Upako

Katika sura ya pili, nilifafanua upako kuwa ni Mungu kuweka muhuri wake, kibali chake, juu ya mtu au huduma, kiasi kwamba kunakuwa na athari ya milele katika maisha ya wale wanaohudumiwa.

Hakuna shaka kwamba yeye huzipaka mafuta baadhi ya huduma, na matokeo ya ajabu yanaonekana ambayo hakuna mwanadamu angeliweza kuyapanga. Kwa mfano, kwa sasa (mwaka 1999) kuna Matembezi ya Upatanisho yanayofanyika, ambapo idadi ndogo ya waumini wanazifuata tena hatua walizozipiga wapiganaji wa Krusedi miaka mia tisa iliyopita. Wakristo wale wa awali wanakumbukwa kwa mauaji, ubakaji na wizi walioutenda katika msafara wao kuvuka Ulaya wakielekea Yerusalemu kuuweka huru Mji Mtakatifu kutoka mikononi mwa Waislamu.

Takriban kila Mwislamu au Myahudi waliyeweza kumkamata aliuawa. Walipanda mbegu za chuki na kutoelewana ambako Mwislamu wa leo anako dhidi ya Mkristo. Mahujaji wa siku hizi wana lengo tofauti kabisa. Kila mahali waendako, humwendea kiongozi wa Kiislamu wakiwa na barua ya kuomba msamaha, isomwayo kwa Kiarabu, Kiingereza, na lugha ya wenyeji. Hakuna masharti yaliyofungamana, ila ni kujitambulisha kwa unyenyekevu na kuyakiri makosa yaliyotendwa zamani sana chini ya bendera ya msalaba. Mwishoni mwa mwaka 1999, wanatarajia kufika Yerusalemu na ujumbe wao wa toba na upatanisho.

Itikio la maimamu na viongozi wa misikiti limekuwa la mshangao na kukubali, wengine hata wakifananisha kuja kwa Wakristo hawa na epifania — kutokea kwa Mungu hadharani kwa watu wake. Magazeti ya kitaifa, televisheni na redio vimebeba taarifa nyingi nzuri kwa watu wote wa nchi zao.

Kuna wanaume na wanawake ambao majina yao yanahusishwa na tukio hili la ajabu, lakini wote wana shauku ya kubaki nyuma ya pazia huku Mungu akiigusa mioyo ya mataifa ya Kiislamu ya Ulaya. Kweli upako wake u juu ya huduma hii.

Nina hakika wewe pia unaweza kufikiria huduma ambazo ndani yake furaha ya Mungu inaonekana wazi na ambazo zinaleta athari kubwa ya milele. Hata hivyo, kuna programu nyingine nyingi mno, zilizozaliwa si katika moyo wa Mungu bali katika akili ya mwanadamu. Mwanzilishi anaweza kuwa mnyoofu na mwenye bidii katika kujitoa kwake kwa kazi hii — na Mungu anaweza kutoa kiasi fulani cha mafanikio ili kuheshimu uaminifu wake — lakini upako ni mdogo au haupo kabisa. Hata mimi nimewahi kuwa sehemu ya huduma kubwa ambako niliona mifano mingi ya mwenendo usio na maadili na fikra za kibinadamu, yote kwa jina la kueneza Injili.

Watu waliwekewa shinikizo la kisiasa, ajira zilitishiwa, mazingira yalichezewa, kweli-nusu zilisemwa (nazo si tofauti na uongo!), ili tu tuweze kuendelea na programu yetu bila vikwazo vingi. Roho ziliokolewa — je, neema ya Mungu si ya ajabu? — lakini kisha watu wakaamini kwamba lengo huhalalisha njia, wakaendelea kupanga programu yao ijayo juu ya msingi ule ule uliotetereka. Ni kiasi gani zaidi cha neema ya Mungu tungaliona kama tungalidumisha unyofu na unyenyekevu mbele zake?

Kuna watu wengi leo wenye ‘huduma’ kubwa ambao wangelifanikiwa vivyo hivyo kama wangelianzisha biashara ya kilimwengu. Huduma yao imejengwa juu ya haiba yao au ujuzi wao wa biashara, badala ya juu ya karama na upako wa Mungu. Hii kwa hakika ni moja ya sababu kuu zifanyazo wengi katika makanisa yetu kuwa na imani ya juujuu na kushindwa kuwa washindi ambao Yesu anatuita, na anatutarajia, tuwe; ndiyo sababu makanisa na wachungaji wengi wanahangaika na milango ya Kuzimu inashinda dhidi ya sehemu kubwa ya kile tukiitacho kanisa; ndiyo sababu athari ndogo mno inaletwa juu ya fikra za kibinadamu za kilimwengu za serikali zetu.

