Neema Itokayo Moyoni Badala ya Kichwani

Usijitahidi kuwa mhubiri hodari. Kuta za Yeriko zilibomolewa kwa mabaragumu ya pembe za kondoo. Mtazame Yesu tu upate chakula cha kuhubiri; nacho kinachohitajika utapewa, na kile utakachopewa kitabarikiwa, kiwe punje ya shayiri au mkate wa ngano, ganda au kombo. Kinywa chako kitakuwa kijito kitiririkacho au chemchemi iliyofungwa, kwa kadiri ulivyo moyo wako. Epuka mabishano yote katika kuhubiri, kunena, au kuandika; usishushe kitu ila Ibilisi, wala usiinue kitu ila Yesu Kristo.—Berridge

MOYO ndio Mwokozi wa ulimwengu. Vichwa haviokoi. Kipaji, akili, umahiri, nguvu, vipawa vya asili haviokoi. Injili hutiririka kupitia mioyo. Nguvu zote zilizo hodari kuliko zote ni nguvu za moyo. Neema zote zilizo tamu na za kupendeza kuliko zote ni neema za moyo. Mioyo mikuu hufanya tabia kuu; mioyo mikuu hufanya tabia za kimungu. Mungu ni upendo. Hakuna kilicho kikuu kuliko upendo, hakuna kilicho kikuu kuliko Mungu. Mioyo hufanya mbingu; mbingu ni upendo. Hakuna kilicho juu zaidi, wala kilicho kitamu zaidi, kuliko mbingu. Ni moyo, wala si kichwa, ufanyao wahubiri wakuu wa Mungu. Moyo huhesabika sana kwa kila namna katika dini. Moyo lazima unene kutoka mimbarini. Moyo lazima usikie katika kiti cha kanisa. Kwa kweli, twamtumikia Mungu kwa mioyo yetu. Heshima ya kichwa haipiti kama fedha halali mbinguni.

Twaamini ya kuwa mojawapo ya makosa mazito na maarufu kuliko yote ya mimbari ya kisasa ni kutia fikira nyingi kuliko maombi, kichwa kingi kuliko moyo, katika mahubiri yake. Mioyo mikubwa hufanya wahubiri wakubwa; mioyo mema hufanya wahubiri wema. Shule ya theolojia ya kupanua na kukuza moyo ndilo hitaji la dhahabu la Injili. Mchungaji huwafunga watu wake kwake na kuwatawala watu wake kwa moyo wake. Waweza kuvistaajabia vipawa vyake, waweza kujivuna kwa uwezo wake, waweza kuguswa kwa kitambo na mahubiri yake; lakini ngome ya nguvu zake ni moyo wake. Fimbo yake ya enzi ni upendo. Kiti cha enzi cha nguvu zake ni moyo wake.

Mchungaji mwema huutoa uhai wake kwa ajili ya kondoo. Vichwa havifanyi mashahidi kamwe. Ni moyo uutoao uhai kwa upendo na uaminifu. Yahitaji ujasiri mkuu kuwa mchungaji mwaminifu, lakini moyo peke yake waweza kutoa ujasiri huu. Vipawa na kipaji vyaweza kuwa hodari, lakini ni vipawa na kipaji vya moyo, wala si vya kichwa.

Ni rahisi zaidi kukijaza kichwa kuliko kuutayarisha moyo. Ni rahisi zaidi kufanya hubiri la akili kuliko hubiri la moyo. Ni moyo uliomvuta Mwana wa Mungu kutoka mbinguni. Ni moyo utakaowavuta wanadamu kwenda mbinguni. Watu wa moyo ndicho ulimwengu ukihitajicho ili kuihurumia taabu yake, kuzibusu huzuni zake ziondoke, kuisikitikia dhiki yake, na kuutuliza uchungu wake. Kristo alikuwa hasa mtu wa huzuni, kwa sababu alikuwa zaidi ya wote mtu wa moyo.

“Nipe moyo wako,” ndilo takwa la Mungu kwa wanadamu. “Nipe moyo wako!” ndilo dai la mwanadamu kwa mwanadamu.

Huduma ya kitaaluma ni huduma isiyo na moyo. Mshahara upewapo nafasi kubwa katika huduma, moyo hupewa nafasi ndogo. Twaweza kuifanya kuhubiri kuwa biashara yetu, tusitie mioyo yetu katika biashara hiyo. Yeye ajitanguliaye nafsi yake mbele katika kuhubiri kwake huutia moyo nyuma. Yeye asiyepanda kwa moyo wake katika chumba chake cha kujifunzia hatavuna kamwe mavuno kwa ajili ya Mungu. Faragha ndicho chumba cha kujifunzia cha moyo. Tutajifunza huko zaidi jinsi ya kuhubiri na cha kuhubiri kuliko tuwezavyo kujifunza katika maktaba zetu. “Yesu akalia machozi” ndiyo mstari mfupi kuliko yote na mkubwa kuliko yote katika Biblia. Ni yeye aendaye zake akilia (si kuhubiri mahubiri makuu), akichukua mbegu za thamani, atakayerudi tena kwa furaha, akiichukua miganda yake.

Kuomba huleta busara, huleta hekima, hupanua na kuutia nguvu akili. Faragha ni mwalimu mkamilifu na darasa kamili kwa mhubiri. Fikira haing’arishwi na kusafishwa tu katika maombi, bali fikira huzaliwa katika maombi. Twaweza kujifunza zaidi katika saa moja ya kuomba, tuombapo kweli kweli, kuliko katika saa nyingi za kujifunza. Kuna vitabu ndani ya faragha visivyoweza kuonekana wala kusomwa mahali pengine popote. Kuna mafunuo yatolewayo ndani ya faragha yasiyotolewa mahali pengine popote.