Watu wa Maombi Wanahitajika

Jifunze utakatifu wa maisha kwa ujumla wake. Manufaa yako yote yategemea hili, kwa maana mahubiri yako hudumu saa moja au mbili tu; maisha yako huhubiri juma zima. Ikiwa Shetani aweza tu kumfanya mhudumu mwenye tamaa kuwa mpenda sifa, mpenda anasa, mpenda kula vizuri, ameiharibu huduma yako. Jitoe kwa maombi, upate maandiko yako, mawazo yako, na maneno yako kutoka kwa Mungu. Luther alitumia saa zake bora tatu katika maombi.—Robert Murray McCheyne

Sisi tuko daima katika juhudi, kama si katika taabu, ya kubuni mbinu mpya, mipango mipya, mashirika mapya ili kuliendeleza Kanisa na kulipatia injili upanuzi na ufanisi. Mwelekeo huu wa siku hizi huelekea kumsahau mtu, au kumzamisha mtu ndani ya mpango au shirika. Mpango wa Mungu ni kumthamini mtu, kumthamini kuliko kitu kingine cho chote. Watu ndio njia ya Mungu. Kanisa latafuta mbinu bora; Mungu atafuta watu bora. “Palitokea mtu, ametumwa kutoka kwa Mungu, jina lake Yohana.” Kipindi kile kilichotangaza na kuandaa njia kwa ajili ya Kristo kilikuwa kimefungamana na mtu yule Yohana. “Kwa ajili yetu mtoto amezaliwa, tumepewa mtoto mwanamume.” Wokovu wa ulimwengu watoka kwa Mwana yule aliyelazwa katika hori. Paulo anapokazia tabia binafsi za watu walioiotesha injili katika ulimwengu, hufumbua siri ya mafanikio yao. Utukufu na ufanisi wa injili hutegemea watu waihubirio. Mungu anapotangaza kwamba “macho ya Bwana hukimbia-kimbia katika dunia yote, ili awatie nguvu wale ambao mioyo yao ni mikamilifu kwake,” anatangaza uhitaji wa watu na kuwategemea kwake kama mfereji ambao kwao huitokeza nguvu yake juu ya ulimwengu. Kweli hii ya muhimu na ya haraka ni ile ambayo enzi hii ya mitambo huelekea kuisahau. Kuisahau ni jambo lenye madhara juu ya kazi ya Mungu kama vile ingekuwa kuling’oa jua kutoka mahali pake. Giza, machafuko, na mauti vingefuata.

Kanisa lahitaji leo si mitambo mingi zaidi wala iliyo bora zaidi, si mashirika mapya wala mbinu nyingi na za kigeni, bali watu ambao Roho Mtakatifu aweza kuwatumia—watu wa maombi, watu wenye nguvu katika maombi. Roho Mtakatifu hapiti katika mbinu, bali katika watu. Haji juu ya mitambo, bali juu ya watu. Hapaki mipango, bali watu—watu wa maombi.

Mwanahistoria mmoja mashuhuri amesema kwamba mambo ya tabia binafsi yana uhusiano zaidi na mageuzi ya mataifa kuliko wanahistoria wa kifalsafa au wanasiasa wa kidemokrasia watakavyokubali. Kweli hii yatumika kwa ukamilifu wake kwa injili ya Kristo; tabia na mwenendo wa wafuasi wa Kristo—huufanya ulimwengu kuwa wa Kikristo, hugeuza sura za mataifa na watu binafsi. Kwa wahubiri wa injili ni kweli kabisa.

Tabia na pia hatima ya injili vimekabidhiwa kwa mhubiri. Yeye huutengeneza au huuharibu ujumbe utokao kwa Mungu kwa mwanadamu. Mhubiri ni bomba la dhahabu ambalo kwalo mafuta ya Mungu hutiririka. Bomba halina budi kuwa la dhahabu tu, bali liwe wazi na lisilo na dosari, ili mafuta yapate kutiririka kwa ukamilifu, bila kuzuiwa, bila kupotea.