Tunawahitaji kwa udi na uvumba wanaume, wanawake na programu zenye upako wa Mungu. Kwa nini yeye aipake mafuta programu ambazo hakuzianzisha, na watu ambao hakuwatayarisha na kuwaachilia katika huduma wanamojishughulisha? Amewatwika watu mzigo, amewatayarisha na anasubiri waachiliwe katika huduma yake ili aweze kudhihirisha utukufu wake kupitia kwao kwa upako mkuu.

Wakati mwingine si walei wanaohitaji kuachiliwa, bali ni viongozi wa kiroho wenyewe!

Nilitembelea nyumbani kwa Jim na Cathy, wanandoa vijana huko Queensland, Australia. Jim alikuwa mshauri wa biashara ndogo ndogo zilizokuwa zikifikiria kupanuka na zilizohitaji ufahamu wa kitaalamu kuhusu hatari zinazoweza kutokea katika hatua kama hiyo. Aliniambia jinsi kwa miaka kadhaa walivyohangaika kifedha, kwa kuwa baadhi ya makampuni hayakumtumia kwa sababu ya kukataa kwake kujihusisha na ‘kutoa rushwa’ kwa wakurugenzi wa makampuni. Jim na Cathy walihudhuria kanisa ambapo mahudhurio mara chache yalizidi watu arobaini.

Mwaka mmoja yeye na mchungaji wake walifanya safari ya kimisheni kwenda Papua New Guinea, taifa lililo karibu zaidi ambalo halijaendelea, lililoko kaskazini-mashariki mwa pwani ya Australia. Aliporudi nyumbani, Jim alifurika furaha akisimulia hadithi za jinsi Bwana alivyoipaka mafuta huduma yao, hasa ile ya mchungaji wao.

“Cathy,” alisema, “mchungaji wetu alikuwa na upako mkuu juu yake alipokuwa akiwahudumia watu wa Papua New Guinea. Roho wa Bwana alimtumia kwa ajabu, na watu wengi wakamwamini Kristo. Tunahitaji kumtuma huko mara nyingi zaidi, lakini najua kwamba hawezi kumudu gharama na wala kanisa haliwezi kwa sasa. Je, tunaweza kukinyoosha kipato chetu kwa kuweka kando fedha kiasi kila mwezi, ili kujenga mfuko wa kumtuma mchungaji katika safari ya kimisheni mara nyingi zaidi?”

Hili walikubaliana kulifanya. Wangelimwachilia mchungaji wao katika huduma aliyoteuliwa. Jim aliponisimulia hadithi hii mwaka mmoja baadaye, aliongeza nyongeza ya ajabu. Katika mwaka ule mmoja, biashara yake ilikuwa imepokea kipato mara kumi zaidi ya walichokuwa wamepokea katika mwaka wowote uliopita, na si tu kwamba waliweza kumtuma mchungaji wao mara chache Papua New Guinea, bali pia waliweza kuwagharimia wengine kadhaa kutoka kanisani kuandamana naye katika huduma!

Mzigo wa kazi kwa Jim ulikuwa ule ule, lakini makampuni yaliyomwajiri sasa yalilipa kamisheni kubwa mno kuliko alivyowahi kupokea awali. Si tu kwamba Mungu alikuwa akiipaka mafuta huduma ya mchungaji wao, bali pia alikuwa akiipaka mafuta huduma ya Jim na Cathy ya ‘kutoa kwa ukarimu.’ Jim huenda asiwe kamwe mhubiri au mwinjilisti, lakini ameipata huduma yake na ameridhika mno, akipaa kama tai.

Hadithi ilikuwa ya kushangaza hata zaidi wakati uliofuata nilipowatembelea Jim na Cathy. Aliniambia jinsi kipato chake kilivyoongezeka maradufu kila mwaka tangu nilipokuwa pale, hivyo sasa alikuwa akipokea mara nane zaidi ya alivyokuwa akipata. “Hata hivyo,” aliongeza, “utaona kwamba bado ninaishi katika nyumba ile ile na nina gari lile lile (dogo) katika njia yangu ya kuegesha. Hii ni kwa sababu, katika miaka minne iliyopita tumemtuma kila mshiriki wa kanisa letu katika uwanja wa umisheni, wengine mara kadhaa. Kwa nini tuwe na haja ya nyumba kubwa zaidi au gari bora zaidi hali tunafurahia sana kumtumikia Bwana?”

