Mzigo

Nakumbuka vyema jioni ile nilipomwomba Bwana anipe mzigo kwa ajili ya vijana. Nilikuwa mwalimu wa shule katika Majeshi ya Uingereza huko Ujerumani, na nilihisi upungufu wa ushuhuda wangu wa maneno kwa wanafunzi, hivyo nikalia katika maombi nikiomba mzigo ambao nilidhani ungenipa moyo wa kushuhudia zaidi. Sikuona jibu la papo hapo, lakini nilijikaza kwa ujasiri zaidi katika kunena na baadhi yao.

Miaka mitatu baadaye, tulikuwa tumerudi nyumbani kwetu huko Wales, nami nikawa nikifundisha katika Shule ya Sekondari ya eneo letu. Baadhi ya wasichana matineja walikuwa wakipitia nyumbani kwetu wakielekea nyumbani kutoka shuleni, hivyo Anne akapendekeza afanye nao funzo dogo la Biblia mara moja kwa juma. Wakakubali kwa hamu, na punde kikundi kikawajumuisha na wavulana, kikawa kimekua hadi kufikia idadi ya tarakimu mbili, hivyo nikajikuta nikichukua uongozi, nikiandaa mafunzo ya Biblia na kupanga shughuli nyingine.

Miaka miwili baadaye, tulikuwa tumeona vijana wengi wenye umri kati ya miaka kumi na minane na ishirini na minane wakija katika imani ya Bwana. Makanisa mawili katika mji wetu yalikuwa yamehuishwa, na athari kwa jamii iliyotuzunguka ilikuwa kubwa. Si kwamba mimi nilikuwa mwinjilisti — la hasha, bali vijana wenyewe waliwaongoza rafiki zao kwenye imani ya Kristo, nami nikawa tu ‘nawachunga,’ nikiwa nimepewa uhuru kamili na wazee wa kanisa letu. Miaka kadhaa baadaye, mmoja wa vijana hao, ambaye sasa yumo katika huduma ya Bwana ya wakati wote, alisema, “Tulikuwa katika uamsho, nasi hatukuutambua!”

Ilikuwa jambo la kawaida kwetu kuona waamini wapya karibu kila juma. Nilikula, nilikunywa, nililala na kuishi kazi ya vijana, kila dakika ya ziada ya siku yangu — nami sikuchoka kamwe! — (wala sikuhisi kamwe uhitaji wa kulipwa!)

Nilipokuwa mchungaji miaka mingi baadaye, Anne aliulizwa kulikuwa na tofauti gani katika kuwa mke wa mchungaji sasa, baada ya kuwa mke wa mwalimu kwa muda mrefu hivyo. Jibu lake lilikuwa kwamba sasa nilikuwa nikifanya kwa wakati wote kile ambacho hapo awali nilikuwa nikitumia muda wangu wote wa ziada kukifanya!

Kulikuwa na nyakati ambapo, baada ya siku ya kazi yenye kuchosha, ningeitwa kutoka kitandani mwangu saa za mapema za asubuhi kwa sababu mmoja wa vijana alikuwa akipitia taabu fulani na alihitaji msaada — sasa hivi! Ningevaa suruali yangu juu ya nguo zangu za kulalia, ningeingia garini mwangu na kumtafuta kijana aliyekuwa taabani, nikirudi nyumbani baada ya saa kadhaa, ili nijikokote kitandani kwa usingizi mfupi kabla ya kuondoka kwenda shuleni. Jambo la ajabu ni kwamba jioni iliyofuata sikuwa nimechoka, wala sikuhisi uhitaji wowote wa kwenda kulala mapema ili kufidia usingizi. Hili lilitokea mara chache hadi tulipolitambua kuwa ni uburudisho usio wa kawaida kutoka kwa Bwana.

Yesu alisema, “Njoni kwangu, ninyi nyote msumbukao na wenye kubeba mizigo, nami nitawapumzisha. Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu. Kwa maana nira yangu ni laini, na mzigo wangu ni mwepesi.”

