Maombi, Jambo Kuu la Lazima

Wajua thamani ya maombi: ni ya bei kupita bei zote. Kamwe, kamwe usiyapuuze.—Sir Thomas Buxton

Maombi ndilo jambo la kwanza, jambo la pili, jambo la tatu lililo lazima kwa mtumishi. Basi omba, ndugu yangu mpendwa: omba, omba, omba.—Edward Payson

MAOMBI, katika maisha ya mhubiri, katika chumba chake cha kujifunza, katika mimbari yake, sharti yawe nguvu ionekanayo wazi ipenyezayo yote na kiungo kitiacho rangi kila kitu. Hayana budi kutoshika nafasi ya pili, wala kuwa tabaka la juu tu. Kwake amepewa kuwa pamoja na Bwana wake “usiku kucha katika kumwomba Mungu.” Mhubiri, ili ajizoeze katika maombi ya kujikana nafsi, ana amri ya kumtazama Bwana wake, ambaye, “alfajiri na mapema sana akaondoka, akatoka akaenda zake mahali pasipokuwa na watu, akaomba huko.” Chumba cha mhubiri cha kujifunza kimepasa kuwa faragha, na Betheli, na madhabahu, na njozi, na ngazi, ili kila wazo lipae kuelekea mbinguni kabla halijaelekea kwa wanadamu; ili kila sehemu ya hotuba inukie hewa ya mbinguni na ifanywe kuwa nzito, kwa sababu Mungu alikuwamo chumbani.

Kama vile injini isivyosonga hata moto uwashwe, vivyo hivyo kuhubiri, pamoja na mitambo yake yote, na ukamilifu, na unadhifu, kunasimama pasipo tumaini, kwa habari ya matokeo ya kiroho, hata maombi yawe yamewasha na kuzua mvuke. Muundo, na ulaini, na nguvu za hotuba ni kama takataka tupu, isipokuwa msukumo mkuu wa maombi umo ndani yake, na katikati yake, na nyuma yake. Sharti mhubiri, kwa maombi, amtie Mungu ndani ya hotuba. Sharti mhubiri, kwa maombi, amsogeze Mungu kwa watu kabla hajaweza kuwasogeza watu kwa Mungu kwa maneno yake. Sharti mhubiri awe amekwisha kupata usikizi na njia iliyo wazi kwa Mungu kabla hajaweza kupata njia kwa watu. Njia iliyo wazi kwa Mungu kwa mhubiri ndiyo dhamana iliyo hakika ya njia iliyo wazi kwa watu.

Ni lazima kunena tena na tena ya kuwa maombi, yakiwa desturi tu, yakiwa kitendo kifanywacho kwa mazoea au kwa namna ya kikazi, ni kitu kilichokufa na kilichooza. Kuomba kwa namna hiyo hakuna uhusiano wo wote na kule kuomba tunakokusihi. Twasisitiza kuomba kwa kweli, kunakohusisha na kuwasha moto kila kipengele kilicho bora cha nafsi ya mhubiri—maombi yazaliwayo katika umoja hai pamoja na Kristo na katika utimilifu wa Roho Mtakatifu, yabubujikayo kutoka chemchemi za ndani, zifurikazo, za huruma laini, na shauku isiyokufa kwa faida ya milele ya mwanadamu; na juhudi iteketezayo kwa utukufu wa Mungu; na hakika kamili ya kazi ngumu na nyeti ya mhubiri, na ya uhitaji wa lazima wa msaada mkuu kabisa wa Mungu. Kuomba kulikojengwa juu ya hakika hizi nzito na za ndani ndiko kuomba kwa kweli peke yake. Kuhubiri kunakotegemezwa na kuomba kwa namna hiyo ndiko kuhubiri peke yake kunakopanda mbegu za uzima wa milele katika mioyo ya wanadamu na kuwajenga watu kwa mbinguni.

Ni kweli kwamba yaweza kuwapo kuhubiri kupendwako na watu, kuhubiri kupendezako, kuhubiri kuvutiako, kuhubiri kwenye nguvu nyingi za akili, na za usomi, na za ubongo, kukiwa na kiasi chake na sura yake ya wema, pamoja na kuomba kidogo au pasipo kuomba kabisa; lakini kuhubiri kupatikanako kusudi la Mungu katika kuhubiri hakuna budi kuzaliwa na maombi tangu andiko hata utangulizi, kukitolewa kwa nguvu na roho ya maombi, kukifuatwa na kufanywa kuota, na kuwekwa katika nguvu hai ndani ya mioyo ya wasikiaji kwa maombi ya mhubiri, muda mrefu baada ya tukio kupita.

