Uzima na Nuru

Hapo mwanzo kulikuwako Neno, naye Neno alikuwako kwa Mungu, naye Neno alikuwa Mungu. Ndani yake ndimo ulimokuwa uzima, nao ule uzima ulikuwa nuru ya watu." Yohana 1: 1, 4.

“Basi Yesu akawaambia tena, akisema, “Mimi ndimi nuru ya ulimwengu. Yeye anifuataye hatakwenda gizani kamwe, bali atakuwa na nuru ya uzima. Yohana 8: 12.

Kwa sababu Kristo alikuwa Mungu, angeweza kuwa Neno la Mungu. Kwa sababu alikuwa na Uzima wa Mungu ndani yake mwenyewe, angeweza kuwa mfunuaji wa Uzima huo. Na hivyo, kama Neno lililo hai, yeye ni Neno litoalo uzima. Neno lililoandikwa laweza kufanywa batili na lisilo na nguvu mahali ambapo hekima ya kibinadamu inategemewa ili kulielewa. Ni pale tu linapopokewa kama mbegu ambamo uzima wa Neno lililo hai umefichwa, ili uamshwe na Roho Mtakatifu, ndipo laweza kuwa kwetu neno la uzima. Umoja wetu na neno la Mungu lililoandikwa unapaswa siku zote kuvuviwa na kuongozwa na imani ya Neno la Milele, ambaye alikuwa Mungu.

Kweli iyo hiyo yajitokeza katika usemi ufuatao: Uzima ni nuru. Tuonapo nuru ikimulika, twajua ya kuwa kuna moto unaowaka katika namna fulani au nyingine. Na ndivyo ilivyo katika ulimwengu wa kiroho.

Ni lazima pawe na uzima mahali pawezapo kuwa na nuru. Yaweza kuwako nuru iliyoakisiwa kutoka katika kitu kilichokufa au chenye giza. Yaweza kuwako nuru iliyoazimwa isiyo na uzima. Lakini uzima wa kweli peke yake ndio uwezao kuonyesha nuru ya kweli. Yeye amfuataye Kristo atakuwa na nuru ya uzima.

Maelezo haya mawili ya kweli moja kuu yathibitisha kwa namna ya kushangaza yale tuliyojifunza kuhusu Roho wa Mungu. Kama vile yeye ayajuavyo mambo ya Mungu kwa sababu yeye ni uzima wa Mungu, vivyo hivyo Kristo ni Neno kwa sababu yeye ni Mungu, na anao uzima wa Mungu; na hivyo nuru ya Mungu yamulika tu pale ulipo uzima wa Mungu. Mawazo yote matatu yaturudisha tena kwenye funzo letu la Biblia yakileta funzo lile moja lililobarikiwa, lakini la lazima sana, ya kuwa ni pale tu neno lililoandikwa linapotuletea uzima wa Neno la Milele, kama vile nuru yake ndani ya moyo ikiwa ni kung'aa kwa uzima unaotenda kazi humo, kama vile Roho Mtakatifu ayajuaye mambo ya Mungu kwa sababu yeye ni uzima wa Mungu, ayafanyapo kuwa uzima na kweli ndani yetu, ndipo kujifunza kwetu Maandiko kwaweza kweli kutubariki.

Na hivyo twarudi kwenye funzo lile moja kuu ambalo Roho hutafuta kulisisitiza kuhusu Neno la Mungu — ya kuwa ni pale tu Maandiko yanapopokewa kutoka katika uzima wa Mungu na kuingia katika uzima wetu ndipo pana ujuzi wowote wa kweli juu yake.

Ni mbegu ichukuayo ndani yake uzima wa Kimungu: pale ipokewapo katika udongo mzuri wa moyo wenye njaa ya uzima huo, itachipuka na kuzaa matunda, kama mbegu zote, “kila moja kwa jinsi yake.”

Itazalisha tena katika maisha yetu uzima ule ule wa Mungu, ambao ndimo ulikotoka, mfano ule ule na tabia ile ile ya Baba na Mwana kwa njia ya Roho Mtakatifu. Twataka kugeuza yote haya kuwa faida ya vitendo na kuyatumia moja kwa moja katika kusoma kwetu Biblia kwa faragha.

Wataka kujua jinsi ya kuanza. Kanuni ni rahisi sana.

