Mwamba wa Kukwaza

Yesu alikuwa chanzo cha kukwaza kukubwa! Petro na Paulo wote wawili wananukuu Agano la Kale wanapomwita “mwamba wa kukwaza” (Warumi 9:33 na 1 Petro 2:8).

Mafarisayo walikwazwa naye, pepo wachafu walikwazwa naye, na hata jamaa yake walikwazwa naye!

Lakini kwa wengine aliepuka kwa makusudi kuwakwaza, kama vile watoza ushuru waliodharauliwa. Alimwambia Petro aende baharini ambako angepata kodi iliyohitajika katika kinywa cha samaki, “ili tusiwakwaze” (Mathayo 17:24). Lakini kwa wengine inaonekana anakwaza kwa makusudi!

Yohana Mbatizaji – Binamu wa Yesu Yohana Mbatizaji alikuwa binamu wa pili wa Yesu na alikuwa amezaliwa miezi michache tu kabla yake. Alikuwa amejaa Roho Mtakatifu hata alipokuwa tumboni mwa mama yake, naye alikuwa wa kwanza kuonyesha itikio lolote kwa Masihi aliyeahidiwa. Aliruka kwa furaha tumboni mwa Elisabeti wakati Mariamu, mama yake Yesu, alipokuja kwa mara ya kwanza kueleza habari ya ajabu ya mimba ya mtoto wake.

Nina hakika wavulana hao wawili walitumia saa nyingi pamoja utotoni. Yaelekea walicheza na kufanya kazi pamoja, walikimbia na kupigana pamoja, na waliongea na kubishana pamoja. Labda hata waliongea pamoja kuhusu mzigo uliokuwa ukikua ndani ya mioyo yao.

Hatimaye, Yohana anaondoka nyumbani ili kuitikia msukumo wa ajabu. Yawezekana kwamba Yesu ndiye peke yake aliyeelewa alipotangaza kwamba lazima “aitengeneze njia ya Bwana” (Mathayo 3:3), kisha akaondoka kuelekea jangwani.

Huko, Yohana akaanza kuhubiri kwa wote waliokuwa tayari kumsikiliza.

“Masihi anakuja karibuni,” alitangaza, “nasi hatujawa tayari! Tubuni na kubatizwa. Mrudieni Mungu wenu!”

(Mathayo 3:2-12) Watu wakaitika, wakitafuta kupatanishwa na Yehova na kuonyesha azimio lao jipya kwa kubatizwa katika kijito cha huko, Mto Yordani. Ubatizo wao ulikuwa ubatizo wa toba na kurudi katika imani ya kweli.

Siku moja Yesu akaja kwenye Mto Yordani, naye Yohana akawapazia watu sauti, “Tazama, Mwana-Kondoo wa Mungu, aichukuaye dhambi ya ulimwengu!” (Yohana 1:29). Yohana akashuhudia kwamba aliona hua akishuka juu ya Yesu na kukaa juu yake.

Zaidi ya hayo, Roho Mtakatifu alikuwa amemwambia Yohana kwamba hii ndiyo ingekuwa ishara ya Masihi ajaye, katika Yohana 1:34 palipoandikwa “Nami nimeona, tena nimeshuhudia ya kuwa huyu ni Mwana wa Mungu.”

Yohana hakuwa mhubiri maarufu ‘aliyependeza masikio ya watu.’

Wengi wa wale waliokuja kumsikia na kumwona walikuwa wakitafuta jambo la kushangaza, wakitumaini kwamba wangekuwepo kusikia hukumu yake dhidi ya viongozi wa sinagogi waliojiona wenye haki.

Alikuwa na maneno makali ya kuwaambia viongozi kama hao, nao watu wakayapenda; lakini Herode hakuyapenda. Yeye alikuwa mtawala wa Milki ya Roma wakati ule, naye alikuwa mtu mwovu aliyekuwa akizini na mke wa nduguye – uzinzi ambao Yohana aliushutumu waziwazi. Ili kuinyamazisha sauti yake, Herode akamtia Yohana gerezani.

Naweza kuwazia mawazo ya Yohana alipokuwa katika vifungo hivyo.