Twaweza kuutolea udhuru umaskini wa kiroho wa kuhubiri kwetu kwa njia nyingi, lakini siri ya kweli itaonekana katika kukosa maombi ya haraka kwa uwepo wa Mungu katika nguvu za Roho Mtakatifu. Wako wahubiri wasiohesabika wawezao kutoa hotuba zilizo bora kwa jinsi yao; lakini matokeo yake ni ya muda mfupi, wala hayaingii kabisa kama sababu katika pande zile za roho ambako vita ya kutisha kati ya Mungu na Shetani, mbingu na kuzimu, inapiganwa, kwa sababu hazikufanywa kuwa za kupigana kwa nguvu na za kushinda kiroho kwa maombi.

Wahubiri wapatao matokeo makuu kwa Mungu ni watu walioshinda katika kusihi kwao na Mungu kabla ya kuthubutu kusihi na wanadamu. Wahubiri walio na nguvu kuu kabisa katika vyumba vyao vya faragha pamoja na Mungu ndio walio na nguvu kuu kabisa katika mimbari zao pamoja na wanadamu.

Wahubiri ni watu wa kibinadamu, nao wako wazi kwa, na mara nyingi hunaswa na, mikondo yenye nguvu ya mahaba ya kibinadamu. Kuomba ni kazi ya kiroho; na tabia ya kibinadamu haipendi kazi ya kiroho iliyo mzigo. Tabia ya kibinadamu hutaka kusafiri hata mbinguni chini ya upepo wa kupendeleza, katika bahari iliyojaa na tulivu. Maombi ni kazi inyenyekezayo. Yaidhili akili na kiburi, yaisulibisha majivuno matupu, na yatia sahihi ufilisi wetu wa kiroho, na haya yote ni magumu kwa nyama na damu kuyavumilia. Ni rahisi zaidi kutoomba kuliko kuyavumilia. Basi twafikia mojawapo ya maovu yaliliayo ya nyakati hizi, labda ya nyakati zote—kuomba kidogo au kutoomba kabisa. Katika maovu haya mawili, labda kuomba kidogo ni kubaya kuliko kutoomba kabisa. Kuomba kidogo ni namna ya kujidanganya, ni kifuniko cha dhamiri, ni mzaha na udanganyifu.

Thamani ndogo tuiwekayo juu ya maombi yadhihirika katika muda mdogo tuupatiao. Muda apatiao maombi mhubiri wa kadiri hauhesabiki karibu kabisa katika jumla ya kila siku. Si mara chache maombi ya mhubiri peke yake huwa ni kando ya kitanda chake akiwa katika nguo za kulala, tayari kwa kitanda na mara amo ndani yake, pamoja, labda, na kuongeza vipande vichache vya maombi ya haraka kabla hajavaa nguo asubuhi. Jinsi gani kuomba kwa namna hiyo ni dhaifu, na bure, na kudogo kukilinganishwa na muda na nguvu walizotoa kwa kuomba watu watakatifu ndani na nje ya Biblia! Jinsi gani kuomba kwetu duni, kudogo, kwa kitoto ni maskini na kwa unyonge kando ya desturi za watu wa kweli wa Mungu katika vizazi vyote! Kwa watu wadhaniao kuwa kuomba ndiyo kazi yao kuu na kutoa muda kwa jinsi ya thamani hii kubwa ya umuhimu wake, ndio Mungu awakabidhio funguo za ufalme wake, na kwao ndiko afanyiako maajabu yake ya kiroho katika ulimwengu huu. Kuomba kukuu ni ishara na muhuri wa viongozi wakuu wa Mungu na arabuni ya majeshi yashindayo ambayo kwayo Mungu atazivika taji kazi zao.

Mhubiri amepewa agizo la kuomba vile vile kama la kuhubiri. Utume wake haujakamilika kama hafanyi yote mawili vizuri. Mhubiri aweza kunena kwa ufasaha wote wa wanadamu na wa malaika; lakini asipoweza kuomba kwa imani ivutayo mbingu zote ziwe msaada wake, kuhubiri kwake kutakuwa “kama shaba iliayo au upatu uvumao” kwa matumizi ya kudumu ya kumheshimu Mungu na kuokoa roho.