Maono

Ikiwa tunataka kufikia kusudi la maisha yetu katika Kristo, ni lazima tuwe na maono yanayoona mbali zaidi ya hali zetu. Mtazamo wetu utaathiri jinsi tunavyoishi: ukiwa mtazamo wa nafsi (kutazama ndani), mtazamo wa ulimwengu (kutazama nje), au mtazamo wetu kwa Bwana (kutazama juu).

Kutazama Ndani

Imesemwa kwamba ‘unachojidhania kuwa, ndicho ulicho.’ Bila shaka hili si kweli kwa wale waliodanganyika akili kwa sababu ya ugonjwa.

Labda umesikia hadithi ya watu wawili waliokuwa katika hospitali ya wagonjwa wa akili.

“Hujambo,” akasema mmoja, “wewe ni nani?”

“Mimi ni Napoleoni,” rafiki yake akajibu.

“La, wewe siyo.”

“Ndiyo, mimi ndiye.”

“La, wewe siyo!”

“Ndiyo, mimi ndiye!”

“Nani alikuambia hivyo?”

“Mungu ndiye aliyeniambia!”

“La, sikukuambia!!!”

Kwa kusikitisha, wako wengi katika kanisa la Kikristo ambao ni vipofu kuhusu utambulisho wao kama vile wale wagonjwa wenye bahati mbaya. Hata hivyo, si maono ya majivuno au kiburi peke yake yanayotupasa kuyashughulikia, bali pia hisia zilizo kinyume za kujidharau. Nukuu iliyo hapo juu bila shaka ni kweli katika uwanja huu hasi. Tunapowaza mawazo ya kujidhalilisha, twaishi katika bonde lilo hilo la mawazo hayo ya chini. Twamwonyesha kidole mtu ajionaye kuwa bora, tukamwita “mwenye kiburi,” ambaye hakika Mungu atamshusha.

Hata hivyo, twaharakisha kujitetea dhidi ya mashtaka kwamba twajidharau kupita kiasi, tukiongeza (kwa kiburi kidogo?) kwamba twaitwa kuwa “wanyenyekevu.” Jambo hili lote laonyesha tu kutokujua unyenyekevu ni nini. Si kinyume cha kiburi — huo ni unyenyekevu wa uongo — nao ni ugonjwa mbaya kama kile kinyume chake.

Twaitwa kuwa ‘wanyenyekevu kama watoto wadogo’ ikiwa twataka kuwa wakuu katika Ufalme wa Mbinguni. Watoto waweza kucheza michezo na kuvaa mavazi ya kujigeuza na barakoa, lakini wakati wa kulala ufikapo, huvua vitu vya kuchezea na kujiingiza chini ya mablanketi, wakiwa tena wanyonge na wachovu, wakihitaji kumbatio la baba, na mama wa kuwafunika. Hurudi kuwa ‘wao wenyewe tu’.

Ni watu wazima peke yao wanaoendelea kuvaa mavazi ya kujigeuza na barakoa, kwa maana hatutaki wengine watuone kama tunavyojijua wenyewe. Biblia huita hilo unafiki (kwa Kigiriki = kuigiza kama mhusika mwingine).

Tafakari jambo hili: kauli iliyo nyenyekevu kuliko zote katika Biblia ilitoka kwa Mungu mwenyewe! Musa alipomwuliza, “Niwaambie nani aliyenituma nitakapozungumza na wana wa Israeli?” yule wa Milele akajibu, “MIMI NIKO AMBAYE NIKO! Waambie ya kwamba MIMI NIKO amekutuma!”

Unyenyekevu ni kujua — na kuwa — wewe ni nani hasa. Si zaidi, si pungufu.

Basi, wewe ni nani?

Tukichukua kwamba wewe ni mwamini Mkristo, mtu aliyezaliwa mara ya pili kwa Roho wa Mungu, Biblia ina mengi ya ajabu ya kusema juu yako. Soma Agano Jipya ukitafuta wingi wa mambo matukufu yanayosemwa kuwa utajiri wa pamoja wa waaminio wote. Baadhi ya utajiri huu hutegemea tendo fulani letu, lakini mwingi hauhusiani sana na uwezo wetu au ukomavu wetu, bali wahusiana kabisa na kile Yesu alichotushindia msalabani, ambacho Baba hufurahi kutupatia kwa sababu tu ampenda Mwana.