Nilikuwa nitanena kwa jioni nne katika kanisa kubwa nchini Brazili. Mchungaji aliyenikaribisha alikuja kwenye eneo la YWAM nilipokuwa nikikaa, ili aniendeshe hadi kanisani kwake. Alikuwa na umri wapata nusu ya wangu, mwenye tabia ya kupendeza sana, na aliongea Kiingereza vizuri sana.

“Mchungaji Gareth,” alisema, “Unawezaje kuendelea ukiwa na bidii kiasi hicho? Waonekana kuwa na nguvu zisizo na kikomo, hali mimi nimechoka kwa kuliongoza kanisa langu.” Akaendelea kueleza jinsi alivyokuwa kanisani kila asubuhi saa kumi na mbili unusu kwa ajili ya maombi, na jinsi asivyofika nyumbani kila jioni hadi baada ya saa tano usiku, akiisha kuufunga mlango wa jengo baada ya mkutano (wa kila usiku).

Baada ya kumhakikishia kwamba nami huchoka hivyo nahitaji kupumzika mchana, nikamuuliza ni kanisa la nani alilokuwa akilijenga. “La Bwana, bila shaka!” akajibu. Nikadokeza kwamba si kanisa la Bwana alilokuwa akilijenga, bali lake mwenyewe, kwa maana Bwana mwenyewe amesema kwamba, ‘Nira yangu ni laini, na mzigo wangu ni mwepesi.’ Sielewi jinsi wachungaji wengi kiasi hicho wanavyopatwa na kuvunjika kimwili hali wao ni watenda kazi pamoja na Kristo — wamefungwa nira pamoja naye — na mzigo wake ni mwepesi! Tafadhali usiniambie kwamba daima ni kwa sababu Shetani anawashambulia kwa sababu tu ya nafasi yao ya uchungaji! Hana haja ya kuwapinga wanapojaribu kujenga ufalme wa Mungu kwa nguvu zao wenyewe na mipango yao. Hana hofu ya kanisa la namna hiyo! Anaogopa tu kanisa lile ambalo Yesu alisema juu yake, “Nitalijenga kanisa LANGU, wala milango ya kuzimu haitalishinda!”

Nikamdokezea rafiki yangu wa Kibrazili kwamba angetumia muda wake vyema zaidi kwa kuwaachilia wengine katika kutaniko lake wasaidie kubeba mzigo kama vile Bwana alivyowawezesha na kukusudia wafanye. Kwa kufanya kazi yote yeye mwenyewe, alikuwa akizuia makusudi ya Bwana kwa kutaniko hilo.

Mzigo wake binafsi na kipawa chake kilichokuwa dhahiri kilikuwa cha kuongoza ibada, lakini vikwazo vya kazi nyingine zote alizohisi kuwa lazima azifanye akiwa mchungaji vilimnyang’anya furaha ambayo angeipata kwa kuhudumu katika kipawa chake, na kulinyang’anya kanisa mwanya wenye upako wa kuingia mbele za Bwana kwa njia ya sifa na ibada.

Tunapofungwa nira pamoja naye, twashiriki mzigo wake. Mzigo wake kwangu ulikuwa huduma ya vijana; kwa mtume Paulo ulikuwa kuwahubiria Mataifa Injili; kwa Jacky Pullinger ulikuwa waraibu wa dawa za kulevya wa The Walled City, Kowloon; kwa Hudson Taylor ulikuwa wapagani wa China; kwa John Wesley ulikuwa wale wa Uingereza wasiokuwa na kanisa; kwa Chuck Colsen ulikuwa wafungwa wa magereza ya Amerika; kwa ……………

Ni upi mzigo wake kwako WEWE?

