Kutafakari

“Heri mtu yule asiyekwenda katika shauri la wasio haki, wala kusimama katika njia ya wakosaji, wala kuketi barazani pa wenye mizaha; bali sheria ya Bwana ndiyo impendezayo, na sheria yake huitafakari mchana na usiku.” Zaburi 1:1-2.

Yoshua 1:8. Zaburi 119:15, 23, 48, 78, 97, 99 na 148. 1 Timotheo 4:15. “Maneno ya kinywa changu, na mawazo ya moyo wangu, yapate kibali mbele zako, Ee Bwana.” Zaburi 19:14 na 49:3.

Lengo la kweli la elimu, masomo, na kusoma, hupatikana, si katika kile kiletwacho matumizini, bali katika kile kitolewacho ndani yetu, kwa kuamsha nguvu yetu ya ndani katika utendaji hai. Hili ni kweli kwa kujifunza Biblia, kama kwa masomo mengine yoyote. Neno la Mungu hutenda kazi baraka yake ya kweli tu wakati kweli linaloileta kwetu imechochea uzima wa ndani na kujizaa yenyewe katika azimio, imani, upendo, au kuabudu. Moyo unapokuwa umepokea neno kwa njia ya akili, na kuwa na nguvu zake za kiroho zikiitwa na kutumika juu yake, neno halibaki tena bure bali limetenda lile ambalo kwalo Mungu amelituma. Limekuwa sehemu ya maisha yetu, na kutuimarisha kwa kusudi na jitihada mpya.

Ni katika kutafakari ambapo moyo hulishika na kulifanya neno kuwa lake. Kama vile ni katika tafakuri, ufahamu hushika maana yote na maelekeo ya kweli. Ndivyo katika kutafakari, moyo huliyeyusha na kulifanya kuwa sehemu ya uzima wake wenyewe. Twahitaji kukumbushwa daima kwamba moyo humaanisha nia na hisia. Kutafakari kwa moyo huonyesha shauku, kukubali, kujisalimisha, na upendo. Ndani ya moyo mna chemchemi za uzima; kile moyo ukiaminicho kweli, hukipokea kwa upendo na furaha, na kukiacha kitawale na kuongoza maisha. Akili hukusanya na kutayarisha chakula tutakachokilia. Katika kutafakari, moyo hukichukua ndani na kukila.

Ufundi wa kutafakari wahitaji kusitawishwa. Kama vile mtu ahitajivyo kufunzwa kukaza nguvu zake za akili ili kufikiri kwa uwazi na usahihi, Mkristo ahitaji kufikiri kwa makini na kutafakari, hadi desturi takatifu itakapofanyika ya kuinua moyo wote kwa kila neno la Mungu.

Swali huulizwa mara nyingine, jinsi nguvu hii ya kutafakari iwezavyo kusitawishwa. Jambo la kwanza kabisa ni kujiweka wenyewe mbele za Mungu. Ni neno lake; Neno hilo halina nguvu ya baraka bila Yeye. Ni katika uwepo na ushirika wake ambao neno limekusudiwa kutuleta. Zoea uwepo wake, na ulichukue neno kama kutoka kwake Mwenyewe kwa hakika kwamba atalifanya litende kazi kwa matunda moyoni. Katika Zaburi 119, una neno mara saba, lakini kila mara kama sehemu ya ombi lililoelekezwa kwa Mungu. “Nitazitafakari mausia yako.” “Ee, jinsi niipendavyo sheria yako!

Ni mazungumzo yangu mchana kutwa.” Kutafakari ni moyo ukimgeukia Mungu na neno lake mwenyewe, ukitafuta kulipokea katika hisia na nia, katika uzima wake wenyewe.

Kipengele kingine cha kutafakari kwa kweli ni utulivu wa amani. Katika kujifunza kwetu Maandiko, katika jitihada yetu ya kushika hoja, au kushinda ugumu, akili yetu mara nyingi yahitaji kutoa juhudi zake za mwisho. Hali ya nafsi inayohitajika katika kutafakari ni tofauti. Hapa, twageuka na kweli fulani tuliyoipata, au siri fulani ambamo twangoja mafundisho ya Kimungu, ili kulificha neno tunaloshughulika nalo katika kina cha moyo, na kuamini kwamba, kwa Roho Mtakatifu, maana na nguvu yake vitafunuliwa katika uzima wetu wa ndani.

