kodi ya kila mwaka ya ardhi ya ile nyumba ndogo na bustani, naye akamwomba Bwana amwezeshe kuiuza mali ile, ili aweze kutimiza haja yake aliyokuwa nayo kwa miaka kumi, ya kumpa yeye mapato ya mali hii yake. Sasa akamsaidia. Nyumba iliuzwa, fedha ikalipwa, naye akaziweka pauni tisini zote katika sanduku la yatima kwa ajili yangu, akiwa na hakika kwamba Bwana angeniongoza jinsi fedha ingeweza kutumika vyema zaidi kwa ajili yake. Bado nilimhoji tena na tena, ili nijue kama halikuwa tendo la hisia za ghafla lililomwongoza kutenda alivyotenda; lakini si tu niliona kwamba nia yake ilikuwa imeamuliwa kikamilifu juu ya tendo hili kwa miaka kumi kabla, bali kwamba pia aliweza kujibu kutoka katika neno la Mungu pingamizi zote nilizozitoa kwa makusudi, ili nimpime, kama alikuwa ametenda kwa akili na kwa nia njema katika yale aliyoyatenda. Hatimaye niliridhika kikamilifu kwamba halikutokana na msukumo wa ghafla, wala chini ya hisia za ghafla, kwamba alikuwa ametoa fedha. Kisha nilimwambia jambo kama hili: “Wewe ni maskini, na una umri wa kama miaka sitini, kwa hiyo unapungukiwa nguvu, kwa hiyo je, huwezi kujiwekea fedha hii mwenyewe?” Jibu lake lilikuwa, kwa kadiri nikumbukavyo, kama hili: “Mungu amenitunza siku zote, wala sina shaka kwamba atafanya hivyo wakati ujao pia. Naweza kufanya kazi na kujipatia riziki yangu kama wengine, nami niko tayari kufanya kazi kama muuguzi, au kwa njia yo yote nyingine.” Ningeweza kusema nini dhidi ya hili? Hivi ndivyo hasa mtoto wa Mungu angesema, na apasavyo kusema. Lakini kubwa kuliko shida zote za kuzipokea zile pauni themanini na tano ilibaki akilini mwangu, nami nailieleza, kama nisimuliavyo yote kwa faida ya msomaji. Ilikuwa hii. Nyumba ilikuwa imeuzwa kwa pauni tisini. Kiasi chote kilikuwa kimewekwa katika sanduku, lakini, kwa ushawishi wa wale ndugu wawili walioombwa kumshauri mjane huyu, alikuwa ameshawishika kuchukua tena pauni tano kati ya zile tisini. Kwa hiyo nilijiambia, je, hangeweza kuwa tayari, baada ya muda, kuchukua tena zile pauni tisini zote; kwa hiyo, nawezaje kufurahi katika kuipokea fedha hii? Kwa sababu hii nilikazia hasa jambo hili, na nikamwambia kwamba niliogopa asije akajuta tendo lake kabisa baada ya muda fulani, kwa kuwa alikuwa amechukua tena zile pauni tano. Sasa nilijifunza mazingira ambayo chini yake alikuwa ameshawishika kuchukua tena zile pauni tano.

Wale ndugu wawili waliokuwa wamemtembelea kwa kusudi la kumwonyesha kufaa kwa kupokea tena zile pauni tisini, au sehemu yake, walimwambia kwamba Barnaba aliuza shamba lake, lakini baadaye aliishi pamoja na wengine kwa kile ambacho yeye na wengine walikuwa wamekiweka katika hazina ya pamoja, na kwamba, kwa hiyo, angeweza kupokea tena angalau sehemu ya zile pauni tisini, kama asingechukua zote. Ndipo akajiambia kwamba, “kama mtoto wa Mungu, angeweza kuchukua fungu la watoto,” na, kwa kuwa alikuwa amempa Mungu hizi pauni tisini, angeweza kupokea tena pauni tano. Aliniambia kwamba aliona kwamba wale ndugu walikuwa wamemwonyesha kutoka Maandiko Matakatifu lile aliloweza kulitenda, na kwa hiyo alikuwa amechukua zile pauni tano. Mimi mwenyewe sikukubaliana na hukumu ya wale ndugu waliosema hivi (kwa kuwa hakuna ushahidi kwamba Barnaba aliwahi kutunzwa kutoka hazina ya pamoja, mapato ya kuuza nyumba na mashamba, ambayo kutoka humo maskini walitunzwa); lakini kwa makusudi sikumwambia mjane neno lo lote, asije mara akashawishika kunipa hizi pauni tano pia. Hata hivyo, alizikuwa hizi pauni tano bila kuzigusa, akanionyesha; na kabla hajaondoka alinilazimisha kuchukua pauni moja kati yake kwa faida ya yatima, ambayo sikuikataa, kwa kuwa sikuwa na nia ya kuzikuza zile pauni themanini na tano. Pia alinipa pensi sita kwa ajili ya yatima, ambazo mtu fulani alikuwa amempa yeye mwenyewe, siku chache kabla.

