Kuzuia Kuomba—Je, Ni Dhambi?

“Wazuia kuomba mbele za Mungu.”—Ayubu 15:4.

“Tutafaidiwa nini, tukimwomba yeye?”—Ayubu 21:15.

“Hasha, nisimtende Bwana dhambi kwa kuacha kuwaombea ninyi.”—1 Samweli 12:23.

“Wala sitakuwa pamoja nanyi tena, msipokiangamiza kitu kilicholaaniwa kati yenu.”—Yoshua 7:12.

Uamsho wo wote wa kina wa uzima wa kiroho wa Kanisa daima utaandamana na hisia ya ndani zaidi ya dhambi. Jambo hili halitaanza katika elimu ya dini; hiyo yaweza tu kudhihirisha kile ambacho Mungu hukitenda katika maisha ya watu wake. Wala haimaanishi kwamba hisia hiyo ya ndani zaidi ya dhambi itaonekana tu katika maneno makali zaidi ya kujilaumu au ya toba: mara nyingine hilo huonekana likiambatana na kuificha dhambi, na kutokuamini juu ya wokovu. Lakini hisia ya kweli ya uchukizo wa dhambi, kuichukia, itathibitishwa kwa nguvu ya shauku ya kutaka kuokolewa, na kwa kujitahidi kujua kwa kadiri iliyo kuu kabisa kile Mungu awezacho kutenda katika kuokoa na dhambi—wivu mtakatifu, wa kutomkosa Mungu kwa lo lote.

Kama tukitaka kukabiliana kwa matokeo na upungufu wa kuomba, ni lazima tuutazame kwa mtazamo huu na kuuliza, Kuzuia kuomba, je, ni dhambi? Na kama ni dhambi, itashughulikiwaje, kugunduliwa, na kuungamwa, na kutupwa nje na mwanadamu, na kusafishwa na Mungu? Yesu ni Mwokozi aokoaye na dhambi. Ni kwa kuijua dhambi kweli tu ndipo twaweza kuijua kweli nguvu iokoayo na dhambi. Maisha yawezayo kuomba kwa matokeo ni maisha ya tawi lililosafishwa—maisha yajuayo kuokolewa na nguvu ya nafsi. Kuona kwamba dhambi zetu za kuomba ni dhambi kweli kweli, ni hatua ya kwanza kuelekea wokovu wa kweli na wa Kimungu kutoka kwazo.

Katika habari ya Akani tunapata mojawapo ya uthibitisho ulio imara sana katika Maandiko kwamba ni dhambi inayowapokonya watu wa Mungu baraka yake, na kwamba Mungu hataivumilia; na wakati huo huo uonyesho ulio wazi kabisa wa kanuni ambazo kwa hizo Mungu huishughulikia, na kuiondoa. Na tuone katika nuru ya habari hii kama twaweza kujifunza jinsi ya kuitazama dhambi ya kutokuomba, na uovu ulio katika shina lake. Maneno niliyoyanukuu hapo juu, “Wala sitakuwa pamoja nanyi tena, msipokiondoa kitu kilicholaaniwa kati yenu,” yanatuingiza katika moyo hasa wa habari hii, na kudokeza mfululizo wa mafunzo yaliyo ya thamani kuliko yote yanayoizunguka kweli waisemayo, kwamba kuwapo kwa dhambi hufanya kuwapo kwa Mungu kusiwezekane.

1. Kuwapo kwa Mungu ndicho kipawa kikuu cha watu wa Mungu, na nguvu yao pekee dhidi ya adui.—Mungu alikuwa amemwahidi Musa, Nitawaingiza katika nchi. Musa alionyesha ya kuwa alilifahamu hili wakati Mungu, baada ya dhambi ya ndama wa dhahabu, aliponena juu ya kuondoa kuwapo kwake na kumtuma malaika. Yeye alikataa kukubali cho chote kilicho pungufu ya kuwapo kwa Mungu mwenyewe. “Kwa maana itajulikanaje ya kuwa mimi na watu wako tumepata neema mbele zako? Je! si kwa kule kwenda kwako pamoja nasi?” Ndicho hiki kilichowapa Kalebu na Yoshua ujasiri wao: Bwana yu pamoja nasi. Ndicho hiki kilichowapa Israeli ushindi wao juu ya Yeriko: kuwapo kwa Mungu. Katika Maandiko yote hii ndiyo ahadi kuu iliyo kiini: Mimi nipo pamoja nawe. Jambo hili humtenga mwamini wa moyo wote na mtu wa dunia na Wakristo wa kidunia walio kandokando yake: yeye huishi hali akijua amejificha katika siri ya kuwapo kwa Mungu.

