Ukuta Uliobomoka

“Nilipita kando ya shamba la mvivu, na kando ya shamba la mizabibu la mtu asiye na akili, na tazama, lote lilikuwa limesongwa na miiba; ardhi ilikuwa imefunikwa na upupu, na ukuta wake wa mawe ulikuwa umebomoka.

Kisha nikaona, nikatafakari; nikatazama, nikapata mafundisho.” Mithali 24:30-32 Mtu huyu mvivu hakuwadhuru wenzake: hakuwa mwizi, wala mnyang'anyi, wala mtu wa kujiingiza katika mambo ya wengine. Hakujisumbua kwa shughuli za watu wengine, kwa maana hata zake mwenyewe hakuzishughulikia — zilihitaji bidii kubwa mno. Hakuwa mwovu waziwazi; hakuwa na nguvu za kutosha hata kwa hilo. Alipenda kuyachukua mambo kwa wepesi. Sikuzote aliliacha lililo jema liwe kama lilivyo, na kadhalika aliliacha na lililo baya liwe kama lilivyo, kama upupu na mibaruti katika bustani yake vilivyoshuhudia wazi.

Kujitaabisha kulikuwa na faida gani? Baada ya miaka mia moja yote yangekuwa sawa; basi aliyapokea mambo kama yalivyokuja. Wengine walisema juu yake, “Si mtu mbaya.” Lakini huenda mwishowe ikaonekana kwamba hakuna mtu mbaya duniani kuliko mtu asiye mwema. Kwa namna fulani si mwema wa kutosha hata kuwa mbaya; hana uthabiti wa tabia wa kumtumikia Mungu wala Baali. Anajitumikia nafsi yake tu, akiiabudu raha yake na kuisujudia starehe yake.

Lakini sikuzote alikusudia kutenda vema. Lo! hakuwa akikusudia kulala muda mrefu zaidi; angepata usingizi kidogo tu, kisha angeishika kazi yake na kukuonyesha awezavyo. Siku moja kati ya hizi alikusudia kuwa mwenye bidii kabisa na kufidia muda uliopotea. Wakati wa kuanza haukuwahi kufika kamwe, lakini sikuzote ulikuwa unakuja. Alikusudia kutubu, lakini akaendelea katika dhambi yake. Alikusudia kuamini, lakini akafa hali hakuamini. Alikusudia kuwa Mkristo, lakini akaishi bila Kristo. Alisitasita kati ya mawazo mawili kwa sababu hakutaka kujisumbua kuamua; hivyo akaangamia kwa kuahirisha.

Picha hii ya mtu mvivu, na bustani yake na konde lake lililojaa upupu na magugu, humwakilisha mtu mwingi aliyekiri kuwa Mkristo, lakini akawa mzembe katika mambo ya Mungu. Uzima wa rohoni umenyauka ndani yake. Amerudi nyuma. Ameshuka kutoka katika nguvu njema za rohoni hata kufikia ulegevu na kutojali mambo ya Mungu. Wakati mambo yameharibika ndani ya moyo wake, na maovu ya kila namna yameingia ndani yake, yakakua, yakashika mizizi, uharibifu unatokea pia kwa nje katika mwenendo wake wa kila siku. Ukuta wa mawe uliolinda tabia yake umebomoka, naye amelala wazi kwa kila uovu. Juu ya jambo hili sasa tutatafakari: “ukuta wake wa mawe ulikuwa umebomoka.”

Njoo basi, na tutembee pamoja na Sulemani, tusimame naye, tutafakari, na tupate mafundisho tunapouangalia ukuta huu uliobomoka. Tukiisha kuuchunguza, na tuyaangalie matokeo ya kuta zilizobomoka; kisha, mwishoni, na tujaribu kumwamsha mvivu huyu ili ukuta wake upate kutengenezwa. Kama mtu huyu mzembe akiwa ni mmoja wetu, rehema isiyo na kikomo ya Mungu na ituamshe kabla ukuta huu ulioharibika haujaingiza kundi la maovu yanayozurura.

