Musa na Neno la Mungu

Kuhusu uhusiano kati ya maombi na neno katika ibada yetu ya faraghani, msemo wa mtu aliyeongoka kutoka upagani umenukuliwa mara nyingi: Ninaomba, ninanena na Mungu; ninasoma katika Biblia, na Mungu ananena nami. Kuna mstari katika historia ya Musa ambao ndani yake wazo hili linaletwa kwa uzuri. Twasoma, Hesabu 7:89, “Musa alipoingia katika hema ya kukutania ili anene naye, ndipo aliisikia sauti ikinena naye kutoka juu ya kiti cha rehema kilichokuwa juu ya sanduku la ushuhuda, katikati ya makerubi wawili; ikanena naye.” Alipoingia kuomba kwa ajili yake mwenyewe au kwa ajili ya watu wake, na kungoja maagizo, alimkuta mmoja akimngoja. Funzo lililoje kwa zamu yetu ya asubuhi.

Roho iombayo ni roho ambayo Mungu atainena. Roho iombayo itakuwa roho isikilizayo, ikingoja kusikia lile Mungu asemalo. Katika umoja na Mungu, uwepo wake na fungu ashikalo lazima viwe halisi kama langu mwenyewe. Twataka kuuliza kile kinachohitajika ili kusoma kwetu Maandiko na kuomba kwetu kupate kuwa ushirika huu wa kweli na Mungu.

Kwanza, ingia mahali paufaapo. “Musa aliingia hemani ili anene na Mungu.”

Alijitenga na watu, akaenda mahali angeweza kuwa na Mungu peke yake. Alienda mahali ambapo Mungu angepatikana. Yesu ametuambia mahali hapo palipo. Anatuita tuingie chumbani mwetu, tufunge mlango, na kumwomba Baba yetu aonaye sirini.

Mahali popote ambapo kweli tuko peke yetu na Mungu paweza kuwa kwetu siri ya uwepo wake. Kunena na Mungu kunahitaji kujitenga na kila kitu kingine. Kunahitaji moyo uliokazwa kwa dhati juu ya, na katika tumaini kamili la, kukutana na Mungu binafsi, na kuwa na mashughuliko ya moja kwa moja naye. Wale waendao pale kunena na Mungu wataisikia Sauti ya yule anayenena nao.

Halafu, ingia katika hali ipasayo. Musa aliisikia Sauti ya Mmoja akinena kutoka juu ya kiti cha rehema. Sujudu mbele ya kiti cha rehema. Pale ufahamu wa kutostahili kwako hautakuzuia, bali utakuwa msaada halisi katika kumtumaini Mungu. Pale utaweza kuwa na uhakika wa kutegemewa kwamba mtazamo wako wa juu utapokewa na jicho lake, kwamba ombi lako laweza kusikiwa, na kwamba jibu lake la upendo litatolewa. Sujudu mbele ya kiti cha rehema, na uwe na hakika kwamba Mungu wa rehema atakuona na kukubariki. Kisha, ingia katika hali inayopasa—hali ya kusikiliza. Wengi wameteka sana na yale mengi au machache waliyo nayo ya kusema katika maombi yao, hata Sauti ya Mmoja anenaye kutoka juu ya kiti cha rehema kamwe haisikiwi kwa sababu haitarajiwi wala kungojewa.

“Asema Bwana. Lakini mtu huyu ndiye nitakayemwangalia, mtu aliye mnyenyekevu, mwenye roho iliyopondeka, atetemekaye asikiapo neno langu.” Na tuingie chumbani, na kujiweka kuomba, kwa moyo ungojao kwa unyenyekevu kumsikia Mungu akinena; katika neno tusomalo; kwa kweli tutaisikia Sauti ya yule anayenena nasi.

Baraka kuu zaidi ya maombi itakuwa kukoma kwetu kuomba, ili kumwacha Mungu anene.

Maombi na neno vimeunganishwa pamoja bila kutenganika: nguvu katika kutumia kimoja hutegemea uwepo wa kingine. Neno hunipa mada ya kuomba, likinieleza zaidi juu ya Mungu na kunipa nguvu ya kuomba, ujasiri wa hakika kwamba nitasikiwa. Neno pia huniletea jibu la maombi, kadiri linavyonifundisha lile Mungu atakalonitendea. Na hivyo, kwa upande mwingine, maombi huutayarisha moyo kupokea neno kutoka kwa Mungu Mwenyewe, kwa mafundisho ya roho ili kutoa ufahamu wa kiroho wa neno, kwa imani ifanywayo mshiriki wa utendaji wake wenye nguvu. Ni wazi kwa nini iko hivyo. Maombi na Neno vina kitovu kimoja—Mungu. Maombi humtafuta Mungu: Neno humfunua Mungu. Katika maombi, mwanadamu humwomba Mungu: katika neno, Mungu humjibu mwanadamu.

Katika maombi, mwanadamu hupanda mbinguni kukaa na Mungu: katika neno, Mungu huja kukaa na mwanadamu. Katika maombi, mwanadamu hujitoa kwa Mungu: katika neno, Mungu hujitoa kwa mwanadamu. Katika maombi na neno, lazima viwe vyote Mungu. Moyo wako uwe kwa ajili ya Mungu kabisa. Lengo moja la shauku yako liwe maombi na neno. Ndipo utakuwa na ushirika wa baraka na Mungu, ubadilishano wa fikira, upendo na uzima: kukaa ndani ya Mungu na Mungu ndani yetu.

Mtafute Mungu, mkaishi.