Mfano wa Ujitoaji

Nakusihi uwe na ushirika na Kristo—ushirika ukuao. Kuna mapazia ya kufunuliwa ndani ya Kristo ambayo hatukuyaona kamwe, na makunjo mapya ya upendo ndani yake. Nakata tamaa kwamba nitawahi kufika mwisho wa mbali wa upendo huo, kwa maana una tabaka nyingi mno. Basi chimba kwa kina, na utoke jasho na ujitaabishe na kujidhili kwa ajili yake, na utenge muda mwingi wa siku kwa ajili yake kadiri uwezavyo. Tutashindwa na kuvutwa katika kazi hiyo.—Samuel Rutherford

MUNGU anao sasa, na amekuwa nao, wengi wa wahubiri hawa waliojitoa na wenye maombi—watu ambao katika maisha yao maombi yamekuwa nguvu yenye uwezo, itawalayo, na ionekanayo wazi. Ulimwengu umeihisi nguvu yao, Mungu ameihisi na kuiheshimu nguvu yao, kusudi la Mungu limesonga kwa nguvu na kwa haraka kwa maombi yao, utakatifu umeng’aa katika tabia zao kwa mng’ao wa Kimungu.

Mungu alimpata mmoja wa watu aliokuwa akiwatafuta katika Daudi Brainerd, ambaye kazi yake na jina lake vimeingia katika historia. Hakuwa mtu wa kawaida, bali aliweza kung’aa katika kundi lo lote, sawa na wenye hekima na vipawa, aliyefaa sana kuzijaza mimbari zinazovutia zaidi na kutumika miongoni mwa wale waliostaarabika na wenye elimu zaidi, ambao walitamani sana kumpata awe mchungaji wao. Rais Edwards atoa ushuhuda kwamba alikuwa “kijana mwenye vipawa vya fahari, mwenye maarifa ya ajabu ya watu na mambo, mwenye uwezo wa nadra wa maongezi, aliyefaulu katika maarifa yake ya theolojia, na kwa kweli, kwa mtu mchanga hivyo, alikuwa mwanatheolojia wa ajabu, hasa katika mambo yote yaliyohusu dini ya uzoefu. Sikumjua kamwe aliye sawa naye katika umri wake na hadhi yake kwa fikira zilizo wazi na sahihi za asili na kiini cha dini ya kweli. Mwenendo wake katika maombi haukuigika karibu kabisa, wa namna ambayo nimeujua ukilinganwa mara chache sana. Elimu yake ilikuwa kubwa sana, naye alikuwa na vipawa vya ajabu kwa ajili ya mimbari.”

Hakuna hadithi iliyo tukufu zaidi iliyoandikwa katika kumbukumbu za dunia kuliko ile ya Daudi Brainerd; hakuna muujiza uthibitishao kwa nguvu ya Kimungu zaidi ukweli wa Ukristo kuliko maisha na kazi ya mtu wa namna hiyo. Peke yake katika jangwa la kishenzi la Amerika, akishindana mchana na usiku na ugonjwa hatari, asiyefundishwa katika kutunza nafsi, akiwafikia Wahindi kwa sehemu kubwa ya wakati kwa njia tu ya mkalimani mpagani asiyefanya vema, akiwa na Neno la Mungu moyoni mwake na mkononi mwake, nafsi yake ikiwaka kwa mwali wa Kimungu, akiwa na mahali na wakati wa kuimwaga nafsi yake kwa Mungu katika maombi, aliisimamisha kikamili ibada ya Mungu na kuyapata matokeo yake yote ya neema. Wahindi walibadilishwa kwa mabadiliko makuu, kutoka katika ushenzi wa hali ya chini kabisa wa upagani wa ujinga na uliodhalilika, wakawa Wakristo safi, watauwa, wenye akili; maovu yote yakarekebishwa, wajibu wa nje wa Ukristo ukakubaliwa na kutendwa mara moja; maombi ya jamaa yakawekwa; Sabato ikaanzishwa na kushikwa kwa dini; neema za ndani za dini zikaonyeshwa kwa utamu na nguvu zizidizo. Ufumbuzi wa matokeo haya wapatikana katika Daudi Brainerd mwenyewe, si katika hali au matukio ya bahati, bali katika mtu Brainerd. Alikuwa mtu wa Mungu, kwa ajili ya Mungu wa kwanza na wa mwisho na wakati wote. Mungu aliweza kupita ndani yake bila kizuizi. Uweza wote wa neema haukuzuiwa wala kubanwa na hali za moyo wake; mfereji mzima ulipanuliwa na kusafishwa kwa ajili ya mapito ya Mungu yaliyo makamilifu na yenye nguvu zaidi, hata Mungu pamoja na nguvu zake zote zenye uweza aweze kushuka juu ya jangwa la kishenzi lisilo na tumaini, na kulibadili liwe bustani yake iliyochanua na yenye matunda; kwa maana hakuna neno gumu mno kwa Mungu kulifanya kama akiweza kupata mtu wa namna ifaayo wa kulifanya naye.