I. Na Tuuangalie Ukuta Huu Uliobomoka Hapo mwanzo ulikuwa ukuta mzuri sana, kwa maana ulikuwa ukuta wa mawe. Mara nyingi mashamba huzungushiwa uzio wa miti unaooza upesi, au ua wa miti hai unaoweza kupenywa kwa urahisi; lakini huu ulikuwa ukuta wa mawe. Kuta za namna hiyo ni za kawaida sana huko Mashariki, na pia katika baadhi ya wilaya zetu ambako mawe ni mengi. Tangu mwanzo ulikuwa ulinzi imara, nalo lilizingirwa salama lile shamba dogo lililokuwa limeangukia mikononi mibaya kiasi hicho. Mtu huyo alikuwa na konde la kulima, na kipande kingine cha ardhi kwa shamba la mizabibu au bustani. Udongo ulikuwa na rutuba, kwani ulizaa miiba na upupu tele; na mahali vinapoota vitu hivyo, vitu bora zaidi vyaweza kuota pia. Lakini mzembe huyo hakuitunza mali yake, bali aliuacha ukuta uharibike, na katika sehemu nyingi ubomoke kabisa.

Niwataje baadhi ya kuta za mawe ambazo watu huziacha zibomoke wanaporudi nyuma. Mara nyingi kanuni nzuri zilipandwa ndani yao katika ujana, lakini sasa zimesahauliwa. Malezi ya Kikristo ni baraka kubwa namna gani! Wazazi wetu, kwa mafundisho na kwa mfano wa maisha yao, walitufundisha wengi wetu yaliyo safi, yenye heshima, na yenye sifa njema. Tuliona katika maisha yao jinsi ya kuishi. Walilifungua Neno la Mungu mbele yetu, wakatufundisha yaliyo haki mbele za Mungu na mbele za wanadamu. Walituombea, tena waliomba pamoja nasi, hata mambo ya Mungu yakatuzunguka na kutuzingira kama ukuta wa mawe.

Hatujaweza kamwe kujiondolea alama zile za utotoni. Hata katika nyakati za kutangatanga, kabla hatujamjua Bwana kwa wokovu, kweli zile zilikuwa na nguvu njema juu yetu. Tulizuiliwa tulipotaka kutenda uovu. Tulisaidiwa tulipokuwa tukijitahidi kumwendea Kristo. Ni jambo la kusikitisha sana watu wanapoziacha kanuni hizi za kwanza zitikiswe na kuondolewa kama mawe yanayoanguka kutoka katika ukuta wa mpaka. Vijana huanza kwa kuzinenea kwa dharau njia za zamani za wazazi wao.

Punde si punde si uzee wa njia hizo tu wanaoudharau, bali njia zenyewe. Hutafuta marafiki wengine, na kwa marafiki hao hawajifunzi lolote ila uovu. Hutafuta anasa mahali ambapo wazazi wao wangetetemeka kupasikia. Jambo hili huelekeza katika mabaya zaidi. Wasipozishusha mvi za baba yao kaburini kwa huzuni, si sifa yao.

Nimewajua vijana waliokuwa Wakristo kweli, wakarudi nyuma kwa masikitiko, kwa sababu walishawishiwa kuzipunguza, kuzificha, au kuzibadili kanuni zile takatifu walizofundishwa tangu wakiwa magotini pa mama yao. Ni msiba mkubwa waumini wanaojidai kuwa waaminifu wanapokosa uthabiti na kuchukuliwa huku na huku na kila upepo wa elimu. Ni dalili ya udhaifu wa akili na uovu wa moyo tunapoweza kuzifanyia mzaha kweli zile nzito na takatifu zilizomwagiwa machozi ya mama na kushikiliwa kwa maisha ya uaminifu ya baba.

“Mimi ni mtumishi wako, mwana wa mjakazi wako” (Zaburi 116:16). Daudi aliliona jambo hili kuwa heshima na pia kifungo kitakatifu, kwamba alikuwa mwana wa mtu aliyeitwa mtumishi wa Mungu.

Jihadharini, ninyi mliopata malezi ya Kikristo, msiyafanyie mzaha. “Mwanangu, ishike amri ya baba yako, wala usiiache sheria ya mama yako.

Yafunge moyoni mwako daima; yakaze shingoni mwako.” (Mithali 6:20-21) Ulinzi wa tabia hupatikana pia katika mafundisho yaliyo imara. Huu nao ni ukuta wa mawe wenye nguvu. Wengi kati yetu wamefundishwa injili ya neema ya Mungu, nao wameijua vema, hata wanaweza kuishindania kwa bidii imani iliyokabidhiwa watakatifu mara moja tu. Heri wale ambao dini yao imesimama juu ya ujuzi ulio wazi wa kweli ya milele.