Yesu ‘alizaliwa na Roho Mtakatifu’ tofauti na yeyote kati yetu tunaohitaji ‘kuzaliwa mara ya pili’ na Roho yeye yule ili sisi, kama yeye, tuweze kuitwa wana wa Mungu. Roho wa Mungu alikaa ndani ya mtu Yesu.

Kweli yeye alikuwa Mwana wa Mungu aliyefanyika mwili. Neno (ufunuo wa Mungu juu ya nafsi yake) lilikuwa limefanyika mwili na kukaa kwetu. Siku moja, Yesu alimjia binamu yake, Yohana, aliyekuwa akiwabatiza watu katika Yordani. Ubatizo wake haukuwa wa kuzaliwa upya, wala wa kukiri imani hadharani, bali wa toba na kurejea katika mafundisho sahihi ya Sheria.

“Nibatize, Yohana,” akasema Yesu.

“Siwezi kukubatiza, Yesu. Ni wewe upasaye kunibatiza mimi!” akasema Yohana.

“Nibatize, Yohana,” Yesu akasema tena, “ili haki yote ipate kutimizwa.”

Hivyo, Yohana akambatiza.

“Naye Roho Mtakatifu akashuka juu yake kwa mfano wa hua, na sauti ikatoka mbinguni, “Wewe ndiwe Mwanangu, mpendwa wangu, nimependezwa nawe.”

Mara moja aliongozwa na Roho kuingia nyikani ambako alikuwa atumie siku arobaini za kimya. Ni za kimya tu kwa maana kwamba hatuna kumbukumbu ya kilichotokea hadi anapojaribiwa na Shetani mwishoni mwa kipindi kile. Kubahatisha hakudhuru isipokuwa tukikifanya kuwa fundisho, lakini mara nyingi nimejiuliza kwa nini Roho Mtakatifu amwongoze hivyo.

Nimekuja kuamini kwamba siku zile arobaini zilitumika katika ushirika na Baba yake, ambako alijifunza juu ya njia iliyowekwa mbele yake, safari kupitia Gethsemane na Kalvari ambayo peke yake ingeweza kununua ukombozi wetu. Alipewa huduma yake.

Aliporudi katika mji wake wa nyumbani wa Nazareti, Yesu aliingia katika sinagogi, akayatwaa Maandiko na kusoma, “Roho wa Bwana yu juu yangu, kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao, na vipofu kupata kuona tena, kuwaacha huru waliosetwa, na kutangaza mwaka wa Bwana uliokubaliwa.”

...na hili akaanza kulifanya. Hakujiruhusu kukengeushwa na madai na matakwa ya wengine.

Yohana alipotupwa katika magereza ya chini ya jumba la Herode, alitazamia kwamba binamu yake Yesu angefanya jambo kuhusu hilo. Baada ya yote, je, hakuwa atakuja kuusimika ufalme wake duniani?

Je, hakuwa atakuja kuiangusha Milki ya Rumi pamoja na Waherode wake? Je, hakuwa atakuja kuwaweka huru wafungwa? Baada ya muda mfupi, ikawa dhahiri kwa Mbatizaji kwamba Yesu hakuwa atakuja — naam, hata hakumtumia kadi ya ‘pona haraka utoke’ jamaa yake aliyefungwa! Yohana aliwaita baadhi ya wanafunzi wake mwenyewe na kuwaomba wamtafute Yesu, na watakapompata wamwulize swali hili. “Je, wewe ndiwe Masihi kweli au tumtazamie mwingine?”

Yohana lazima alikuwa amechukizwa kweli kweli na kile kilichoonekana kama kutojali kwa Yesu, kwa maana hakuna ambaye angeweza kuwa na uhakika zaidi kuliko Yohana mwenyewe kwamba Yesu ndiye Masihi. Alikuwa ametabiri, alikuwa ameiona hua na alikuwa ameisikia sauti ikimtangaza kuwa hivyo. Angalia jibu ambalo Yesu alimtumia Yohana.

