Maombi Mengi ndiyo Gharama ya Upako

Jitihada zote za mhudumu zitakuwa ubatili au mbaya kuliko ubatili kama hana upako. Upako lazima ushuke kutoka mbinguni na kueneza harufu nzuri na hisia na ladha juu ya huduma yake; na miongoni mwa njia nyingine za kujistahilisha kwa kazi yake, Biblia lazima ishike nafasi ya kwanza, na ya mwisho pia lazima itolewe kwa Neno la Mungu na maombi.—Richard Cecil

KATIKA mfumo wa Kikristo upako ni kutiwa mafuta kwa Roho Mtakatifu, kutenga kwa ajili ya kazi ya Mungu na kustahilisha kwa ajili yake. Upako huu ndio uwezeshaji mmoja wa kimungu ambao kwao mhubiri hutimiza makusudi ya pekee na yenye kuokoa ya kuhubiri. Pasipo upako huu hakuna matokeo ya kweli ya kiroho yatimizwayo; matokeo na nguvu katika kuhubiri havipandi juu ya matokeo ya usemi usiotakaswa. Pasipo upako, ile ya kwanza ina nguvu kama mimbari.

Upako huu wa kimungu juu ya mhubiri huzaa kupitia Neno la Mungu matokeo ya kiroho yatiririkayo kutoka injili; na pasipo upako huu, matokeo haya hayapatikani. Mavuto mengi ya kupendeza yaweza kufanyika, lakini haya yote hushuka chini sana ya makusudi ya kuhubiri injili. Upako huu waweza kuigwa. Kuna vitu vingi vifananavyo nao, kuna matokeo mengi yafananayo na athari zake; lakini ni geni kwa matokeo yake na kwa asili yake. Ule moto au wororo uchochewao na hubiri lenye kusikitisha au la hisia waweza kuonekana kama mienendo ya upako wa kimungu, lakini hauna nguvu kali, yenye kupenya, ivunjayo moyo. Hakuna dawa iponyayo moyo katika mienendo hii ya juujuu, ya huruma, ya hisia; si ya msingi, wala haipekui dhambi wala haiponyi dhambi.

Upako huu wa kimungu ndicho kipengele kimoja kitofautishacho kuhubiri injili kwa kweli na njia nyingine zote za kuiwasilisha kweli. Huitia nguvu na kuipenyeza kweli iliyofunuliwa kwa nguvu zote za Mungu. Huliangaza Neno na kuipanua na kuitajirisha akili na kuiwezesha kulishika na kulifahamu Neno. Huustahilisha moyo wa mhubiri, na kuuleta katika hali ile ya wororo, ya usafi, ya nguvu na nuru zilizo za lazima ili kupata matokeo yaliyo makuu kuliko yote. Upako huu humpa mhubiri uhuru na kupanuka kwa fikira na roho—uhuru, ujazo, na unyofu wa kunena visivyoweza kupatikana kwa njia nyingine yoyote.

Pasipo upako huu juu ya mhubiri injili haina nguvu za kujieneza yenyewe zaidi ya mfumo mwingine wowote wa kweli. Huu ndio muhuri wa umungu wake. Upako ndani ya mhubiri humtia Mungu katika injili. Pasipo upako, Mungu hayupo, na injili huachwa kwa nguvu za chini na zisizoridhisha ambazo ustadi, hamu, au vipawa vya wanadamu vyaweza kubuni ili kuyatia nguvu na kuyaendeleza mafundisho yake.

Ni katika kipengele hiki ambapo mimbari hushindwa mara nyingi kuliko katika kipengele kingine chochote. Ni hapo hapo mahali hapa muhimu kuliko yote ndipo huanguka. Yaweza kuwa na elimu, umahiri na ufasaha vyaweza kufurahisha na kuvutia, mshtuko wa hisia au njia zisizoudhi sana zaweza kuwaleta watu makundi makundi, nguvu ya akili yaweza kuvutia na kuitia nguvu kweli kwa rasilimali zake zote; lakini pasipo upako huu, kila kimoja na vyote hivi vitakuwa kama shambulio la hasira la maji juu ya Gibraltari. Mapovu na povu yaweza kufunika na kung’aa; lakini miamba i pale pale, isiyoathirika wala isiyoweza kuathirika. Moyo wa mwanadamu hauwezi kufagiliwa ugumu wake na dhambi yake kwa nguvu hizi za kibinadamu zaidi ya miamba hii kuwezavyo kufagiliwa na mtiririko wa bahari usiokoma.