Dini iliyojaa hamasa tu na mafundisho machache yaweza kufaa kwa muda; lakini ili kuwa na nguvu za maisha yote ni lazima kuwe na ujuzi wa mafundisho makuu yaliyo msingi wa injili. Natetemeka nisikiapo habari za mtu anayeziacha, moja baada ya nyingine, kweli muhimu za injili, kisha akajivunia ukunjufu wake. Namsikia akisema, “Haya ndiyo maoni yangu, lakini wengine wana haki ya kuwa na yao.” Hilo ni sawa tunaponena juu ya maoni tu; lakini hatuwezi kunena hivyo juu ya kweli aliyoifunua Mungu. Kweli hiyo ni moja, haigeuki, na wote wanapaswa kuipokea. Si maoni yako binafsi juu ya kweli yanayokuokoa, bali ni kweli yenyewe kama Mungu alivyoifunua, ikikumbatiwa kwa imani.

Kwa furaha nitaacha namna yangu ya kulieleza fundisho, lakini si fundisho lenyewe. Mtu mmoja aweza kulieleza hivi, mwingine vile; lakini kweli yenyewe haipaswi kusalimishwa kamwe. Roho ya wale wapendao kupanua mipaka ya imani hutunyang'anya uhakika. Ningependa kuwauliza baadhi ya viongozi wao kama wanaamini kuwa liko jambo lolote linalofundishwa katika Maandiko linalostahili mtu kufa kwa ajili yake, na kama wale mashahidi walioyatoa maisha yao walikuwa wapumbavu kwa kuyatoa kwa ajili ya mambo ambayo huenda ni maoni tu. Roho hii ya kanisa lisilo na mipaka huzibomoa kuta za mawe. Humwingiza Shetani na jeshi lake lote, nayo italidhuru kanisa la Mungu kupita kipimo isipopingwa. Hali ya imani iliyolegea huidhuru nafsi ya mtu ye yote.

Sisi si washupavu; lakini hatungepata hasara yoyote kama tungeishi kwa uaminifu hata watu wakatuita hivyo. Siku hizi nilikutana na mtu aliyeshtakiwa kuwa mshupavu, nikamwambia, “Nipe mkono wako. Napenda kukutana na washupavu mara kwa mara. Wanazidi kuwa haba, na kitu walichoumbwa nacho ni imara sana hata kama kingekuwa kingi zaidi, huenda tungeona wanaume zaidi kati yetu na viumbe vichache visivyo na uti wa mgongo.”

Siku hizi tumewaona watu wachache wenye uti wa mgongo; wengi wamekuwa kama mavuvu ya bahari. Palikuwa na wakati ambapo ningesema, “Kuwa mkunjufu, ukatupilie mbali wembamba wa fikira.” Sasa yanipasa kusema, “Simama imara katika kweli.” Imani iliyokabidhiwa watakatifu mara moja tu ni ya thamani zaidi kwangu sasa ambapo inaitwa finyu, kwa maana nimechoshwa na upana ule utokao katika nyua zilizobomoka.

Zipo kweli zisizohamishika na hakika zilizo dhahiri za imani, na ole wako ukiziacha kuta hizi za mawe zibomoke. Nachelea kwamba wavivu ni wengi, na kwamba vizazi vijavyo vyaweza kuomboleza uzembe unaosifiwa katika kizazi hiki cha ulegevu.

Ukuta mwingine unaopuuzwa mara nyingi ni ule wa mazoea ya utauwa yaliyokwisha kujengwa. Mvivu huuacha ukuta huu ubomoke. Niyataje baadhi ya makinga muhimu ya maisha na ya tabia.

Mojawapo ni zoea la maombi ya faraghani. Sala ya sirini yapasa kutolewa kwa ukawaida, angalau asubuhi na jioni. Hatuwezi kuishi bila nyakati maalum za kumkaribia Mungu. Kuutazama uso wa mwanadamu kabla ya kuutazama uso wa Mungu ni hatari. Kuingia ulimwenguni bila kuukabidhi moyo wako kwa Mungu ni kuuacha wazi kwa kila mvamizi wa rohoni. Usiku, kwenda kitandani kama wanyama waingiavyo zizini, bila kumshukuru Mungu kwa rehema za mchana, ni jambo la aibu. Dhabihu ya jioni yapasa kutolewa kwa hakika kama tuufurahiavyo moto wa jioni. Yatupasa kujiweka chini ya mabawa ya Mlinzi wa wanadamu.