“Tazama, wapendezwa na kweli iliyo moyoni; nawe utanijulisha hekima kwa siri.” Katika maelezo ya mama wa Bwana wetu twaambiwa: “Mariamu akayaweka maneno hayo yote, akiyafikiri moyoni mwake.” Katika mama yake kuyaweka maneno hayo yote moyoni mwake, tuna taswira ya nafsi iliyoanza kumjua Kristo, na iko katika njia ya uhakika ya kumjua vizuri zaidi. Karibu si lazima kusema zaidi kwamba katika kutafakari, utumizi binafsi huchukua nafasi ya wazi.

Hili ni kwa kiasi kidogo mno katika masomo yetu ya kiakili ya Biblia. Lengo lake ni kujua na kufahamu. Katika kutafakari, lengo kuu ni kumiliki na kuonja. Utayari wa kuamini kila ahadi bila kusita, kutii kila amri bila kusitasita, kusimama “mkamilifu na kutimizwa katika mapenzi yote ya Mungu,” ndiyo roho pekee ya kweli ya kujifunza Biblia.

Ni katika kutafakari kwa utulivu ambapo imani hii hutumika, ambapo uaminifu huu hutolewa, ambapo kujisalimisha kikamilifu kwa mapenzi yote ya Mungu hufanywa, na hakika hupokewa ya neema ya kutimiza nadhiri zetu.

Na kisha kutafakari lazima kuongoze kwenye maombi. Hutoa mada ya maombi. Lazima kuongoze mbele kwenye maombi, kuomba na kupokea dhahiri kile kilichoonwa katika neno au kukubaliwa katika neno. Thamani yake ni kwamba ni maandalizi ya maombi, dua ya makusudi na ya moyo wote kwa kile moyo umehisi kwamba neno limefunua kuwa cha lazima au kiwezekanacho. Hilo lamaanisha kwamba raha ya imani hutazama juu kwa hakika kwamba neno litafunuka na kudhihirisha nguvu yake, katika nafsi ijitoayo kwalo kwa upole na uvumilivu.

Tuzo ya kupumzika kwa muda kutoka juhudi ya kiakili, na kusitawisha desturi ya kutafakari takatifu, itakuwa kwamba baada ya muda, hivyo viwili vitaletwa katika maelewano, na masomo yetu yote yataongozwa na roho ya kumngoja Mungu kwa utulivu, na kuutoa moyo na maisha kwa neno.

Ushirika wetu na Mungu umekusudiwa kwa siku nzima. Baraka ya kuhakikisha desturi ya kutafakari kwa kweli katika zamu ya asubuhi itakuwa kwamba tutaletwa karibu zaidi na baraka ya yule mtu wa Zaburi ya kwanza; “Sheria ya Bwana ndiyo impendezayo, na sheria yake huitafakari mchana na usiku.”

Wafanyakazi na viongozi wote wa watu wa Mungu na wakumbuke kwamba wanahitaji hili zaidi ya wengine ikiwa watawafunza kwalo, na kudumisha mawasiliano yao wenyewe bila kukatika na chanzo pekee cha nguvu na baraka. Mungu asema, “Nitakuwa pamoja nawe. Sitakupungukia wala sitakuacha.” “Uwe hodari tu na moyo wa ushujaa mwingi, uangalie kutenda sawasawa na sheria yote... upate kufanikiwa kila uendako. Kitabu hiki cha torati kisiondoke kinywani mwako, bali ukitafakari mchana na usiku... ndipo utakapoifanikisha njia yako... Uwe hodari na moyo wa ushujaa.”

“Maneno ya kinywa changu, na mawazo ya moyo wangu, yapate kibali mbele zako, Ee Bwana, mwamba wangu, na mwokozi wangu.” Lengo lako lisiwe chini ya hili—kwamba kutafakari kwako kupate kibali machoni pake—sehemu ya dhabihu ya kiroho uitoayo. Ombi na tarajio lako lisiwe chini ya hili, kwamba kutafakari kwako kuwe ibada ya kweli, kujitoa kwa moyo kulikoishi kwa Neno la Mungu katika uwepo wake.