Brainerd aliishi maisha ya utakatifu na maombi. Shajara yake imejaa na kujirudia-rudia kwa kumbukumbu za nyakati zake za kufunga, kutafakari, na kujitenga. Muda aliotumia katika maombi ya faragha ulifikia saa nyingi kila siku. “Nirudipo nyumbani,” alisema, “na kujitoa kwa kutafakari, kuomba, na kufunga, nafsi yangu hutamani kufisha mwili, kujikana nafsi, unyenyekevu, na kutengana na vitu vyote vya ulimwengu.” “Sina jambo lo lote,” alisema, “na dunia ila kuitumikia kwa uaminifu kwa ajili ya Mungu. Sitamani kuishi dakika moja kwa ajili ya kitu cho chote ambacho dunia yaweza kutoa.” Baada ya daraja hili la juu aliomba hivi: “Nikihisi kiasi cha utamu wa ushirika na Mungu na nguvu ya kulazimisha ya upendo wake, na jinsi unavyoiteka nafsi kwa ajabu na kuzifanya tamaa na shauku zote zikusanyike katika Mungu, naitenga siku hii kwa kufunga na kuomba kwa siri, nimsihi Mungu aniongoze na kunibariki kwa habari ya kazi kuu niliyo nayo mbele yangu ya kuihubiri injili, na kwamba Bwana anirudie na kunionyesha nuru ya uso wake. Nilikuwa na uzima na nguvu kidogo tu wakati wa mchana kabla ya adhuhuri. Karibu na katikati ya alasiri Mungu aliniwezesha kushindana kwa bidii katika maombezi kwa ajili ya rafiki zangu waliokuwa mbali, lakini usiku uleule Bwana alinijilia kwa ajabu katika maombi. Nadhani nafsi yangu haikuwahi kuwa katika uchungu wa namna hiyo hapo awali. Sikuhisi kizuizi cho chote, kwa maana hazina za neema ya Kimungu zilifunguliwa kwangu. Nilishindana kwa ajili ya rafiki waliokuwa mbali, kwa ajili ya kukusanywa kwa nafsi, kwa ajili ya makutano ya nafsi maskini, na kwa ajili ya wengi niliodhani kuwa ni watoto wa Mungu, kila mmoja binafsi, katika mahali pengi pa mbali. Nilikuwa katika uchungu namna hiyo tangu jua lilipokuwa juu kama nusu saa hata karibu na giza, hata nikawa nimelowa jasho mwili mzima, lakini bado ilionekana kwangu kwamba sikuwa nimefanya lo lote. Ee, Mwokozi wangu mpenzi alitoa jasho la damu kwa ajili ya nafsi maskini! Nilitamani huruma zaidi kwao. Nilihisi nikiwa bado katika hali tamu, chini ya hisia ya upendo na neema ya Kimungu, nikaenda kulala nikiwa katika hali hiyo, moyo wangu ukiwa umemwelekea Mungu.” Ni maombi yaliyoyapa maisha na huduma yake nguvu ya ajabu.

Watu wa maombi yenye nguvu ni watu wa uwezo wa kiroho. Maombi hayafi kamwe. Maisha yote ya Brainerd yalikuwa maisha ya maombi. Mchana na usiku aliomba. Kabla ya kuhubiri na baada ya kuhubiri aliomba. Akipanda kupitia upweke usio na mwisho wa misitu aliomba. Juu ya kitanda chake cha majani aliomba. Akijitenga kwenda misitu iliyoshamiri na ya faragha, aliomba. Saa kwa saa, siku baada ya siku, asubuhi na mapema na usiku wa manane, alikuwa akiomba na kufunga, akiimwaga nafsi yake, akifanya maombezi, akiwa katika ushirika na Mungu. Alikuwa pamoja na Mungu kwa nguvu katika maombi, na Mungu alikuwa pamoja naye kwa nguvu, na kwa hilo yeye, ingawa amekufa, angali akinena na kutenda kazi, naye atanena na kutenda kazi hata mwisho utakapokuja, na miongoni mwa watukufu wa siku ile tukufu atakuwa pamoja na wa kwanza.

Yohana Edwards asema juu yake: “Maisha yake yaonyesha njia ifaayo ya kufanikiwa katika kazi za huduma. Aliitafuta kama askari atafutavyo ushindi katika kuzingira au katika vita; au kama mtu apigaye mbio katika shindano kwa ajili ya tuzo kubwa. Akiwa amechochewa na upendo kwa Kristo na kwa nafsi za watu, alifanyaje kazi? Sikuzote kwa bidii. Si kwa neno na mafundisho tu, hadharani na faraghani, bali kwa maombi mchana na usiku, akishindana na Mungu kwa siri na akiwa katika utungu wa kuzaa kwa kuugua na uchungu usioweza kutamkwa, hata Kristo aumbwe mioyoni mwa watu aliotumwa kwao. Kama mwana wa kweli wa Yakobo, alidumu katika kushindana katika giza lote la usiku, hata kulipopambazuka!”