Usafi: Ni Nini

Mathayo 5:8 yasema, “Heri walio safi wa moyo, maana hao watamwona Mungu.”

Wapendwa Wenzangu, Sisi Salvationists sikuzote twaimba au kuomba au kunena juu ya Moyo Safi. Kweli, ziko habari chache tunazozinena mara nyingi zaidi, au tunazoona fahari ndani yake kwa kweli zaidi. Baadhi ya nyimbo zetu zilizo nzuri kuliko zote na zenye kuchochea moyo ni juu ya jambo hili. Labda hakuna wimbo tuimbao mara nyingi zaidi kuliko ule uanzao, “Ee, nipate moyo wa kumsifu Mungu wangu!

Moyo uliowekwa huru na dhambi!

Moyo uihisio sikuzote ile Damu, Iliyomwagwa kwa ukarimu kwa ajili yangu! “ Je, hilo si zuri? Lakini waendelea vizuri zaidi -- “Moyo uliofanywa upya katika kila wazo, Uliojaa Upendo wa Uungu; Mkamilifu na mnyofu, safi na mwema, Nakala, Bwana, ya moyo wako!”

Lakini, ijapokuwa nguvu ya nyimbo hizo za kuchochea mioyo yetu ni kubwa, labda hakuna kitu kimfurahishacho Salvationist wa kweli kuliko shuhuda za wazi za wale waishio katika kuifurahia Baraka hii, au maombi ya bidii ya kuomba itolewe, au maonyo ya moto kwa Wenzetu ili wajipatie Lulu hii ya Thamani Kubwa, isikiwayo mara nyingi katika safu zetu.

Lakini wengi wa Askari wetu hawaionji kwa hakika wala kuungama waziwazi kuifurahia Baraka hii; nami nimekuwa nikifikiri ya kwamba, labda, ni kwa sababu jambo hili halijaeleweka vizuri kama ipasavyo. Basi, nakusudia kujaribu kulieleza katika Barua chache, ambazo nataraji Wenzangu watazifikiri kwa uangalifu.

Basi, tafadhali kumbukeni kwamba jambo langu ni “Usafi wa Moyo.” Nataka kueleza maana yetu tusemapo Moyo Safi; kuonyesha jinsi mwezavyo kuipata hazina hii ya thamani, kama hamnayo bado; na jinsi mwezavyo kuilinda Baraka hii mkiisha kuipata. Nitaanza kwa kusema: Sisi sote twajua maana ya kuwa Safi. Tusemapo juu ya usafi wa vitu vinavyotuzunguka, twamaanisha kwamba ni safi na havikughoshiwa. Si kwamba havina uchafu au unajisi tu, bali havikuchanganywa na kitu duni chochote.

Tusemapo kwamba mtu ni safi, kwa maana ya dini, twamaanisha kwamba ni mnyofu na mwaminifu na wa kweli ndani na nje; kwamba haungami tu, bali huyatenda mambo yahusuyo wajibu wake kwa Mungu na kwa wanadamu.

Dhambi hunenwa katika Biblia kuwa ni uchafu au unajisi wa mwili, wa akili, au wa roho. Basi Usafi katika dini lazima umaanishe kutokuwapo kwa machafu kama vile ulevi, ulafi, udanganyifu, hila, uongo, kiburi, nia mbaya, hasira kali, choyo, kutokuamini, kuasi, au mfano wa hayo.

Kwa ufupi, kuwa safi rohoni humaanisha kuokolewa na yote na kila kitu ambacho Bwana akuonyesha kuwa kinapingana na Mapenzi yake Matakatifu. Humaanisha kwamba si kwamba unao uwezo tu wa kuishi maisha ya namna ile ayatakayo, bali kwamba kweli unayaishi.

Basi Usafi, sina haja ya kuwaambia, Wenzangu, husifiwa sana na kutamaniwa sana na wote wenye nia njema. Kwanza: Sisi sote twapenda usafi wa vitu; kwa mfano, nina hakika kwamba kila mtu asomaye barua hii hupendelea kuwa na mwili safi. Uamkapo asubuhi, hupati raha hata umekwisha kujiosha. Wachimba-madini watokapo shimoni, au wakulima kutoka shambani, au wasichana kutoka kiwandani, haja yao ya kwanza ni maji ya kujisafisha.

Wapenda nguo safi na kitani safi, sivyo? Fikirini fedha na kazi zitumiwazo katika kuzitunza nguo zenu ziwe safi. Wapenda nyumba safi. Tazama jinsi mama wa nyumbani asuguavyo na kuosha na kufagia na kupangusa ili sakafu na madirisha, na samani, vikae safi.

