Mwanafunzi wa Biblia

Bali sheria ya BWANA ndiyo impendezayo, na sheria yake huitafakari mchana na usiku." Zaburi 1: 2 Kuna wito wa sauti kuu kila upande wa kutaka kujifunza Biblia zaidi na kwa ukweli zaidi. Wainjilisti kama Bwana Moody na wengine wengi wamethibitisha nguvu iliyoko katika kuhubiri kunakotolewa moja kwa moja kutoka katika neno la Mungu, na kunakovuviwa na imani ya nguvu yake. Wakristo wenye bidii wameuliza: "Kwa nini wachungaji wetu hawawezi kunena kwa namna iyo hiyo, wakilipa neno lenyewe la Mungu nafasi kubwa zaidi?" Mchungaji kijana mmoja baada ya mwingine ametoka katika Chuo cha Theolojia, akikiri ya kuwa alifundishwa kila kitu isipokuwa ujuzi wa jinsi ya kujifunza Neno mwenyewe, na kisha kuwachochea na kuwasaidia wengine kulisoma.

Katika baadhi ya Makanisa yetu, hamu imeonyeshwa ya kutimiza hitaji hili katika mafunzo ya wachungaji. Yaweza kuonekana jambo rahisi sana kupata watu wema wa kuchukua kazi hiyo; na hata hivyo imeonekana kuwa vigumu kwa watu wenye mafunzo ya kitheolojia kugeukia urahisi na unyofu wa kukielekea neno la Mungu, unaohitajika ili kuwaonyesha vijana njia ya kuyafanya Maandiko kuwa chanzo pekee cha ujuzi na mafundisho yao. Katika Vuguvugu la Wanafunzi la siku zetu, Mungu asifiwe.

Kujifunza Biblia kumepewa nafasi ya kwanza. Kuna fursa ya ajabu, kama vile kulivyo na hitaji kubwa sana, la kukuongoza kwa namna ambayo kwaweza kuleta baraka kamili katika maisha ya mtu mmoja mmoja, kwa kulipa neno la Mungu nafasi yake ya kweli katika kazi ipaswayo kufanywa kwa ajili yake. Na tuangalie kanuni zilizo msingi wa dai la kujifunza Biblia zaidi, na kwa uaminifu kwazo peke yake ndipo laweza kutimizwa kweli. 1. Neno la Mungu Ndilo Ufunuo Pekee wa Kweli wa Mapenzi ya Mungu. Maelezo yote ya kibinadamu ya kweli ya Kimungu, hata yakiwa sahihi kiasi gani, yana kasoro na yachukua kiasi cha mamlaka ya kibinadamu. Katika neno, sauti ya Mungu yasema nasi moja kwa moja. Kila mtoto wa Mungu ameitwa kuwa katika umoja wa moja kwa moja na Baba, kwa njia ya Neno. Kama vile Mungu afunuavyo moyo wake wote na neema yake ndani yake, mtoto wake aweza, akilipokea kutoka kwa Mungu, kupata uzima na nguvu yote iliyomo katika neno na kuiingiza ndani ya moyo na nafsi yake mwenyewe. Twajua ni taarifa chache jinsi gani za mkono wa pili za ujumbe au matukio zinazoweza kutegemewa kabisa. Ni watu wachache sana wanaotoa taarifa kwa usahihi ya yale waliyoyasikia. Kila mwamini ana haki na wito wa kusimama katika mawasiliano ya moja kwa moja na Mungu. Ni katika neno Mungu amejifunua, ni katika neno bado ajifunua, mwenyewe kwa kila mtu.

2. Neno hili la Mungu ni neno lililo hai. Lachukua ndani yake nguvu ya Kimungu ya kuamsha uzima. Usemi wa kibinadamu wa kweli mara nyingi ni dhana au taswira tu ya kweli, ukiielekea akili na wenye athari kidogo au wa bila athari kabisa. Imani ya kuwa ni neno la Mungu mwenyewe na ya kuwepo na nguvu ndani yake, ndiyo ilifanyayo kuwa lenye ufanisi. Uzima wote au roho hujifanyia umbo ambamo hudhihirishwa.

