Utoshelevu Wetu Watoka kwa Mungu

Lakini zaidi ya yote alikuwa hodari katika maombi. Undani na uzito wa roho yake, heshima na utaratibu wa jinsi alivyojielekeza na kujiendesha, na uchache pamoja na ukamilifu wa maneno yake, mara nyingi vimewashangaza hata wageni, kama vile vilivyokuwa vikiwafikia wengine kwa faraja. Hali ya kutisha zaidi, iliyo hai, na yenye heshima kuliko zote niliyowahi kuihisi au kuiona, ni lazima niseme, ilikuwa maombi yake. Na kwa kweli ilikuwa ushuhuda. Alimjua na kuishi karibu na Bwana kuliko watu wengine, kwa maana wale wamjuao zaidi wataona sababu zaidi ya kumkaribia kwa heshima na hofu.—William Penn kumhusu George Fox

Neema zilizo tamu zaidi, kwa upotoshaji mdogo tu, zaweza kuzaa tunda lililo chungu zaidi. Jua hutoa uzima, lakini kupigwa na jua ni mauti. Kuhubiri ni kutoa uzima; kwaweza kuua. Mhubiri anashika funguo; aweza kufunga kama vile aweza kufungua. Kuhubiri ni taasisi kuu ya Mungu kwa kupanda na kukomaza uzima wa kiroho. Kunapofanywa vema, faida zake hazielezeki; kunapofanywa vibaya, hakuna uovu uwezao kupita matokeo yake ya uharibifu. Ni jambo rahisi kuliangamiza kundi ikiwa mchungaji hana tahadhari au malisho yameharibiwa, ni rahisi kuiteka ngome ikiwa walinzi wamelala au chakula na maji vimetiwa sumu. Ikiwa imepewa madaraka ya neema kama hayo, imefunuliwa kwa maovu makuu hivyo, ikihusisha majukumu mazito mengi hivyo, ingekuwa dhihaka juu ya ujanja wa ibilisi na uchongezi juu ya tabia na sifa yake ikiwa asingeleta nguvu zake kuu ili kumchafua mhubiri na mahubiri. Mbele ya haya yote, swali la mshangao la Paulo, “Ni nani atoshaye kwa mambo hayo?” halikosi kufaa kamwe.

Paulo asema: “Utoshelevu wetu watoka kwa Mungu; ambaye ndiye aliyetutosheleza kuwa wahudumu wa agano jipya; si wa andiko, bali wa roho; kwa maana andiko huua, bali roho huhuisha.” Huduma ya kweli imeguswa na Mungu, imewezeshwa na Mungu, na imefanywa na Mungu. Roho wa Mungu yu juu ya mhubiri katika nguvu ya upako, tunda la Roho limo moyoni mwake, Roho wa Mungu amemtia uhai mtu na neno; kuhubiri kwake hutoa uzima, hutoa uzima kama vile majira ya machipuko yatoavyo uzima; hutoa uzima kama vile ufufuo utoavyo uzima; hutoa uzima wenye moto kama vile majira ya joto yatoavyo uzima wenye moto; hutoa uzima wenye matunda kama vile majira ya pukutiko yatoavyo uzima wenye matunda. Mhubiri atoaye uzima ni mtu wa Mungu, ambaye moyo wake huona kiu ya Mungu daima, ambaye nafsi yake huandama Mungu kwa bidii daima, ambaye jicho lake ni kwa Mungu peke yake, na ambaye ndani yake, kwa nguvu ya Roho wa Mungu, mwili na ulimwengu vimesulubiwa, na huduma yake ni kama mafuriko makarimu ya mto utoao uzima.

