Lango Jembamba na Nyumba ya Mfasiri

Mwishowe akaja mtu mkuu kwenye lango, jina lake aliitwa Bwana Nia-Njema, akasema: Ni nani aliyeko; unatoka wapi, nawe wataka nini?

Mkristo.—Natoka katika Mji wa Uharibifu, nikichukua mzigo wa Dhambi mgongoni mwangu; lakini niko safarini kwenda Mlima Sayuni, ili nipate kuokoka na ghadhabu itakayokuja; na kwa kuwa nimeambiwa ya kwamba njia yangu hupitia lango hili, nataka kujua, Bwana, kama utaniruhusu niingie?

Bwana Nia-Njema.—Kwa moyo wangu wote.

Basi akalifungua lango. Lakini Mkristo alipokuwa akiingia tu, akamvuta kwa nguvu.

Ndipo Mkristo akauliza: Maana yake nini hayo? Bwana Nia-Njema akamwambia ya kwamba karibu kidogo na lango hili palikuwa na ngome imara, ambayo Beelzebubu ndiye mkuu wake, na kwamba kutoka huko yeye na wengine walioishi humo hurusha mishale kwa wale wanaokaribia langoni, wapate kujaribu kama wanaweza kuwaua kabla hawajaingia.

Ndipo Mkristo akasema: Naingia kwa furaha na kwa hofu. Basi alipokwisha ingia, yule mtu wa langoni akauliza: Ni nani aliyekutuma huku?

Mkristo.—Mwinjilisti aliniambia nije na kubisha (kama nilivyofanya); naye akasema ya kwamba wewe, Bwana, utaniambia ninalopaswa kufanya.

Bwana Nia-Njema.—Mlango umefunguliwa wazi upate kuingia, wala hakuna mtu awezaye kuufunga.

Mkristo.—Sasa naonekana kuvuna faida ya hatari zote nilizokutana nazo njiani.

Bwana Nia-Njema.—Lakini imekuwaje hata hakuna mtu aliyekuja pamoja nawe?

Mkristo.—Hakuna rafiki yangu aliyeona ya kuwa kuna sababu ya kuogopa, kama nilivyoona mimi.

Bwana Nia-Njema.—Je, walijua juu ya kukimbia kwako?

Mkristo.—Naam, mke wangu na watoto wangu waliniona nikienda, nami nikasikia vilio vyao walipokimbia nje kujaribu kunizuia. Baadhi ya rafiki zangu, pia, walitaka nirudi nyumbani, lakini niliziba masikio yangu kwa mikono, hivyo nikaendelea na njia yangu.

Bwana Nia-Njema.—Lakini je, hakuna hata mmoja wao aliyekuja kukusihi urudi?

Mkristo.—Naam, Mkaidi na Mgeugeu wote wawili walikuja, lakini walipoona ya kuwa sitakubali, Mkaidi akarudi nyumbani, bali Mgeugeu akaja pamoja nami hata kufikia Bwawa la Kukata-Tamaa.

Bwana Nia-Njema.—Mbona hakupita ndani yake?

Mkristo alipomweleza yaliyobaki, akasema: Ah, maskini huyo! Je, ulimwengu wa raha ni kitu kidogo hivyo kwake, hata asione ya kuwa yafaa kukabili hatari chache ili aupate?

Bwana, akasema Mkristo, hakuna tofauti kubwa kati yake na mimi. Ndipo akamweleza Bwana Nia-Njema jinsi alivyopotoshwa kutoka njia iliyonyoka na Bwana Mwenye-Hekima-ya-Dunia.

Bwana Nia-Njema.—Ee, je, alikukuta? Lo! Alitaka utafute raha mikononi mwa Bwana Sheria. Kwa kweli, wote wawili ni wadanganyifu. Je, ulisikiliza aliyoyasema?

Ndipo Mkristo akamweleza yote. Lakini sasa nilipokwisha fika, akasema, ninastahili kufa zaidi, kuliko kusimama na kusema na Bwana wangu. Lakini ee, furaha iliyoje kwangu kuwa hapa!

Bwana Nia-Njema.—Hatumzuii nje hata mmoja abishaye langoni hapa, wawe wamefanya lolote kabla ya kufika hapa; kwa maana 'hawatatupwa nje kamwe.' Basi, Mkristo mwema, njoo pamoja nami, nami nitakufundisha njia unayopaswa kwenda. Tazama mbele. Ile ndiyo njia iliyowekwa na Kristo na watu wenye hekima wa zamani, nayo imenyoka kama vile mstari uwezavyo kuinyoosha.