Sasa nilimwuliza, kwa kuwa jambo hili kuhusu kubaki na zile pauni tano lilikuwa limeelezwa kwa kuridhisha, kwa kadiri lilivyohusu hali ya moyo wake mwenyewe, alitaka nifanye nini na ile fedha, ikiwa ningeona ni haki kuizuia. Jibu lake lilikuwa kwamba angeliacha jambo hilo kwangu, kwamba Mungu angeniongoza kulihusu; lakini kwamba, kama angesema lo lote juu yake, angependa zaidi litumike kwa ajili ya kuwatunza ndugu wanaotenda kazi katika neno bila mshahara wo wote, na ambao huhatarisha maisha yao kwa ajili ya jina la Kristo. Alitaka mimi nipate sehemu ya ile fedha; lakini hili nililikataa kabisa, nisije nikasemwa vibaya katika jambo hili. Kisha nilijitolea kulipa gharama zake za safari, kwa kuwa alikuwa amekuja kwangu, ambazo hakuzikubali, kwa kuwa hakuzihitaji. Mwishoni, nilimwambia kwamba sasa ningeomba zaidi kuhusu jambo hili, na kufikiri la kufanya kulihusu. Kisha niliomba pamoja na mwanamke huyu mpendwa, mcha-Mungu, nikamkabidhi kwa Mungu, nikaachana naye, wala sijamwona tangu wakati huo.

Nilingoja kutoka tarehe 9 Agosti, 1853, hata tarehe 7 Machi, 1854, nilipomwandikia, nikimrudishia tena zile pauni themanini na tano zote, au sehemu yake. Tarehe 9 Machi, 1854, miezi saba tu baada ya kuipokea fedha, na miezi tisa tu baada ya yeye kuitoa kwa kweli, na miaka kumi na miezi tisa baada ya yeye kufanya azimio la kumpa Mungu nyumba yake na bustani yake, nilipata habari kutoka kwake, akisema kwamba alikuwa na nia ile ile kama alivyokuwa nayo kwa miaka mingi. Kwa hiyo niliitumia ile fedha, kuwasaidia ndugu wamishonari wa nchi za kigeni ambao, kwa kadiri ya ujuzi wangu, walifanana zaidi na aina ya watu ambao alitaka kuwasaidia.

Sababu kwa nini nimekaa kwa undani hivyo juu ya tukio hili ni: 1. Ikiwa, kama wakili wa ukarimu wa watoto wa Mungu, nitalaumiwa kwa kupokea kutoka kwa mjane maskini karibu kihalisi mali yake yote, yaweza kuonekana kwa jinsi gani nilivyofanya hivyo. Kukataa tarehe 9 Machi, 1854, pia, kungekuwa kuzidi kile ambacho ningeruhusiwa kukifanya. 2. Nilitamani, pia, kutoa mfano wa vitendo kwamba natamani michango kwa njia ya Mungu peke yake. Si fedha peke yake ninayoitamani; bali fedha ipokelewayo kwa kuitikia maombi, katika utaratibu wa Mungu. 3. Tukio hili laonyesha jinsi Mungu anavyonisaidia mara nyingi kwa namna isiyotarajiwa kabisa. 4. Nimeitaja pia habari hii ili kuwe na ushahidi mpya kwamba hata katika siku hizi za mwisho upendo wa Kristo una nguvu ya kulazimisha, na waweza kutenda kwa nguvu, kama katika siku za mitume. Nimeshuhudia matukio mengi kama haya, katika miaka ishirini ambayo nimekuwa nikishughulika katika utumishi huu wangu. Na tumshukuru Mungu kwa mambo kama haya, na tutafute neema ya kuwaiga watu kama hao wacha-Mungu, wanaume kwa wanawake, kuliko kudhani kwamba wanapita kiasi. Hata hivyo, siwezi kuliacha jambo hili, bila kumkabidhi mjane huyu maskini kwa maombi ya wote wampendao Bwana wetu Yesu, ili aweze kuhifadhiwa katika unyenyekevu, asije, kwa kujiona mkuu, kwa sababu ya yale ambayo amewezeshwa kuyatenda, kwa neema ya Mungu, si tu akapoteza baraka katika nafsi yake mwenyewe, bali tukio hili likawa mtego kwake. Omba pia, msomaji uaminiye, kwamba kamwe asiruhusiwe kujuta yale aliyomtendea Bwana.

