Mawazo ya Mungu na Mawazo Yetu

“Kwa maana kama vile mbingu zilivyo juu sana kuliko nchi, kadhalika njia zangu zi juu sana kuliko njia zenu, na mawazo yangu kuliko mawazo yenu.” Isaya 55:9. Duniani, maneno ya mtu mwenye hekima mara nyingi humaanisha kitu tofauti na kile msikiaji ayafahamucho. Ni kwa asili gani basi kwamba maneno ya Mungu, kama ayafahamuvyo, humaanisha kitu kilicho cha juu sana zaidi ya tuyapokeavyo mara moja.

Kuna uhitaji mkubwa mno wa kukumbuka hili. Kufanya hivyo kutatuongoza daima kutoka kuridhika na maarifa na mawazo yetu ya neno, kwenda kustaajabu na kungoja iwezayo kuwa baraka yake kamili kama Mungu alivyoikusudia. Kutayapa maombi yetu kwa mafundisho ya Roho Mtakatifu ncha mpya na haraka, hata kutuonyesha kile ambacho bado hakijaingia moyoni mwetu kukiwaza. Kutatupa ujasiri kwa tumaini kwamba kuna kwetu, hata katika maisha haya, utimizo unaopita mawazo yetu ya juu kabisa.

Neno la Mungu hivyo lina maana mbili. Moja ni ile lililo nayo katika akili ya Mungu, ikifanya maneno ya kibinadamu kuwa kwa kweli wabebaji wa utukufu wote wa hekima, nguvu, na upendo wa Kimungu. Nyingine ni ufahamu wetu dhaifu, wa sehemu, wenye kasoro wa neno. Hata baada ya neema na uzoefu kufanya maneno kama upendo wa Mungu, neema ya Mungu, nguvu ya Mungu, au mojawapo ya ahadi nyingi zinazohusiana na haya, kuwa ya kweli na halisi sana kwetu, bado kuna utele usio na kikomo katika neno tusioujua bado. Jinsi hili linavyowekwa kwa namna ya kushangaza katika andiko letu kutoka Isaya.

“Kama vile mbingu zilivyo juu sana kuliko nchi.” Imani yetu katika jambo hilo ni rahisi na wazi hivi kwamba hakuna angeota kujaribu kwa mkono wake mdogo kuufikia jua au nyota. Kupanda mlima ulio juu zaidi hakungefaa. Twaliamini kwa moyo wetu wote. Na sasa Mungu asema, vivyo hivyo, “mawazo yangu yako juu kuliko mawazo yenu.” Hata neno lilipokuwa limenena mawazo ya Mungu, na mawazo yetu yametafuta kuyapokea, bado yabaki, juu sana ya mawazo yetu kama vile mbingu zilivyo juu kuliko nchi. Mambo yasiyo na kikomo yote ya Mungu na ulimwengu wa milele hukaa katika neno kama mbegu ya uzima wa milele. Na kama vile mwaloni uliokua kamili ulivyo mkuu kwa siri zaidi ya tunda dogo lililouchipuza, ndivyo maneno ya Mungu yalivyo mbegu tu ambazo kutoka humo maajabu makuu ya Mungu ya neema na nguvu yaweza kukua.

Imani katika neno hili yapasa kutufundisha mafunzo mawili, moja la ujinga, jingine la matarajio. Yatupasa kujifunza kulijia neno kama watoto wadogo.

Yesu alisema, “Nakushukuru, Baba, Bwana wa mbingu na nchi, kwa kuwa mambo haya uliwaficha wenye hekima na akili, ukawafunulia watoto wachanga.” Wenye busara na wenye hekima si lazima wawe wanafiki au maadui. Kuna wengi wa watoto wapendwa wa Mungu mwenyewe, ambao, kwa kupuuza kusitawisha daima roho ya kitoto, na bila kujua kutegemea uwiano wa imani yao na Maandiko, au uadilifu wa masomo yao ya kiroho, wana kweli iliyofichwa kwao, na kamwe hawakuwa watu wa kiroho. “Kwa maana ni nani katika binadamu ayajuaye mambo ya binadamu ila roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu. Lakini sisi hatukuipokea roho ya dunia, bali Roho atokaye kwa Mungu, makusudi tupate kuyajua tuliyokirimiwa na Mungu.” Hisi ya kina ya ujinga wetu, kutokuamini kwa kina nguvu yetu wenyewe ya kuyafahamu hata mambo ya Mungu, na iweke alama juu ya kujifunza kwetu Biblia.

Kadiri kukata tamaa kwetu kuingia sawasawa katika mawazo ya Mungu kunavyokuwa kwa kina zaidi, ndivyo ujasiri wa matarajio uwezavyo kuwa mkuu zaidi. Mungu ataka kulifanya neno lake kuwa kweli ndani yetu. “Na watoto wako watafundishwa na Bwana.” Roho Mtakatifu tayari yumo ndani yetu kuyafunua mambo ya Mungu. Kwa jibu la maombi yetu ya unyenyekevu na imani, Mungu, kwa njia yake, atatoa ufahamu unaozidi kukua daima katika siri ya Mungu—muungano wetu wa ajabu na mfano wetu na Kristo, kuishi kwake ndani yetu, na sisi kuwa kama alivyokuwa katika ulimwengu huu.

Naam, zaidi—kama mioyo yetu itaona kiu na kungoja hilo, wakati waweza kuja ambapo, kwa mawasiliano ya pekee ya Roho wake, shauku zetu zote zatoshelezwa na Kristo aumiliki hivi moyo hata, kile kilichokuwa kwa muda mrefu imani kinakuwa uzoefu, kwamba kama vile mbingu zilivyo juu kuliko nchi, mawazo yake yako juu kuliko mawazo yetu.