Utakatifu — Lengo Kuu la Kujifunza Biblia

Uwatakase kwa ile kweli; neno lako ndilo kweli." Yohana 17: 17.

Katika ombi lake kuu la maombezi, Bwana wetu alinena juu ya maneno ambayo Baba alikuwa amempa, juu ya yeye mwenyewe kuyatoa kwa wanafunzi wake, na juu ya wao kuwa wameyapokea na kuyaamini. Ndilo hili lililowafanya kuwa wanafunzi. Ni kuyashika kwao maneno haya kutakakowawezesha kweli kuishi maisha na kufanya kazi ya wanafunzi wa kweli. Kuyapokea maneno ya Mungu kutoka kwa Kristo na kuyashika, ndio alama na nguvu ya uanafunzi wa kweli.

Katika kumwomba Baba awahifadhi ulimwenguni alipokwisha kuuacha, Bwana wetu aomba ya kuwa angewatakasa katika ile kweli, kama ikaavyo na kutenda kazi katika neno lake. Kristo alikuwa amesema juu yake mwenyewe, "Mimi ndimi kweli." Alikuwa mzaliwa wa pekee wa Baba, amejaa neema na kweli. Fundisho lake halikuwa kama lile la sheria iliyokuja kwa mkono wa Musa, likitoa ujuzi, ahadi ya mema yatakayokuja ambayo yalikuwa taswira au kivuli tu.

"Maneno hayo niliyowaambia ni roho, tena ni uzima." yakitoa kiini chenyewe na nguvu na umiliki wa Kimungu wa kile wakinenacho. Kristo alikuwa amenena juu ya Roho kama Roho wa kweli ambaye angeongoza katika kweli yote iliyokuwamo ndani yake mwenyewe, si kama jambo la ujuzi au fundisho, bali kuingia katika uzoefu wake halisi na furaha yake.

Na kisha aomba ya kuwa katika kweli hii iliyo hai, kama ikaavyo ndani ya Neno, na kufunuliwa ndani yake kwa Roho, na Baba angewatakasa. "Na kwa ajili yao," asema, "najiweka wakfu mwenyewe, ili na hao watakaswe katika kweli." Naye amwomba Baba katika nguvu yake na upendo wake awatunze, ili kusudi lake — kuwatakasa katika ile kweli, kwa njia ya neno lake ambalo ndilo kweli — lipate kutimizwa, ili wao, kama yeye mwenyewe, wapate kutakaswa katika kweli. Na tujifunze mafunzo ya ajabu yaliyotolewa hapa kuhusu neno la Mungu.

“Uwatakase kwa ile kweli; neno lako ndilo kweli." Lengo kuu la neno la Mungu ni kutufanya Watakatifu. Hakuna bidii wala mafanikio katika kujifunza Biblia yatakayotufaa kweli isipokuwa yatufanye kuwa watu wanyenyekevu zaidi, watakatifu zaidi. Katika matumizi yetu yote ya Maandiko Matakatifu, hili ni lazima liwe kwa hakika lengo letu kuu. Sababu mara nyingi kunakuwa na kusoma Biblia kwingi na tokeo halisi dogo hivyo katika tabia iliyo mfano wa Kristo ni ya kuwa "wokovu, katika kutakaswa na Roho na kuiamini kweli," hautafutwi kweli. Watu hudhania ya kuwa kama watajifunza Neno na kukubali kweli zake, hili kwa namna fulani, lenyewe, litawafaidi.

Lakini uzoefu hufundisha ya kuwa hasa. Tunda la tabia takatifu, la maisha yaliyowekwa wakfu, la nguvu ya kuwabariki wengine, haliji, kwa sababu rahisi na ya asili kabisa ya kuwa twapata tu kile tukitafutacho. Kristo alitupa Neno la Mungu ili kutufanya watakatifu, ni pale tu tunapofanya hili kuwa lengo letu dhahiri katika kujifunza kwote Biblia, ndipo ile kweli, si kweli ya kimafundisho, bali nguvu yake ya Kimungu ya kuamsha uzima, ikitoa uzima wenyewe wa Mungu, uliomo ndani yake kama mbegu, iwezavyo kujifunua na kujitoa kwetu.