Baada ya kutoa kwa undani vyanzo na jinsi ya riziki kwa ajili ya kuwatunza yatima kwa muda wa siku ishirini na nne, Bw. M. aongeza:—

Kusudi hasa kwa nini nimekuwa na undani hivyo, ni, kuonyesha kwamba kazi hii sasa, kama vile daima, ni kazi inayoendeshwa kabisa kwa kumtegemea Mungu aliye hai, ambaye yeye peke yake ndiye tumaini letu, na kwake yeye peke yake twatazamia msaada, na ambaye kamwe hajatuacha katika saa ya mahitaji. Hata hivyo, kuna jambo moja tofauti kuhusu mwaka huu, ukilinganishwa na miaka ya kale, nalo ni kwamba, ingawa majaribu ya imani yetu katika mwaka huu yalikuwa makubwa kama vile katika miaka iliyopita, kiasi kilichohitajika nyakati za kale hakikuwahi kuwa kikubwa kama katika mwaka huu, hasa kwa kuwa mkate katika sehemu kubwa ya mwaka huu ulikuwa ghali karibu mara mbili zaidi kuliko miaka kadhaa iliyotangulia.

Lakini basi, yaweza kusemwa, Ikiwa umekuwa na jaribu hili la imani, pamoja na hawa yatima mia tatu, kwa nini watafuta kujenga Nyumba nyingine ya Yatima kwa ajili ya wengine mia saba, na hivyo kuwa na elfu moja wa kuwatunza? Je, hutakuwa na majaribu makubwa zaidi ya imani?

Jibu langu ni: 1. Mungu hakuniangusha kamwe katika miaka yote ishirini ya utumishi huu wangu. 2. Naendelea kwa urahisi sasa, na yatima mia tatu, kama nilivyokuwa na thelathini, idadi ambayo kwayo nilianza. Idadi yao ni mara kumi kubwa kuliko ilivyokuwa mwanzoni; lakini Mungu amenisaidia siku zote. 3. Majaribu ya imani yalitarajiwa, naam, yalikuwa mojawapo ya makusudi makuu ya kazi hii, kwa faida ya kanisa la Kristo kwa ujumla. 4. Nilipewa ujasiri wa kwenda mbele, kwa kumtegemea Mungu peke yake, nikiwa na hakika kwamba angenisaidia; walakini nilimngoja kwa siri kwa miezi sita kabla sijaidhihirisha nia yangu hii, ili nisije nikachukua hatua ya haraka; wala sikujuta kamwe kuwa nimekwenda mbele. 5. Lakini yatupasa kuongeza kwamba wingi ule ule ambao Bwana alinipa wakati ule, akili yangu ilipokuwa ikitafakari jambo hili, ulikuwa uthibitisho mkubwa kwangu kwamba sikuwa nimekosea nia yake. Na hata katika mwaka huu, jinsi msaada wake ulivyokuwa mkuu; kwa maana kipato cha kazi kwa ujumla kimekuwa pauni elfu kumi na mbili, mia saba na themanini na tano, shilingi kumi na tano, pensi saba na nusu. Kwa hiyo, nina hakika kwamba Bwana, kwa wakati wake mwenyewe, hataniruhusu tu kujenga Nyumba nyingine ya Yatima, bali kwamba yeye pia, atakapopenda kuijaza, atapata mahitaji ya kuwatunza watoto hawa.