Mahubiri yauayo ni mahubiri yasiyo ya kiroho. Uwezo wa mahubiri hayo hautoki kwa Mungu. Vyanzo vya chini kuliko Mungu vimeyapa nishati na kichocheo. Roho haonekani ndani ya mhubiri wala katika mahubiri yake. Nguvu za aina nyingi zaweza kusukumwa na kuchochewa na mahubiri yauayo, lakini si nguvu za kiroho. Zaweza kufanana na nguvu za kiroho, lakini ni kivuli tu, ni ghushi; zaweza kuonekana kuwa na uzima, lakini uzima huo umefanywa tu kwa mvuto wa nje. Mahubiri yauayo ni andiko; yaweza kuwa na umbo zuri na utaratibu, lakini bado ni andiko, andiko kavu, lenye makapi, ganda tupu, tupu kabisa. Andiko laweza kuwa na chembe ya uzima ndani yake, lakini halina pumzi ya majira ya machipuko ili kuiamsha; ni mbegu za majira ya baridi, ngumu kama udongo wa majira ya baridi, zenye barafu kama hewa ya majira ya baridi, hakuna kuyeyuka wala kuchipua kwazo. Mahubiri haya ya andiko yana kweli. Lakini hata kweli ya Kimungu haina nishati itoayo uzima peke yake; haina budi kutiwa nguvu na Roho, pamoja na nguvu zote za Mungu nyuma yake. Kweli isiyohuishwa na Roho wa Mungu hufisha kadiri ile ile, au zaidi, ya uongo. Yaweza kuwa kweli isiyochanganyika; lakini pasipo Roho kivuli chake na mguso wake ni vya kufisha, kweli yake ni uongo, nuru yake ni giza. Mahubiri ya andiko hayana upako, hayakulainishwa wala kupakwa mafuta na Roho. Yaweza kuwako machozi, lakini machozi hayawezi kuendesha mitambo ya Mungu; machozi yaweza kuwa si kitu ila pumzi ya majira ya joto juu ya jabali la barafu lililofunikwa na theluji, si kitu ila matope-theluji ya juujuu. Yaweza kuwako hisia na bidii, lakini ni hisia za mwigizaji na bidii ya mwanasheria. Mhubiri aweza kuhisi kutokana na kuwashwa kwa cheche zake mwenyewe, awe fasaha juu ya ufafanuzi wake mwenyewe, awe na bidii katika kutoa zao la ubongo wake mwenyewe; msomi aweza kunyakua nafasi na kuiga moto wa mtume; bongo na mishipa ya fahamu vyaweza kushika nafasi na kujifanya kuwa kazi ya Roho wa Mungu, na kwa nguvu hizi andiko laweza kung’aa na kumeta kama andiko lililoangazwa, lakini kung’aa na kumeta huko kutakuwa tasa pasipo uzima kama shamba lililopandwa lulu. Kile kitu kiletacho mauti kiko nyuma ya maneno, nyuma ya mahubiri, nyuma ya tukio, nyuma ya namna, nyuma ya tendo. Kizuizi kikubwa kiko ndani ya mhubiri mwenyewe. Hana ndani yake zile nguvu kuu ziumbazo uzima. Yawezekana hakuna upungufu katika usahihi wa mafundisho yake, uaminifu wake, usafi wake, au bidii yake; lakini kwa namna fulani mtu, yule mtu wa ndani, katika mahali pake pa siri hajawahi kuvunjika na kujisalimisha kwa Mungu, maisha yake ya ndani si njia kuu ya kupitisha ujumbe wa Mungu, nguvu ya Mungu. Kwa namna fulani nafsi na si Mungu hutawala katika patakatifu pa patakatifu. Mahali fulani, bila yeye mwenyewe kujua, kitu fulani kisichopitisha nguvu za kiroho kimegusa utu wake wa ndani, na mkondo wa Kimungu umezuiwa. Utu wake wa ndani haujawahi kuhisi ufilisi wake kamili wa kiroho, kutokuwa kwake na nguvu kabisa; hajawahi kujifunza kulia kwa kilio kisichoelezeka cha kukata tamaa juu ya nafsi na kutojiweza, hata nguvu ya Mungu na moto wa Mungu vinapoingia na kujaza, kusafisha, na kutia nguvu. Kujithamini, kujiona kuwa na uwezo, katika sura fulani yenye madhara, kumelichafua na kulinajisi hekalu ambalo lingepasa kuhifadhiwa takatifu kwa ajili ya Mungu. Mahubiri yatoayo uzima humgharimu mhubiri mengi—kufa kwa nafsi, kusulubiwa kwa ulimwengu, utungu wa nafsi yake mwenyewe. Mahubiri yaliyosulubiwa peke yake yaweza kutoa uzima. Mahubiri yaliyosulubiwa yaweza kutoka tu kwa mtu aliyesulubiwa.