“Enendeni mkamweleze Yohana mambo mliyoyaona na kuyasikia; vipofu wanapata kuona, viwete wanakwenda, wenye ukoma wanatakaswa, viziwi wanasikia, wafu wanafufuliwa, maskini wanahubiriwa habari njema.

....naye heri yeye asiyechukizwa nami!”

Kwa maneno mengine, “Ninafanya sawasawa kabisa kile nilichoitiwa, kutayarishiwa na kupakwa mafuta kukifanya!”

Ikiwa Yesu alihitaji kupakwa mafuta ili kuitekeleza huduma yake, si zaidi sana sisi?

Alikuwa amejazwa Roho Mtakatifu tangu kuzaliwa lakini alihitaji upako wa Roho kabla ya kuanza huduma yake!

Kuna tofauti kubwa kati ya uzoefu huu miwili wa Roho Mtakatifu, nasi twashindwa kuuelewa kwa kudhoofisha huduma ya Mwili wa Kristo.

Katika Kuzaliwa Upya tuli‘batizwa na Roho kuingia katika Mwili wa Kristo’. Hili liliwatokea wanafunzi kwa mara ya kwanza siku tatu baada ya Kalvari, wakati Yesu alipowajia katika chumba kilichofungwa akawavuvia, akisema, “Pokeeni Roho Mtakatifu!” (kwa Kiyunani ni hali ya amri ya aoristo, itakayo athari ya papo hapo). Walikuwa ‘wamezaliwa mara ya pili’ kama nilivyozaliwa mimi karibu milenia mbili baadaye nikiwa na umri wa miaka kumi na saba, wakati Roho Mtakatifu yeye yule alipoingia maishani mwangu. Hiki ndicho tukiitacho kuhesabiwa haki.

Yohana aliwaambia watu juu ya mmoja ajaye baada yake ambaye angewabatiza kwa Roho Mtakatifu na kwa moto. Hii ilikuwa ahadi ya Baba ambayo Yesu aliirejelea alipowaagiza wanafunzi wake “kaeni humu mjini hata mvikwe uwezo utokao juu”. Hili lilitokea kwa mara ya kwanza siku ya Pentekoste, majuma saba baada ya Kalvari, wakati wale mia moja na ishirini waliokusanyika katika Chumba cha Juu walipotiwa nguvu kwa uweza mkuu, Yesu aliyetukuzwa alipowabatiza kwa Roho Mtakatifu. Ubatizo huu ni wa Yesu kuwaingiza katika Roho Mtakatifu. Ni wazi Maandiko yananena juu ya uzoefu miwili tofauti.

Ni mapenzi ya Mungu kwa kila muumini kujazwa Roho. Huu ni uzoefu wa wakati wa kimaamuzi na pia ni uzoefu unaoendelea baada ya kuongoka.

Twahimizwa na mtume Paulo katika Waefeso 5:18 ‘tuendelee kujazwa Roho’. Ni dhahiri, ijapokuwa ubatizo (kujazwa kwa mara ya kwanza) wa Roho Mtakatifu ni tendo huru la Bwana, sisi tuna wajibu kwa kule kujazwa kunakoendelea. Kuna jambo tuwezalo kufanya.

Paulo anaendelea na yale yaliyo ushahidi mitatu wa maisha yaliyojaa Roho: mstari wa 19: mtazamo wa kuabudu; mstari wa 20: mtazamo wa kushukuru; mstari wa 21: mtazamo wa kutumika.

Sehemu iliyobaki ya sura ya 5 na sehemu kubwa ya sura ya 6, ni mifano ya jinsi ya kuyaishi maisha haya yaliyojaa Roho katika mahusiano yetu na wenzi wetu wa ndoa, watoto na wafanyakazi wenzetu.

Kwa masikitiko, tumekosea kudhani kujazwa huku (au ubatizo) kwa Roho Mtakatifu kuwa ndio upako wa Roho. La kwanza ni kujazwa — ndani yako; la pili ni kutiwa nguvu — juu yako. La kwanza ni kutayarishwa kwa maandalizi ya utumishi; la pili huja baada ya kuachiliwa katika utumishi. La kwanza sasa hutegemea mitazamo yetu na uwazi wetu; la pili bado ni huru.

