Usafi Umeamriwa

Waebrania 12:14 yasema, “Tafuteni ... utakatifu, ambao hapana mtu atakayemwona Bwana asipokuwa nao.”

Rafiki zangu wapendwa, Tena, nataka kulishika lile jambo nililoliandikia katika barua yangu iliyopita. Kweli, ni habari ya thamani. Nimeipenda na kuinena maisha yangu yote ya dini; na, leo, naiona furaha na utangazaji wa Baraka ya Moyo Safi kuwa ni jambo la lazima kwa amani yangu, na nguvu zangu, na kufaa kwangu, na la lazima kwa maendeleo na kufanikiwa kwa The Army, kama lilivyokuwa sikuzote.

Kuelewa vizuri jambo hili kutawasaidia kuipata Baraka hii ninyi wenyewe, na kuwawezesha kuwaeleza wengine.

Katika barua yangu iliyopita, nilinena juu ya Usafi kwa jumla; katika hii, nataka kusema neno juu ya jambo hili katika matumizi yake kwenu. Bwana wetu mpendwa alimaanisha nini aliponena juu ya walio “Safi wa Moyo,” na kuwaita heri? Ni nini kuwa na Moyo Safi? Ili kulijibu swali hilo, sharti nianze kwa kuuliza jingine: Moyo maana yake nini? Nalijibu swali hilo hivi: hatumaanishi kile kiungo mkihisicho kikipiga kifuani mwenu, ambacho ndicho nguvu kuu ya mfumo wa mwili. Hicho ni sehemu ya maana sana ya mtu, na kukitunza katika hali njema ni jambo la lazima kabisa.

Lakini si moyo ulio katika mwili wenu ambao Yesu Kristo aliunena katika fungu hili, nami nataka kuwaambia habari zake, bali ile nguvu ambayo, kwa kuwa ndiyo nguvu kuu ya roho yenu, yaweza kusemwa kuwa yaufanana nao. Kama vile moyo upigao kifuani mwenu ulivyo nguvu kuu iendeshayo mtu wa asili, vivyo hivyo moyo tuunenao ndio nguvu kuu iendeshayo Mtu wa Kiroho.

(a) Kwa maana hii, ni Moyo wenu uhisio furaha au huzuni. Msemapo, “Mwanamke yule maskini alikufa kwa moyo uliovunjika kwa sababu ya kutendwa vibaya na mumewe,” mwamaanisha kwamba ni uchungu mkali wa roho yake uliomwua.

(b) Ni Moyo uchaguao kati ya mema na mabaya. Msemapo, “Moyo wa ndugu yangu uko upande wa Mungu, na wema, na kweli,” mwamaanisha kwamba mambo hayo ndiyo uchaguzi mkuu wa roho yake.

(c) Ni Moyo uamuao njia ya mwenendo itakayofuatwa. Msemapo, “Kijana huyu alikwenda kwenye Kiti cha Rehema akampa Mungu moyo wake,” mwamaanisha kwamba aliazimu, katika roho yake ya ndani kabisa, kuupokea Wokovu na kuwa Askari wa Kristo.

(d) Ni Moyo uipendao haki na kuuchukia uovu. Mungu asemapo, “Mwanangu, nipe moyo wako, humaanisha “Njoo, kijana mume au mwanamwali, unipende Mimi na utakatifu, na Roho za watu, na kumchukia Ibilisi na Dhambi, kwa nguvu zote ulizo nazo.”

(e) Ni Moyo uiumbao tabia, uongozao uchaguzi, na kutawala mwendo wote na mwenendo wa maisha ya mtu. Moyo ndiye nahodha wa merikebu. Ndio uamuao kama mtu ataipokea rehema, atamtumikia Mungu, ataifuata haki, ataishi kwa ajili ya Wokovu wa wenzake, na mwishowe kuingia katika Bandari ya Mbinguni kwa shangwe, au kama ataishi maisha ya uasi, atakufa katika dhambi zake, na kuishia kuwa mvunjiko juu ya miamba ya kukata tamaa milele. Jinsi lilivyo jambo la maana kwa kila mmoja wetu kuwa na moyo mwema, mnyofu, safi.

