Andiko Huua

Wakati wa mateso haya nililetwa kuyachunguza maisha yangu kuhusiana na umilele kwa ukaribu zaidi kuliko nilivyokuwa nimefanya nilipokuwa katika kufurahia afya. Katika uchunguzi huu kuhusu utekelezaji wa wajibu wangu kwa viumbe wenzangu nikiwa mtu, mhudumu wa Kikristo, na afisa wa Kanisa, nilisimama nimekubaliwa na dhamiri yangu mwenyewe; lakini kuhusiana na Mkombozi na Mwokozi wangu tokeo lilikuwa tofauti. Malipo yangu ya shukrani na utii wa upendo hayalingani hata kidogo na madeni yangu kwa ajili ya kunikomboa, kunihifadhi, na kunitegemeza katika mabadiliko ya maisha tangu utoto hata uzee. Ubaridi wa upendo wangu kwake yeye aliyenipenda kwanza na aliyenitendea mengi hivyo ulinilemea na kunichanganya; na ili kuikamilisha tabia yangu isiyostahili, sikuwa nimepuuza tu kuikuza neema niliyopewa kadiri ya wajibu na pendeleo langu, bali kwa kukosa kuikuza nilikuwa, huku nikizidiwa na masumbufu na kazi zenye kutatanisha, nimepungua kutoka juhudi na upendo wa kwanza. Nilifadhaika, nikajinyenyekeza, nikaomba rehema, na kufanya upya agano langu la kujitahidi na kujitoa bila kujizuia kwa Bwana.—Askofu McKendree

Mahubiri yauayo yaweza kuwa, na mara nyingi ni, sahihi kimafundisho—yenye usahihi wa kimapokeo, usiovunjika. Sisi twapenda usahihi wa mafundisho. Ni mzuri. Ni bora kuliko yote. Ni fundisho safi, lililo wazi la Neno la Mungu, ni nyara zilizoshindwa na kweli katika mapambano yake na uongo, ni maboma ambayo imani imeyainua dhidi ya mafuriko yaharibuyo ya imani potofu au kutokuamini, kuwe kwa unyofu au kwa kutojali; lakini usahihi wa mafundisho, ulio wazi na mgumu kama bilauri, wenye shaka na wa mapigano, waweza kuwa si kitu ila andiko lililoumbwa vema, lililopewa jina vema, na lililojifunzwa vema, andiko lile liualo. Hakuna kilichokufa kama usahihi wa mafundisho uliokufa, uliokufa mno hata kutafakari, uliokufa mno hata kufikiri, kujifunza, au kuomba.

Mahubiri yauayo yaweza kuwa na ufahamu na mshiko wa kanuni, yaweza kuwa ya kielimu na yenye uchambuzi katika ladha, yaweza kuwa na kila kidogo cha asili na sarufi ya andiko, yaweza kuwa na uwezo wa kulinyoosha andiko hata mfano wake ulio kamili, na kuliangaza kama vile Plato na Cicero waweza kuangazwa, yaweza kulisoma kama vile wakili asomavyo vitabu vyake ili kuandaa hoja yake au kuitetea kesi yake, na bado yakawa kama sakitu, sakitu iuayo. Mahubiri ya andiko yaweza kuwa fasaha, yaliyopambwa kwa ushairi na usemi wa kuvutia, yaliyonyunyiziwa maombi na kukolezwa mihemko, yaliyoangazwa na kipaji, na bado haya yakawa si kitu ila mapambo mazito au safi na ya thamani, maua adimu na mazuri yalifunikayo maiti jenezani. Mahubiri yauayo yaweza kuwa bila elimu, yasiyo na ubichi wo wote wa wazo au hisia, yaliyovikwa mambo ya jumla yasiyo na ladha au mambo maalum yasiyo na maana, yenye mtindo usio na utaratibu, wa uzembe, usionukia harufu ya chumba cha ndani wala ya masomo, usiopambwa na wazo, wala usemi, wala maombi. Chini ya mahubiri kama hayo, tazama ukiwa jinsi ulivyo mpana na kamili! tazama mauti ya kiroho jinsi ilivyo kuu!

