Maombi na Ujitoaji Vimeungana

Kuna upungufu ulio dhahiri wa uvutano wa kiroho juu ya huduma ya siku hizi. Nauhisi katika hali yangu mwenyewe, nami nauona katika hali ya wengine. Naogopa kwamba kuna wingi mno wa roho ya chini, ya ujanja, ya hila, na ya werevu miongoni mwetu. Twajitahidi kupita kiasi kilichofaa ili kuridhisha ladha ya mtu huyu na chuki za mtu yule. Huduma ni jambo kuu na takatifu, nayo yapaswa kukuta ndani yetu tabia sahili ya roho, na kutojali kutakatifu lakini kwa unyenyekevu kwa matokeo yote. Kasoro kuu katika wahudumu wa Kikristo ni kukosa mazoea ya ujitoaji.—Richard Cecil

KAMWE haikuwapo haja kubwa zaidi ya wanaume na wanawake watakatifu; na wito wenye kulazimu zaidi ni ule wa wahubiri watakatifu, waliojitoa kwa Mungu. Ulimwengu wasonga kwa hatua kubwa mno. Shetani ana mtego na utawala wake juu ya ulimwengu, naye afanya kazi ili mienendo yake yote iyatumikie makusudi yake. Dini lazima ifanye kazi yake iliyo bora, ionyeshe vielelezo vyake vinavyovutia na vilivyo kamili zaidi. Kwa kila njia, utakatifu wa siku hizi lazima uvuviwe na maadili yaliyo bora zaidi na kwa uwezekano ulio mkubwa zaidi kwa njia ya Roho. Paulo aliishi magotini pake, ili Kanisa la Efeso lipate kupima kimo, na upana, na kina vya utakatifu usiopimika, na “kutimilika kwa utimilifu wote wa Mungu.” Epafra alijibidiisha kwa taabu iliyochosha na mapambano makali ya maombi yenye moto, ili Kanisa la Kolosai lipate “kusimama likiwa kamili na limejaa katika mapenzi yote ya Mungu.” Kila mahali, kila kitu katika nyakati za mitume kilikuwa katika kujinyosha ili watu wa Mungu, kila mmoja na wote, “waufikie umoja wa imani, na kumfahamu sana Mwana wa Mungu, hata kuwa mtu mkamilifu, hata kufikia kipimo cha kimo cha utimilifu wa Kristo.” Hakukutolewa fadhili kwa vibeti; wala kutiwa moyo kwa utoto wa kudumu. Watoto wachanga walipaswa kukua; wazee, badala ya udhaifu na hali za kunyong’onyea, walipaswa kuzaa matunda katika uzee, na kuwa wanono na wenye kusitawi. Kitu kilicho cha Kimungu zaidi katika dini ni watu watakatifu, wanaume na wanawake watakatifu.

Wingi wo wote wa fedha, kipaji, au utamaduni hauwezi kuyasogeza mambo kwa ajili ya Mungu. Utakatifu uitiao nguvu nafsi, mtu mzima akiwaka moto kwa upendo, kwa shauku ya imani zaidi, maombi zaidi, juhudi zaidi, kujiweka wakfu zaidi—hii ndiyo siri ya nguvu. Haya twayahitaji na lazima tuwe nayo, nao watu lazima wawe mwili hai wa ujitoaji huu uwakao moto kwa Mungu. Maendeleo ya Mungu yamezuiwa, kusudi lake limelemazwa, jina lake limevunjiwa heshima kwa kukosa kwao haya. Kipaji (ijapokuwa kilicho bora na chenye vipawa vingi zaidi), elimu (ijapokuwa iliyo na maarifa na ustaarabu zaidi), cheo, hadhi, nafasi, majina yenye heshima, wakubwa wa dini hawawezi kulisogeza gari hili la Mungu wetu. Ni gari la moto, na nguvu za moto peke yake ndizo ziwezazo kulisogeza. Kipaji cha Milton chashindwa. Nguvu za kifalme za Leo zashindwa. Roho ya Brainerd yaweza kulisogeza. Roho ya Brainerd ilikuwa ikiwaka moto kwa Mungu, ikiwaka moto kwa ajili ya nafsi za watu. Hakuna kitu cha kidunia, cha kilimwengu, wala cha ubinafsi kilichoingia kupunguza hata kidogo ukali wa nguvu hii na mwali huu usukumao vyote na uteketezao vyote.