Basi, kwa kuwa Moyo ndio bwana wa mtu kabisa namna hii, hakuna jambo liwezalo kuwa wazi zaidi, sivyo, wenzangu, kuliko ulazima wa Moyo huo kuwa safi? Lakini Moyo Safi ni nini?

Ni nini kuwa na Moyo uliotakaswa kwa Nguvu ya Roho Mtakatifu kwa njia ya Damu ya Yesu Kristo? Hilo ni ulizo la maana sana, nami nataraji sana kwamba askari wangu wapendwa watanisikiliza kwa uangalifu ninapojitahidi kulijibu.

1. Kwanza, Moyo Safi si Moyo usiojaribiwa kamwe kutenda maovu. Yamkini hakuna kitu kama hicho ulimwenguni humu, wala hakikuwapo kamwe, yaani Moyo Usiojaribiwa, maana yake mtu mume au mwanamke ambaye hakupatwa kamwe na jaribu la kutenda dhambi, la namna hii au ile. Si kwamba Bwana wetu Mbarikiwa alijaribiwa na Ibilisi nyikani tu, bali alizungukwa na mivuto miovu maisha yake yote. Mtume Paulo atuambia waziwazi kwamba Mwokozi wetu alijaribiwa katika mambo yote kama sisi, lakini haleluya! Aliushinda ulimwengu, na mwili, na ibilisi, akapita katika jaribu lile kali bila doa. Alishinda yote, kwa maana Mtume atuhakikishia kwa shangwe kwamba “alikuwa hana dhambi.”

Mtajaribiwa, wenzangu, safari yenu yote ya duniani, hata malangoni mwa Mbingu penyewe; lakini, ashukuriwe Mungu, jaribu si dhambi, na Neema, Neema tele, imewekwa tayari kuwawezesha kuvishinda vivutio vyote vya dunia na hila zote za jehanum. Mwaweza kutoka mkiwa zaidi ya washindi. Lakini kumbukeni, ijapokuwa mwaweza kuwa na Moyo Safi, itawapasa kupigana na jaribu.

2. Moyo Safi si Moyo usioweza kuteswa. Bila shaka yoyote, Yesu Kristo alikuwa na Moyo Safi; alikuwa Mtakatifu, asiye na uchafu, na hata hivyo alikuwa “Mtu wa Huzuni.” Paulo atuambia kwamba ijapokuwa alijizoeza kuwa na dhamiri isiyo na hatia mbele za Mungu na mbele za wanadamu sikuzote, hata hivyo hakuepushwa na kuwa, nyakati nyingine, “katika huzuni kwa majaribu ya namna nyingi.”

Watakatifu wote wa zamani walikuwa na saa za giza na za kuinama, wengi wao wakipita katika bahari za uchungu. Na kama ilivyokuwa kwa Watakatifu wa zamani, ndivyo ilivyo kwa Watakatifu wa siku hizi. Si dhambi kulia na kuinamishwa, ikiwa katika dhiki yetu hatujitii katika kutokuamini na kukata tamaa na kutenda mabaya. Jipeni moyo, ndugu wanaume kwa wanawake! “Mkizungukwa na gharika na miali ya moto,” sharti “mwendelee na njia yenu.” Mkidumu kuamini hamtatahayarika, Mungu atawaokoa.

3. Kwa Moyo Safi hatumaanishi Moyo usioweza kutenda dhambi. Ibilisi alikuwa hapo kwanza kiumbe kizuri kisicho na dhambi. Lakini alijitia chini ya jaribu. Ile taji isiyo na dhambi ilianguka kutoka paji lake zuri la uso, na kutoka kuwa malaika mkuu aliye safi, alibadilika kuwa pepo mchafu, akatupwa kutoka Mbingu yake yenye nuru isiyo na dhambi mpaka jehanum yake yenye giza na huzuni. Adamu alikuwa safi alipotoka mikononi mwa Muumba wake. Mungu alimtangaza kuwa mwema, lakini kwa kupotoshwa na Shetani aliupoteza Usafi wake, akatupwa nje ya Edeni akaingia katika ulimwengu wa dhambi na huzuni na mauti.