Ya kwanza: “Tulieni, mjue ya kuwa mimi ndimi Mungu.” Chukua wakati wa kuwa kimya na kumtambua Mungu. “Nyamaza kimya mbele za Bwana MUNGU!” “Ee kila mwenye mwili, nyamaza kimya mbele za BWANA!” “Lakini BWANA yumo ndani ya hekalu lake takatifu; dunia yote na inyamaze kimya mbele zake.” Mwabudu na umngoje yeye ili apate kusema nawe. Ifuatayo: Kumbuka ya kuwa neno latoka katika uzima, moyo wa Mungu ukiuchukua uzima wake ili kuutia ndani ya wako. Si kitu pungufu ya uzima wa Mungu: hakuna kitu pungufu ya nguvu ya Mungu kiwezacho kulifanya liwe hai ndani yako. Ifuatayo: mwamini Kristo aliye Neno lililo hai. “Ndani yake ndimo ulimokuwa uzima, nao ule uzima ulikuwa nuru ya watu.” “Yeye anifuataye hatakwenda gizani kamwe, bali atakuwa na nuru ya uzima.” Mfuate Yesu katika upendo na shauku ya kumtamani, katika utii na huduma, na hivyo uzima wake utatenda kazi ndani yako, nao uzima utakuwa nuru ya nafsi yako.

Kisha, mwombe Baba akupe Roho Mtakatifu ambaye peke yake ayajuaye mambo ya Mungu, ili alifanye neno ndani ya moyo wako kuwa hai na lenye nguvu. Uwe na njaa ya mapenzi ya Mungu kama chakula chako cha kila siku; uwe na kiu ya chemchemi iliyo hai ya Roho ndani yako; lipokee neno katika utashi wako, katika uzima wako, katika furaha yako — uzima ambao laleta ndio utakaotoa nuru ambayo kwayo lang'aa. Sababu ya mimi kusisitiza mara nyingi hivi juu ya kweli iliyotolewa katika sura chache zilizopita ni rahisi sana.

Uzoefu wangu mwenyewe umenifundisha jinsi inavyochukua muda mrefu kabla hatujaelewa waziwazi ya kuwa neno la Mungu ni lazima lipokewe katika uzima na si katika akili tu, na tena jinsi inavyochukua muda mrefu, hata baada ya kulielewa, kabla hatujaliamini kabisa na kulitenda. “Kuwaandikia mambo yale yale, kwangu mimi si udhia, bali kwenu ninyi ni salama.”

Lisome funzo hili hata ulijue. Neno latoka katika uzima wa Mungu, lachukua uzima huo ndani yake lenyewe, latafuta kuingia katika uzima wangu na kuujaza uzima wa Mungu. Uzima huu ni nuru ya watu, nao hutoa nuru ya kuujua utukufu wa Mungu. Waweza kuona ya kuwa funzo hili lachukua muda zaidi kuliko udhaniavyo, ya kuwa lakuzuia zaidi kuliko lisaidiavyo katika masomo yako ya Biblia, na ya kuwa laongezeka ugumu kadiri uzidivyo kulisoma. Usiogope wala usikose subira; bali uhakikishiwe ya kuwa ukilijifunza sawasawa, utamsifu Mungu ya kuwa limekuwa ufunguo ambao hukupata kuwa nao kamwe, wa hazina iliyofichwa ya neno, ukikupa hekima ya kweli katika sehemu ya siri.

Basi narudia tena maneno yale rahisi yenye baraka na ukweli usiokwisha. Kama vile Roho akaaye ndani ya Mungu peke yake ayajuavyo mambo ya Mungu, ni Roho akaaye ndani yangu peke yake awezaye kunifanya niyajue mambo ya Mungu kwa kuyatia katika uzima wangu.

Kama vile Kristo alivyokuwa Neno kwa sababu alikuwa Mungu, na alikuwa na uzima wa Mungu, neno lililoandikwa laweza kunibariki tu pale, kwa njia yake, Neno lililo hai linaponiletea uzima wa Mungu. Kama vile uzima ulivyokuwa ndani ya Kristo, na kama vile Uzima ulivyo Nuru ya watu, ndivyo ilivyo kwamba ni pale tu ninapokuwa na uzima wa Kristo kwa njia ya neno ndipo ninapokuwa na nuru ya kuujua Mungu.