Upako huu ndio nguvu ya kujiweka wakfu, na uwepo wake ndio kipimo cha kudumu cha kujiweka wakfu huko. Ni kutiwa mafuta huku kwa kimungu juu ya mhubiri kunakohakikisha kujiweka kwake wakfu kwa Mungu na kwa kazi yake. Nguvu na sababu nyingine zaweza kumwita kwenye kazi, lakini huku peke yake ndiko kujiweka wakfu. Kutengwa kwa ajili ya kazi ya Mungu kwa nguvu za Roho Mtakatifu ndiko kujiweka wakfu pekee kunakotambuliwa na Mungu kuwa halali.

Upako, upako wa kimungu, kutiwa mafuta huku kwa kimbingu, ndicho mimbari ihitajicho na lazima iwe nacho. Mafuta haya ya kimungu na ya kimbingu yatiwayo juu yake kwa kuwekewa mkono wa Mungu lazima yaulainishe na kuupaka mafuta mtu mzima—moyo, kichwa, roho—hata yamtenge kwa kutengwa kulio na nguvu mbali na sababu na makusudi yote ya kidunia, ya kilimwengu, ya kimwili, ya kibinafsi, yakimtenga kwa ajili ya kila kilicho safi na kilicho kama Mungu.

Ni uwepo wa upako huu juu ya mhubiri ufanyao msukosuko na mvutano katika kutaniko jingi. Kweli zilezile zimenenwa katika ukamilifu wa herufi, lakini hakuna mtetemeko uliyoonekana, hakuna maumivu wala mpigo uliohisiwa. Yote yametulia kama makaburini. Mhubiri mwingine aja, na uvutano huu wa siri u juu yake; herufi ya Neno imewashwa moto na Roho, uchungu wa mwendo mkuu wahisiwa, ni upako uenaeo na kuisukua dhamiri na kuuvunja moyo. Kuhubiri kusiko na upako hufanya kila kitu kuwa kigumu, kikavu, kichungu, kilichokufa.

Upako huu si kumbukumbu au enzi ya zamani tu; ni jambo la sasa, lililotimizwa, linalotambulikana. Ni mali ya uzoefu wa mtu na pia ya kuhubiri kwake. Ndicho kimbadilishacho kuwa mfano wa Bwana wake wa kimungu, na pia kile ambacho kwacho hutangaza kweli za Kristo kwa nguvu. Ni nguvu iliyo kuu hivyo katika huduma hata kufanya yote mengine yaonekane dhaifu na ya bure pasipo huo, na kwa uwepo wake kufidia kutokuwako kwa nguvu nyingine zote zilizo dhaifu zaidi.

Upako huu si kipawa kisichoweza kuondolewa. Ni kipawa chenye masharti, na uwepo wake hudumishwa na kuongezwa kwa njia ileile ambayo kwayo ulipatikana mwanzo; kwa maombi yasiyokoma kwa Mungu, kwa tamaa zenye moto za kumtafuta Mungu, kwa kuuthamini, kwa kuutafuta kwa moto usiochoka, kwa kuhesabu yote mengine kuwa hasara na kushindwa pasipo huo.

Jinsi gani na kwatoka wapi upako huu? Moja kwa moja kutoka kwa Mungu kwa kujibu maombi. Mioyo iombayo peke yake ndiyo mioyo iliyojaa mafuta haya matakatifu; midomo iombayo peke yake ndiyo iliyotiwa mafuta ya upako huu wa kimungu.

Maombi, maombi mengi, ndiyo gharama ya upako wa kuhubiri; maombi, maombi mengi, ndilo sharti moja, pekee la kuudumisha upako huu. Pasipo maombi yasiyokoma upako haumjii kamwe mhubiri. Pasipo kudumu katika maombi, upako, kama ile mana iliyowekwa kupita kiasi, huzaa mabuu.