Tunayo huzuni isiyoneneka ya kuwaona mara nyingi mno Watakatifu na Askari wakianguka kutoka katika Utakatifu na kuingia dhambini. Baadhi ya wale Warudi-nyuma wengi wa kusikitisha wanaotuzunguka hapo kwanza walikwenda na Mungu kwa ukaribu, wakazitunza nguo zao zisitiwe mawaa na dunia, wakawa vielelezo vya yote yaliyo safi na mema. Lakini wamerudi kwenye mafundisho ya kwanza manyonge ya dunia, na, kama nguruwe mke aliyeoshwa, wanagaa-gaa tena matopeni. Basi, wenzangu, mtaona kwamba, hata mwe safi kiasi gani, itawezekana kwenu kutenda dhambi. Ijapokuwa mwazifua nguo zenu kuwa nyeupe, na kwa kitambo mwaenenda na Mungu katika ushirika mtakatifu, na kuwa na imani hata mwaweza kuihamisha milima na kuokoa makutano, sharti mkumbuke kwamba mngali katika maisha haya, mwaweza kuanguka na kutoka katika Neema.

Sharti mkumbuke kwamba msipojiangalia nafsi zenu, na kukesha na kuomba, yaelekea mtapatwa na dhambi fulani iwazingayo kwa upesi, na, baada ya kuwaokoa wengine, ninyi wenyewe mtakuwa watu wa kukataliwa. Kwa hiyo, “Anayejidhania kuwa amesimama na aangalie asianguke.”

4. Kwa Moyo Safi hatumaanishi hali yoyote ya Usafi, ijapokuwa imebarikiwa namna gani, isiyoweza kuongezeka katika furaha, na kufaa, na nguvu. Ondoa magugu katika bustani yako, na maua, na mimea na miti itakua upesi zaidi, itasitawi zaidi tele, na kuzaa matunda zaidi.

Dakika hii hii, mwacheni Yesu Kristo aisafishe bustani ya roho zenu na husuda na kiburi, na kuiondoa mimea yenye sumu ya nia mbaya na choyo, na kila kitu kingine kiovu, na hapo imani, amani, tumaini, upendo, unyenyekevu, ujasiri, na maua mengine yote mazuri ya Paradiso yatasitawi kwa uzuri wa kupendeza zaidi na kuzaa tele zaidi.

Lo, je, hamtainama sasa mbele za Mungu, na kujitoa kabisa mikononi mwa Mwokozi wenu wa thamani? Anangoja kuwatakasa. Tupeni nje yote yazuiayo. Ni Mungu autakasaye Moyo. Je, mtamwacha aifanye kazi hiyo? Sasa lieni kwa Imani: “Hasira na uvivu, tamaa na kiburi, Vitiishwe dakika hii; Vitupwe katika wimbi jekundu La Damu ya Mkombozi wangu.”

Lakini sharti mwendelee mbele kidogo, Wenzangu, na, kwa ujasiri na kwa kuamini, kuimba ule wimbo wa ushindi: 'Imekwisha kufanyika, uniokoe dakika hii, unibariki kwa Wokovu kamili; Ukombozi kwa Damu yako ninao, na upendo usio na mawaa, na amani.”

“Njoo, Roho Mtakatifu, Moto Mtakatifu wote, njoo, yajaze mahekalu yako ya duniani sasa; yaliyofanywa matupu ya kila tamaa mbaya, Tawala ndani, na Wewe peke yako. “Haki yako ya enzi, dai lako la neema, juu ya kila wazo na kila nguvu; maisha yetu kulitukuza jina lako, Twajitoa kwako katika saa hii takatifu. “Jaza kila chumba cha roho; Yajaze mawazo yetu yote, zijaze shauku zetu, Hata chini ya utawala wako mkuu tuisalimishe nia yetu kwa furaha. 'Imekwisha kufanyika! Njoo dakika hii, roho yangu yenye shauku ni yako yote; Moyo wangu ni makao yako ya kudumu. Tangu sasa, naishi kwa ajili yako peke yako.”