Anao mzigo kwa ajili yako, naye anangojea uuchukue. Kwa masikitiko, wengi walio na mizigo mizito katika kazi ya Bwana mara nyingi hutegemea wengine waibebe. “Hiyo ni kazi ya mchungaji! Kwa nini hafanyi jambo kuhusu hilo? Kuna tatizo la kutisha katika mji huu la magenge ya vijana. Kwa nini kanisa halifanyi jambo kuhusu hilo?” Kwa nini wewe hufanyi? Bila shaka, twapaswa ‘kuchukuliana mizigo’ (Gal 6:2) mizigo hiyo inapokuwa ni uzito fulani wa huzuni, lakini mzigo unapokuwa ni mzigo wa huduma kutoka kwa Bwana, ‘kila mtu na alichukue furushi lake mwenyewe’ (Gal 6:5). Tunapojaribu kuweka mizigo yetu juu ya wengine, twatenda kama vile Mafarisayo wa siku za Yesu. Walikuwa daima wakiwaambia wengine wanachopaswa kufanya, hata Yesu akasema juu yao, “Hufunga mizigo mizito na kuiweka juu ya mabega ya watu.”

Mtu mwingine anapoweka mzigo wake wa huduma juu yako, waweza kuwa mzito sana; ni mzigo ule tu ambao Yesu anao kwa ajili yako ndio utakaokuwa ‘Mwepesi.’

Ni jambo la kusikitisha kiasi gani kwamba sisi tulio viongozi wa kanisa mara nyingi ndio wa kwanza kuweka ‘mzigo wetu’ juu ya wengine, nyakati nyingine tukitumia ushawishi wa hila, kujipendekeza, au hatia ili kuwafanya watimize matakwa yetu.

“John, tunahitaji mwalimu mwingine wa shule ya Jumapili, nami naamini wewe ndiye mtu barabara kwa kazi hiyo!” Ikiwa John ni ‘mtu barabara,’ basi yampasa pia awe na mzigo kwa ajili ya kazi hiyo.

“Mary, kikundi cha wanawake kinaanza kufanya ziara za nyumba kwa nyumba ili kuwaalika watu kwenye ibada zetu. Nina hakika twaweza kukutegemea usitutupe mkono.”

Bila shaka, ikiwa John na Mary wanaombwa kufanya ‘huduma’ hizi, wanaweza sikuzote kukubali kufanya hivyo, hata bila ‘mzigo,’ kama tendo la uaminifu katika kulitumikia kanisa (na kwa matumaini, Bwana), lakini ni lazima wahakikishe hawajifungi katika ahadi ambazo zaweza kuwa kizuizi kwa wito wa Bwana wa kuwaita katika huduma nyingine ambayo ndiyo mzigo na kusudi lake la kweli kwao. John aweza kujibu, “Ndiyo, mchungaji, nitakuwa tayari kufundisha darasa la shule ya Jumapili kwa muda. Nitajitolea kwa miezi mitatu ijayo, nikiweza kurudia kwa vipindi vingine vya miezi mitatu, hadi Bwana atakaponidhihirishia kwamba ana huduma nyingine inayolingana zaidi na mzigo wangu.” Kwa masikitiko, wachungaji wengi huona hili kama upungufu wa kujitoa! Kujitoa kwa nani?

Jim alikuwa kijana mwenye mzigo. Kila mwishoni mwa juma, yeye na rafiki wawili walikuwa wakiomba usiku wote wa Ijumaa kabla ya kutumia siku iliyofuata katika mitaa ya mji wetu, wakishuhudia kwa yeyote waliyeweza kuongea naye. Wachungaji waliiheshimu kazi ya Jim, nao walifurahi kumruhusu ahudhurie mikutano yao ya kila mwezi ya wahudumu, ingawa hakuwa mshiriki wa kanisa lolote la eneo hilo wala hakuhudhuria. Kwa kweli, alikuwa mwenye kudharau kabisa linapokuja suala la kunena juu ya makanisa ya mji wetu. “Wote wanacheza michezo tu! Hakuna hata mmoja wao aliye makini kuhusu kazi halisi ya maombi, maombezi na uinjilisti!” alikuwa akisema mara nyingi kwa yeyote ambaye angemsikiliza.