Husemwa, “Twaweza kuomba nyakati zote.” Ni kweli; lakini nachelea kwamba wale wasioomba kwa nyakati maalum mara chache sana huomba kabisa. Wanaoomba kwa ukawaida ndio walio karibu zaidi na kuomba bila kukoma. Uzima wa rohoni haustawi kwa desturi kavu, lakini kwa kuwa uhai daima huchukua umbo fulani la nje, yatupasa kuyatunza mazoea yake ya nje kama tuutunzavyo uwezo wake wa ndani. Usiruhusu kamwe mianya mikubwa katika ukuta wa sala ya faraghani ya kila siku.

Naenda mbali zaidi. Kuna nguvu kubwa ya ulinzi katika sala ya jamaa, nami nahuzunika sana kwa kuwa jamaa nyingi za Kikristo hulipuuza jambo hili. Palikuwa na wakati ambapo dini ya Kirumi haikuweza kusonga mbele sana Uingereza, kwa sababu iliwapa kivuli tu cha kile ambacho nyumba za Kikristo zilikuwa nacho tayari kwa uhalisi.

“Je, unaisikia kengele ile asubuhi?”

“Ni ya nini?”

“Ni ya kwenda kanisani kusali.” Mpuritani akajibu, “Sina haja ya kwenda huko. Nimewakusanya watoto wangu. Tumesoma Maandiko, tumeomba, na tumeimba sifa za Mungu. Tuna kanisa nyumbani mwetu.” Kengele ya jioni ikalia tena. Ilikuwa ya sala ya jioni. Lakini yeye alikuwa amekwisha kufanya ibada yake ya jioni mezani pake mwenyewe, Biblia kubwa ikiwa ndiyo pambo lake kuu. Wakasema haiwezekani kuwa na ibada bila kuhani. Akajibu kwamba kila mtu mtauwa yampasa kuwa kuhani nyumbani mwake.

Hivyo watakatifu waliupinga ujanja wa makuhani, wakaihifadhi imani kutoka kizazi hata kizazi.

Ibada ya nyumbani na mimbari ndizo, chini ya Mungu, kuta za mawe za Uprotestanti. Sala yangu ni kwamba kuta hizi zisibomolewe.

Uzio mwingine wa ulinzi ni ibada za katikati ya juma. Watu wanapoiacha mikutano ya katikati ya juma, nguvu za dini yao hupungua. Sinenei juu ya wale wanaozuiliwa kwa maongozi ya Mungu kwa sababu ya ugonjwa, kazi, au wajibu. Yapo mambo ya pekee. Ninanena juu ya wale wawezao kuhudhuria lakini hawataki. Mtu anaposema, “Mahubiri ya Jumapili yanitosha. Sitaki mikutano ya maombi wala mafundisho,” hilo huonyesha kukosa hamu ya Neno, nayo ni dalili mbaya. Ukijenga uzio kuizunguka Jumapili na kuziacha siku nyingine za juma wazi, ng'ombe wa Shetani wataingia na kufanya uharibifu mkubwa.

Jihadhari pia kuutunza ukuta wa kusoma Biblia na wa mazungumzo ya Kikristo. Shirikiana na watauwa. Kaa katika ushirika na Mungu. Kwa baraka ya Roho, utaudumisha uzio imara dhidi ya majaribu. La sivyo, majaribu yataingia katika mashamba ya nafsi yako na kuyala matunda yote mema. Wengi wamepata ulinzi mkubwa kwa konde la maisha yao ya kila siku katika ukuta wa mawe wa kuungama imani hadharani. Ninanena nanyi mlio waamini wa kweli, nanyi mnajua ya kuwa mara nyingi imekuwa kinga imara kujulikana na kutambulikana waziwazi kuwa mfuasi wa Yesu.

Sijawahi kujuta — wala sitajuta kamwe — siku ile nilipokwenda hata mto mdogo wa Lark katika Cambridgeshire, nikazikwa huko pamoja na Kristo katika ubatizo. Kwa kutenda hivyo nilikwenda kinyume cha maoni ya rafiki zangu wote niliowaheshimu; lakini kwa kuwa nilikuwa nimejisomea mwenyewe Agano la Kigiriki, niliona nimefungwa kubatizwa kwa kuzamishwa baada ya kuiungama imani yangu, nami nikafanya hivyo. Kwa tendo hilo niliutangazia ulimwengu, “Nimekufa kwenu, nami nimezikwa mbali nanyi katika Kristo, nami natumaini tangu sasa na kuendelea kuenenda katika upya wa uzima.”