Maneno ambayo Mungu ameyachagua kuyavika mawazo yake mwenyewe ya Kimungu yamevuviwa na Mungu na uzima wa Mungu wakaa ndani yake. Mungu si Mungu wa wafu, bali wa walio hai. Neno halikuvuviwa tu lilipotolewa mara ya kwanza: Roho wa Mungu bado apumua ndani yake. Mungu bado yumo ndani ya neno lake na pamoja nalo. Wakristo na waalimu wanahitaji kuliamini hili. Litawaongoza kulipa neno rahisi la Kimungu tumaini ambalo hakuna fundisho la kibinadamu liwezalo kuwa nalo.

3. Mungu mwenyewe peke yake aweza, na kwa hakika zaidi atakuwa, Mfasiri wa neno lake mwenyewe. Kweli ya Kimungu yahitaji Mwalimu wa Kimungu. Ufahamu wa kiroho wa mambo ya kiroho waweza kutoka kwa Roho Mtakatifu peke yake. Kadiri usadikisho wa tabia ya kipekee ya neno uzidivyo kuwa mzito, likiwa tofauti kabisa na, na lililoinuliwa juu sana kupita, ufahamu wote wa kibinadamu tu, ndivyo hitaji litakavyohisiwa kwa dharura zaidi la fundisho la kimiujiza, la Kimungu moja kwa moja. Na kwa kadiri hiyo zaidi baraka itakayotendeka ambayo ndilo kusudi kuu la neno. Nafsi italetwa kumtafuta Mungu mwenyewe, nayo itaongozwa kumpata katika Roho Mtakatifu akaaye ndani ya moyo. Kadiri roho huyo, ambaye ndani yake Mungu, kwa namna ya ajabu, ameingia katika uzima wetu wenyewe na kujiunganisha nao, anavyongojewa na kutegemewa, atatufanya tujue hekima katika sehemu ya siri, katika moyo na tabia. Neno lisomwalo kwa maombi na kuthaminiwa moyoni katika imani hii, litakuwa, kwa njia ya Roho, nuru na uzima ndani yetu.

4. Basi neno hutuleta katika ushirika ulio wa karibu na wa ndani kabisa na Mungu — umoja wa mapenzi na uzima. Katika neno Mungu amefunua moyo wake wote na mapenzi yake yote: katika sheria yake na amri zake yale atakayo tuyafanye: katika ukombozi wake na ahadi zake yale atakayo kututendea. Tunapoyakubali mapenzi hayo katika neno kama yatokayo kwa Mungu mwenyewe, na kujitoa kwa kazi yake, twajifunza kumjua Mungu katika mapenzi yake, ambayo kwa nguvu yake atenda kazi ndani yetu, na ambamo upendo wake wa kujishusha wajulikana. Nalo neno hutimiza kusudi lake lililo tajiri zaidi litujazapo heshima na kutegemea kutokako katika uwepo na ukaribu wa Kimungu. Hakuna kitu pungufu ya hili kipaswacho kuwa lengo letu, kiwezacho kuwa uzoefu wetu, katika kujifunza kwetu kote Biblia.

Sasa na tuyachukue tena mawazo haya manne na kufanya utumizi wa vitendo. Katika Maandiko Matakatifu, tunayo maneno yenyewe ambayo kwayo Mungu Mtakatifu amenena na ambamo anena nasi. Maneno haya, leo hii, yamejaa uzima wa Mungu. Mungu yumo ndani yake, naye hufanya uwepo na nguvu yake kujulikana kwao wamtafutao ndani yake. Kwao waombao na kungoja fundisho la Roho Mtakatifu akaaye ndani yetu, Roho atafunua maana ya kiroho na nguvu ya neno. Neno hivyo lakusudiwa kila siku kuwa njia ya ufunuo wa Mungu mwenyewe kwa nafsi na wa ushirika naye. Je, tumejifunza kuzitumia kweli hizi? Je, twafahamu ya kuwa neno husema daima “Mtafute Mungu”? Msikilize Mungu. Mngoje Mungu. Mungu atasema nawe. Mwache Mungu akufundishe?”

Yote tunayoyasikia kuhusu mafundisho zaidi ya Biblia na kujifunza zaidi Biblia ni lazima yatuongoze kwenye jambo hili moja. Ni lazima tuwe watu, na ni lazima tusaidie kuwazoeza wengine wawe watu, ambao kwao neno halitengwi kamwe na Mungu mwenyewe aliye hai, na wanaoishi kama watu ambao Mungu aliye mbinguni asema nao kila siku na mchana kutwa.