Katika mwaka huu shule nne za mchana, zenye watoto 202, zilikuwa zimehudumiwa kikamilifu na fedha za Taasisi. Zaidi ya hayo, shule moja ya Jumapili huko Bristol, yenye watoto 137, ilikuwa imehudumiwa kikamilifu, na nyingine tatu huko Devonshire, Somersetshire, na Gloucestershire, zenye watoto 300, zilikuwa zimesaidiwa. Mwisho, shule moja ya watu wazima, yenye wanafunzi watu wazima 154, ilikuwa kikamilifu imehudumiwa. Jumla yote iliyotumiwa katika mwaka huu kuhusiana na shule hizi ilikuwa £359, 15s. 10½d. Idadi ya watoto wote waliokuwa chini ya uangalizi wetu katika shule tu zilizohudumiwa kikamilifu na Taasisi hii, kutoka tarehe 5 Machi, 1834, hata tarehe 26 Mei, 1854, ilikuwa 5,817 katika shule za mchana, 2,748 katika shule za Jumapili, na watu 2,315 katika shule ya watu wazima.

Katika mwaka huu zilitumiwa kwa kusambaza Maandiko Matakatifu, kutoka fedha za Taasisi, £433, 2s. 9d. Zilisambazwa katika mwaka huu Biblia 1,890 na Agano Jipya 1,288; na tangu mwanzo wa kazi hata tarehe 26 Mei, 1854, Biblia 12,366 na Maagano 7,349.

Katika mwaka huu zilitumiwa kutoka fedha za Taasisi, kwa ajili ya makusudi ya umishonari, jumla ya £2,249, 10s. 8½d. Kwa fedha hii watenda-kazi hamsini na sita katika neno na mafundisho, katika sehemu mbalimbali za ulimwengu, walisaidiwa kwa kiwango kikubwa au kidogo.

Katika mwaka huu, Bwana alipenda kubariki tena kwa wingi kazi za wengi wa wale watumishi wa Kristo waliosaidiwa kupitia fedha za Taasisi hii, na hii imekuwa hivyo katika nchi za kigeni na vile vile nyumbani.

Zilitolewa kwa kusambaza vijikaratasi, kutoka tarehe 26 Mei, 1853, hata tarehe 26 Mei, 1854, jumla ya £563, 5s. 0½d.; na vilisambazwa vijikaratasi 869,636.

Jumla ya vijikaratasi vyote vilivyosambazwa tangu mwanzo hata tarehe 26 Mei, 1854, ilikuwa 2,689,676.

Twatamani kuwa na shukrani kwa Bwana kwamba katika kipindi cho chote kilichotangulia hatukuwezeshwa kusambaza vijikaratasi vingi zaidi, na nakala nyingi zaidi za Maandiko Matakatifu, na kusaidia kwa kiwango kikubwa zaidi kazi za umishonari, kuliko katika kipindi hiki; walakini hatungependa kupumzika katika hilo. Ni baraka ya Bwana juu ya kazi zetu tuihitajiyo, tuitamaniyo, na ambayo kwa neema yake pia twaitafuta.