Mkristo.—Lakini je, hakuna kigeuzi wala kizingo ambacho kwacho mtu asiyeijua njia aweza kupotea?

Bwana Nia-Njema.—Rafiki yangu, si chache njia zielekeazo humo, na njia hizo ni pana: lakini kwa jambo hili waweza kupambanua sahihi na potovu—zilizo sahihi zimenyoka wala si pana kamwe.

Ndipo nikaona katika ndoto yangu ya kuwa Mkristo alisema: Je, huwezi kunisaidia kuutua mzigo huu mgongoni mwangu?—kwa maana hata sasa alikuwa hajauondoa. Akaambiwa: Kwa habari ya mzigo wako, huna budi kuuchukua hata utakapofika mahali pa Ukombozi, kwa maana huko utaanguka kutoka mgongoni mwako.

Ndipo Mkristo alitaka kuanza safari; lakini Bwana Nia-Njema akasema: Ngoja kidogo nikuambie ya kuwa utakapokwisha pita langoni utaiona nyumba ya Bwana Mfasiri, ambaye mlangoni pake yakupasa kubisha, naye atakuonyesha mambo mema. Ndipo Mkristo akaagana na rafiki yake, aliyemtakia safari njema.

Sasa akaendelea mbele hata akaifikia nyumba ambayo mlangoni pake yampasa kubisha; hili akalifanya mara mbili au tatu. Mwishowe mtu mmoja akaja mlangoni, akauliza: Ni nani aliyeko?

Mkristo.—Nimekuja kumwona mwenye nyumba mwema.

Basi baada ya muda mfupi Bwana Mfasiri akamjia, akauliza: Wataka nini?

Mkristo.—Bwana, natoka katika Mji wa Uharibifu, nami niko safarini kwenda Mlima Sayuni. Niliambiwa na yule mtu asimamaye langoni, ya kuwa nikija hapa ungenionyesha mambo mema yatakayonisaidia.

Ndipo Mfasiri akampeleka Mkristo chumbani, akamwamuru mtumishi wake alete taa, na hapo akaona ukutani picha ya mtu aliyekuwa na uso wa uzito, ambaye macho yake yalitazama juu mbinguni, na kitabu kilicho bora kuliko vyote kilikuwa mkononi mwake, sheria ya kweli ilikuwa midomoni mwake, na ulimwengu ulikuwa nyuma yake. Alisimama kana kwamba angewaombea watu, na taji ya dhahabu ilining'inia karibu na kichwa chake.

Mkristo.—Maana yake nini haya?

Mfasiri.—Nimekuonyesha picha hii kwanza, kwa maana huyu ndiye atakayekuwa kiongozi wako pekee wakati usipoweza kuipata njia yako kuiendea nchi uendayo; basi angalia sana yale niliyokuonyesha, usije ukakutana na baadhi ya watu wanaojifanya kukuongoza vema; lakini njia yao hushukia mautini.

Kisha akampeleka chumba kikubwa kilichojaa vumbi, kwa maana hakikuwa kimefagiwa; na Mfasiri akamwambia mtumishi wake akifagie. Basi alipofanya hivyo, mawingu ya vumbi yakapaa juu, hata yakamfanya Mkristo kukaba roho.

Ndipo Mfasiri akamwambia mjakazi aliyesimama karibu; Loweza sakafu ili vumbi lisipae; naye alipofanya hivi, kikafagiwa kwa urahisi.

Mkristo.—Maana yake nini haya?

Mfasiri.—Chumba hiki ni moyo wa mtu yule asiyeijua neema ya Mungu. Vumbi ni dhambi yake ya asili na uovu ulio ndani yake. Yeye aliyefagia kwanza ni Sheria, bali yule aliyeloweza sakafu ni Kitabu kiwaambiacho watu Habari Njema. Basi mara ulipomwona wa kwanza akifagia, vumbi likapaa hata chumba kisiweze kusafishwa naye; hii ni kukuonyesha ya kuwa sheria katika kutenda kwake haiusafishi moyo na dhambi, bali huipa dhambi nguvu, ili kuiamsha ndani ya nafsi.

Kisha ukamwona mjakazi akiingia kulitua vumbi; ndivyo dhambi isafishwavyo na kushushwa chini kwa imani katika Kitabu.

Sasa, akasema Mkristo, niache niende zangu.

Vema, akasema Mfasiri, yashike mambo haya yote akilini mwako yapate kuwa mchokoo mbavuni mwako; na imani na ikuongoze!