2. Kushindwa na kufeli daima hutokana na kupoteza kuwapo kwa Mungu.—Ndivyo ilivyokuwa pale Ai. Mungu alikuwa amewaingiza watu wake katika Kanaani kwa ahadi ya kuwapa nchi. Kushindwa kule Ai kulipotokea, Yoshua alihisi mara moja ya kuwa sababu yake lazima iwe katika kuondolewa kwa nguvu za Mungu. Yeye hakuwapigania. Kuwapo kwake kulikuwa kumezuiliwa.

Katika maisha ya Kikristo na kazi ya Kanisa, kushindwa siku zote ni ishara ya kupoteza kuwapo kwa Mungu. Tukiitumia kweli hii kwa kufeli kwetu katika maisha ya kuomba, na kwa sababu ya hilo kwa kufeli kwetu katika kazi ya Mungu, twaongozwa kuona kwamba yote yatokana tu na sisi kutosimama katika ushirika ulio wazi na kamili pamoja na Mungu. Ukaribu wake, kuwapo kwake papo hapo, hakukuwa ndicho kitu kikuu kilichotafutwa na kutumainiwa. Yeye hakuweza kutenda kazi ndani yetu kama alivyotaka. Kupoteza baraka na nguvu daima husababishwa na kupoteza kuwapo kwa Mungu.

3. Kupoteza kuwapo kwa Mungu daima hutokana na dhambi fulani iliyofichwa.—Kama vile maumivu yalivyoamriwa katika maumbile ili kuonya juu ya uovu fulani uliofichwa mwilini, ndivyo kushindwa kulivyo sauti ya Mungu ituambiayo kuna kitu kilichoharibika. Yeye amejitoa kwa watu wake kwa ukamilifu, hufurahi mno kuwa pamoja nao, naye angependa sana kuidhihirisha ndani yao pendo lake na nguvu zake, hata kwamba yeye hajiondoi kamwe wasipomlazimisha kwa dhambi.

Katika Kanisa lote kuna lalamiko la kushindwa. Kanisa lina nguvu ndogo sana juu ya umati, au juu ya watu walio na elimu. Uongofu wenye nguvu ni nadra kiasi. Uchache wa Wakristo watakatifu, waliowekwa wakfu, walio wa kiroho, waliojitoa kwa utumishi wa Mungu na wa wenzao, unahisiwa kila mahali. Nguvu ya Kanisa ya kuihubiri injili kwa wapagani imepooza kwa sababu ya uhaba wa fedha na wa watu; na yote yatokana na upungufu wa kuomba kwenye matokeo kuletako Roho Mtakatifu kwa nguvu, kwanza juu ya watumishi na waaminio, kisha juu ya wamisionari na wapagani. Je, twaweza kukana kwamba upungufu wa kuomba ndiyo dhambi ambayo kwa ajili yake kuwapo kwa Mungu na nguvu zake haikuonekani zaidi waziwazi kati yetu?

4. Mungu mwenyewe ataifichua dhambi iliyofichwa.—Twaweza kudhani twajua dhambi ni nini: ni Mungu peke yake awezaye kufichua maana yake halisi na ya kina. Aliponena na Yoshua, kabla ya kuitaja dhambi ya Akani, Mungu kwanza alisema, “Wamelivunja agano langu nililowaamuru.” Mungu alikuwa ameamuru (6:19) kwamba nyara zote za Yeriko, dhahabu na fedha na vyote vilivyokuwamo, viwe kitu kilichowekwa wakfu, kilichotakaswa kwa Bwana, na kuingia katika hazina yake. Nao Israeli walikuwa wamevunja nadhiri hii ya wakfu: hawakumpa Mungu haki yake; walikuwa wamemwibia Mungu.