Kuna mwelekeo katika kanisa leo, wa kuzitambua tena karama za huduma za nyakati za Agano Jipya kama vile mtume na nabii. Hatujapata ugumu wa kuwaita watu wainjilisti, wachungaji, au walimu, lakini hawa wengine wawili walioandikwa katika Waefeso 4 wametuletea wasiwasi zaidi kidogo. Ni imani yangu kwamba huduma hizi zapaswa kuwepo kanisani na kudhihirika kwa upako wao.

Kwa masikitiko, hata hivyo, nimekuwepo mara nyingi mno wakati mzungumzaji alipomaliza muda wake mimbarani kwa kunena hadharani, akiwalenga watu binafsi katika kusanyiko kwa unabii wa mambo ya baadaye. Mengi ya haya hayajawahi kutimia na hakuna aliyemwajibisha nabii kwa maneno yake yasiyo sahihi. Kama mchungaji nimelazimika kushughulikia hali kadhaa za kusikitisha zilizoletwa katika maisha ya watu binafsi, kwa kutenda kwa kufuata ushauri wa kinabii wa mtu mwingine. Katika siku za Agano la Kale, ikiwa neno la nabii halikuwa kweli, aliuawa! Alinena tu alipojua kwamba ana upako wa Mungu!

Kwa kupita njia, sina budi kumpongeza ndugu aliyekuwa ametembelea mji fulani kwa huduma, akiuacha na neno kali la kumwagwa kwa nguvu kwa Roho wa Mungu kulikokaribia kuyaangukia makanisa. “Kama ningekuwa mchungaji hapa, ningeghairi likizo zangu,” alisema, “ili niweze kupatikana kwa ajili ya wengi watakaoingia kanisani mwangu katika miezi ijayo.”

Baadhi ya wachungaji walifanya hivyo hasa, wakiwaacha wake zao na watoto wao waende likizo peke yao.

Hata hivyo, mwaka ulipoelekea mwisho ilikuwa dhahiri kwamba hakuna jambo la pekee lililokuwa limetokea, hivyo wawakilishi wa wachungaji wa eneo hilo walimtumia nabii barua ya heshima wakiuliza kama walikuwa wamefanya jambo lililozigeuza baraka za Mungu ziondoke mjini mwao. Jibu lake lilikuwa la kunyenyekeza, akikiri kwamba alikuwa ‘amekosea vibaya’ na, kwa sababu hiyo, alikuwa ameghairi mikutano mingine ya kinabii kwa miezi kadhaa, akijiweka chini ya nidhamu ya viongozi wa kanisa lake la eneo hilo. Aliwaomba msamaha.

Ushauri bora zaidi niliowahi kuusikia kuhusu unabii ulitoka kwa Floyd McClung wa Youth With A Mission.

Alisema, “Ikiwa mtu atakupa neno la kinabii, liweke katika droo ya chini ya kabati lako na uifunge droo hiyo. Halikupewa kwa ajili ya mwongozo wa siku hizi, bali kama kitia-moyo cha wakati ujao.” Aliendelea kueleza kwamba, ikiwa unabii unatoka kwa Mungu, utafika wakati ambapo huenda ukawa katika hali ambayo unahitaji uhakikisho. Ndipo utaukumbuka unabii uliokuambia kwamba jambo hili lingetokea, na matokeo yake ni kwamba utakuwa na ujasiri ulioongezeka kwamba Mungu amekuongoza hapa.

Kutimia kwa unabii ndio ushahidi pekee wa upako wake.

Watu ni wepesi kudai upako bila kuzingatia gharama ya kukosekana kwa upako. Ikiwa manabii wa uongo wa Agano la Kale waliuawa, mtu hujiuliza Bwana anawaonaje manabii wa uongo wa Agano Jipya. Ni kiasi gani cha baraka yake iliyo bora wanachokipoteza?

Wasiwasi kama huo waweza kuelezwa kuhusu walimu. Paulo alilionya kanisa la awali mara kwa mara kuhusu walimu wa ‘uongo,’ na jinsi watu “wasivyoyavumilia mafundisho yenye uzima bali watakavyotaka masikio yao yachekeshwe, wakijilundikia walimu kwa kadiri ya tamaa zao wenyewe.”

