Yapasa Kutoa Muda Mwingi kwa Maombi

Mabwana wakuu na waalimu katika mafundisho ya Kikristo sikuzote wameiona katika maombi asili yao kuu kabisa ya nuru. Bila kwenda nje ya mipaka ya Kanisa la Kiingereza, imeandikwa juu ya Askofu Andrewes ya kwamba alitumia saa tano kila siku akiwa magotini. Maazimio makuu kabisa ya vitendo yaliyoyatajirisha na kuyapamba maisha ya wanadamu katika nyakati za Kikristo yamefikiwa katika maombi.—Canon Liddon

IJAPOKUWA maombi mengi ya faragha, kwa asili ya mambo, sharti yawe mafupi; ijapokuwa maombi ya hadhara, kama kanuni, yapasa kuwa mafupi na yaliyofupishwa; ijapokuwa kuna nafasi tele na thamani iwekwayo juu ya maombi ya haraka—lakini katika kuchangamana kwetu kwa faragha na Mungu, muda ni sifa iliyo ya lazima kwa thamani yake. Muda mwingi utumiwao pamoja na Mungu ndiyo siri ya kuomba kote kwenye mafanikio. Maombi yahisiwayo kama nguvu kuu ni zao la moja kwa moja au lisilo la moja kwa moja la muda mwingi utumiwao pamoja na Mungu. Maombi yetu mafupi hupata maana na ufanisi wao kutokana na yale marefu yaliyoyatangulia. Ombi fupi lishindalo haliwezi kuombwa na mtu ambaye hajashinda na Mungu katika mashindano makuu zaidi ya muda mrefu. Ushindi wa imani wa Yakobo usingaliweza kupatikana pasipo kule kushindana usiku kucha. Ujuano na Mungu haufanywi kwa kupita haraka-haraka. Mungu hawapi karama zake wale waendao na kuja ovyo au kwa haraka. Kuwa sana na Mungu peke yake ndiyo siri ya kumjua na ya kuwa na uvutano kwake. Yeye humshindia yule mwenye kudumu katika imani imjuayo. Huwapa karama zake zilizo tajiri kabisa wale watangazao shauku yao kwa karama hizo na kuzithamini kwa kudumu na vile vile kwa bidii ya kusihi kwao. Kristo, ambaye katika jambo hili na katika mambo mengine ni Kielelezo chetu, alitumia masiku mengi kucha katika maombi. Ilikuwa desturi yake kuomba sana. Alikuwa na mahali pake pa kawaida pa kuomba. Nyakati nyingi ndefu za kuomba huifanya historia yake na tabia yake. Paulo aliomba mchana na usiku. Ilimchukulia Danieli muda kutoka katika mambo ya maana sana ili aombe mara tatu kwa siku. Kuomba kwa Daudi asubuhi, na adhuhuri, na usiku bila shaka mara nyingi kulikuwa kurefu sana. Ijapokuwa hatuna habari maalum ya muda watu hawa watakatifu wa Biblia waliotumia katika maombi, lakini dalili zaonyesha ya kwamba walitumia muda mwingi katika maombi, na katika nyakati nyingine nyakati ndefu za kuomba zilikuwa desturi yao.

Hatungependa mtu ye yote adhani ya kwamba thamani ya maombi yao yapaswa kupimwa kwa saa, bali kusudi letu ni kuzikaza akili zetu juu ya ulazima wa kuwa sana peke yetu na Mungu; na ya kwamba kama sifa hii haikuzaliwa na imani yetu, basi imani yetu ni ya aina dhaifu na ya juujuu.