Naamini kwamba kila mwamini mpya apaswa kufundishwa sura ya kwanza ya kitabu cha Waefeso mapema katika maisha yake mapya, ili apate kujua nafasi yake “katika Kristo.”

Tumechaguliwa katika yeye, tumefanywa wana wa kuasiliwa katika jamaa ya Mungu, nasi twakubaliwa kwa sababu Baba ampenda. Tume‘ketishwa mahali pa mbinguni’ katika yeye, juu sana ya kila enzi na mamlaka (za uovu). Acha kuamini uongo wa Shetani kukuhusu, uanze kuamini yale Mungu asemayo juu yako!

Nilikuwa mwenye dhambi, lakini Biblia yaniambia sasa mimi ni mtakatifu!

Nilikuwa mtumwa wa dhambi, lakini sasa mimi ni mwana wa Mungu!

Dhambi zangu zimesamehewa, nami naweza kumwita “Baba!” Zamani nilitembea gizani lakini sasa natembea nuruni!

Nilikuwa nimekufa lakini sasa ni hai!

Nilikuwa nimepotea lakini sasa nimepatikana — mimi ni wa kwake!

Mimi ni kiumbe kipya (roho), mambo ya kale yamepita, na mambo yote yamekuwa mapya.

— si kwa sababu ya kitu chochote kilicho ndani yangu, bali kwa sababu mimi ni ndani yake.

Litangaze kutoka juu ya nyumba! Inueni vichwa vyenu, mwimbe! Sisi ni watoto wa MFALME, Haleluya! Maisha haya ni kambi fupi tu ya mazoezi inayotuandaa kutawala pamoja na mfalme wetu, nasi twaweza kushinda kwa sababu yeye aishi ndani yetu, Kristo ndani yetu, dhamana yetu ya utukufu.

Shetani atakushtaki, akikuletea hisia za hatia na hukumu, lakini kweli yatangaza kwamba “hakuna kitu kiwezacho kukutenga na upendo wa Mungu ulio katika Kristo Yesu.” Utamwamini nani — Shetani, baba wa uongo, au Roho Mtakatifu, mwandishi wa Neno la Mungu?

Hali zaweza kukuelemea, lakini waweza kuwa “zaidi ya mshindi kwa njia ya Kristo akutiaye nguvu.” Je, wewe waamini hili, au wapendelea kumwamini adui yako, Shetani?

Mojawapo ya misiba mikubwa katika kanisa la Kikristo ni idadi ya waaminio wasiojua wao ni nani (katika Kristo), na wanaotumia muda mwingi kujaribu kujihesabia haki mbele za Mungu na mbele za watu. Jambo hili lasikitisha zaidi lionekanapo miongoni mwa viongozi wasio na uhakika wa nafasi zao (mara nyingi kwa sababu Mungu hakuwaita kuwa pale), na wanaohitaji kucheza siasa za kanisa ili kushikilia hadhi yao. Kwa watu wa namna hiyo ni vigumu sana kuwa mtumishi ambaye Bwana alituita sote kuwa. Badala yake, hushikilia ‘mamlaka’ yao, mara nyingi wakiwaumiza waaminio wengine katika mchakato huo. Kuna mstari wa Biblia ambao sikuzote umenigusa kuwa wa maana sana, lakini nilipounukuu na kuwauliza wasikilizaji wangu unapatikana wapi katika Maandiko, hakuna aliyeweza kunijibu. Wasomeka hivi.

“Yesu, akijua ya kuwa Baba amempa vitu vyote mikononi mwake, na ya kuwa alitoka kwa Mungu naye alikuwa akienda kwa Mungu ....”

(Kwa maneno mengine, “Yesu akijua yeye alikuwa nani, alikotoka, alichokuwa akifanya na alikokuwa akienda ....”)

Je, wajua kifuatacho? (Je, hupendezwi mtu akikuwekea shinikizo la ghafla hivi??) Jitafutie mwenyewe katika Injili ya Yohana, sura ya 13! Alikuwa na uhakika ndani yake mwenyewe na katika wito wake.

