Kufanywa Upya Kwa Kila Siku — Gharama Yake

Kwa hiyo hatulegei; bali ijapokuwa utu wetu wa nje unachakaa, lakini utu wetu wa ndani unafanywa upya siku kwa siku. 2 Wakorintho 4: 16.

“Wala msiifuatishe namna ya dunia hii; bali mgeuzwe kwa kufanywa upya nia zenu, mpate kujua hakika mapenzi ya Mungu yaliyo mema, ya kumpendeza, na ukamilifu.” Warumi 12: 2.

Si jambo dogo wala rahisi kuwa Mkristo aliyekomaa na mwenye nguvu. Kwa upande wa Mungu, yamaanisha ya kuwa kuligharimu Mwana wa Mungu uhai wake, ya kuwa yahitaji nguvu kuu ya Mungu kumuumba mwanadamu upya, na ya kuwa hakuna kitu pungufu ya utunzaji usiokoma wa kila siku wa Roho Mtakatifu uwezao kuudumisha uzima huo.

Kwa upande wa mwanadamu, yataka ya kuwa utu mpya uvaliwapo, utu wa kale uvuliwe. Tabia zote, mazoea, na anasa, za asili yetu wenyewe, zinazounda uzima ambao ndani yake tumeishi, zapaswa kuwekwa mbali. Yote tuliyo nayo kwa kuzaliwa kwetu kutoka kwa Adamu, yapaswa kuuzwa, kama tutamiliki lulu ya thamani kubwa.

Kama mtu atakuja nyuma ya Kristo, apaswa kujikana mwenyewe, kuuchukua msalaba wake, kuacha vyote na kumfuata Kristo katika njia aliyoiendea. Apaswa kutupilia mbali si tu dhambi yote, bali kila kitu, hata kiwe cha lazima na halali na chenye thamani kiasi gani, kiwezacho kuwa sababu ya dhambi; kuling'oa jicho, au kuukata mkono. Apaswa kuuchukia uhai wake mwenyewe, kuupoteza kama ataishi katika "nguvu ya uzima usio na mwisho." Ni jambo zito, zito zaidi sana kuliko watu wengi wadhaniavyo, kuwa Mkristo wa kweli.

Hili ni kweli hasa kuhusu kufanywa upya kwa kila siku kwa utu wa ndani. Paulo alinena juu yake kama kunakoandamana na kunakoshartizwa na kuchakaa kwa utu wa nje. Waraka mzima (2 Kor.) hutuonyesha jinsi ushirika wa mateso ya Kristo, hata kufananishwa na mauti yake, ulivyokuwa siri ya maisha yake katika nguvu na baraka kwa Makanisa. Sikuzote twachukua katika mwili kufa kwake Yesu, ili uzima wa Yesu nao udhihirishwe katika miili yetu. Kwa maana sisi tulio hai daima twatolewa tufe kwa ajili ya Yesu, ili uzima wa Yesu nao udhihirishwe katika miili yetu ipatikanayo na mauti. Basi mauti hutenda kazi ndani yetu, bali uzima ndani yenu.

Uzoefu kamili wa uzima ndani ya Kristo katika nafsi yetu, mwili wetu, na kazi yetu kwa ajili ya wengine hutegemea juu ya ushirika wetu katika mateso yake na mauti yake. Hakuwezi kuwa na kipimo kikubwa cha kufanywa upya kwa utu wa ndani, pasipo dhabihu, kuchakaa kwa wa nje.

Ili kujazwa mbinguni, uzima ni lazima umwagwe udongo. Tunayo kweli iyo hiyo katika andiko letu la pili, “Mgeuzwe kwa kufanywa upya nia zenu." Nyumba ya kale yaweza kufanywa upya, na hata hivyo ikashikilia sana mwonekano wake wa kale, au kufanywa upya kwaweza kuwa kamili hivyo hata watu wakapaaza sauti kwamba ni mabadiliko makubwa jinsi gani! Kufanywa upya kwa nia na Roho Mtakatifu kwamaanisha kugeuzwa kabisa, njia iliyo tofauti kabisa ya kufikiri, kuhukumu, na kuamua. Nia ya mwili hutoa nafasi kwa "ufahamu wa kiroho" (Wakolosai 1: 9, 1 Yohana 5: 20). Kugeuzwa huku hakupatikani ila kwa gharama ya kuacha yote yaliyo ya asili. "Wala msiifuatishe namna ya dunia hii, bali mgeuzwe."

Kwa asili, sisi ni wa dunia hii. Tunapofanywa upya kwa neema bado tumo katika dunia, chini ya ushawishi wa hila uenezao kila mahali ambao hatuwezi kujiondoa katika. Na zaidi ya hayo, dunia bado imo ndani yetu, kama chachu ya asili ambayo hakuna kiwezacho kuisafisha ila nguvu kuu ya Roho Mtakatifu, akitujaza uzima wa mbinguni.

Na tuziache kweli hizi zishike kwa kina na kututawala. Kugeuzwa kwa Kimungu, kwa kufanywa upya kwa kila siku kwa nia zetu kuwa sura yake yeye aliye juu sana, kwaweza kwenda ndani yetu si kwa haraka zaidi wala mbali zaidi kuliko kutafuta kwetu kuwekwa huru kutoka katika kila alama ya kuifuatisha namna ya dunia hii. Neno la kukataza, "Wala msiifuatishe namna ya dunia hii” lahitaji kusisitizwa kwa nguvu sawa na neno la kuthibitisha, "mgeuzwe." Roho ya dunia hii na Roho wa Mungu hupigania kuimiliki nafsi yetu. Ni pale tu ile ya kwanza inapojulikana na kukanwa na kutupwa nje, ndipo Roho wa mbinguni aweza kuingia, na kuifanya kazi yake iliyobarikiwa ya kufanya upya na kugeuza.

Dunia yote na lolote lililo la roho ya kidunia ni lazima liachwe. Uzima wote na lolote lililo la nafsi ni lazima lipotezwe. Kufanywa upya huku kwa kila siku kwa utu wa ndani kwagharimu mengi, yaani, kwa muda wote tunapokuwa tukisita, au kujaribu kukufanya kwa nguvu zetu wenyewe. Mara ile tunapojifunza kweli ya kuwa Roho Mtakatifu hufanya yote, na katika imani ya nguvu ya Bwana Yesu tumekwisha acha yote, kufanywa upya kwageuka kuwa ukuaji rahisi, wa asili, wenye afya, wenye furaha wa uzima wa mbinguni ndani yetu.

Chumba cha ndani ndipo hugeuka kuwa mahali tunapopatamani kila siku, ili kumsifu Mungu kwa yale aliyoyafanya, na ayafanyayo, na yale tujuayo atakayoyafanya. Siku kwa siku, twajitoa upya kwa Bwana aliyebarikiwa aliyesema, "Aniaminiye mimi, kama vile maandiko yalivyonena, mito ya maji yaliyo hai itatoka ndani yake." Kufanywa upya kwa Roho Mtakatifu kwageuka kuwa mojawapo ya kweli zilizobarikiwa zaidi za maisha yetu ya kila siku ya Kikristo.