Ikiwa yeyote wa wasomaji Wakristo ana desturi ya kusambaza vijikaratasi, na hata hivyo hajawahi kuona tunda, je, ninaweza kuwapendekezea madokezo yafuatayo kwa ajili ya kuzingatia kwao kwa maombi. 1. Tafuta hali kama hiyo ya moyo, kwa njia ya maombi na kutafakari Maandiko Matakatifu, kiasi kwamba u tayari kumwacha Mungu awe na heshima yote, ikiwa jema lo lote litatimizwa kwa utumishi wako. Ikiwa unajitakia mwenyewe heshima, naam, hata kama ni kwa sehemu tu, wamlazimisha Bwana, kwa kusema, akuweke kando bado kama chombo kisichofaa kwa matumizi ya Bwana. Mojawapo ya sifa kubwa za kufaa katika utumishi wa Bwana ni moyo unaotamani kweli kupata heshima kwa ajili yake. 2. Tangulizia kazi zako zote kwa maombi ya bidii na juhudi; ziendee kwa roho ya maombi; na zifuatishe kwa maombi. Usitegemee idadi ya vijikaratasi ulivyotoa. Vijikaratasi milioni moja vyaweza visiwe njia ya kuokoa hata nafsi moja; na hata hivyo jinsi gani, kupita hesabu, ilivyo kubwa baraka itokanayo na kijikaratasi kimoja tu. Hivyo ndivyo pia kuhusu usambazaji wa Maandiko Matakatifu, na huduma ya neno lenyewe. Basi, tarajia kila kitu kutoka baraka ya Bwana, na hakuna cho chote kutoka juhudi zako mwenyewe. 3. Na hata hivyo, wakati huo huo, fanya kazi, kaza kuingia katika kila mlango ulio wazi, uwe tayari wakati wa kufaa na wakati usiofaa, kana kwamba kila kitu kinategemea kazi zako. Hili, kama lilivyoelezwa kabla, ni mojawapo ya siri kubwa zinazohusiana na utumishi wenye mafanikio kwa Bwana: kufanya kazi, kana kwamba kila kitu kinategemea bidii yetu, na hata hivyo tusitegemee hata kidogo juhudi zetu, bali baraka ya Bwana. 4. Baraka hii ya Bwana, hata hivyo, isitafutwe tu katika maombi, bali pia iwe ikitarajiwa, ikitazamiwa, ikitazamiwa daima; na matokeo yatakuwa kwamba kwa hakika tutakuwa nayo. 5. Lakini tuseme kwamba, kwa ajili ya kujaribiwa kwa imani yetu, baraka hii ilizuiliwa machoni petu kwa muda mrefu; au tuseme, hata, kwamba tungelala usingizi kabla hatujaona jema jingi litokanalo na kazi zetu; hata hivyo kazi zetu, ikiwa zaendeshwa kwa namna hiyo na roho hiyo kama ilivyoelezwa, hatimaye zitakubaliwa kwa wingi, nasi tutakuwa na mavuno mengi katika siku ya Kristo.

Mwanzoni mwa kipindi hiki kulikuwa na yatima 300 katika Nyumba mpya ya Yatima juu ya Ashley Down, Bristol. Katika mwaka huu waliingizwa ndani yake yatima 30, wakawa 330 kwa jumla. Jumla ya yatima waliokuwa chini ya uangalizi wetu kutoka Aprili, 1836, hata tarehe 26 Mei, 1854, ilikuwa 558.

Gharama katika mwaka huu kwa ajili ya kuwatunza yatima zilikuwa £3,897, 2s. 0½d.

Bila mtu ye yote kuombwa kitu cho chote na mimi binafsi, jumla ya £64,591, 6s. 11¼d. nilipewa kwa ajili ya yatima, kama tunda la maombi kwa Mungu, tangu mwanzo wa kazi hata tarehe 26 Mei, 1854. Yaweza pia kuwa jambo la kupendeza kwa msomaji kujua kwamba jumla iliyotolewa kwa ajili ya makusudi mengine, tangu mwanzo wa kazi hata tarehe 26 Mei, 1854, ilifikia £22,268, 2s. 11¼d.; na ile iliyoingia kwa kuuza Biblia na vijikaratasi, na kwa malipo ya watoto katika shule za mchana, tangu mwanzo hata tarehe 26 Mei, 1854, ilifikia £3,989, 4s. 5¾d.

Kazi zetu ziliendelea kubarikiwa miongoni mwa yatima. Tuliona pia tena tunda la kazi zetu, katika mwaka huu, kuhusu yatima waliokuwa zamani chini ya uangalizi wetu.

Mwezi wa Julai, 1853, ilimpendeza Bwana kuijaribu imani yangu kwa njia ambayo kabla haikuwa imejaribiwa. Binti yangu mpendwa, mtoto wa pekee, na mwaminifu tangu mwanzo wa mwaka 1846, aliugua tarehe 20 Juni. Ugonjwa huu, mwanzoni homa ndogo, uligeuka kuwa homa ya matumbo. Tarehe 3 Julai hapakuwa na tumaini la kupona kwake. Sasa ndilo lilikuwa jaribu la imani. Lakini imani ilishinda. Mimi na mke wangu mpendwa tuliwezeshwa kumkabidhi mikononi mwa Bwana. Yeye alitutegemeza sote wawili mno. Lakini nitasema tu juu yangu mwenyewe. Ingawa mtoto wangu wa pekee na mpendwa aliletwa karibu na kaburi, walakini nafsi yangu ilikuwa katika amani kamili, iliyoridhika na mapenzi ya Baba yangu wa mbinguni, nikiwa na hakika kwamba yeye angemtendea yeye na wazazi wake lile tu ambalo mwishoni lingekuwa jema zaidi. Aliendelea kuwa mgonjwa sana hata karibu tarehe 20 Julai, ambapo kupona kulianza. Tarehe 18 Agosti alikuwa amepona kiasi kwamba angeweza kuhamishiwa Clevedon, kwa kubadili hewa, ingawa alikuwa dhaifu mno. Ilikuwa ni siku hamsini na tisa tangu alipougua kwanza.