“Herode, wewe mpumbavu mzee! Wadhani u na mamlaka na kwamba kunitia gerezani kutainyamazisha sauti yangu. Lakini binamu yangu ni Masihi, naye amekuja kuipindua milki yako ndogo na kuanzisha ufalme wake mwenyewe! Atanitoa gerezani hivi karibuni, nawe ndiwe utakayefungwa! Ametangaza kwamba amekuja kuwaweka huru wafungwa. Siwezi kusubiri kuuona uso wako atakapofanya hivyo!” Na kwa hayo, Yohana anaketi katika chumba chake cha gereza na kusubiri… na kusubiri… na kusubiri… Wakati huohuo, Yesu anaendelea na huduma yake katika vijiji vya karibu, bila hata kupata muda wa kumtembelea Yohana gerezani!

Bila shaka, angalau angekuja kumtembelea! Lakini kwa sababu hakuja, Yohana anakwazwa, na hatimaye akakatwa kichwa! Wanafunzi wa Yohana wanatumwa kwa Yesu kuuliza swali zito. “Wewe ndiwe yule ajaye, au tumtazamie mwingine?” (Mathayo 11:3). “Hukidhi vigezo vyetu kwa kuwa hufanyi tuliyotarajia ufanye!”

Yesu anajibu, “Naye akawajibu, “Enendeni mkamweleze Yohana mambo mliyoyaona na kuyasikia; vipofu wanapata kuona, viwete wanakwenda, wenye ukoma wanatakaswa, viziwi wanasikia, wafu wanafufuliwa, maskini wanahubiriwa habari njema. Naye heri yeye asiyechukizwa nami” (Luka 7:22-23).

Mariamu, Rafiki Mpendwa wa Yesu Yesu alikuwa na rafiki wa pekee sana walioishi katika mji mdogo wa Bethania. Alikuwa umbali wa maili chache tu alipopokea habari kwamba rafiki yake Lazaro alikuwa akifa na kwamba dada zake Mariamu na Martha walikuwa wakimwombolezea. “Naye Yesu aliwapenda Martha, na umbu lake, na Lazaro. Basi aliposikia kwamba yu hawezi, alikaa siku mbili katika mahali alipokuwapo” (Yohana 11:5-6).

Hatusomi habari za miujiza yoyote, mafundisho yoyote, wala jambo lolote alilofanya katika siku hizo mbili! Naye Lazaro akafa! Hatimaye Yesu alipofika Bethania, Lazaro alikuwa amekaa kaburini siku nne na dada zake walikuwa katika huzuni nzito. Ni Martha ndiye anayetoka kumlaki. Jambo hilo lastahili kuangaliwa, kwa maana yeye ndiye tunayemfikiria mara nyingi kama ‘mtumishi wa kazi ngumu’ – yule aliyefungiwa jikoni – huku dada yake Mariamu akiacha kila kitu ili aketi miguuni pa Yesu, akiipaka manukato ya thamani na kuipangusa kwa nywele zake huku akiyapokea yote aliyoyasema. Leo, Mariamu angekuwa mtu maarufu katika shughuli za Kikristo – mwenyekiti wa Kikundi cha Wanawake cha Kumwabudu cha eneo hilo, huku dada yake akiwa nyuma akitengeneza kahawa na kuandaa biskuti.

Martha akamwambia Yesu, “Bwana, kama ungalikuwapo hapa, ndugu yangu hangalikufa” (Yohana 11:21). Yesu anamhakikishia kwamba ndugu yake atafufuka, kwa maana Yeye ndiye ufufuo na uzima.

Sisikii shutuma yoyote katika maneno ya Martha, ila huzuni tu. Kisha anaenda kwa Mariamu, kumwomba aje kwa Yesu.

Lakini kwa nini Mariamu hayupo tayari huko? Bila shaka anajua kwamba anakuja? Kila mtu angelijua hilo, lakini Mariamu aliketi kimya nyumbani. Kwa nini? Naomba nipendekeze kwamba alikuwa akinuna!

Alikuwa amekwazwa! Anapokuja kwa Yesu, anaanguka mbele yake akilia na kusema maneno yale yale aliyosema Martha. “Bwana, kama ungalikuwapo hapa, ndugu yangu hangalikufa” (Yohana 11:32).

Ona kwamba Yesu hasemi maneno yale yale ya faraja kwa Mariamu aliyoyasema kwa dada yake. Je, ingekuwa kwa sababu ya sauti yake? Ya kushtaki? Ya kuhukumu?

Badala ya kumfariji Mariamu, “Yesu akalia machozi” (Yohana 11:35), lakini si kwa sababu Lazaro alikuwa amekufa – alikuwa amejua hilo kwa muda, na pia kwamba baada ya muda mfupi, wote wangefurahi kwa ufufuo wake. Hakulia kwa sababu Mariamu, Martha, na rafiki zao walikuwa katika huzuni – alikuwa amejua kwamba wangehuzunika kwa maana hiyo ilikuwa kawaida wakati wa kifo cha mpendwa.

