Maombi Ni Alama ya Uongozi wa Kiroho

Nipe wahubiri mia moja wasioogopa cho chote ila dhambi na wasiotamani cho chote ila Mungu, wala sijali hata chembe kama ni makasisi au walei; hao peke yao ndio watakaotikisa malango ya kuzimu na kuusimamisha ufalme wa mbinguni juu ya nchi. Mungu hafanyi jambo lo lote ila kwa kuyajibu maombi.—John Wesley

Mitume walijua ulazima na thamani ya maombi kwa huduma yao. Walijua ya kuwa wito wao mtukufu kama mitume, badala ya kuwaondolea ulazima wa kuomba, uliwafunga kwao kwa haja iliyo na shime zaidi; hata wakawa na wivu mkubwa isije kazi nyingine ya maana ikamaliza wakati wao na kuwazuia wasiombe kama iwapasavyo; basi wakawaweka walei kuziangalia zile huduma nyeti na zenye kunyakua nafasi za kuwahudumia maskini, ili wao (yaani mitume) wapate, bila kuzuiwa, “kudumu katika kuomba na katika huduma ya lile neno.” Maombi yamewekwa kwanza, na uhusiano wao na maombi umeelezwa kwa nguvu zaidi—“kujitoa kwayo,” wakiyafanya kuwa shughuli yao, wakijisalimisha kwa kuomba, wakitia bidii, na shime, na uvumilivu, na wakati ndani yake.

Jinsi gani watu watakatifu, wa kitume, walivyojitoa kwa kazi hii ya kimungu ya maombi! “Usiku na mchana tukiomba sana,” asema Paulo. “Sisi tutadumu katika kuomba” ndilo shauri moja la ujitoaji wa kitume. Jinsi gani wahubiri hawa wa Agano Jipya walivyojimwaga katika maombi kwa ajili ya watu wa Mungu! Jinsi gani walivyomweka Mungu kwa nguvu zake zote ndani ya Makanisa yao kwa kuomba kwao! Mitume hawa watakatifu hawakujidanganya bure kwamba wameutimiza wajibu wao mtukufu na mzito kwa kulihubiri neno la Mungu kwa uaminifu tu, bali kuhubiri kwao kulifanywa kung’ang’anie na kupenya kwa moto na msisitizo wa maombi yao. Kuomba kwa kitume kulikuwa na taabu, na juhudi, na ulazima kama kuhubiri kwa kitume. Waliomba kwa nguvu usiku na mchana ili kuwaleta watu wao katika maeneo ya juu kabisa ya imani na utakatifu. Waliomba kwa nguvu zaidi ili kuwashika katika kimo hiki cha juu cha kiroho. Mhubiri ambaye hajapata kujifunza katika shule ya Kristo ustadi ule wa juu na wa kimungu wa kuwaombea watu wake kamwe hatajifunza ustadi wa kuhubiri, ijapokuwa amemiminiwa elimu ya uhubiri kwa tani, na ajapokuwa ni mwenye kipaji cha ajabu kuliko wote katika kutunga mahubiri na kuyatoa.

Maombi ya viongozi wa kitume, watakatifu, hufanya mengi katika kuwafanya watakatifu wale wasio mitume. Kama viongozi wa Kanisa katika miaka iliyofuata wangalikuwa waangalifu na wenye bidii katika kuwaombea watu wao kama walivyokuwa mitume, zile nyakati za huzuni na giza za kupenda dunia na ukengeufu zisingaliharibu historia na kufunika utukufu na kuzuia maendeleo ya Kanisa. Kuomba kwa kitume hufanya watakatifu wa kitume na kudumisha nyakati za kitume za usafi na nguvu ndani ya Kanisa.

Ni utukufu ulioje wa nafsi, ni usafi na uinuko ulioje wa nia, ni kutokujitakia ulioje, ni kujitoa dhabihu kulioje, ni juhudi ilioje ichoshayo, ni moto ulioje wa roho, ni busara ilioje ya kimungu vinavyohitajiwa ili mtu awe mwombezi kwa ajili ya wanadamu!

Mhubiri anapaswa kujimwaga katika maombi kwa ajili ya watu wake; si ili wapate kuokolewa tu, bali ili waokolewe kwa nguvu. Mitume walijimwaga katika maombi ili watakatifu wao wawe wakamilifu; si ili wapate kuonja kidogo tu vitu vya Mungu, bali ili “wapate kutimilika kwa utimilifu wote wa Mungu.” Paulo hakuutegemea uhubiri wake wa kitume kulifikia lengo hili, bali “kwa sababu hii aliipiga magoti mbele ya Baba wa Bwana wetu Yesu Kristo.” Kuomba kwa Paulo kuliwachukua waongofu wa Paulo mbali zaidi katika njia kuu ya utakatifu kuliko kuhubiri kwa Paulo. Epafra alifanya sawa au zaidi kwa maombi kwa ajili ya watakatifu wa Kolosai kuliko kwa kuhubiri kwake. Alijitaabisha kwa bidii sikuzote katika maombi kwa ajili yao ili “wapate kusimama wakamilifu, wamejaa katika mapenzi yote ya Mungu.”

