Kanada Yaita

Asubuhi iliyofuata nilimwomba Anne anunue “Times Educational Supplement.” Chapisho hili lilitoka kila Jumatatu na kuorodhesha nafasi zote za ualimu kotekote Uingereza pamoja na makala kuhusu utendaji wa kielimu. Nilifikiri ingekuwa vyema kupata mtazamo wa jumla wa maendeleo katika elimu ili niione picha ya hapa kwetu kwa uwazi zaidi. Jioni ile nilifungua ukurasa wa kwanza na kusoma, kwa mshangao wangu, “Mwalimu wa fizikia anahitajika kwa shule iliyoko Toronto, Kanada.”

Lilikuwa tangazo la kwanza la namna hiyo katika jarida lolote la Uingereza kwa miaka mingi, kwani shule za Kanada bado hazikuruhusiwa kutangaza nje ya nchi yao; lakini, mmiliki wa shule hii binafsi alikuwa na ofisi New York, na kama nilivyogundua baadaye, hakuna Mkanada angefanya kazi kwa mshahara mdogo uliotolewa!

Makala iliendelea kusema kwamba mwanzilishi, Bw. Giles, angekuwa London juma lililofuata, ili kuwahoji walimu watarajiwa kwa nafasi hii, na nyingine zilizotangazwa vivyo hivyo. Hili lilinifaa sana kwa kuwa National Association of Schoolmasters - chama changu - kilikuwa kimeitisha mgomo wa siku moja, wa kwanza kabisa, kwa Jumatano iliyofuata. Hivyo, baada ya mahojiano mafupi, nilipewa nafasi ya kuwa Mkuu wa Idara ya Fizikia katika Toronto French School, Kanada.

Mshahara ungekuwa dola 11,000 pamoja na gharama za kuhamia. Hii ilikuwa angalau dola 2,000 zaidi ya mshahara wangu wa wakati ule, wa juu kabisa Wales. Ni baada tu ya kufika Kanada ndipo ningegundua jinsi ilivyokuwa vigumu kulea watoto watatu kwa mshahara ule Toronto!

Sikufanya uamuzi wowote katika mkutano na Bw. Giles bali nilirudi Wales na mkataba ili niutie sahihi. Nilipofika nyumbani, niligundua tulikuwa na wageni, Martin na Sharon Loyley. Walikuwa marafiki wamishonari tuliowafahamu Hong Kong, nao walikuwa Wales likizoni, wakitembelea familia yake huko England. Walifurahi kusikia juu ya mahojiano yangu, na kwa hamu wakatutia moyo kwa sababu Sharon alitoka Toronto na aliifahamu shule ile vizuri kabisa!

“Lazima mkae na mama yangu,” akasema. “Anaishi peke yake na angefurahi sana kuwa nanyi nyote pale.”

Mungu alikuwa tayari akiiandaa njia mbele yetu.

Baada ya mazungumzo na maombi, Anne nami tuliamua kuikubali nafasi ile, na mkataba ukatiwa sahihi ipasavyo na kurudishwa kwa Bw. Giles.

Siku iliyofuata nilikwenda kwa mwalimu mkuu nikiwa na barua yangu ya kujiuzulu mkononi. Nilipoingia ofisini mwake, Bw. Price alinisalimu kwa uchangamfu akiwa na ‘habari njema’ kwamba Bodi ya Wasimamizi ilikuwa imebadili nia na nilikuwa huru kuhudhuria kozi ile ya chuo kikuu.

Bila shaka, habari zangu zilimshangaza sana, lakini alikubali sababu zangu kwa ukarimu. Tulikuwa na miezi mitatu ya kujiandaa; ripoti za afya na viza vilipatikana, nyumba iliuzwa, kazi ya vijana ‘ilikabidhiwa,’ na ‘kwa herini’ nyingi zikasemwa, lakini, hatukuenda peke yetu. Rafiki mmoja mwema alivutiwa na uamuzi wangu naye akachukua nafasi ya kumwona Bw. Giles mwenyewe. Keith aliteuliwa kuwa Mkuu wa Hisabati katika shule ileile niliyokuwa mimi. Hivyo, mnamo Agosti 1975 tulifunga mali zetu zote katika kontena la meli la futi 24, na kuruka hadi Toronto, Kanada - nchi ya ahadi na nafasi kubwa wazi.