Anza Siku kwa Maombi

Imenipasa kuomba kabla ya kuonana na mtu ye yote. Mara nyingi ninapolala muda mrefu, au kukutana na wengine mapema, huwa ni saa kumi na moja au saa kumi na mbili kabla sijaanza maombi ya faragha. Huu ni utaratibu mbovu. Haupatani na Maandiko. Kristo aliondoka kabla ya mapambazuko akaenda mahali pasipo na watu. Daudi asema: “Nitakutafuta mapema”; “Asubuhi utaisikia sauti yangu.” Maombi ya jamaa hupoteza sehemu kubwa ya nguvu na utamu wake, wala siwezi kuwafaa lo lote wale wanaokuja kunitafuta. Dhamiri huhisi hatia, nafsi haijalishwa, taa haijatengenezwa. Kisha, katika maombi ya faragha, nafsi mara nyingi haipatani, nahisi ni afadhali sana kuanza na Mungu—kuuona uso wake kwanza, kuileta nafsi yangu karibu naye kabla haijawa karibu na mwingine.—Robert Murray McCheyne

WATU walioyafanya mengi zaidi kwa ajili ya Mungu katika ulimwengu huu wamekuwa mapema magotini. Yeye anayeupoteza wakati wa asubuhi na mapema, nafasi yake na uchangamfu wake, katika shughuli nyingine badala ya kumtafuta Mungu, atapata maendeleo hafifu katika kumtafuta muda wote wa siku uliobaki. Kama Mungu si wa kwanza katika mawazo yetu na jitihada zetu asubuhi, atakuwa mahali pa mwisho katika sehemu iliyobaki ya siku.

Nyuma ya kuamka mapema huku na kuomba mapema kuna shauku yenye moto ituzukayo katika kumfuatia Mungu. Ulegevu wa asubuhi ni kielelezo cha moyo ulegeavyo. Moyo uliochelewa kumtafuta Mungu asubuhi umepoteza ladha yake kwa Mungu. Moyo wa Daudi ulikuwa na moto kwa Mungu. Aliuona njaa na kiu kwa Mungu, na hivyo akamtafuta Mungu mapema, kabla ya mapambazuko. Kitanda na usingizi havikuweza kuifunga nafsi yake katika hamu yake kwa Mungu. Kristo alitamani sana ushirika na Mungu; na hivyo, akiondoka kabla sana ya kucha, akaenda mlimani kuomba. Wanafunzi, walipoamka kabisa na kuiona aibu ya kujifurahisha kwao, wangejua mahali pa kumpata. Twaweza kupitia orodha ya watu walioushtua ulimwengu kwa nguvu kwa ajili ya Mungu, nasi tungewakuta wamemfuata Mungu mapema.

Shauku kwa Mungu isiyoweza kuvunja minyororo ya usingizi ni kitu dhaifu, na itamfaidia Mungu kidogo tu baada ya kujifurahisha kikamili. Shauku kwa Mungu ibakiayo nyuma sana ya ibilisi na ulimwengu mwanzoni mwa siku haitawahi kupata kuwafikia.

Si kuamka tu kunakowaweka watu mbele na kuwafanya majemadari wakuu katika majeshi ya Mungu, bali ni shauku yenye moto isukumayo na kuvunja minyororo yote ya kujifurahisha. Lakini kule kuamka huipa shauku mahali pa kutokea, kuiongeza, na kuitia nguvu. Kama wangelilala kitandani na kujifurahisha, shauku ingaliizimwa. Shauku iliwaamsha na kuwaweka katika kujinyosha kwa ajili ya Mungu, na kule kuutii na kuufuata wito huu kukaipa imani yao mshiko wake juu ya Mungu, na kukaipa mioyo yao ufunuo wa Mungu ulio mtamu na uliojaa zaidi, na nguvu hii ya imani na utimilifu huu wa ufunuo ukawafanya kuwa watakatifu wa daraja la juu, na fahari ya utakatifu wao imetushukia sisi, nasi tumeingia katika kuyafurahia mashindi yao. Lakini sisi twajishibisha katika kufurahia, wala si katika kuzaa matunda. Twajenga makaburi yao na kuandika maandishi ya makaburi yao, lakini twaangalia tusiifuate mifano yao.

Twahitaji kizazi cha wahubiri wamtafutao Mungu na kumtafuta mapema, watoao uchangamfu na umande wa jitihada kwa Mungu, na kupata kwa malipo uchangamfu na utimilifu wa nguvu zake, ili awe kwao kama umande, aliyejaa furaha na nguvu, katika joto lote na kazi yote ya siku. Uvivu wetu kumfuata Mungu ndiyo dhambi yetu iliayo. Wana wa ulimwengu huu wana hekima kutuliko sisi mno. Wako kazini mapema na hata usiku. Sisi hatumtafuti Mungu kwa moto na kwa bidii. Hakuna mtu ampataye Mungu asiyemfuatia kwa nguvu, wala hakuna nafsi imfuatiayo Mungu kwa nguvu isiyomfuata asubuhi na mapema.