Usafi Maana Yake Ni Ukombozi

Luka 1:74-75 yasema, “Ya kwamba -- atatujalia sisi, kwamba sisi... tumtumikie yeye pasipo hofu, kwa utakatifu na kwa haki mbele zake, siku zetu zote.”

Wenzangu Wapendwa, nataraji sitawachosha kwa kuirudia tena mara nyingine habari ya moyo safi. Jambo hili ni la maana sana, si kwa Kanisa la Kikristo na Salvation Army tu, bali kwa ulimwengu wote, hata ni lazima liletwe mbele tena.

Utakatifu umekuwa baraka kubwa kwetu katika siku zilizopita, nami nina hakika utakuwa baraka kubwa zaidi katika siku zijazo. Ndiyo sababu ni lazima ukae mbele daima. Yawapasa kuiona thamani yake na kuifahamu maana yake waziwazi.

Ikiwa hamuishi katika amani, nguvu, na furaha ziletwazo na utakatifu, huenda ni kwa sababu ya kutokuelewa vizuri habari zake. Uwezo wa ibilisi wa kuwapotosha watu katika jambo hili—kama katika mengine mengi—hutegemea sana nguvu yake ya kudanganya.

Basi, nawezaje kuwasaidia mpate kufahamu vizuri zaidi maana ya usafi wa moyo?

Mtakumbuka kwamba katika barua yangu iliyopita, nilieleza yale tusiyoyamaanisha. Moyo safi haumaanishi kwamba mtu hawezi kujaribiwa wala kwamba hatateseka kamwe. Wala haumaanishi kwamba mtu aliyetakaswa kutoka katika uchafu hawezi tena kutenda dhambi, au kwamba amefika mahali pasipo na kuendelea zaidi katika imani, tumaini, upendo, na neema za Roho Mtakatifu.

Basi, moyo safi ni nini?

Moyo safi umetakaswa na Roho Mtakatifu kutoka katika dhambi yote, nao waweza kumpendeza Mungu katika yote uyatendayo, kumpenda yeye kwa ukamilifu, na kuwapenda wengine kama nafsi yake. Palipo hivyo, yaweza kusemwa kwa haki kwamba Mungu ameufanya moyo huo kuwa safi, kama yeye alivyo safi.

Lakini wengine waweza kuuliza, Je, Mungu hafanyi jambo hili wakati wa kuongoka? Je, hamfanyi mtu kuwa mtakatifu kabisa saa ile ile amsameheapo dhambi zake?

Jibu langu ni la. Ijapokuwa kazi kubwa hufanyika wakati wa kuongoka, ukombozi kamili kutoka katika dhambi hautukii wote mara moja. Mungu huivunja nguvu ya dhambi juu ya mtu, lakini kuondolewa kwa dhambi kutoka moyoni na maishani hakujakamilika bado.

Acheni nilieleze jambo hili kwa kuzieleza hali tatu za roho kwa habari ya dhambi: 1. Kabla ya kuongoka, dhambi ndiyo bwana wa roho. Tamaa fulani, mazoea, au shauku ya ubinafsi humtawala mtu na kuyaongoza matendo yake. Maana yake nini? Maana yake ni kwamba mtu huyo yumo katika utumwa.

Waweza kuona kwamba dhambi ni mbaya. Waweza kuichukia, kushindana nayo, na kuazimia kuiacha, lakini hujikuta wakitenda yale wasiyoyataka kuyatenda, na kushindwa kuyatenda yale wayatakayo.

Hii ndiyo hali ya kila mtu asiyeongoka aufahamuye uzito wa dhambi. Kwa wengine, dhambi itawalayo yaweza kuwa dhahiri, kama vile ulevi, tamaa mbaya, udanganyifu, au kamari. Kwa wengine, yaweza kuwa iliyofichika zaidi, kama vile kiburi, tamaa ya makuu, ubinafsi, au kutokuamini. Lakini katika kila hali, dhambi ndiyo itawalayo.

2. Mtu aokolewapo, hapokei msamaha tu bali pia uhuru kutoka katika utawala wa dhambi.

Minyororo imevunjwa. Milango ya gereza imefunguliwa. Wako huru. Badala ya kutawaliwa na dhambi, sasa wana nguvu juu yake. Badala ya kusukumwa kuelekea uharibifu, wako huru kumfuata Mungu na kuenenda katika mapenzi yake. Lakini, ingawa badiliko hili ni kubwa, bado halijakamilika. Ingawa dhambi haitawali tena, mielekeo yake ingalipo. Mizizi hii ya ndani, ile Maandiko yaiitayo “mizizi ya uchungu” huendelea kuleta vita.

Kadiri wakati upitavyo, mapigano haya ya ndani yaweza kumwingiza mtu katika kutenda dhambi na kutubu, tena na tena.

3. Ndipo ijapo hatua ya tatu. Ikiwa imechoka kwa vita, ikihuzunishwa na kiburi, hasira, wivu, na ubinafsi ungalimo ndani, roho hulia kwa ajili ya uhuru kamili: “Je, hakuna ponyo kamili?

Je, siwezi kamwe kuwa huru mbali na vita hivi vya ndani?”

Kwa kilio hiki, Mungu hujibu kwa ahadi: “Nitawatakasa… Nitawapa moyo mpya… Nitatia Roho yangu ndani yenu…” Ndipo roho huamini. Roho Mtakatifu huja kwa nguvu. Na hatua hii ya tatu hufikiwa: uhuru kutoka katika dhambi yote.

Hali Tatu kwa Muhtasari Ɣ Katika hatua ya kwanza, roho i chini ya dhambi Ɣ Katika hatua ya pili, roho i juu ya dhambi Ɣ Katika hatua ya tatu, roho iko huru mbali na dhambi Basi nawauliza, wenzangu—mko katika hatua ipi?

Jichunguzeni wenyewe. Je, mmepokea moyo safi?

Wengine wenu mwaweza kusema kwa hakika kwamba Mungu amewatakasa kabisa—kwamba huilinda roho yenu yote, na nafsi, na mwili katika usafi, naye ataendelea kufanya hivyo. Mpeni yeye utukufu wote. Enendeni katika nuru yake, mkakae katika ushirika pamoja naye.

Lakini kwa wale wajuao kwamba hawajapata moyo safi bado, nawauliza: Je, mtaupokea sasa?

Mungu yu tayari kuwatakasa. Ni nini kinachowazuia?

Wakati ni sasa. Salimisheni vyote kwake, mkaje mbele zake kwa imani.