Ndicho hiki tunachohitaji: Mungu ni lazima atufichulie jinsi upungufu wa kuomba ulivyo ishara ya kutokuwa waaminifu kwa nadhiri yetu ya wakfu, ya kwamba Mungu awe na moyo wetu wote na maisha yetu yote. Ni lazima tuone kwamba kuzuia huku kuomba, pamoja na visingizio tunavyovitoa kwa ajili yake, ni dhambi kubwa kuliko tulivyodhani; kwa maana kwamaanisha nini? Kwamba tuna ladha au shauku ndogo ya ushirika na Mungu; kwamba imani yetu yategemea zaidi kazi na juhudi zetu wenyewe kuliko nguvu za Mungu; kwamba tuna hisia ndogo ya baraka ya mbinguni ambayo Mungu angoja kuimwaga chini; kwamba hatuko tayari kuutoa sadaka utulivu na tumaini la mwili kwa ajili ya kumngoja Mungu kwa saburi; kwamba hali ya kiroho ya maisha yetu, na kukaa kwetu ndani ya Kristo, ni dhaifu mno kabisa hata isituwezeshe kushinda katika kuomba. Shinikizo la kazi kwa ajili ya Kristo linaporuhusiwa kuwa kisingizio cha sisi kutopata wakati wa kutafuta na kupata kuwapo kwake mwenyewe na nguvu zake ndani yake, kuwa ndilo hitaji letu kuu, hakika hilo huthibitisha kwamba hakuna hisia ya haki ya kumtegemea kwetu Mungu kabisa; hakuna kuufahamu kwa kina ule utendaji wa Kimungu na ulio juu ya maumbile wa Mungu ambao ndani yake sisi ni vyombo vyake tu, hakuna kuingia kwa kweli katika tabia ya kimbinguni, iliyo ya ulimwengu mwingine kabisa, ya utume wetu na makusudi yetu, hakuna kujisalimisha kikamilifu kwa Kristo Yesu mwenyewe na kumfurahia.

Kama tungejisalimisha kwa Roho wa Mungu ili atuonyeshe kwamba haya yote kwa kweli kabisa ndiyo maana ya ulegevu katika kuomba, na ya sisi kuruhusu mambo mengine kukisonga nje, visingizio vyetu vyote vingeanguka, nasi tungeanguka chini na kulia, “Tumefanya dhambi! tumefanya dhambi!” Samweli wakati mmoja alisema, “Mimi, hasha, nisimtende Bwana dhambi kwa kuacha kuwaombea ninyi.” Kuacha kuomba ni dhambi juu ya Mungu. Mungu na atufichulie hili. (Kidokezo A.)

5. Mungu aifichuapo dhambi, ni lazima iungamwe na kutupwa nje.—Kushindwa kule Ai kulipokuja, Yoshua na Israeli hawakuijua sababu. Mungu aliishughulikia Israeli kama taifa, kama mwili mmoja, na dhambi ya mtu mmoja ikawapata wote. Israeli wote hawakuijua dhambi, walakini waliadhibika kwa ajili yake. Kanisa laweza kutokujua ukubwa wa dhambi hii ya kuzuia kuomba, watumishi au waaminio mmoja mmoja huenda wasiwahi kuiona kuwa kosa halisi, walakini haikosi kuleta adhabu yake. Lakini dhambi isipokuwa tena imefichwa, Roho Mtakatifu aanzapo kuihakikisha, ndipo huja wakati wa kujichunguza moyo. Katika habari yetu muungano wa wajibu wa mtu mmoja mmoja na wa pamoja ni wa kutisha sana. Wa mtu mmoja: kama tuonavyo katika neno lile, “mtu kwa mtu”; kila mtu alijihisi yu chini ya jicho la Mungu, ashughulikiwe. Na Akani alipokwisha kutwaliwa, ilimpasa kuungama. Wa pamoja: kama tuonavyo katika Israeli wote kwanza kuteseka na kushughulikiwa na Mungu, kisha kumtwaa Akani, na jamaa yake, na kitu kilicholaaniwa, na kuwaangamiza kutoka kati yao.

Kama tuna sababu ya kudhani hii ndiyo dhambi iliyo kambini, na tuanze kwa kuungama, kwa mtu mmoja mmoja na kwa pamoja. Kisha na tuje mbele za Mungu ili kuiondoa na kuiangamiza dhambi. Hapa, penye kizingiti hasa cha historia ya Israeli katika Kanaani, pasimama chungu ya mawe katika bonde la Akori, ili kutuambia kwamba Mungu hawezi kuchukuliana na dhambi, kwamba Mungu hatakaa pamoja na dhambi, na kwamba kama twataka kweli kuwapo kwa Mungu kwa nguvu, ni lazima dhambi iondolewe. Na tuutazame usoni ukweli huu wa kutisha. Huenda zikawapo dhambi nyingine, lakini hii kwa hakika ni moja isababishayo kupoteza kuwapo kwa Mungu—hatuombi kama Kristo na Maandiko yanavyotufundisha. Na tuitoe nje mbele za Mungu, na kuiacha dhambi hii hata kufa kwake. Na tujisalimishe kwa Mungu ili kuitii sauti yake. Hofu ya kushindwa kuliopita isituzuie, wingi wa vitisho vya majaribu, au wajibu, au visingizio, usituzuie. Ni swali rahisi la utii. Je, tutajitoa kwa Mungu na Roho wake ili kuishi maisha ya kuomba, yampendezayo yeye? Hakika, ikiwa ni Mungu aliyekuwa akizuia kuwapo kwake, aliyekuwa akiifichua dhambi, aitakaye iangamizwe, na kurudi kwenye utii, hakika twaweza kuitegemea neema yake ya kutukubali na kututia nguvu kwa ajili ya maisha yale ayatakayo kwetu. Si swali la kile uwezacho kutenda; ni swali la kama sasa, kwa moyo wako wote, wageuka kumpa Mungu haki yake, na kujitoa ili mapenzi yake na neema yake vipate njia yake ndani yako.

