Upako ni Lazima

Baraka moja angavu ambayo maombi ya faraghani huyaleta juu ya huduma ni kitu fulani kisichoelezeka wala kuigika—upako utokao kwake Aliye Mtakatifu . . . . Kama upako tuubebao hautoki kwa Bwana wa majeshi, sisi ni wadanganyifu, kwa kuwa ni katika maombi tu tuwezapo kuupata. Na tudumu katika kusihi bila kukoma, kwa bidii daima. Ngozi yako ya manyoya na ilale sakafuni pa kupuria pa kusihi hata iwe imelowa kwa umande wa mbinguni.—Charles Haddon Spurgeon

ALEXANDER KNOX, mwanafalsafa Mkristo wa siku za Wesley, si mfuasi bali rafiki mkubwa wa binafsi wa Wesley, na mwenye huruma nyingi za kiroho kwa vuguvugu la Kiwesley, aandika: “Ni jambo la ajabu na la kusikitisha, lakini naamini kwa hakika ya kuwa, isipokuwa miongoni mwa Wamethodisti na wachungaji wenye mwelekeo wa Kimethodisti, hakuna kuhubiri kwingi kwenye kuvutia katika Uingereza. Wachungaji, kwa ujumla mno, wameipoteza kabisa stadi hiyo. Naona kuna, katika sheria kuu za ulimwengu wa maadili, aina ya maelewano ya siri kama ule mvutano katika kemia, kati ya kweli ya dini itangazwayo ipasavyo na hisia zilizo ndani kabisa za akili ya mwanadamu. Pale moja inapoonyeshwa ipasavyo, ile nyingine itaitikia. Je, mioyo yetu haikuwaka ndani yetu?—lakini kwa hisia hii ya ibada ni lazima kabisa iwepo ndani ya mnenaji. Basi, nalazimika kusema kutokana na kuchunguza kwangu mwenyewe ya kuwa upako huu, kama Wafaransa wauitavyo si vibaya, unaelekea zaidi kupita kulinganishwa kote kupatikana katika Uingereza ndani ya kikao kidogo cha Kimethodisti kuliko katika Kanisa la parokia. Hili, na hili peke yake, laonekana kwa kweli kuwa ndilo lijazalo nyumba za Wamethodisti na kupunguza watu Makanisani. Mimi, nadhani kwa hakika, si mtu wa juhudi za kupita kiasi; mimi ni mtu wa kanisa mnyofu na wa moyo wote, mwanafunzi mnyenyekevu wa shule ya Hale na Boyle, ya Burnet na Leighton. Basi lazima nikiri ya kuwa nilipokuwa katika nchi hii, miaka miwili iliyopita, sikumsikia hata mhubiri mmoja aliyenifundisha kama walimu wangu mwenyewe wakuu isipokuwa wale wanaohesabiwa kuwa wa Kimethodisti. Nami sasa nakata tamaa ya kupata hata chembe ya mafundisho ya moyoni kutoka upande mwingine wowote. Wahubiri wa Kimethodisti (ijapokuwa siwezi sikuzote kuyakubali maneno yao yote) kwa hakika kabisa hueneza dini hii ya kweli na isiyo na unajisi. Nilihisi furaha ya kweli Jumapili iliyopita. Naweza kushuhudia ya kuwa mhubiri kwa kweli alinena maneno ya kweli na ya kiasi. Hapakuwa na ufasaha wa maneno—mtu huyo mwaminifu hakuwaza kamwe jambo kama hilo—bali palikuwa na kitu bora zaidi: mawasiliano ya moyoni ya kweli iliyo hai. Nasema iliyo hai kwa sababu yale aliyoyatangaza kwa wengine haikuwezekana kutohisi ya kuwa aliishi kwayo yeye mwenyewe.”

Upako huu ndio ufundi wa kuhubiri. Mhubiri asiyekuwa na upako huu kamwe hakuwa kamwe na ufundi wa kuhubiri. Mhubiri aliyeupoteza upako huu ameupoteza ufundi wa kuhubiri. Ufundi mwingine wowote awezao kuwa nao na kuudumisha—ufundi wa kutunga mahubiri, ufundi wa ufasaha, ufundi wa kufikiri kukuu na kulio wazi, ufundi wa kuwapendeza wasikilizaji—ameupoteza ufundi wa kimungu wa kuhubiri. Upako huu huifanya kweli ya Mungu kuwa yenye nguvu na yenye kuvutia, huvuta na kuvutia, hujenga, hushitaki dhamiri, huokoa.

Upako huu huitia uzima kweli ya Mungu iliyofunuliwa, huifanya kuwa hai na yenye kutoa uzima. Hata kweli ya Mungu inenwapo pasipo upako huu ni hafifu, imekufa, tena huleta mauti. Ijapoifurika kweli, ijapokuwa nzito kwa fikira, ijapong’aa kwa usemi, ijapochongwa na mantiki, ijapokuwa yenye nguvu kwa bidii, pasipo upako huu wa kimungu huishia katika mauti wala si katika uzima. Bw. Spurgeon asema: “Nastaajabu ni muda gani tungeweza kuzipiga akili zetu kabla ya kuweza kuweka wazi katika maneno maana ya kuhubiri kwa upako. Lakini yeye ahubiriye huujua uwepo wake, na yeye asikiaye hutambua mara kutokuwako kwake. Samaria, wakati wa njaa, huwakilisha hotuba isiyo nao. Yerusalemu, pamoja na karamu yake ya vinono, vilivyojaa mafuta, yaweza kuwakilisha hubiri lililotajirishwa kwao. Kila mtu ajua uchangamfu wa asubuhi ulivyo wakati lulu za mashariki zijaapo juu ya kila jani la majani, lakini ni nani awezaye kuueleza, sembuse kuutokeza wenyewe? Ndivyo ilivyo siri ya upako wa kiroho. Twajua, lakini hatuwezi kuwaambia wengine ni nini. Ni rahisi kama ilivyo kipumbavu, kuuiga. Upako ni kitu usichoweza kukitengeneza, na uigaji wake ni mbaya kuliko usiofaa kitu. Lakini wenyewe, hauna kifani, tena wahitajika kupita kipimo kama ukitaka kuwajenga waaminio na kuwaleta wenye dhambi kwa Kristo.”