Mielekeo ya Kuepukwa

Na tumtazame mara kwa mara Brainerd katika misitu ya Amerika akiimimina nafsi yake yenyewe mbele za Mungu kwa ajili ya wapagani wanaoangamia, ambao pasipo wokovu wao hakuna kitu kingeweza kumfanya awe na furaha. Maombi—maombi ya siri, ya bidii, ya kuamini—ndiyo msingi wa utauwa wote wa binafsi. Ujuzi wa kutosha wa lugha mahali ambapo mmisionari anaishi, tabia ya upole na ya kuvuta, moyo uliojitoa kwa Mungu katika dini ya chumba cha ndani—haya, haya ndiyo mafanikio ambayo, zaidi ya maarifa yote, au vipawa vingine vyote, yatatufaa kuwa vyombo vya Mungu katika kazi kuu ya ukombozi wa mwanadamu.—Udugu wa Carey, Serampore

Kuna mielekeo miwili iliyokithiri katika huduma. Mmoja ni kujitenga na mahusiano na watu. Mtawa, na mpweke wa jangwani walikuwa mifano ya hili; walijitenga na watu ili kuwa zaidi pamoja na Mungu. Walishindwa, bila shaka. Kuwa kwetu pamoja na Mungu kwafaa tu kadiri tunavyozitumia faida zake zisizo na thamani juu ya watu. Enzi hii, si kwa mhubiri wala kwa watu, haijashughulika sana na Mungu. Shauku yetu si upande huo. Twajifungia katika masomo yetu, twakuwa wanafunzi, walaji-vitabu, walaji-Biblia, watengeneza-mahubiri, tukijulikana kwa fasihi, mawazo, na mahubiri; lakini watu na Mungu, wako wapi? Nje ya moyo, nje ya akili. Wahubiri walio wafikiriaji wakuu, wanafunzi wakuu, hawana budi kuwa waombaji wakuu kuliko wote, la sivyo watakuwa warudi-nyuma wakuu kuliko wote, wataalamu wasio na moyo, wenye kutegemea akili tu, walio duni kuliko wahubiri walio duni kabisa katika makadirio ya Mungu.

Mwelekeo mwingine ni kuifanya huduma kuwa maarufu kwa watu kabisa. Yeye si tena mtu wa Mungu, bali mtu wa mambo, wa watu. Yeye haombi, kwa sababu utume wake ni kwa watu. Kama aweza kuwasukuma watu, kuchochea shauku, mhemko upendeleao dini, shauku katika kazi ya Kanisa—yeye ameridhika. Uhusiano wake binafsi na Mungu si sababu yo yote katika kazi yake. Maombi yana nafasi ndogo au hayana nafasi kabisa katika mipango yake. Msiba na uharibifu wa huduma kama hiyo hauwezi kuhesabiwa kwa hesabu za kidunia. Kadiri mhubiri alivyo katika maombi kwa Mungu, kwa ajili yake mwenyewe, kwa ajili ya watu wake, ndivyo ilivyo nguvu yake ya kutenda mema halisi kwa watu, ndivyo ulivyo uzaaji wake wa kweli wa matunda, uaminifu wake wa kweli kwa Mungu, kwa mwanadamu, kwa wakati huu, kwa umilele.

Haiwezekani kwa mhubiri kuiweka roho yake katika upatano na tabia ya Kimungu ya wito wake wa juu pasipo maombi mengi. Kwamba mhubiri kwa nguvu ya wajibu na uaminifu wa taabu kwa kazi na desturi za huduma aweza kujiweka katika hali njema na ufaafu, ni kosa kubwa. Hata kutengeneza mahubiri, kusikokoma na kunako lemea kama sanaa, kama wajibu, kama kazi, au kama anasa, kutamvutia mtu sana na kumfanya mgumu, kutaufanya moyo kuwa mgeni, kwa kupuuza maombi, kutoka kwa Mungu. Mwanasayansi humpoteza Mungu katika maumbile. Mhubiri aweza kumpoteza Mungu katika mahubiri yake.

Maombi huuburudisha moyo wa mhubiri, huuweka katika upatano na Mungu na katika huruma na watu, huinua huduma yake kutoka hewa ya baridi ya taaluma, huyafanya mambo ya desturi kuzaa matunda, na huligeuza kila gurudumu kwa wepesi na nguvu ya upako wa Kimungu.