Siku ile, kwa neema ya Mungu, nilifuata mbinu ya jemadari aliyekusudia kupigana hata ashinde, na kwa hiyo akaziteketeza merikebu zake ili pasiwe na njia ya kurudi nyuma. Naamini ya kuwa kuungama Kristo kwa dhati mbele za watu ni kama ua wa miiba, unaomweka mtu ndani ya mipaka yake na kuwazuia mbali wale wangetaka kumpotosha. Bila shaka ni ua tu, nao haufai kitu ukilizunguka shamba la magugu; lakini ngano inapoota, ua ni wa maana sana.

Ninyi mnaodhani ya kuwa mwaweza kuwa mali ya Bwana na hali mmelala wazi kama ardhi isiyokuwa na mwenyewe, mmekosea sana. Yawapasa kuwa tofauti na ulimwengu na kuitii sauti isemayo, “Tokeni kati yao, mkatengwe nao” (2 Wakorintho 6:17).

Ahadi ya wokovu ni kwake yeye aaminiye kwa moyo na kukiri kwa kinywa (Warumi 10:9-10). Sema kwa ujasiri, “Lakini mimi na nyumba yangu, tutamtumikia Bwana” (Yoshua 24:15). Kwa ungamo la namna hiyo unaingia katika njia kuu ya Mfalme na kujiweka chini ya ulinzi wa Bwana wa wasafiri, naye atakutunza.

Mara nyingi, ambapo ungalisitasita, utasema, “Nadhiri za Bwana zi juu yangu; nawezaje kurudi nyuma?” Kwa hiyo nawasihi: uweke ukuta wa mawe na kuutunza. Kama mahali popote umeangushwa, uujenge tena. Na ionekane wazi kwa mwenendo wako na maneno yako ya kuwa wewe ni mfuasi wa Yesu, wala huoni haya kujulikana hivyo.

Zishikeni kwa nguvu kanuni zenu za dini kama wanaume na wanawake wa kweli. Msigeuke kando kwa ajili ya faida wala kwa ajili ya heshima ya kijamii. Msiruhusu mali kuubomoa ukuta wenu. Nimewajua watu waliofanya uwazi mpana ili gari lao lipite, na ili kuwakaribisha matajiri wa kidunia katika ushirika wao kwa ajili ya cheo chao. Wale wanaoziacha kanuni ili kuwapendeza watu hatimaye watahesabiwa kuwa duni; bali yeye aliye mwaminifu atapata heshima kutoka kwa Mungu. Ulinde ua huu wa kushikamana kwa uthabiti na imani, nawe utapata baraka kubwa ndani yake.

Upo ukuta mwingine wa mawe wa kutajwa: uthabiti wa tabia. Imani yetu takatifu humfundisha mtu kuwa na msimamo kwa ajili ya Kristo na kuwa hodari katika kuyaondoa mazoea ya dhambi. “Jicho lako la kuume likikukosesha, ling'oe ulitupe mbali nawe” (Mathayo 5:29). Hasemi ulifunike kwa kiraka.

“Mkono wako wa kuume ukikukosesha, ukate uutupe mbali nawe” (Mathayo 5:30). Hasemi uutundike katika kitambaa. Dini ya kweli hutimiza kabisa. Yasema, “Msiguse kitu kilicho najisi” (2 Wakorintho 6:17).

Lakini wengi ni wavivu kiasi hicho katika njia za Mungu hata hawana uthabiti wao wenyewe. Marafiki waovu huwashawishi, nao hawawezi kusema, “Hapana.” Wanahitaji ukuta wa mawe uliojengwa kwa kukataa mara kwa mara. Haya ndiyo mawe yake: “Hapana. Hapana. Hapana.” Thubutu kuwa tofauti. Azimu kushikamana na Kristo kwa ukaribu. Fanya uamuzi thabiti wa kutokubali kitu chochote maishani mwako — hata kiwe cha faida au cha furaha kiasi gani — ikiwa kitalidharaulisha jina la Yesu. Uwe usiyeyumba katika kweli, usiyelegeza utakatifu, usiyetikisika katika unyofu, imara katika fadhili, na thabiti katika uadilifu. Neema ya Mungu ikijenga ua wa namna hiyo kukuzunguka, hata Shetani ataitambua na kusema, “Je, wewe hukumzungushia ua pande zote?” (Ayubu 1:10).