Alilia kwa sababu Mariamu alikuwa amekwazwa.

Yesu angekufa kwa ajili ya “makosa” yetu, lakini bado anahuzunika tunapokwazwa.

Katika safari ya kwenda Bethania, Yesu alikuwa amewaambia wanafunzi wake kwamba mara nyingi watu hukwazwa wasipoweza kuelewa. Wanatembea gizani (Yohana 11:10). Je, alikuwa amejua jinsi Mariamu angeitikia?

Kwa Nini Vikwazo Huja Kwa nini Bwana huruhusu vikwazo vije? Je, yawezekana kusudi lake ni kutufunulia jambo fulani kutuhusu sisi wenyewe? Je, Yohana alipaswa kutambua kwamba, ingawa alikuwa ametangaza kwamba, “Yeye hana budi kuzidi, bali mimi kupungua” (Yohana 3:30), ratiba ni ya Bwana wala si yake.

Ni rahisi kwetu kuanguka katika mtego wa kujaribu kumlazimisha Mungu afanye mambo kwa njia yetu. Ni rahisi mno kuvuka mpaka kati ya kutimiza mapenzi yake dhidi ya mapenzi yetu. Hatupaswi kukwazwa asipofanya mambo ‘kwa njia yetu’ kwa sababu Yeye peke yake ndiye ajuaye lililo bora kwetu, hata tusipoweza kuona sababu za mabonde tunayopitia.

Je, Mariamu alihitaji kujifunza kwamba utii na uaminifu ni bora zaidi kuliko umaarufu na sifa, hata katika ‘utumishi’ wa Bwana?

Ukuu katika Ufalme huwafikia wale wanaokubali kuwa wadogo kuliko wote, naam kuwa watumishi (Luka 9:48).

Jinsi ya Kukabiliana na Vikwazo Kwanza, lazima ukubali kuwa ni chako! Kikwazo ni chako! Mtu mwingine hakukutenda dhambi – wewe mwenyewe ‘ulijitwika tumbili’ begani mwako, basi mtupe – au mbebe!

Kisha, kichunguze! Bwana aliruhusu kije ili kikufundishe jambo fulani kukuhusu wewe mwenyewe.

Imenibidi kujifunza mambo magumu kwa njia hii, nami nimekupa baadhi ya sababu za vikwazo katika sura iliyopita. Lazima uchunguze aina za tabia yako na ujifunze kukazia nguvu zako. Kwa mfano, wachungaji wengi huwa na tabia ya huzuni (melancholic). Kipawa kimoja cha mwenye tabia ya huzuni ni uwezo wa kuona matatizo mapema kabla ya wengine. Hili laweza kuwafanya wawakosoe wengine, wakwazwe na kushindwa kwa wengine kuona ‘lililo dhahiri,’ na kutolichukulia hatua. Mshukuru Mungu kwamba hamko kama mimi nyote!

Vipawa vya kila mtu ni tofauti. Kwa miaka mingi nilikwazwa na kushindwa kwa wengine kutambua ufundishaji wangu kama ‘kipawa.’ Kila mtu hudhani anaweza kufundisha, nami imenibidi kujifunza kuwa ‘mgumu wa ngozi’ watu wanapopuuza vipawa vyangu na wito wangu kama mchungaji.

Ukishakikubali na kukichunguza, kitupe!

Kwa kuchagua, kiombee na ukizike! Wabariki wale waliokukwaza na utafute kutiwa nguvu na Roho Mtakatifu ikiwa kikwazo chaonekana kizito mno – ameahidi kutosheleza majaribu yako yote.

“Tafuteni kwa bidii kuwa na amani na watu wote, na huo utakatifu, ambao hapana mtu atakayemwona Bwana asipokuwa nao. Mkiangalia sana mtu asiipungukiwe na neema ya Mungu; ‘shina la uchungu’ lisije likachipuka na kuwasumbua, na watu wengi wakatiwa unajisi kwa hilo” (Waebrania 12:14-15).

Kisha, hatua ya mwisho ya kuchukua wakati tumbili wako mabegani, ni kukisahau! Usikiache kikwazo kikae moyoni mwako tena. Mkabidhi Bwana, na kiondoe akilini na moyoni mwako.

Hatimaye, usiwe wewe usababishaye kikwazo, kwa maana, “ole wake mtu yule ambaye kwa yeye vinakuja!” (Luka 17:1)!