Twahitaji kuwa na uhakika kama huo ikiwa twataka kuwa yote Bwana anayotaka tuwe — tukiruka kama tai. Ni rahisi kuwatumikia wengine ujuapo wewe ni nani na uko wapi.

Kutazama Nje

Waona nini utazamapo jamii ya wanadamu — mtazamo wako wa ulimwengu ni upi? Kila kitu kikuzungukacho kikionekana kuwa katika machafuko, kwa nini washangaa? Yakupasa kutambua kwamba hii ndiyo hali ya ulimwengu. Ni uumbaji wa kale uliochoka, ukiugua na kuwa na utungu wa uchungu, chini ya uongozi wa vipofu, ukingoja siku ambayo Muumba wake atarudi, akija pamoja na wana wa Mungu.

Wakati huohuo, utafuata dini ya ubinadamu wa kilimwengu, ambapo mwanadamu ndiye kitovu cha ulimwengu wake mwenyewe na Mungu amefukuzwa hadi pembezoni mwake. Naam, katika jamii ya baada ya Ukristo tunayoishi sasa, wengi wangeungana na wanateolojia huria wa mwanzoni mwa karne ya ishirini, wakidai kwamba Mungu amekufa! Bila hakika za kuwajibika kwa mtu aliye nje yake, mwanadamu huwa mwamuzi wa maadili — lililo jema au baya — na jamii huyumbayumba kutoka mtikisiko mmoja hadi mwingine.

Nilikuwa Skotlandi nikiongoza pamoja tamasha la maombi na Ian na Peter, wachungaji wawili wa Kanisa la Skotlandi. Roho ya Ian ilikuwa na huzuni sana jioni ile, hivyo nikamwuliza sababu. Siku ile, sinodi ya kanisa la taifa ilikuwa imepiga kura kuwaweka wakfu wanaume wa mapenzi ya jinsia moja, jambo ambalo Ian na Peter wote waliliamini kuwa kinyume na Maandiko. Wao, pamoja na wengine wengi, waliruhusiwa kuandikisha kutokukubali kwao katika kumbukumbu rasmi lakini hoja ilikuwa imepita.

Kisha nikamwuliza Peter kwa nini yeye hakuwa amevunjika moyo vivyo hivyo. Jibu lake lilikuwa lenye kufumbua macho. Ilikuwa mfano wa glasi iliyojaa nusu — au iliyo tupu nusu — ya maji. “Nilipofika katika mji huu miaka ishirini iliyopita,” akasema, “ungeweza kupata labda makanisa yetu mawili au matatu ambapo Injili ilihubiriwa kwa uaminifu. Leo yako ishirini na mawili!” “Kuna mgawanyiko unaotokea. Palipo na giza kubwa zaidi, pako pia na nuru kubwa zaidi.” Hakuruhusu maono yake ya ulimwengu yamnyang’anye maono yake ya Bwana.

Wakati huu, mimi na wewe tuko katika ulimwengu huu, lakini sisi si wa ulimwengu. Usitazamie kwamba utakupokea. Kama vile haukumpokea Bwana Yesu, ndivyo hauwezi kukukubali wewe. Hata hivyo, Bwana hakuchagua kutuondoa katika ulimwengu huu kwa sababu ataka tuwe mashahidi wake ulimwenguni. Ajua kwamba jambo hilo litakuwa gumu kwa maana tuna adui aliye macho, lakini ameomba, na bado huendelea kutuombea. “Baba, siombi kwamba uwatoe katika ulimwengu, bali uwalinde na yule mwovu, kwa maana wao si wa ulimwengu, kama mimi nisivyo wa ulimwengu.” Bila shaka, waaminio wapaswa kushiriki katika nyanja nyingi za ulimwengu — kama chumvi ili kukoleza ukosefu wake wa ladha na kupinga uovu wake; kama nuru ili kufunua ugonjwa wake na kuonyesha njia ya uzima. Watakuwako baadhi watakaoruka kama tai katika huduma waliyopewa na Mungu ndani ya taasisi na mashirika ya ulimwengu.

Hata hivyo, shughuli yetu kuu si ulimwengu huu, bali Ufalme wake miongoni mwa mataifa ya ulimwengu huu.

Hatukuitwa kusimama katika ulimwengu tukitoa ushahidi wa Kristo; twaitwa kusimama katika Kristo tukiutolea ulimwengu ushahidi!