Mahubiri haya ya andiko hushughulika na uso na kivuli cha mambo, wala si mambo yenyewe. Hayapenyi sehemu ya ndani. Hayana ufahamu wa kina, wala mshiko wenye nguvu, wa uzima uliofichwa wa Neno la Mungu. Ni ya kweli kwa nje, lakini nje ni ganda ambalo halina budi kuvunjwa na kupenywa ili kupata kiini. Andiko laweza kuvikwa ili kuvutia na kuwa la mtindo, lakini kuvutia huko si kwa kumwelekea Mungu wala mtindo huo si kwa ajili ya mbinguni. Kushindwa kuko ndani ya mhubiri. Mungu hajamfanya. Hajawahi kuwa mikononi mwa Mungu kama udongo mikononi mwa mfinyanzi. Amekuwa na shughuli juu ya mahubiri, wazo lake na umaliziaji wake, nguvu zake za kuvuta na za kuvutia; lakini mambo ya ndani ya Mungu hajawahi kuyatafuta, kuyasoma, kuyapima kina, wala kuyaonja. Hajawahi kusimama mbele ya “kiti cha enzi kilicho juu na kilichoinuliwa,” hajawahi kuusikia wimbo wa maserafi, hajawahi kuiona njozi wala kuhisi kasi ya utakatifu ule wa kutisha, na kulia kwa kujiacha kabisa na kwa kukata tamaa chini ya hisia ya udhaifu na hatia, na kuyaona maisha yake yakifanywa upya, moyo wake ukiguswa, ukitakaswa, ukiwashwa moto na kaa la moto litokalo madhabahuni pa Mungu. Huduma yake yaweza kuwavuta watu kwake, kwa Kanisa, kwa mfumo na sherehe; lakini hakuna kuvutwa kweli kwa Mungu, hakuna ushirika mtamu, mtakatifu, wa Kimungu uletwao. Kanisa limepambwa kuta lakini halikujengwa, limependezwa lakini halikutakaswa. Uzima umekandamizwa; baridi imo katika hewa ya majira ya joto; udongo umekaushwa. Mji wa Mungu wetu umekuwa mji wa wafu; Kanisa ni makaburi, si jeshi lililojipanga vitani. Sifa na maombi vimezuiwa; ibada imekufa. Mhubiri na mahubiri vimeisaidia dhambi, si utakatifu; vimeijaza watu jehanamu, si mbinguni.

Mahubiri yauayo ni mahubiri yasiyo na maombi. Pasipo maombi mhubiri huumba mauti, wala si uzima. Mhubiri aliye dhaifu katika maombi ni dhaifu katika nguvu zitoazo uzima. Mhubiri ambaye ameyaondoa maombi kuwa kitu kionekanacho wazi na kitawalacho sana katika tabia yake mwenyewe ameyanyoa mahubiri yake nguvu yake ya pekee itoayo uzima. Kuomba kwa kitaaluma kuko na kutakuwako, lakini kuomba kwa kitaaluma husaidia mahubiri katika kazi yake ya kufisha. Kuomba kwa kitaaluma hupoza na kuua mahubiri na kuomba vyote pia. Sehemu kubwa ya ibada iliyolegea na mielekeo ya uvivu na isiyo na heshima katika kuomba kwa kusanyiko yatokana na kuomba kwa kitaaluma mimbarini. Maombi katika mimbari nyingi ni marefu, yatanga-tangayo, makavu, na yasiyo na maana. Pasipo upako wala moyo, huanguka kama sakitu iuayo juu ya neema zote za ibada. Ni maombi yaletayo mauti. Kila alama ya ibada imeangamia chini ya pumzi yao. Kadiri yalivyokufa zaidi ndivyo yanavyozidi kuwa marefu. Ni haki kutaka kuwepo kwa kuomba kufupi, kuomba kwenye uhai, kuomba kwa moyo halisi, kuomba kwa Roho Mtakatifu—kwa kunyoka, mahususi, kwenye moto, rahisi, kwenye upako mimbarini. Shule ya kuwafundisha wahubiri jinsi ya kuomba, kama Mungu ahesabuvyo kuomba, ingekuwa na faida zaidi kwa utauwa wa kweli, ibada ya kweli, na kuhubiri kwa kweli, kuliko shule zote za theolojia.

Simama! Tulia! Tafakari! Tuko wapi? Twafanya nini? Kuhubiri ili kuua? Kuomba ili kuua? Kuomba kwa Mungu! Mungu mkuu, Muumba wa ulimwengu wote, Mhukumu wa watu wote! Tazama heshima iliyoje! urahisi ulioje! unyofu ulioje! kweli iliyoje katika sehemu za ndani inahitajika! Ni lazima tuwe wa kweli kiasi gani! wenye moyo kiasi gani! Maombi kwa Mungu ni zoezi tukufu zaidi, juhudi iliyo juu zaidi ya mwanadamu, kitu kilicho halisi zaidi! Je, hatutayatupa milele mahubiri yaliyolaaniwa yauayo na maombi yauayo, na kufanya kile kilicho halisi, kilicho na nguvu kuliko yote—kuomba kwenye maombi, kuhubiri kuumbako uzima, kuleta nguvu iliyo kuu kuliko zote juu ya mbingu na dunia, na kuchota kutoka hazina ya Mungu isiyokwisha na iliyo wazi kwa ajili ya uhitaji na ufukara wa mwanadamu?