Siku moja ya Jumapili, Roger alikuja kwenye ibada yetu ya asubuhi ya Jumapili. Hakujua mengi kuhusu ‘taratibu nzuri’ za mikutano ya kanisa, lakini aling’aa kwa uchangamfu katika uhusiano wake mpya kabisa na Bwana.

“Jim aliniongoza kwa Kristo jana usiku,” aliniambia, “na akasisitiza nihudhurie kanisa hili ili nitiwe nidhamu!” Nikaeleza tofauti kati ya kutiwa nidhamu na kufanywa mwanafunzi.

Nilipomwona Jim tena, nilizungumza juu ya Roger, nikiongeza, kwa tabasamu, kwamba ilionekana Jim sasa alikuwa katika biashara ya kuzaa watoto wa haramu, akiwazaa mtaani, lakini akitegemea wengine wawalee! Jambo hili wazi lilimchoma Jim moyoni, kwa maana Jumapili iliyofuata alikuwa katika ibada yetu ya kanisa. Alikuwepo kwa majuma matano yaliyofuata hadi, siku moja tulipokutana kwa chakula cha mchana.

“Kuna nini moyoni mwako siku hizi?” niliuliza.

“Ni kile kile kama sikuzote — maombi na maombezi,” akajibu.

“Waonaje juu ya maisha ya maombi ya kanisa letu?” “Si sana! Hakuna mtu huko anayeonekana kupendezwa na maombi yenye kushinda!” “Ee,” nikasema, “Namjua mtu katika kanisa letu aliye na mzigo wa kweli wa maombi. Ana urefu wa karibu mita mbili, ana nywele za kimanjano, ni…” Jim akajikuna kichwa nilipoendelea na maelezo, akijaribu kuwaza mtu huyu angeweza kuwa nani, hadi nilipoongeza kwamba alikuwa na biashara ndogo ya usanii wa kibiashara. “Lakini huyo ni mimi!” akasema, akinitazama kama kwamba nilikuwa nikipoteza akili yangu.

“Ndivyo hasa!” nikapaza sauti. “Ni kweli kabisa! Niambie Jim, kwa nini Mungu amekupa wewe mzigo huu lakini wataka mimi niubebe? Nina mzigo wangu mwenyewe wa kubeba katika kazi ya Bwana, nami nakuhitaji wewe uwe ukibeba mzigo wako wa maombi kwa ajili yangu, ili niweze kuubeba mzigo wangu kwa ufanisi zaidi.”

“Basi, nifanye nini?” Jim akauliza.

“Wewe ndiye upaswaye kuniambia, si mimi kukuambia wewe. Wewe ndiwe mwenye mzigo, na ikiwa mzigo huo ni kweli kutoka kwa Bwana, yeye ndiye wa kutuambia jinsi utakavyoubeba!”

“Watu wanahitaji kufundishwa jinsi ya kuomba.”

“Basi, utafanya hivyo lini?”

“Nini? Mimi?”

“Ndiyo, wewe! Wewe ndiwe mwenye mzigo! Utaanza lini kuwafundisha watu kuomba?”

“Juma lijalo?”

“Sawa!”

Juma lililofuata Jim alianzisha darasa, lililoundwa na kiini cha kutaniko langu na baadhi ya wanafunzi kutoka Chuo Kikuu cha eneo letu, ambao walikuwa wamesikia habari za mafundisho hayo yakitangazwa chuoni. Baada ya mafundisho, watu wakaanza kuomba na kufanya maombezi kwa bidii, kulingana na ‘mtindo’ ambao Jim alikuwa amewatambulisha. Tulikuwa tukiingia katika ukaribu na Bwana na kuisikia sauti ya Roho, ikituongoza katika kuombea mambo yaliyokuwa moyoni mwa Bwana.