Nilipokuwa katika taabu hii, taabu hii kubwa, mbali na kuwa katika amani, kwa kadiri ilivyohusu mpango wa Bwana, pia nilihisi amani kamili kuhusu chanzo cha taabu hii. Wakati mwezi wa Agosti, 1831, mkono wa Bwana ulipowekwa juu yangu kwa uzito katika jamaa yangu, kama ilivyosimuliwa katika sehemu ya kwanza ya Simulizi hii, sikuwa na sitasita hata kidogo katika kujua kwamba ilikuwa fimbo ya Baba, iliyotumika kwa hekima na upendo usio na mwisho kwa ajili ya kuirejesha nafsi yangu kutoka hali ya uvuguvugu. Wakati huu, hata hivyo, sikuwa na hisia kama hiyo. Nikiwa na ufahamu wa udhaifu wangu mwingi, makosa, na mapungufu, kiasi kwamba mimi pia ningekuwa tayari kusema pamoja na Mtume Paulo, “Ole wangu, maskini mimi!” walakini nilikuwa na hakika kwamba taabu hii haikuwa juu yangu katika njia ya fimbo ya kibaba, bali kwa ajili ya kujaribiwa kwa imani yangu. Watu mara nyingi, bila shaka, huwa na wazo kunihusu, kwamba majaribu yangu yote ya imani yanahusu mambo yanayohusiana na fedha, ingawa kinyume chake nimesema mara nyingi sana; sasa, hata hivyo, Bwana angeijaribu imani yangu kuhusu mmojawapo wa hazina zangu za dunia nipendazo zaidi, naam, baada ya mke wangu mpendwa, mpendwa kuliko mali zangu zote za duniani. Wazazi wanajua mtoto wa pekee, mtoto mpendwa, alivyo, na jinsi kwa wazazi waaminio mtoto wa pekee, mtoto aaminiye, avyopaswa kuwa. Basi, Baba wa mbinguni alisema, kana kwamba, kwa mpango wake huu, Je, u tayari kunikabidhi mimi mtoto huyu? Moyo wangu ulijibu, Kama ionekanavyo vyema kwako, Baba yangu wa mbinguni. Mapenzi yako yatimizwe. Lakini kama vile mioyo yetu ilivyofanywa kuwa tayari kumrudisha mtoto wetu mpendwa kwa yeye aliyetupa sisi; ndivyo yeye alivyokuwa tayari kutuachia yeye, naye akaishi. “Nawe utajifurahisha katika Bwana, naye atakupa haja za moyo wako.” Zaburi 37:4. Haja za moyo wangu zilikuwa, kumbakiza binti mpendwa, kama yangekuwa mapenzi ya Mungu; njia ya kumrudisha ilikuwa, kuridhika na mapenzi ya Bwana.

Kati ya majaribu yote ya imani ambayo hata sasa nimepaswa kuyapitia, hili lilikuwa kubwa kuliko yote; na, kwa rehema nyingi za Mungu, naikiri kwa sifa yake, niliwezeshwa kujifurahisha katika mapenzi ya Mungu; kwa maana nilihisi hakika kamili kwamba kama Bwana angemchukua binti huyu mpendwa, ingekuwa jema zaidi kwa wazazi wake, jema zaidi kwake mwenyewe, na zaidi kwa utukufu wa Mungu kuliko kama angeishi: sehemu hii iliyo bora niliridhika nayo; na hivyo moyo wangu ulikuwa na amani, amani kamili, wala sikuwa na wasiwasi hata wa dakika moja. Ndivyo ingekuwa chini ya hali zote, hata ziwe za uchungu kiasi gani, mwaminio angekuwa akitumia imani.

Tarehe 31 Desemba, 1853. Katika mwaka huu Bwana alipenda kunipa £638, 11s. 8½d.

---