Musa, Mtu wa Maombi

Kabla ya Musa palikuwa na kipindi cha mababa, pamoja na maisha ya jamaa, na mamlaka waliyokuwa nayo baba, na kuyaweka alama; Musa ni mtu wa kwanza aliyeteuliwa kuwa mwalimu na kiongozi wa watu. Ndani yake, twapata mifano ya ajabu ya nafasi na nguvu ya maombezi katika mtumishi wa Mungu.

Maombi ya Musa. Tangu mwito wake wa kwanza huko Misri, Musa aliomba. Alimuuliza Mungu jinsi atakavyowaambia watu (Kutoka 3:11-13). Alimweleza udhaifu wake wote na kumsihi aondolewe utume wake (4:1-13). Watu walipomlaumu kwamba mizigo yao imeongezwa, alienda na kumweleza Mungu, mstari 22, na kumjulisha hofu zake zote (6:12). Huu ulikuwa mazoezi yake ya kwanza. Kutoka humo ilizaliwa nguvu yake katika maombi wakati, mara baada ya mara, Farao alipomwomba amwombee Bwana, na wokovu ukaja kwa ombi la Musa (8:8, 9, 12, 28, 29, 30, 31; 9:28-29, 9:33; 10:17-18). Yachunguze mafungu haya hadi utakapoingiwa kikamilifu na jinsi maombi yalivyokuwa kigezo halisi katika kazi ya Musa na ukombozi wa Mungu.

Katika Bahari ya Shamu, Musa alimlilia Mungu pamoja na watu, na jibu likaja (14:15).

Watu walipoona kiu jangwani, na Amaleki alipowashambulia, pia yalikuwa maombi yaliyoleta wokovu (17:4, 11).

Huko Sinai, Israeli walipofanya Ndama wa Dhahabu, yalikuwa maombi yaliyozuia mara moja uangamivu uliotishwa (32:11, 32:14). Ulikuwa uombaji uliofanywa upya uliowapatia kurudishwa (32:31). Yalikuwa maombi zaidi yaliyohakikisha uwepo wa Mungu uende nao (33:17), na tena yalikuwa maombi yaliyoleta ufunuo wa utukufu wa Mungu (33:19). Na baada ya hayo kutolewa, yalikuwa maombi mapya yaliyopokea kufanywa upya kwa agano (34:9-10). Katika Kumbukumbu la Torati, twapata muhtasari wa ajabu wa haya yote (9:18-20, 19:26); twaona kwa uzito jinsi alivyoomba, na jinsi katika tukio moja ilikuwa kwa siku arobaini mchana na usiku alianguka kifudifudi mbele za Bwana (9:25, 10:10).

Katika Hesabu, twasoma juu ya maombi ya Musa yakizima moto wa Bwana, 11:2, na kupata ugavi wa nyama; 11:2, 11, ya maombi yakimponya Miriamu, 12:13; na yale ya kuliokoa taifa walipokataa kupanda kwenda nchi ile, 14:17-20. Maombi yalileta hukumu juu ya Kora, 16:15, na wakati Mungu alipotaka kuuangamiza mkutano wote, maombi yalifanya upatanisho, 16:46. Maombi yalitoa maji katika mwamba, 20:6, na kwa jibu la maombi, nyoka wa shaba akatolewa, 21:7. Kwa maombi, mapenzi ya Mungu yalijulishwa katika jambo lililokuwa gumu, 27:5, na Yoshua akatolewa kuwa mrithi wa Musa, 27:16.

Yachunguze haya yote hadi moyo wako wote utakapojaa wazo la fungu ambalo maombi lazima yalitende, layatendalo, katika maisha ya mtu atakaye kuwa mtumishi wa Mungu kwa wenzake.

Tunapochunguza, sehemu zitaungana kuwa moja iliyo hai, na Musa atakuwa kwetu mfano ulio hai kwa maisha yetu ya maombi. Tutajifunza kinachohitajika ili kuwa mwombezi. Mafunzo yatakayotujia yatakuwa kama haya: Naona Musa alikuwa mtu aliyejitoa kwa Mungu, mwenye bidii, naam, mwenye wivu kwa ajili ya Mungu, kwa ajili ya heshima na mapenzi yake.

Mtu, pia, aliyejitoa kabisa kwa watu wake, tayari kujitoa dhabihu mwenyewe, ikiwa wangeokolewa.

Mtu aliyekuwa na ufahamu wa mwito wa Kimungu wa kutenda kama mpatanishi, kuwa kiungo, mkondo wa mawasiliano na wa baraka, kati ya Mungu aliye Mbinguni na watu duniani. Maisha yaliyomilikiwa kabisa na ufahamu huu wa kimungu hata hakuna kilicho rahisi na cha asili zaidi kuliko kutarajia kwamba Mungu atasikia.

Naona hapa Mungu, kwa jibu la maombi ya mtu mmoja, akiwaokoa na kuwabariki wale aliowakabidhi kwake, na akifanya lile ambalo asingelifanya bila hayo. Naona jinsi serikali yote ya Mungu ilivyoyaingiza maombi katika mpango wake kama moja ya sehemu zake za msingi.

Naona jinsi Mbingu ilivyojaa uzima na nguvu na baraka ambazo Dunia inahitaji, na jinsi maombi ya Dunia yalivyo nguvu ya kuleta baraka hiyo chini.

Naona zaidi ya yote jinsi maombi yalivyo kielelezo cha maisha ya kiroho, na jinsi nguvu yake inavyotegemea uhusiano wangu na Mungu, na ufahamu wa kuwa mwakilishi wake. Anakabidhi kazi yake kwangu, na kadiri kujitoa kwangu kwa maslahi yake kunavyokuwa rahisi na kamili zaidi, ndivyo inavyokuwa ya asili na ya hakika zaidi ile hakika kwamba anisikia.

Fikiri nafasi Mungu aliyokuwa nayo katika maisha ya Musa, kama Mungu aliyemtuma, Mungu ambaye Musa alijitoa kabisa kwake, Mungu aliyeahidi kuwa pamoja naye, ambaye angemsaidia na kumsaidia daima wakati na jinsi alipoomba.

Sasa kwa utumizi wa vitendo: Tunawezaje kujifunza kuomba kama Musa? Hatuwezi kuipata neema hii kwa tendo la nia. Funzo letu la kwanza lazima liwe hisi ya kutokuwa na uwezo. Ndipo neema itakapoifanya kazi ndani yetu, taratibu na kwa hakika, ikiwa tutajitia mikononi mwa mazoezi yake. Lakini ijapokuwa mazoezi yatakuwa ya taratibu, kuna jambo moja liwezalo kufanywa mara moja: twaweza kuamua mara moja kujitoa kwa maisha haya na kushika hali ipasayo. Fanya hivi sasa, chukua uamuzi, kuishi kabisa kuwa mkondo kwa ajili ya baraka ya Mungu kupita ndani yako kuelekea ulimwenguni. Chukua hatua.

Ikibidi, chukua dakika kumi kwa fikira ya makini. Ipokee teuzi ya Kimungu, na uchukue kitu fulani cha maombezi. Chukua muda, tuseme wiki moja, na uzishike imara kweli za msingi ambazo mfano wa Musa unafundisha. Kama mwalimu wa muziki asisitizavyo kufanya mazoezi ya viwango vya sauti—mazoezi tu ndiyo yakamilishayo—jiweke kujifunza kwa ukamilifu na kuyatumia mafunzo ya kwanza yanayohitajika.