Bwana Spurgeon asema: “Bila shaka mhubiri hutofautishwa zaidi ya wote wengine kuwa mtu wa maombi. Yeye huomba kama Mkristo wa kawaida, la sivyo angekuwa mnafiki. Huomba zaidi ya Wakristo wa kawaida, la sivyo angekuwa hafai kwa cheo alichokichukua. Kama ninyi mkiwa wahudumu hamna maombi mengi, mwastahili kuhurumiwa. Kama mkilegea katika ibada takatifu, si ninyi tu mtakaohitaji kuhurumiwa bali na watu wenu pia, na siku yaja ambayo mtaona haya na kufadhaika. Maktaba zetu zote na masomo yetu ni utupu mtupu ukilinganishwa na vyumba vyetu vya ndani. Nyakati zetu za kufunga na kuomba katika Hema zimekuwa siku kuu kweli kweli; kamwe lango la mbingu halijawahi kusimama wazi zaidi; kamwe mioyo yetu haijawahi kuwa karibu zaidi na ule Utukufu wa katikati.”

Kuomba kufanyako huduma yenye maombi si kuomba kidogo kutiwako kama tuwekavyo kiungo ili kutoa ladha ya kupendeza, bali kuomba huko hakuna budi kuwa mwilini, na kuunda damu na mifupa. Maombi si wajibu mdogo, uliowekwa pembeni; si tendo la vipande-vipande lifanywalo kwa mabaki ya wakati yaliyonyakuliwa kutoka biashara na shughuli nyingine za maisha; bali yamaanisha kwamba wakati wetu ulio bora, kiini cha wakati wetu na nguvu zetu, hakina budi kutolewa. Hayamaanishi chumba cha ndani kimezwe na masomo au kumezwe na shughuli za wajibu wa kihuduma; bali yamaanisha chumba cha ndani kwanza, masomo na shughuli pili, masomo na shughuli vyote viwili vikiburudishwa na kufanywa vyenye ufanisi na chumba cha ndani. Maombi yaathiriyo huduma ya mtu hayana budi kuipa sauti maisha ya mtu. Kuomba kutoako rangi na mwelekeo kwa tabia si pumziko la kupendeza, la haraka. Hakina budi kuingia kwa nguvu ndani ya moyo na maisha kama vile “kulia sana na machozi” kwa Kristo kulivyoingia; hakina budi kuivuta nafsi hata uchungu wa tamaa kama vile ya Paulo ilivyofanya; hakina budi kuwa moto na nguvu iliyofumwa ndani kama “kuomba kwake mwenye haki kwafaa sana, kukiwa kwa bidii” kwa Yakobo; hakina budi kuwa cha ubora ule ambao, kikitiwa katika chetezo cha dhahabu na kufukizwa mbele za Mungu, hufanya utungu mkuu wa kiroho na mageuzi.

Maombi si tabia ndogo iliyobandikwa kwetu tulipokuwa tumefungwa kwenye kamba za aproni za mama zetu; wala si sala fupi ya kiasi cha robo dakika iliyo ya adabu isemwayo juu ya chakula cha saa moja, bali ni kazi iliyo nzito kabisa ya miaka yetu iliyo mizito kabisa. Yashughulisha wakati na hamu zaidi ya milo yetu iliyo mirefu kabisa au karamu zetu zilizo tajiri kabisa. Maombi yayafanyayo mahubiri yetu kuwa ya maana lazima nayo yafanywe kuwa ya maana sana. Tabia ya kuomba kwetu itaamua tabia ya kuhubiri kwetu. Kuomba hafifu kutafanya kuhubiri hafifu. Maombi hufanya kuhubiri kuwa na nguvu, huyapa upako, na kuyafanya yakae. Katika kila huduma iliyo nzito kwa mema, maombi yamekuwa daima jambo zito.

Mhubiri hana budi kuwa hasa mtu wa maombi. Moyo wake hauna budi kuhitimu katika shule ya maombi. Katika shule ya maombi peke yake ndipo moyo waweza kujifunza kuhubiri. Hakuna elimu iwezayo kufidia kushindwa kuomba. Hakuna bidii, wala juhudi, wala masomo, wala vipawa vitakavyojaza upungufu wake.

Kusema na watu kwa ajili ya Mungu ni jambo kuu, lakini kusema na Mungu kwa ajili ya watu ni kukuu zaidi. Kamwe hatasema vema na kwa mafanikio halisi na watu kwa ajili ya Mungu yeye ambaye hajajifunza vema jinsi ya kusema na Mungu kwa ajili ya watu. Zaidi ya haya, maneno yasiyo na maombi mimbarini na nje yake ni maneno yafishayo.