"Uwatakase kwa ile kweli; neno lako ndilo kweli." Ni Mungu mwenyewe peke yake awezaye kutufanya Watakatifu kwa Neno lake. Neno, likitengwa na Mungu na kutenda kwake moja kwa moja, haliwezi kufaa. Neno ni chombo: Mungu mwenyewe ni lazima alitumie. Mungu ndiye Mtakatifu peke yake. Yeye peke yake aweza kufanya mtakatifu. Thamani isiyoelezeka ya neno la Mungu ni kwamba ni njia ya Mungu ya utakatifu. Kosa la kutisha la wengi ni kwamba husahau ya kuwa Mungu peke yake aweza kulitumia au kulifanya lenye ufanisi. Haitoshi ya kuwa ninao uwezo wa kufikia duka la dawa la tabibu. Namhitaji yeye aandike dawa. Pasipo yeye, matumizi yangu ya dawa zake yaweza kuwa ya kuua. Ilikuwa hivyo kwa waandishi. Walijisifu kwa sheria ya Mungu; walifurahia kujifunza kwao Maandiko na hata hivyo wakabaki bila kutakaswa. Neno halikuwatakasa, kwa sababu hawakutafuta hili katika neno, wala hawakujitoa kwa Mungu ili awafanyie.

"Uwatakase kwa ile kweli; neno lako ndilo kweli." Utakatifu huu kwa njia ya Neno ni lazima utafutwe na kungojewa kutoka kwa Mungu katika maombi. Bwana wetu si tu aliwafundisha wanafunzi wake ya kuwa yawapasa kuwa watakatifu; si tu alijiweka wakfu mwenyewe kwa ajili yao, ili wapate kutakaswa katika kweli, bali aliyaleta maneno yake na kazi yake kwa Baba pamoja na Ombi ya kuwa angewatakasa. Ni jambo la lazima sana kulijua neno la Mungu na kulitafakari. Ni jambo la lazima sana kuweka mioyo yetu juu ya kuwa watakatifu, kama lengo letu la kwanza na kuu katika kujifunza Neno. Lakini haya yote hayatoshi; kila kitu hutegemea juu ya sisi kumfuata Kristo katika kumwomba Baba atutakase kwa njia ya Neno. Ni Mungu, Baba Mtakatifu, atufanyaye watakatifu, kwa Roho wa utakatifu akaaye ndani yetu. Hutenda ndani yetu nia yenyewe na tabia ya Kristo aliye utakaso wetu. "Hakuna aliye mtakatifu kama BWANA"; utakatifu wote ni wake na kile atoacho kwa Uwepo wake mtakatifu.

Hema na hekalu havikuwa vitakatifu kwa uwezo wa kusafishwa, kutengwa, au kuwekwa wakfu. Vilikuwa vitakatifu kwa Mungu kuingia na kukaa ndani. Kuvimiliki kwake ndiko kulivifanya vitakatifu. Mungu, vivyo hivyo, hutufanya watakatifu kwa njia ya neno lake likimleta Kristo na Roho Mtakatifu ndani yetu. Naye Baba hawezi kufanya hivi isipokuwa tunapokaa mbele zake, na kutulia, na katika kutegemea kwa kina na kujisalimisha kote tunapojitoa kwake. Ni katika ombi litolewalo katika Jina, na ushirika, na imani ya Mwombezi Mkuu: "Uwatakase kwa ile kweli; neno lako ndilo kweli." ndipo nguvu ya Baba ya kutakasa itakapoonekana, na ujuzi wetu wa neno la Mungu kwa kweli kututakasa.

Ni takatifu jinsi gani Saa ya Kesha ya Asubuhi! Saa hiyo imewekwa hasa kwa ajili ya Nafsi kujitoa kwa utakatifu wa Mungu, ili itakaswe kwa njia ya Neno. Na tukumbuke daima ya kuwa lengo moja la neno la Mungu ni kutufanya watakatifu. Na liwe ombi letu la daima "Baba, unitakase katika kweli yako."