Kuifikia Hatima Yako

Unaweza kuruka kama tai! Hiyo ndiyo hatima Mungu aliyokupangia, lakini utaufahamu utamu wake tu utakapofuata mipango yake, ukiifanya kwa njia yake, kama ilivyoainishwa waziwazi katika Maandiko.

Tutazingatia hatua sita za kuifikia hatima yako katika Kristo, na tutumie kama mwongozo hadithi iliyosimuliwa katika 2 Wafalme 4:1-7.

Mke wa mmoja wa manabii alimjia Elisha akamwambia, “Mtumishi wako, mume wangu, amekufa. Alimcha Bwana, lakini ametuachia madeni makubwa nisiyoweza kuyalipa, na sasa wadai wamekuja kuwachukua watoto wangu wawili wawe watumwa.” Elisha akamwambia, “Nikufanyie nini? Niambie, una nini nyumbani mwako?” “Sina kitu,” akajibu, “isipokuwa chupa ndogo ya mafuta.” Ndipo akasema, “Nenda ukaazime kila chombo uwezacho kutoka kwa majirani zako wote. Vyombo vya umbo au ukubwa wo wote, lakini viwe vitupu, vingi kadiri iwezekanavyo. Kisha uingie nyumbani mwako, ufunge mlango, na umimine mafuta kutoka katika chupa yako ndogo katika kila chombo cha jirani zako. Kila kimoja kikijaa, kiweke kando.”

Akaenda akafanya kama alivyomwambia, akimimina mafuta katika kila chombo hata kikajaa. Mwishoni, havikuwapo tena vyombo vya kujaza, na mafuta yakakoma kutiririka. Akaja akamweleza nabii Elisha yaliyotokea. “Nenda, ukayauze mafuta,” akasema, “ulipe madeni yako, kisha wewe na watoto wako mtaishi kwa kile kitakachobaki maisha yenu yote.”

Hali ya mambo ilikuwa ya kukatisha tamaa sana kwa mjane huyu. Hakuona njia ya kutoka katika tatizo lake, kwa maana hali zilikuwa zimemlemea. Aliona giza tu lisilo na tumaini. Ilionekana hakuna njia ya kutoka bondeni mwake. Alihitaji MAONO mapya. Watu wawili katika chumba cha gereza, wakichungulia kupitia vyuma vya dirisha; mmoja aliona giza tu, mwingine aliona nyota!

Wote wawili walikuwa na mandhari ile ile mbele yao, lakini walikuwa na maono tofauti! Hali zao zilikuwa sawa, lakini walikuwa na mitazamo tofauti.

Moyo wa mjane ulikuwa mzito alipokaribia kuwapoteza wanawe wawili kwa wadai. Alibeba mzigo uliomwelemea. Alihitaji MZIGO tofauti. Mvulana alionekana akipanda kilima akiwa amembeba mtoto kilema mgongoni mwake.

Mpita njia akasema, “Lo, una mzigo mzito hapo!” Mvulana akajibu, “Huo si mzigo! Huyo ni ndugu yangu!”

Yesu anataka tubebe mzigo - mzigo wake ulio mwepesi. Mzigo unaoubeba utakuwa mzito tu ikiwa si ule aliokupangia (nawe uliokusudiwa kwa ajili yake!)

Nabii alionekana kupuuza hali zake alipomwuliza alichokuwa nacho. “Ni chupa ndogo tu ya mafuta!” Hakutambua kwamba chupa ile ndogo ilikuwa na kila kilichohitajika kukidhi uhitaji wake mkubwa. Kuna nini mkononi mwako - KIPAWA chako?

“Una nini mkononi mwako, Musa?” Mungu akauliza. “Ni fimbo tu ya mchungaji,” mtumishi wake akajibu. “Yatosha,” Mungu akasema, “kwa maana nataka uwaongoze kundi la kondoo zangu watoke katika utumwa wao huko Misri.” Mungu daima huweka mikononi mwetu uwezo na karama tunazohitaji kuubeba mzigo wake.

Kisha nabii akampa mjane kazi ya kufanya - huduma kwa majirani zake wote. Ilionekana jambo la kipumbavu kulifanya. Kwa nini kuingiza vyungu na masufuria mengi hivyo, ndoo, na mabeseni? Alichokuwa nacho ni chupa ndogo tu ya mafuta, - lakini alifanya kama alivyoagizwa. Kila mmoja wetu anahitaji HUDUMA.

“Yesu, akijua ya kuwa Baba amempa vitu vyote mikononi mwake, na ya kuwa alitoka kwa Mungu naye alikuwa akienda kwa Mungu, aliinuka chakulani, .... akawaosha wanafunzi wake miguu.”

Yesu alisema kwamba hakuja kutumikiwa bali kutumika - naye anatarajia vivyo hivyo kutoka kwa wanafunzi wake. Mjane alipomimina mafuta, jambo la ajabu likatokea! Waweza kuwazia sura zao zilivyokuwa huku vyungu na masufuria vikijazwa hata kufurika kutoka katika chupa ile ndogo ya mafuta? Mungu alikuwa amebariki utii wake kwa UPAKO wake!

“Bwana, tulicho nacho ni mikate mitano na samaki wawili tu!” “Wagawie makutano,” Bwana akasema. Wote wakala wakashiba - nao wakaokota masazo, vikapu kumi na viwili vilivyojaa!

Mjane na wanawe wawili wakayauza mafuta yote kwa majirani zao. Kulikuwa na fedha za kutosha kulipa madeni yote, na wao kuishi kwa raha kwa kile kilichozidi maisha yao yote. Walibarikiwa, majirani zao walibarikiwa, na Mungu akaheshimiwa.

Walikuwa wamejifunza kuishi katika HATIMA yao ya kweli - uhuru na baraka za Mungu - wakiruka kama tai. Mtume Paulo aliwaandikia waaminio wa Filipi: “Nina hakika ya jambo hili, ya kwamba yeye aliyeanza kazi njema ndani yako ataikamilisha hata siku ya Yesu Kristo.”

Basi tunaeleza HATUA SITA: MAONO MZIGO KIPAWA HUDUMA UPAKO KURUKA!

Tutayazingatia haya kwa kina zaidi katika sura zijazo.