Wahubiri ni viongozi wa Mungu kwa hakika. Ndio wenye hatia kuu kwa hali ya Kanisa. Ndio wauumbao umbo lake, wauupao mkondo na mwelekeo maisha yake.

Mengi kwa kila njia yategemea viongozi hawa. Ndio wazifinyangao nyakati na taasisi. Kanisa ni la kimungu, hazina lililoihifadhi ni ya mbinguni, lakini hubeba chapa ya kibinadamu. Hazina imo katika vyombo vya udongo, nayo huvuta harufu ya chombo. Kanisa la Mungu huwafanya viongozi wake, au hufanywa nao. Likiwafanya au likifanywa nao, litakuwa kama walivyo viongozi wake; la kiroho ikiwa wao ni wa kiroho, la kidunia ikiwa wao ni wa kidunia, la mchanganyiko ikiwa viongozi wake ni wa mchanganyiko. Wafalme wa Israeli waliipa tabia ibada ya Israeli. Kanisa mara chache huasi au kupanda juu ya dini ya viongozi wake. Viongozi wa kiroho wenye nguvu, watu wa uwezo mtakatifu, wakiongoza, ni alama za upendeleo wa Mungu; msiba na udhaifu hufuata nyayo za viongozi dhaifu au wa kidunia. Israeli walikuwa wameanguka chini sana Mungu alipowapa watoto kuwa wakuu wao na wachanga kuwatawala. Manabii hawatabiri hali ya heri wakati watoto wawaoneapo Israeli wa Mungu na wanawake wawatawalapo. Nyakati za uongozi wa kiroho ni nyakati za mafanikio makuu ya kiroho kwa Kanisa.

Maombi ni mojawapo ya sifa bora za uongozi imara wa kiroho. Watu wa maombi yenye nguvu ni watu wa uwezo, nao huyafinyanga mambo. Nguvu yao na Mungu ina mwendo wa ushindi.

Awezaje mtu kuhubiri asiyeupata ujumbe wake mpya kutoka kwa Mungu chumbani mwake cha faragha? Awezaje kuhubiri bila imani yake kuchochewa, na maono yake kusafishwa, na moyo wake kupashwa moto kwa kufungiwa pamoja na Mungu? Ole wa midomo ya mimbari isiyoguswa na moto huu wa chumbani. Itakuwa mikavu na isiyo na upako sikuzote, wala kweli za kimungu hazitakuja kamwe kwa nguvu kutoka midomo ya namna hiyo. Kwa kadiri ya faida za kweli za dini, mimbari isiyo na chumba cha faragha sikuzote itakuwa kitu kilicho tasa.

Mhubiri aweza kuhubiri kwa namna ya kirasmi, au ya kufurahisha, au ya kielimu bila maombi, lakini kati ya uhubiri wa namna hii na kupanda mbegu ya Mungu ya thamani kwa mikono mitakatifu na mioyo yenye maombi na kulia kuna umbali usiopimika.

Huduma isiyo na maombi ni mzishi wa kweli yote ya Mungu na wa Kanisa la Mungu. Aweza kuwa na jeneza la gharama kubwa kuliko yote na maua mazuri kuliko yote, lakini ni mazishi, pamoja na mapambo yote ya kuvutia. Mkristo asiye na maombi kamwe hataijua kweli ya Mungu; huduma isiyo na maombi kamwe haitaweza kufundisha kweli ya Mungu. Zama za utukufu wa miaka elfu zimepotezwa na Kanisa lisilo na maombi. Kuja kwa Bwana wetu kumeahirishwa bila kikomo na Kanisa lisilo na maombi. Kuzimu kumejipanua na kujaza mapango yake ya kutisha mbele ya huduma iliyokufa ya Kanisa lisilo na maombi.

Sadaka iliyo bora, iliyo kuu kuliko zote, ni sadaka ya maombi. Kama wahubiri wa karne ya ishirini watajifunza vema somo la maombi, na kuitumia kwa ukamili nguvu ya maombi, miaka elfu ya utukufu itafika adhuhuri yake kabla karne hii haijaisha. “Ombeni bila kukoma” ndio mwito wa tarumbeta kwa wahubiri wa karne ya ishirini. Kama wa karne ya ishirini watayapata maandiko yao, na mawazo yao, na maneno yao, na mahubiri yao vyumbani mwao vya faragha, karne ijayo itakuta mbingu mpya na nchi mpya. Mbingu na nchi ya zamani iliyotiwa waa la dhambi na kufunikwa na dhambi zitapita chini ya nguvu ya huduma iliyo na maombi.