6. Dhambi ikiwa imetupwa nje, kuwapo kwa Mungu kwarejeshwa.—Tangu siku hii na kuendelea hakuna neno lo lote katika Yoshua juu ya kushindwa vitani. Habari hii yawaonyesha wakiendelea toka ushindi hata ushindi. Kuwapo kwa Mungu kulikohakikishwa hutoa nguvu ya kumshinda kila adui.

Kweli hii ni rahisi mno hata urahisi wenyewe wa jinsi tunavyoikubali huipokonya nguvu yake. Na tusimame kidogo na kufikiri maana yake. Kuwapo kwa Mungu kukirejeshwa humaanisha ushindi kuhakikishwa. Basi, sisi tunawajibika kwa kushindwa. Basi, lazima iwepo dhambi mahali fulani inayokusababisha. Basi, imetupasa mara moja kuitafuta na kuiondoa dhambi. Twaweza kutumaini kwa uthabiti kuwapo kwa Mungu mara dhambi itakapoondolewa. Hakika kila mmoja yu chini ya wajibu wa kutisha wa kuyachunguza maisha yake na kuona sehemu aliyo nayo katika uovu huu.

Mungu hasemi kamwe na watu wake juu ya dhambi ila kwa nia ya kuwaokoa nayo. Nuru ile ile ionyeshayo dhambi ndiyo itakayoonyesha njia ya kutokea humo. Nguvu ile ile ivunjayo na kuhukumu, ikiwa imesalimishwa kwa unyenyekevu na kungojwa katika kuungama na imani, itatoa nguvu ya kuinuka na kushinda. Ni Mungu anayenena na Kanisa lake na nasi juu ya dhambi hii: “Alistaajabu ya kuwa hapana mwombezi.” “Nikastaajabu ya kuwa hapana wa kutegemeza.” “Nikatafuta mtu atakayesimama penye pengo mbele zangu, wala sikuona.” Mungu anenaye hivi ndiye atakayefanya badiliko kwa ajili ya watoto wake wamtafutao uso wake. Yeye atalifanya bonde la Akori, la taabu na aibu, la dhambi iliyoungamwa na kutupwa nje, kuwa mlango wa tumaini. Tusiogope, tusishikamane na visingizio na maelezo ambayo hali za mambo huyadokeza, bali na tuungame tu, “Tumefanya dhambi; twafanya dhambi; hatuthubutu kufanya dhambi tena.” Katika jambo hili la kuomba tuna hakika Mungu hatudai mambo yasiyowezekana. Yeye hatuchoshi kwa kielelezo kisichowezekana kutekelezwa. Yeye hatuombi tuombe zaidi ya neema aitoayo ili kutuwezesha. Yeye atatoa neema ya kutenda ayatakayo, na hivyo ya kuomba hata maombezi yetu, siku baada ya siku, yawe furaha kwake na kwetu, chemchemi ya nguvu kwa dhamiri zetu na kazi zetu, na mfereji wa baraka kwa wale tunaowatumikia.

Mungu alishughulika kibinafsi na Yoshua, na Israeli, na Akani. Kila mmoja wetu na amruhusu ashughulike kibinafsi nasi kuhusu dhambi hii, ya kuzuia kuomba, na matokeo yake katika maisha yetu na kazi yetu; kuhusu kuokolewa na dhambi, uhakika wake na baraka yake. Inama tu katika utulivu na ungoje mbele za Mungu, hata, akiwa Mungu, akufunike kwa kuwapo kwake, akuongoze kutoka katika eneo lile la mabishano juu ya yawezekanayo kwa mwanadamu, ambako kuhakikishwa kwa dhambi hakuwezi kamwe kuwa kwa kina, na wokovu kamili hauwezi kamwe kuja. Twaa wakati wa utulivu, na uwe kimya mbele za Mungu, ili yeye alishike jambo hili mkononi. “Kaa kimya, kwa maana yeye hatatulia mpaka atakapokuwa amelimaliza jambo hili leo.” Jiache mwenyewe mikononi mwa Mungu.

WITO WA KUOMBA ZAIDI