Yesu alinena juu ya aina tano za watu ambao huwaona kuwa wakuu katika ufalme wake. Ni watumishi, kama watoto, walio tayari kuwa wa mwisho au mdogo kuliko wote, na kama yule mdogo. Je, umewahi kutafakari maana ya kuwa ‘kama yule mdogo’? Katika siku za Yesu mali yote ya baba ilirithishwa kwa mwana mkubwa. Shamba na ng’ombe wote vilikuwa vyake. Mwana mdogo angeweza kubeba urithi wake wote begani mwake kama vile yule mwana mpotevu alivyofanya alipoondoka nyumbani. Alipotubu na kurudi nyumbani kwa baba yake, alijiona hastahili kuwa mwana wa baba yake, lakini yule mzee alimpokea kwa kumbatio la upendo, viatu vipya, koti, na karamu.

Kwa hili mwana mkubwa alikasirika. “Kwa nini umemchinja ndama aliyenona kwa ajili ya mharibifu huyu?” akadai. Kwa kujibu, baba alionyesha kwamba ndama wote walionona walikuwa wa mwana mkubwa. Kwa hakika, shamba lote lilikuwa lake. Alimiliki vyote! Lakini kwa kweli, shamba ndilo lililomiliki yeye! Hakuwa na hamu ya toba na msamaha; hamu yake pekee ilikuwa katika kile alichomiliki. Hili ni shamba langu! Usiliguse!

(Je, wasikia mwangwi? Hii ni huduma yangu/ kanisa langu/ mpango wangu/ kwaya yangu! Hawa ni kondoo wangu! Usitikise mashua!) Kwani kanisa ni la nani hasa?

Kuwa ‘kama yule mdogo’ kwamaanisha kwamba hatuuruhusu ulimwengu huu utumiliki, wala nafasi zake, wala mali zake, wala umaarufu wake, wala sifa zake, wala malengo yake. Sisi ‘si wa ulimwengu huu,’ hatujafungwa nao, kwa maana sisi ni mabalozi wa ulimwengu mwingine, ulio wa juu zaidi. Hili halimaanishi kwamba hatupaswi kumiliki mali au kupokea heshima tunapopewa. Naam, Mkristo apaswa kuonekana wazi juu ya umati kama mtu afanyaye kazi yake vema na anayestahili heshima, hata kwa vipimo vya ulimwengu.

Hata hivyo, ijapokuwa twaweza kuumiliki ulimwengu, haupaswi kutumiliki, nasi twaushika kwa wororo sana, ili wakati Bwana atakapotuita tuondoke, kushikamana kwetu kusizuie tusiende. Anapotuita turuke kama tai, hatuzuiliwi chini na vifungo, ahadi, ‘kamba’ zilizosukwa kwa miaka mingi ya kuchangamana na ulimwengu na njia zake.

Twahitaji kuelewa kwamba maisha haya — katika ulimwengu huu — ni kambi tu ya mazoezi ambayo Mungu ameibuni ili kutukamilisha kwa ajili ya ulimwengu halisi wa Umilele. Anatafuta watu watakaoshinda katika maisha haya ili wapate kutawala pamoja naye katika yajayo. Hatuoni ni ajabu kwamba watu wateseke kwa mkazo mkubwa na fedheha za kibinafsi wanapokuwa katika mazoezi ya kuwa askari wa majini, lakini mara nyingi twaanza kunung{RS}unika Bwana wetu anaporuhusu magumu na simba angurumaye atushambulie katika mazoezi yetu. Tuko tayari mno kuhatarisha maandalizi yetu kwa kutafuta urafiki na ulimwengu.

Hata hivyo, tutakapokuwa kile Bwana alichotuita tuwe, tutakuwa washindi, hata katika ulimwengu huu, na Ufalme wake utawekwa imara duniani kama huko mbinguni. Atalijenga kanisa lake, wala milango ya kuzimu haitalishinda.

Kwa njia, paka ‘anayelia miao’ kamwe hatakamata windo lake; simba angurumaye ni asiyefaa vivyo hivyo, isipokuwa tunapompa nguvu kwa kuruhusu ngurumo yake iathiri hisia zetu na kupooza matendo yetu.