Nimewakawiza vya kutosha mkiutazama ukuta kutoka nje. Sasa na niwaalike ndani, tuyaangalie matokeo ya uzio uliobomoka.

Kwanza, mpaka hutoweka. Mistari ya utengano iliyokuwa ikishikiliwa kwa kanuni nzuri, kwa mazoea ya utauwa, kwa ungamo la wazi, na kwa azimio thabiti, sasa haipo. Basi swali hutokea: je, mtu huyu ni Mkristo au siyo? Uzio umeanguka kiasi kwamba hajui tena ni kitu gani kilicho cha Bwana na ni kipi kilicho wazi kama ardhi ya wote. Hajui kama yeye mwenyewe ni sehemu ya milki ya Mfalme au ni jangwa tu lililo chini ya utawala wa dunia.

Haya hutokea nyua zisipotunzwa. Kama mtu huyo angeishi karibu na Mungu, akaenenda kwa unyofu, na kuufurahia uwepo tele wa Roho katika maisha matakatifu na katika kungoja kwa saburi, angejua barabara mpaka ulipo. Angejua kama nchi yake ni ya mtaa wa Watakatifu Wote, au ya Nchi Isiyo na Mwenyewe, au ya eneo lile analotawala Shetani.

Nilisikia habari za mama mmoja mtakatifu mpendwa, aliyekuwa mzee, ambaye alipokaribia kufa alishambuliwa na Shetani. Alikitikisa kidole chake taratibu akisema, “Mteule! Mteule! Mteule!” Alijua ya kuwa amechaguliwa, naye aliyakumbuka maneno haya, “Bwana aliyeuchagua Yerusalemu na akukemee” (Zekaria 3:2). Ukuta unaposimama imara kulizunguka shamba, twaweza kumpinga ibilisi na kusema, “Iache mali ya Bwana. Mimi ni wa Kristo, si wako.” Ili kunena hivi, ni lazima uzitengeneze nyua kwa uangalifu, mpaka uwe wazi, nawe uweze kutangaza, “Wavamizi, jihadharini.” Usimwachie adui hata kidogo. Uinue ukuta juu zaidi anapojaribu kuupanda. Asipate kamwe uwazi wa kuingilia.

Pili, ukuta ukianguka, ulinzi hupotea. Moyo wa mtu usipokuwa na uzio, mawazo yake hutangatanga juu ya milima ya ubatili. Kama kondoo, mawazo yapasa kuzungushiwa uzio, la sivyo yatapotea.

Daudi alisema, “Nayachukia mawazo ya ubatili” (Zaburi 119:113). Wavivu wanayo tele, kwa maana kila uwazi usipozibwa na kila lango lisipofungwa, mawazo ya ubatili yatamiminika ndani. Tafakari takatifu, kutafakari kuletako faraja, shauku za utauwa, na ushirika wa neema pamoja na Mungu vyote vitatoweka tukiuacha ukuta ubomoke kwa uvivu.

Mema yanapoondoka, mabaya huingia. Ukuta ukiwa umeanguka, kila mpita njia huona mwaliko.

Lango liko wazi, nao huingia. Je, kuna matunda? Huyachuma. Hutembea kama walio katika bustani ya watu wote, na kuchungulia kila pembe. Je, kuna mahali pa faragha moyoni mwako kwa ajili ya Yesu peke yake? Shetani na dunia watapavamia. Kwa nini tushangae? Kila mnyama anayezurura hukanyaga na kuharibu zaidi ya anavyokula, mianya ikiwa wazi kabisa. Vivyo hivyo, kila namna ya tamaa mbaya na ya mawazo mabaya hujilisha juu ya nafsi isiyolindwa.

Haifai kuomba, “Usitutie majaribuni” (Mathayo 6:13), ikiwa kwa kusudi unayaelekea. Mungu hatakutia majaribuni, lakini waweza kujitia mwenyewe. Ukijiweka wazi kwa mvuto mbaya, unamhuzunisha Roho wa Mungu, naye aweza kukuacha uvune matunda ya upumbavu wako. Je, isingekuwa busara zaidi kuutengeneza uzio mara moja?