Watu waliomwonyesha Kristo kwa ukamilifu zaidi katika tabia zao, na waliouathiri ulimwengu kwa nguvu zaidi kwa ajili yake, wamekuwa watu waliotumia muda mwingi hivyo na Mungu hata kuufanya kuwa sifa mashuhuri ya maisha yao. Charles Simeon aliziweka wakfu kwa Mungu saa zile kuanzia saa nne hata saa nane asubuhi. Bw. Wesley alitumia saa mbili kila siku katika maombi. Alianza saa kumi alfajiri. Juu yake, mtu mmoja aliyemjua vema aliandika: “Alidhani maombi kuwa shughuli yake kuliko kitu kingine cho chote, nami nimemwona akitoka chumbani mwake cha faragha akiwa na utulivu wa uso karibu na kung’aa.” John Fletcher alizitia madoa kuta za chumba chake kwa pumzi za maombi yake. Nyakati nyingine aliomba usiku kucha; sikuzote, mara kwa mara, na kwa bidii kubwa. Maisha yake yote yalikuwa maisha ya maombi. “Nisingeinuka katika kiti changu,” alisema, “pasipo kuinua moyo wangu kwa Mungu.” Salamu yake kwa rafiki sikuzote ilikuwa: “Je, nakukuta ukiomba?” Luther alisema: “Nikikosa kutumia saa mbili katika maombi kila asubuhi, shetani hupata ushindi mchana kutwa. Nina shughuli nyingi mno hata siwezi kuendelea pasipo kutumia saa tatu kila siku katika maombi.” Alikuwa na msemo: “Aliyeomba vema amejifunza vema.”

Askofu Mkuu Leighton alikuwa peke yake na Mungu sana hata alionekana kuwa katika kutafakari kusikokoma. “Maombi na sifa ndizo zilizokuwa shughuli yake na furaha yake,” asema mwandishi wa historia yake. Askofu Ken alikuwa na Mungu sana hata nafsi yake ilisemekana kuwa imemtamani Mungu kwa mahaba. Alikuwa na Mungu kabla saa haijagonga saa tisa kila asubuhi. Askofu Asbury alisema: “Nakusudia kuamka saa kumi kila iwezekanapo na kutumia saa mbili katika maombi na kutafakari.” Samuel Rutherford, ambaye harufu nzuri ya utauwa wake ingali tele, aliamka saa tisa alfajiri ili akutane na Mungu katika maombi. Joseph Alleine aliamka saa kumi kwa shughuli yake ya kuomba hata saa mbili. Kama alisikia wafanyabiashara wengine wakifanya biashara zao kabla hajaamka, angepaza sauti: “Aa, jinsi jambo hili linavyonitahayarisha! Je, Bwana wangu hastahili zaidi kuliko wao?” Yeye aliyejifunza vema biashara hii huchota apendavyo, mara aonapo, na kwa kukubaliwa na benki ya mbinguni isiyopungukiwa.

Mmoja wa wahubiri watakatifu kabisa na wenye vipawa vingi kabisa wa Uskoti asema: “Yanipasa kutumia saa zilizo bora kabisa katika kuchangamana na Mungu. Ndiyo kazi yangu iliyo tukufu kabisa na yenye kuzaa matunda kabisa, wala haipasi kusukumizwa pembeni. Saa za asubuhi, kuanzia saa kumi na mbili hata saa mbili, ndizo zisizokatizwa kabisa nazo zapasa kutumika hivyo. Baada ya chai ndiyo saa yangu iliyo bora, nayo yapasa kuwekwa wakfu kwa Mungu kwa unyofu. Haitupasi kuiacha ile desturi njema ya zamani ya kuomba kabla ya kwenda kitandani; lakini sharti tujihadhari na usingizi. Niamkapo usiku, yanipasa kuinuka na kuomba. Muda kidogo baada ya chamshakinywa waweza kutolewa kwa maombezi.” Huu ndio uliokuwa mpango wa kuomba wa Robert McCheyne. Kile kikundi cha Kimethodisti kisichosahaulika katika kuomba kwao hututahayarisha. “Kuanzia saa kumi hata saa kumi na moja alfajiri, maombi ya faragha; kuanzia saa kumi na moja hata saa kumi na mbili jioni, maombi ya faragha.”

John Welch, mhubiri mtakatifu na wa ajabu wa Uskoti, alidhani siku imetumika vibaya kama hakutumia saa nane au kumi katika maombi. Aliweka shuka ili apate kujifunika alipoinuka kuomba usiku. Mke wake angelalamika alipomkuta amelala chini akilia. Naye angejibu: “Aa, mwanamke, ninazo nafsi za watu elfu tatu za kutoa hesabu yao, wala sijui hali ya wengi wao ilivyo!”