Hutumia hofu, aibu, wivu, husuda, hasira na hisia hasi za namna hiyo ili kutunyang’anya ushindi wetu. Twahitaji kujifunza kutambua mbinu zake na kuazimia tusiruhusu hisia hizi kutuzuia. Nilitumia mwezi wenye furaha sana huko Nepali nikiendesha semina kadhaa kwa ajili ya wamisionari na kusafiri sehemu kubwa ya nchi.

Katika mji wa Dharan, nilitambulishwa kwa mzee aliyekuwa mchungaji pale kwa miaka mingi wakati kulipokuwa na mateso makubwa juu ya makanisa. Alikuwa amekamatwa zaidi ya mara ishirini na tano na alikuwa amefungwa gerezani mara saba, kifungo kirefu zaidi kikiwa cha miaka minane. Mara tu alipoachiliwa kutoka gerezani angerudi kijijini kwake na kuanza kuihubiri Injili tena. Nilimwuliza, “Je, hukuogopa kukamatwa tena?” Jibu lake lilikuwa “Kwa nini niogope? Simba amekwisha nguruma kwa sauti yake kuu kabisa!” Alikuwa na maono sahihi — uwezo wa kuona kamili katika mambo ya kiroho!

Alikuwa Jim Elliot, mmoja wa vijana watano waliouawa kwa imani katika misitu ya Ekuado mwaka 1959, aliyeandika muda mfupi kabla ya kifo chake, “Si mpumbavu yule aachaye kile asichoweza kukitunza ili kupata kile asichoweza kukipoteza!”

Ni dhahiri, ulimwengu huu haukummiliki kwa maana alikuwa na maono yaliyo juu zaidi ya ulimwengu huu.

Yesu alijua wakati ujao wa mwanadamu duniani ungekuwaje, hivyo atwambia kwamba “mambo hayo mtakapoyaona, tazameni juu kwa maana ukombozi wenu umekaribia.” Maono yetu yapaswa kuelekea juu.

Kutazama Juu

Ulimwengu waweza kudai katika upofu wake kwamba ‘Mungu amekufa,’ lakini raia wa ufalme wa Mbinguni wanajua uhalisia tofauti. Mungu bado yuko juu ya kiti cha enzi na anayaleta mambo yote kwenye kilele, ili katika ukamilifu wa wakati apate kuyakusanya pamoja katika Kristo, yote yaliyo Mbinguni, na yaliyo Duniani. Atatimiza makusudi yake.

Katika 2 Wafalme 6, twasoma juu ya taabu fulani ambayo nabii Elisha alipatwa nayo baada ya kumjulisha mfalme wake juu ya mipango iliyokuwa ikifanywa na Washamu kuivamia Israeli. Mfalme wa Shamu alituma jeshi kubwa ili kumkamata nabii katika mji wa Dothani. Jua lilipokuwa likichomoza, mtumishi wa nabii aliondoka kitandani mwake na kufungua madirisha ili kuukaribisha mchana mpya. Wazia mshangao na hofu yake alipouona mji umezingirwa na jeshi la Washamu. Hali hazikuwa za kutia moyo sana! Mtazamo ulikuwa mweusi. Ulimwengu wote ulionekana umepangwa dhidi ya mtu wa Mungu.

“Ole wetu, bwana wangu! Tufanyeje?” mtumishi akalia.

Elisha aliondoka kitandani mwake, akatembea taratibu hadi dirishani, akamtazama adui, akaomba. Hakuna maneno ya dhiki, hakuna kusihi ukombozi, hakuna maswali aliyomwuliza Mungu. Ombi rahisi tu, “Bwana, umfumbue macho yake!”

Naye Bwana akayafumbua macho ya yule kijana, akaona kwamba milima iliyouzunguka mji ilikuwa imejaa farasi na magari ya moto ya jeshi la Mungu. Mfalme wa Shamu angeweza kutuma jeshi lake kubwa, lakini wasingeweza kumshinda mtu wa Mungu. Pamoja na Mungu sisi sikuzote tu ‘zaidi ya washindi’ juu ya yote ambayo adui au ulimwengu waweza kututupia. Twahitaji kutazama juu ili kuona kwamba vilima vinavyozunguka hali zetu vimejaa majeshi ya Bwana, vikingoja tu amri yake ili yaachiliwe katika hali hiyo.