Wapenda mji safi. Ni kazi kubwa na ya gharama nyingi kufagia njia kuu na kuchukua takataka; na fedha nyingi hutumika katika kutengeneza na kusafisha mifereji ya maji machafu ili miji yetu midogo na mikubwa ikae tamu na safi. Twapenda usafi wa namna hii kwa sababu wapendeza macho na wafaa kwa afya. Twajua kwamba uchafu wachukiza hisi, huzalisha wadudu waharibifu, huleta kipindupindu, tauni, na magonjwa ya kila namna, na kuwahimiza watu kaburini. Basi, twauchukia na kusema, “Uondolewe; na tuwe safi!”

Lakini wote wenye nia njema huusifu usafi wa roho zaidi sana kuliko usafi wa mwili, au wa nguo, au wa nyumba, au wa kitu kingine chochote; na hivyo ni kwa sababu ni wa maana zaidi sana.

Kwa mfano: (a) Mungu apenda Usafi wa Roho. Ndiyo asili yake kufanya hivyo. Sina shaka, kama sisi, yeye hupendelea kuwaona watoto wake wakiwa safi kwa nje. Hutuambia, kwa kinywa cha Mtume Paulo, kwamba miili yetu yapasa kuoshwa kwa maji safi, lakini kuoshwa kwa moyo kwatamaniwa naye zaidi sana kuliko kuoshwa kwa mwili.

“Watakatifu wake ni wazuri machoni pake, Huwatazama watoto wake kwa furaha; Huliona tumaini lao, aijua hofu yao, Hutazama, na kuipenda sura yake iliyo ndani yao.”

Naam, Mungu hufurahia Utakatifu. Mbingu, makao yake, ni safi. Wenyeji wake ni safi. Kazi zake, na furaha zake, na ibada yake, vyote vilevile ni safi.

(b) Malaika hupenda Usafi. Kama kiumbe kisicho kitakatifu kingeweza, kwa njia yoyote, kuingizwa katika Mji wa Mbinguni, nina hakika wenyeji wake wangekiepuka kiumbe hicho, kama vile tumwepukavyo mtu mwenye ugonjwa wa kutisha.

(c) Mashetani wajua kwamba Usafi ni kitu cha thamani, ijapokuwa wanauchukia na kuupinga kwa nguvu zao zote.

(d) Watu wengi waovu huusifu Usafi. Huuona kuwa ni mzuri na wa kutamanika kwa wengine, ijapokuwa wauhesabu kuwa hauwezekani kwao wenyewe. Katika saa zao za kufikiri, Roho wa Mungu ashindanapo nao, kumbukumbu za siku za zamani zisizo na hatia zijaapo katika fikira zao, nao wawaonapo watu wawajuao kuwa ni safi na wema, hujichukia wenyewe kwa sababu ya uchafu wao, ingawa wakati wote wanakataa kujitia chini ya Mungu, na kuukubali Wokovu ambao ungewafanya kuwa safi.

(e) Roho zilizopotea katika Jehanum zahisi jinsi Utakatifu ulivyo bora bila kiasi kuliko Uovu. Sasa zaona jinsi ingalikuwa heri kwao kama wangaliiosha mioyo yao katika Damu ya Mwana-Kondoo walipokuwa na nafasi ya kufanya hivyo. Lo, ni nini ambacho hawangalikitoa ili kupata nafasi kama hizo mzifurahiazo ninyi!

Je, mnaupenda Usafi, rafiki zangu? Labda mnao. Labda mmekwisha kumwendea Yesu kwa ajili ya Nguvu itakasayo, mmejilaza miguuni pake, mmeyaacha mambo yenu ya mashaka, mmejitoa kufanya Mapenzi yake, mkiishi au mkifa, na kuamini kwamba Damu ya Yesu Kristo imewatakasa.

Lo, kama jambo hilo limekuwa lenu, heri ninyi, na heri zaidi kama mnaenenda katika nguvu na amani ya jambo hilo leo. Ikiwa ni hivyo, nawapa hongera; nawafurahia, na kumsifu Mungu kwa ajili yenu.

Lakini kama Baraka hii si yenu, je, mnaitamani? Je, wazo lake lajaza roho zenu shauku? Je, lawafanya kujisikia kama yule mtunga-mashairi, alipoimba: “Ee tumaini tukufu la upendo mkamilifu!

Laniinua hata mambo ya juu, Lanichukua kwa mbawa za tai; Laipa roho yangu iliyofurahishwa ladha, Na kunifanya kwa dakika chache kula karamu Pamoja na makuhani na wafalme wa Yesu.”

Rafiki zangu, furaha yenu na uvutano wenu vyote vinaungana na kufanywa kwenu watakatifu. Lo, nawasihi sasa mpige magoti hapa na kumwomba Mungu amfanye kila mmoja wenu kuwa safi, kwa Nguvu ya Roho Mtakatifu, kwa njia ya Damu ya Mwana-Kondoo.