Mtu humfanya mhubiri. Mungu hana budi kumfanya mtu. Mjumbe ni, kama yamkini, zaidi ya ujumbe. Mhubiri ni zaidi ya mahubiri. Mhubiri huyatengeneza mahubiri. Kama vile maziwa yatoayo uzima kutoka kifuani mwa mama si kitu ila uhai wa mama, vivyo hivyo yote asemayo mhubiri hupakwa rangi na kujazwa na kile alicho mhubiri. Hazina imo katika vyombo vya udongo, na ladha ya chombo huingia ndani na yaweza kuharibu rangi. Mtu, mtu mzima, yuko nyuma ya mahubiri. Kuhubiri si tendo la saa moja. Ni mtiririko wa maisha. Yahitaji miaka ishirini kuyatengeneza mahubiri, kwa sababu yahitaji miaka ishirini kumfanya mtu. Mahubiri ya kweli ni kitu chenye uhai. Mahubiri hukua kwa sababu mtu hukua. Mahubiri yana nguvu kwa sababu mtu ana nguvu. Mahubiri ni matakatifu kwa sababu mtu ni mtakatifu. Mahubiri yamejaa upako wa Kimungu kwa sababu mtu amejaa upako wa Kimungu.

Paulo aliiita “Injili yangu;” si kwamba alikuwa ameishusha kwa tabia zake za pekee au kuipotosha kwa kujimilikisha kwa ubinafsi, bali injili iliwekwa ndani ya moyo na damu ya uhai ya mtu Paulo, kama amana binafsi ya kutekelezwa kwa sifa zake za Kipaulo, kuwashwa moto na kutiwa nguvu kwa nishati ya moto ya nafsi yake yenye moto. Mahubiri ya Paulo—yalikuwa nini? Yako wapi? Mifupa mitupu, vipande vilivyotawanyika, vielealo juu ya bahari ya uvuvio! Lakini mtu Paulo, aliye mkuu kuliko mahubiri yake, huishi milele, katika umbo lake kamili, sura na kimo, na mkono wake ukiliumba Kanisa. Kuhubiri si kitu ila sauti. Sauti hufa katika kimya, andiko husahauliwa, mahubiri hufifia kutoka kumbukumbu; mhubiri huishi.

Mahubiri hayawezi kupanda katika nguvu zake zitoazo uzima kupita mtu. Watu waliokufa hutoa mahubiri yaliyokufa, na mahubiri yaliyokufa huua. Kila kitu hutegemea tabia ya kiroho ya mhubiri. Katika kipindi cha Kiyahudi, kuhani mkuu alikuwa ameandikiwa kwa herufi za vito juu ya bamba la dhahabu la kipajini: “Utakatifu kwa Bwana.” Vivyo hivyo kila mhubiri katika huduma ya Kristo hana budi kuumbwa kulingana na kauli hii takatifu na kutawaliwa nayo. Ni aibu kubwa kwa huduma ya Kikristo kushuka chini zaidi katika utakatifu wa tabia na utakatifu wa lengo kuliko ukuhani wa Kiyahudi. Jonathan Edwards alisema: “Niliendelea na kufuatilia kwangu kwa shauku utakatifu zaidi na kufananishwa na Kristo. Mbingu niliyoitamani ilikuwa mbingu ya utakatifu.” Injili ya Kristo haisongi kwa mawimbi ya umaarufu. Haina nguvu ya kujienezea yenyewe. Husonga kadiri wale walio na dhamana yake wanavyosonga. Mhubiri hana budi kuiwakilisha injili katika nafsi yake. Sifa zake za Kimungu, zilizo bora zaidi, hazina budi kudhihirika ndani yake. Nguvu ya upendo isukumayo haina budi kuwa ndani ya mhubiri kama nguvu isukumayo mbele, ya kipekee, itawalayo yote, na isiyojijali nafsi. Nishati ya kujikana haina budi kuwa hali yake ya kuwepo, moyo wake na damu yake na mifupa yake. Hana budi kwenda kama mtu miongoni mwa watu, akiwa amevikwa unyenyekevu, akikaa katika upole, mwenye busara kama nyoka, asiye na madhara kama hua; vifungo vya mtumwa pamoja na roho ya mfalme, mfalme katika mwenendo wa juu, wa kifalme, uliojitegemea, pamoja na urahisi na utamu wa mtoto mchanga. Mhubiri hana budi kujitupa, kwa kujitoa kwote kwa imani kamili ijikanayo nafsi na kwa juhudi ijiteketezayo, ndani ya kazi yake kwa ajili ya wokovu wa watu. Watu washikao na kukiumba kizazi kwa ajili ya Mungu hawana budi kuwa wafia-dini wenye moyo, mashujaa, wenye huruma, wasio na hofu. Wakiwa watumishi waoga wa nyakati, watafutao vyeo, wakiwa wapendezao watu au waogao watu, kama imani yao ina mshiko dhaifu kwa Mungu au Neno lake, kama kujikana kwao kwavunjwa na sura yo yote ya nafsi au ya ulimwengu, hawawezi kulishika Kanisa wala ulimwengu kwa ajili ya Mungu.