Nimetumia muda fulani katika Amerika ya Kusini ambako baadhi ya walimu wa Amerika ya Kaskazini ni maarufu sana, wakiwa na vitabu na video nyingi zilizotafsiriwa kwa Kihispania na Kireno. Nimetazama video pamoja na rafiki zangu wa Kilatino, ambapo mwalimu ametoa kauli za mamlaka, bila kuwa na msingi wa kibiblia. Anatoa kauli tano, tatu za kwanza zikiwa sahihi kibiblia, lakini mbili za mwisho ni za mawazo yake mwenyewe.

Hadhira yake, hata hivyo, inazipokea zote tano kama zilizo za kibiblia, na wachungaji wengi, wasio na uzoefu wa kujifunza binafsi na uchambuzi wa kibiblia, wanayapokea mafundisho haya kama msingi wao wa kimafundisho. Mwathiri mchungaji nawe utaathiri kanisa — kwa wema au kwa ubaya.

Nimeandika awali kwamba sifa ya mzee inayomtofautisha na shemasi ni kwamba yeye ni ‘hodari wa kufundisha’ (mwenye uwezo na wepesi wa kulitumia Neno). Mzee afundishaye vyema apaswa kuhesabiwa kuwa anastahili ‘heshima maradufu.’ Huduma yake inahesabiwa kuwa ya thamani kiasi kwamba kanisa huiweka juu ya zote nyingine kwa ‘heshima maradufu.’ Kwa nini?

Tuongeze pia kabla ya kulijibu swali, kwamba wazee (wachungaji na walimu) wanaoshindwa katika huduma yao wapaswa kutiwa nidhamu mbele ya kanisa lote! Heshima maradufu, hatari maradufu. Hili halihusu nafasi nyingine yoyote kanisani!

Turudi kwenye swali. Kwa nini mwalimu apokee heshima maradufu na si nabii au mwinjilisti, au mwingine yeyote?

Niruhusu nipendekeze kwamba sababu yaweza kuelezwa kwa mifano ifuatayo.

Ikiwa mwinjilisti anafanya kazi yake vyema, ataleta waumini wapya wengi kanisani. Ikiwa anafanya kazi yake vibaya, hataongeza muumini mpya yeyote kanisani. Ni matokeo ya sifuri au wengi na ni ya kujumlisha.

Ikiwa mwalimu anafanya kazi yake vyema, atazaa wanafunzi wengi watakaojizidisha wenyewe. Ikiwa anafanya kazi yake vibaya, pia atazaa wanafunzi wengi, wanafunzi wabaya watakaojizidisha wenyewe. Matokeo ni wengi wa upande mzuri au wengi wa upande mbaya, wote wakiwa na uwezo wa kuzidisha.

“Mungu ameweka waalimu” aliandika Paulo. Akaendelea kuuliza, “Je, wote ni waalimu?” Tunahitaji walimu waliopakwa mafuta na Roho ili kufundisha utajiri uliofichika wa Kristo. Usijidai mwenyewe wito wowote wa huduma wa kanisa kama vile mchungaji, mwalimu, au nabii isipokuwa umeachiliwa katika huduma hiyo na wengine, wakitambua mzigo na kipawa dhahiri ulichopokea kutoka kwa Bwana. Ni jambo la hatari kudai upako pale ambapo haupo. Hiyo si imani — ni kujikinai, ni dhambi.

Kuna mwelekeo leo miongoni mwa waumini waliokata tamaa wa kuanzisha makanisa ya nyumbani. Wamechoshwa na muundo wa ngazi za madaraka wa kanisa lao la dhehebu, wakiamini kuwa si wa kibiblia na ni wa kutawala kupita kiasi. Kwa masikitiko, mengi mno ya makanisa haya huishia katika mkondo ule ule wa kanisa la awali, kadiri ‘viongozi’ wenye mamlaka na wa kutawala wanavyofika juu. Ni asili ya kibinadamu kuwatawala wale tunaowaona kuwa dhaifu au wasio na uwezo kuliko sisi wenyewe.

Mtume Paulo alipopanda makanisa ya nyumbani katika Asia Ndogo, aliwaweka wazee ili kuyasimamia makusanyiko haya machanga. Hiyo ni huduma itokayo kwa Mungu. Mamlaka ya kiongozi hayako katika cheo chake bali katika upako wake kama mzee.

Anapotimiza kweli matakwa ya kibiblia ya mzee kama yanavyopatikana katika Tito na 1 Timotheo, kuna uwezekano mkubwa wa kanisa hilo la nyumbani kukua chini ya upako wa Bwana.