Maombi ni muumba na pia mfereji wa ujitoaji. Roho ya ujitoaji ni roho ya maombi. Maombi na ujitoaji vimeunganishwa kama nafsi na mwili vilivyounganishwa, kama uzima na moyo vilivyounganishwa. Hakuna maombi ya kweli pasipo ujitoaji, wala hakuna ujitoaji pasipo maombi. Mhubiri lazima awe amejisalimisha kwa Mungu katika ujitoaji ulio mtakatifu zaidi. Yeye si mtu wa kazi ya ujira, huduma yake si taaluma; ni taasisi ya Kimungu, ujitoaji wa Kimungu. Amejitoa kwa Mungu. Lengo lake, matarajio yake, tamaa yake ni kwa ajili ya Mungu na kwa Mungu, na kwa mtu wa namna hiyo maombi ni ya lazima kama chakula kilivyo cha lazima kwa uzima.

Mhubiri, zaidi ya kila kitu kingine, lazima awe amejitoa kwa Mungu. Uhusiano wa mhubiri na Mungu ndio nembo na hati za huduma yake. Hizi lazima ziwe wazi, za uhakika, zisizokosewa. Utauwa wa kawaida, wa juujuu tu, usiwe wake. Kama hafanyi vyema katika neema, hafanyi vyema kamwe. Kama hahubiri kwa maisha, tabia, na mwenendo, hahubiri kamwe. Kama utauwa wake ni hafifu, kuhubiri kwake kwaweza kuwa laini na kutamu kama muziki, kwenye kipaji kama Apolo, lakini uzito wake utakuwa uzito wa unyoya, wa njozi tu, upitao kama wingu la asubuhi au umande wa mapema. Ujitoaji kwa Mungu—hakuna badala yake katika tabia na mwenendo wa mhubiri. Ujitoaji kwa Kanisa, kwa maoni, kwa shirika, kwa usahihi wa mafundisho—haya ni duni, yenye kupotosha, na ya bure yanapokuwa chanzo cha uvuvio, chachu ya wito. Mungu lazima awe chemchemi ya jitihada ya mhubiri, kisima na taji ya kazi yake yote. Jina na heshima ya Yesu Kristo, na maendeleo ya kusudi lake, lazima viwe vyote katika vyote. Mhubiri asiwe na uvuvio ila jina la Yesu Kristo, wala tamaa ila kwamba yeye atukuzwe, wala taabu ila kwa ajili yake. Ndipo maombi yatakuwa chanzo cha mianga yake, njia ya kuendelea daima, na kipimo cha mafanikio yake. Lengo la daima, tamaa pekee, awezayo mhubiri kuithamini ni kuwa na Mungu pamoja naye.

Kamwe kusudi la Mungu halikuhitaji vielelezo vilivyo kamili vya uwezekano wa maombi kuliko katika zama hizi. Hakuna zama, wala mtu, atakayekuwa kielelezo cha nguvu ya injili ila zama au watu wa maombi ya kina na ya bidii. Zama zisizo na maombi zitakuwa na vielelezo vichache tu vya nguvu ya Kimungu. Mioyo isiyo na maombi haitawahi kupanda hata vimo hivi vya Alpu. Zama hizi zaweza kuwa bora kuliko zilizopita, lakini kuna umbali usio na kikomo kati ya kuboreka kwa zama kwa nguvu ya ustaarabu usongao mbele, na kuboreka kwake kwa kuongezeka kwa utakatifu na mfano wa Kristo kwa nguvu ya maombi. Wayahudi walikuwa bora zaidi wakati Kristo alipokuja kuliko katika zama zilizotangulia. Zilikuwa zama za dhahabu za dini yao ya Kimafarisayo. Zama zao za dhahabu za dini ndizo zilizomsulibisha Kristo. Kamwe hakukuwa na maombi mengi zaidi, kamwe hayakuwa machache zaidi; kamwe hakukuwa na dhabihu nyingi zaidi, kamwe hazikuwa chache zaidi; kamwe hakukuwa na ibada ya sanamu chache zaidi, kamwe haikuwa nyingi zaidi; kamwe hakukuwa na ibada nyingi za hekaluni zaidi, kamwe hazikupungua za kumwabudu Mungu; kamwe hakukuwa na utumishi mwingi wa midomo zaidi, kamwe haukupungua utumishi wa moyo (Mungu akiabudiwa kwa midomo ambayo mioyo yake na mikono yake ilimsulibisha Mwana wa Mungu!); kamwe hakukuwa na wahudhuriaji wengi zaidi wa kanisa, kamwe hawakupungua watakatifu.

Ni nguvu ya maombi ifanyayo watakatifu. Tabia takatifu huumbwa kwa nguvu ya kuomba kwa kweli. Kadiri ya watakatifu wa kweli wanavyozidi, ndivyo maombi yanavyozidi; kadiri ya maombi yanavyozidi, ndivyo watakatifu wa kweli wanavyozidi.