Lipo tokeo lingine tena: nchi yenyewe yaweza kupotea. Huko Uingereza, ukuta uliobomoka hauondoi umiliki; lakini huko Palestina, mashamba yaliyokuwa juu ya vilima yalishikiliwa na kuta za matuta. Kuta hizo zilipoanguka, udongo ulitelezea chini, tuta baada ya tuta, na mizabibu na miti ikaenda pamoja nao.

Kisha mvua ziliusomba udongo wote kabisa, pakabaki mwamba mtupu tu.

Ndivyo ilivyo katika mambo ya roho. Mtu aweza kujipuuza mwenyewe na kuyapuuza mambo ya Mungu — akawa mzembe juu ya mafundisho na juu ya maisha matakatifu — hata nguvu zake za kutenda mema zikaisha. Akili yake, moyo wake, na nguvu zake huonekana kutoweka. Nabii alisema, “Efraimu ni kama hua mjinga, asiye na moyo” (Hosea 7:11).

Wengi ni hua wajinga wa namna hiyo. Mtu anayeifanyia dini mzaha huifanyia mzaha nafsi yake, na punde huwa hawezi kufikiri kwa uzito wala kutumika kwa faida.

Kwa hiyo, simama imara katika siku hii mbaya. Fikira za dini zinapoteleza kama matope hata katika Bahari ya Chumvi ya kutokuamini, jenga kuta imara kuyazunguka maisha yako, imani yako, na tabia yako. “Basi simameni” (Waefeso 6:14), na mkiisha kuyatimiza yote, simameni bado. Roho Mtakatifu na akutie mizizi na kukuimarisha, usije ukautupa ujasiri wako, “ulio na thawabu kubwa” (Waebrania 10:35).

Mwisho, na nijaribu kumwamsha mvivu. Ni wakati wa kuamka. Jua limekwisha kuukausha umande. Wewe waomba “usingizi kidogo tu zaidi.” Ukilala kidogo zaidi, huenda usiamke hata utakapoinua macho yako katika ulimwengu mwingine. Amka sasa. Ruka kutoka kitandani mwako kabla hakijawa kaburi lako.

Uangalie moyo wako. Uzembe umeziacha dhambi zikue kama magugu. Umempuuza Mungu na Kristo hata umekuwa mtu wa dunia, mzembe, usiyejali. Baadhi yenu mliwahi kulichukua jina lile takatifu; sasa mnaufanana na ulimwengu. Yachunguze matokeo ya kuta zako ulizozipuuza. Jilinganishe na waumini wenye bidii — huenda ni maskini na wasio na elimu — wanaomtumikia Kristo kwa uaminifu. Pamoja na vipawa vyako vyote na nafasi zako zote, umekuwa mtumishi asiyefaa. Je, si wakati wa kujitikisa?

Wafikirie wengine waliokusudia kuamka baadaye. Baadhi wameanguka katika dhambi ya waziwazi na kumvunjia Kristo heshima. Walikwenda hatua chache tu mbele yako. Moyo wako ni kama wao. Ukikutwa na jaribu kama lao, waweza kuanguka kama walivyoanguka. Anayekiri imani hali ni mvivu yu tayari kwa lolote. Moyo mvivu ni kiberiti kwa cheche za ibilisi.

Kumbuka kuja kwake Bwana Yesu Kristo. Je, atakukuta umelala? Kumbuka hukumu. Utatoa udhuru gani kwa wakati uliopoteza na kwa vipawa usivyovitumia, Bwana wako atakaporudi?

Nawe, rafiki yangu ambaye hujaongoka, ukipita katika maisha bila kuijali nafsi yako, hakika utapotea. “Na mwenye haki akiokoka kwa shida, yule asiyemcha Mungu na mwenye dhambi ataonekana wapi?”

(1 Petro 4:18). Wokovu ni wa neema tupu; lakini neema haizai uvivu wala kutojali. Huzaa nguvu, bidii, uchangamfu, kudumu, na kujikana nafsi.

Mungu na atujalie kukaa kwake Roho Mtakatifu ndani yetu, ili yote yapangwe vema, dhambi zing'olewe mizizi moyoni, na mtu mzima alindwe kwa neema ya utakaso dhidi ya waharibifu wanaovizia karibu na kila ukuta mfupi. Ee Bwana, utukumbuke kwa rehema. Utuzungushie uzio kwa uweza wako. Utuepushe na uvivu ungetuweka wazi kwa uovu, kwa ajili ya Yesu. Amina.