Ndani ya mwaka mmoja, kutaniko lilikuwa limeongezeka maradufu, wazee walikuwa wamemteua mchungaji msaidizi, jengo jipya kabisa lilikuwa limekamilika lenye kukalisha karibu watu mia tatu na lilikuwa karibu limelipiwa kikamilifu! Viongozi wa dhehebu langu wanadhani nilifanya kazi kubwa katika kanisa lile, ambalo lilikuwa na historia ya idadi ndogo ya waliohudhuria kwa miaka kadhaa, lakini najua kilichotokea — na sasa nawe wajua. Nilichofanya ni kumwachilia tai aruke tu!

Bwana alikuwa ameuweka mzigo wake juu ya Jim kwa sababu alitaka kumtumia kwa ajili ya kulijenga watu wake. Alipoachiliwa katika huduma, Mungu akaipaka mafuta kazi hiyo.

Mzigo Wako

Ni nini kilicho kizito zaidi moyoni mwako? Wewe peke yako ndiwe uwezaye kutoa jibu la swali hilo, ingawa wengine waweza kukuwezesha kulieleza waziwazi.

Ikiwa huna mzigo unaohusiana na kazi ya Ufalme, tafadhali omba Bwana akupe mmoja na akudhihirishie. Nilipomwomba Bwana mzigo wangu kwa ajili ya vijana, sikuwa na ufahamu nilio nao sasa kuhusu mzigo wake kuwa ‘mwepesi.’ Maombi yangu yalitia ndani kauli kwamba sikuomba kuwa na furaha katika kuubeba mzigo, bali kujua tu kwamba, safari yangu duniani itakapokwisha, nitamsikia akisema, “Vema, mtumwa mwema na mwaminifu!” Sikupata furaha ya kudumu — kwa kweli kulikuwa na mambo mengi yasiyofurahisha — lakini kwa hakika nilipata shangwe na utoshelevu katika mzigo huo.

Ninapoiangalia huduma ya Yesu ni dhahiri kwamba mzigo wake ni wa kimahusiano — ni kwa ajili ya watu. Alisema kwamba alikuwa ametiwa mafuta ili kuwahubiri maskini, kuwafungua mateka, kuwapa vipofu kuona, kuwaweka huru walioonewa, na kuhubiri upatanisho au fadhili za Mungu juu ya watu. Tangu siku hizo, bila shaka, tumeliendeleza kanisa hadi mahali ambapo tunayo majengo mazuri ya kuyatunza na programu nyingi zilizopangwa vizuri kiasi kwamba ni rahisi kwa watu kuwa na umuhimu mdogo kuliko vitu hivi. Kwa masikitiko, nyingi za huduma zetu zimejikita katika kazi kiasi kwamba mara nyingi watu huhesabiwa kuwa wa kutupwa, na wengi hubeba majeraha mazito kutokana na yale waliyoyapitia.

Iwe mbali nami kudokeza kwamba hupaswi kuwa na mzigo wa kutunza patakatifu pazuri, lakini kumbuka kwamba kusudi lake ni lazima sikuzote liwe kuwaleta wanaume na wanawake katika uhusiano wa ndani zaidi na Bwana.

Hii hapa ni orodha ya baadhi ya mizigo, mmojawapo ambao Bwana aweza kuuweka juu yako.

Ndani ya kutaniko: kufundisha Biblia; watoto; ujenzi wa kanisa; usafi; dansi; ushemasi; uzee wa kanisa; uinjilisti; fedha; maua; wenye ndoa; misheni; muziki; waamini wapya; kufikia watu; sifa & ibada; maombi & maombezi; wazee; wasio na wenzi; kikundi kidogo; shule ya Jumapili; umoja; ukaribishaji; vijana; … Katika Jamii: ; wahanga wa uavyaji mimba; biashara za mtaa; mkahawa wa kahawa; mazingira; familia yako; serikali ya mkoa au ya shirikisho; walio wachache; ukahaba; shule za eneo; michezo; watu wa mitaani; jiko la supu; haki za wanawake; mahali pa kazi… ongeza yako mwenyewe.