Mahubiri makali zaidi na yenye nguvu zaidi ya mhubiri yapasa kuwa kwake mwenyewe. Kazi yake iliyo ngumu zaidi, tete, ya taabu, na kamili, haina budi kuwa juu ya nafsi yake mwenyewe. Kuwafunza wale kumi na wawili ilikuwa kazi kuu, ngumu, na yenye kudumu ya Kristo. Wahubiri si watengeneza-mahubiri, bali watengeneza-watu na watengeneza-watakatifu, na yeye peke yake amefunzwa vema kwa kazi hii ambaye amejifanya mwenyewe kuwa mtu na mtakatifu. Si vipawa vikuu wala elimu kuu wala wahubiri wakuu ambavyo Mungu ahitaji, bali watu walio wakuu katika utakatifu, wakuu katika imani, wakuu katika upendo, wakuu katika uaminifu, wakuu kwa ajili ya Mungu—watu wahubirio daima kwa mahubiri matakatifu mimbarini, na kwa maisha matakatifu nje ya mimbari. Hawa waweza kukiumba kizazi kwa ajili ya Mungu.

Kwa mfumo huu, Wakristo wa kwanza waliumbwa. Walikuwa watu wa umbo imara, wahubiri wa mfano wa kimbingu—mashujaa, imara, wa kijeshi, watakatifu. Kuhubiri kwao kulimaanisha kazi ya kujikana, ya kujisulubisha, ya dhati, ya taabu, ya kufia-dini. Walijitia katika kazi hiyo kwa namna iliyoathiri kizazi chao, na kuumba ndani ya tumbo lake kizazi ambacho hakijazaliwa bado kwa ajili ya Mungu. Mtu ahubiriye apasa kuwa mtu aombaye. Maombi ni silaha yenye nguvu kuliko zote ya mhubiri. Nguvu iliyo kuu yenyewe, huyapa yote uzima na nguvu.

Mahubiri halisi hutengenezwa katika chumba cha ndani. Mtu—mtu wa Mungu—hufanywa katika chumba cha ndani. Maisha yake na misimamo yake ya ndani kabisa ilizaliwa katika ushirika wake wa siri pamoja na Mungu. Uchungu wa roho yake uliolemewa na wenye machozi, na ujumbe wake mzito zaidi na mtamu zaidi, ulipatikana alipokuwa peke yake pamoja na Mungu. Maombi humfanya mtu; maombi humfanya mhubiri; maombi humfanya mchungaji.

Mimbari ya siku hizi ni dhaifu katika kuomba. Kiburi cha elimu ni kinyume cha unyenyekevu utegemeao wa maombi. Maombi mara nyingi mno huwa kwa mimbari ni jambo la kirasmi tu—tendo la kawaida la ibada. Maombi si kwa mimbari ya kisasa nguvu ile kuu iliyokuwa katika maisha ya Paulo au huduma ya Paulo. Kila mhubiri asiyeyafanya maombi kuwa sababu kuu katika maisha yake mwenyewe na huduma yake ni dhaifu kama sababu katika kazi ya Mungu, na hana nguvu ya kuisukuma mbele kusudi la Mungu katika ulimwengu huu.