Mfalme Daudi alikabili siku nyingi ambazo kila kitu kilionekana kuwa dhidi yake. Mfalme Sauli alikuwa amejaribu kumwua mara kadhaa na alikuwa amemwinda baada ya kuondoka jumba la kifalme huko Yerusalemu hata, kwa miaka mingi, aliishi maisha ya mtu aliyetupwa. Hata hivyo, miongoni mwa siku zenye huzuni zaidi za maisha yake ni wakati alipotambua kwamba mwanawe Absalomu alikuwa akiinua jeshi ili kumwondoa baba yake katika kiti cha enzi cha Israeli. Daudi anaandika jinsi hisia zake zilivyobadilika katika Zaburi 3. — Kutoka mtazamo wenye giza wa mstari wa 1 (‘Ee Bwana, watesi wangu wamezidi kuwa wengi’) hadi ujasiri wa mstari wa 8 (‘Bwana ndiye mwokozi wangu!’). Yatupasa kuangalia mstari wa 3 ili kuona jinsi badiliko hili la mtazamo lilivyotokea “Bali wewe, Bwana, u ngao yangu pande zote; utukufu wangu, na mwenye kukiinua kichwa changu.” Baadaye angeandika “Nitainua macho yangu niitazame milima; msaada wangu utatoka wapi? Msaada wangu u katika Bwana!”

Hali zako ziwe zipi, adui akushtaki vyovyote, ulimwengu ukukwaze vyovyote, inua macho yako ukazie fikira uhalisia wa mambo ya mbinguni. Bwana arusi wako angoja, meza ya karamu imeandaliwa, nasi karibuni tutasikia mlio wa tarumbeta ukitualika kwenye karamu ya arusi pamoja na Mwana-Kondoo.

Bwana wako ndiye anayeongoza, nawe waweza kuwa na uhakika kwamba ‘yeye aliyeanza kazi njema ndani yako ataimaliza hata siku ya Kristo Yesu.’

Haya si mawazo chanya bali ni tamko wazi la tumaini letu (yaani; kutarajia kwa shauku kile kilicho hakika.) Hata wakati huo, ataka turuke kama tai!

Waweza kuwa na mtazamo mzuri juu yako mwenyewe, mtazamo halisi juu ya ulimwengu na tumaini lenye shauku katika Bwana, lakini mtazamo wako juu ya kanisa ni upi? Je, ni dhaifu na lisilo na matokeo, likiwa na athari ndogo juu ya ulimwengu wako? Je, limekuwa shirika badala ya kiumbe hai — Mwili ulio hai wa Kristo? Je, laelekeza mipango badala ya kuwajali watu?

Mojawapo ya pendeleo kubwa nililo nalo ni kusafiri hadi nchi nyingi ili kuwahudumia vijana na viongozi wa kanisa. Nataka kulipiga kelele kwa sauti na kwa uwazi kwamba kanisa la Yesu Kristo li hai na lenye afya, katika sehemu nyingi. Kila niendako hukutana na wanaume na wanawake wanaotimiza mambo makubwa kwa ajili ya Mungu, ijapokuwa, bila shaka, vyombo vya habari vya kilimwengu havituambii mengi juu ya waaminio hawa wanaobadilisha ulimwengu wao. Kile walicho nacho kwa pamoja ni mzigo, na maono makuu ya kile Mungu awezacho kufanya kupitia kwao.

Alipokuwa kijana, Loren Cunningham alikuwa na maono. Yalikuwa ya mawimbi ya vijana wakiachiliwa na kufika kama mawimbi ya bahari kwenye fuo za ulimwengu. Aliamini kwamba Mungu angeweza kuwachochea makutano waende na mikono miwili ya Injili. Walipaswa kuitangaza habari njema na pia kuonyesha tabia ya Yesu kwa matendo yao.

Leo, Youth With A Mission linajulikana kote ulimwenguni, likiwa na nguvu kazi ya umisionari ya kama wafanyakazi elfu nane wanaohudumu katika mataifa zaidi ya hamsini na likiwa limehudumu katika kila nchi inayotambuliwa na Umoja wa Mataifa.

Basi maono yako ni yapi?